About Bible Thianghlim | ©

BibleThianghlim – 1 Korinth

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

1 Korinth

12345678910
111213141516

• A ngantu: Paul
• A siartu: Korinth Kawhhran
• Ngan kum: A.D. 55

Korinth khua hi Grik ram sung, Akaia ramṭhen ih khawpi thupibik a si. Lăwng cawlhnak hmun pahnih a nei ih, pursum leilawnnak hmunpi a si. Kum tin an tuah mi lehnak khalin mi tampi a hîp. Cu tawkih rapawl in anmai nunphung le sakhua an rak luhpi. Cutin hmun kip ah milem biaknak le sualralnak a rak um.

Hih khawpi ah apostol Paul a rak thlen hmaisabik cān hi a missionary khualtlawn a vei hnihnak ah a si. Paul in hi khua ah Jew-pawl le Grikpawl hnenah Sabbath ni tinten thuthangṭha sim a thawk (Apo 18:1-18). Jew-pawl in a rawngbawlnak an hnawn tikah, Zentelpawl lamah a her. Hi khawpi ah kum khat le a hrek a um. A hmaisa lamah cun puanthlam ṭhitin amah te cawmawih rawngbawlin, Bawipa hnenah mi tampi a hruai. Hi khawpi a fehsan hnuah, Apollos in thuthangṭha hnaṭuan a run pehzăwm (Apo 18:27-19:1).

Korinth zumtupawl cu Bawipa in sualralnak lak ihsin a runsuak hai. Sikhalsehla rundamnak an co hnuah mi hrekkhat in an sualnak lamzin hlun an bansan lo. Paul in cuih thu a theih tikah, misualrálpawl lak ihsin thiarfihlimaw dingin zumtupawl hnenih thu a peknak ca a kuat (5:9). Paul cun a missionary khualtlawn a vei thumnak, Efesa khua ih rawng a bawl laiah, Korinth kawhhran ah ṭhenawknak a um thu a thei (1:11). Korinth khawmipawlih thusuhnak a phunphun ca a rak dawng (7:1, 25; 8:1; 12:1; 16:1 siar aw). Cuvek dinhmun ruangah Efesa khua ihsin A.D. 55 hrawngah Korinth cakuat pakhatnak hi a ngan (16:8, 19 siar aw).

Korinth kawhhran hnenih cakuat ah thupi tam zet a ngan. Asinan Korinth khawmipawl in tisanak lăngter hnakin Bible vekih pitlinnak lăngter cu hi cakuatih a tum bik mi a si.

Sualralnak leitlun ih um mi kan si bangin kannih zumtupawl hin, “lungthin bangrep le thutluknak bangrepin nan pehzăwmawk famkim thluh thei nak ding,” ti mi hi kan zuam a ṭul (1:10). “Khrih-ih thinlung” neitu kan sinak kan lăngter a ṭul (2:16).

1

Cibaibûknak

1 ^aJesu Khrih-ih apostol si dingah, Pathian duh zawngih kawh mi Paul le kan unaupa Sosthenes in, 2 ^bKorinth khua ih um Pathian kawhhran, Khrih Jesu ih tithianghlim mi, kan Bawipa, anmah le kanmah ih Bawipa Jesu Khrih hmin hmun kip ih a kotu, mithiang si dingih a kawh mipawl hmuahhmuah hnenah:

1:1^a Apo 18:17; Rom 1:1; Efe 1:1

1:2^b Apo 2:21; 18:1; Rom 1:7

3 ^aKan Pa Pathian hnen le kan Bawipa Jesu Khrih hnen ihsin zangfahnak le hnangamdaihnak cu nan hnenah um hram seh.

1:3^a Rom 1:7

Pathian hnenih Lungawi Thu Simnak

4 ^aKhrih Jesu ah nan hnenih Pathian zangfahnak pek mi ruangah nan hrangah ka Pathian hnenah lungawi thu ka sim ringring. 5 ^bZiangahtile nannih cu ziangtinkimah nan ṭawng mi hmuahhmuah ah le nan theihnak hmuahhmuah ah Pathian in a lo lianter a si. 6 ^cCumi cu Khrih theihpinak nanmah ih hngehterih a um vek khan a si. 7 ^dCutin kan Bawipa Jesu Khrih rung lăng ding hngakhlap zetih nan hngah laiah, thilpek pakhat te hman nan tlasam lo. 8 ^eAnih cun kan Bawipa Jesu Khrih-ih ni ah sawihnăwm kai lo nan si thei nak dingah, a cemnet tiang a lo hngetter ding. 9 ^fA Fapa, Jesu Khrih kan Bawipa thawi pawlkăwmawknak sungih a lo kotu Pathian cu a rinum a si.

1:4^a Rom 1:8

1:5^b 2Ko 8:7; 9:11

1:6^c 1Ti 2:6

1:7^d Rom 1:11; Tit 2:13; 2Pe 3:12; Thu 1:7

1:8^e Fil 1:6, 10; 1Th 3:13; 5:2

1:9^f Isa 49:7; Rom 8:28; 1Th 5:24; Heb 10:23

Ṭhenṭhêkawknak

10 ^aU le nau tla, nan zaten nan ṭawng mi bangrepin, nan lakah ṭhenawknak um loin, lungthin bangrep le thutluknak bangrepin nan pehzăwmawk famkim thluh thei nak dingah, kan Bawipa Jesu Khrih hmin in ka lo ngen a si. 11 ^bZiangahtile u le nau tla, nan lakah tawhawknak a um ti kha Kaloe teih sungkua lakih mi hrekkhat in in sim. 12 ^cHihi ka lo sim a si, mi kip in, “Kei cu Paul-ih pawl ka si. Kei cu Apollos-ih pawl ka si. Kei cu Kefas-ih pawl ka si. Kei cu Khrih-ih pawl ka si,” tiah nan ti. 13 ^dKhrih cu ṭhenin a um maw si? Paul cu nan hrangah khĕnbet a simaw? Asilole nannih cu Paul-ih hmin in baptisma nan co maw si?

1:10^a Rom 7:1

1:11^b Apo 11:14

1:12^c Joh 1:42; Apo 18:24

1:13^d Mat 28:19

14 ^aNan lakah Khrispas le Kaias siarlo zohman baptisma ka lo pek lo ruangah, Pathian hnenah ka lung a awi. 15 Curuangah zohman in Paul in amai hmin in baptisma a pe tiah an ti thei lo. 16 ^bA si, Stefanas teih sungkua khal baptisma ka rak pe hai. Cu lo mi dang baptisma ka pek mi ka thei lo. 17 ^cZiangahtile Khrih in kei cu baptisma pe dingah i thlah lo ih, thuthangṭha phuang dingah i thlah sawn a si. Asinan minung fimnak ṭawngkampawl thawn a si lo, cuti a si lo ahcun, Khrih-ih khraws cu zianghmanlo ih canter a si pang ding.

1:14^a Apo 18:8; 19:29

1:16^b Apo 11:14

1:17^c Joh 4:2; Apo 2:38

Khrih cu Pathian Huham le Fimnak

18 ^aZiangahtile khraws thucah cu a hloral rero mipawl hrangah cun atthlak a si, asinan kannih rundam rero mipawl hrangah cun cumi cu Pathian huham a si. 19 ^bZiangahtile,

1:18^a Apo 2:47; Rom 1:16; 2Ko 2:15; 2Th 2:10

1:19^b Isa 29:14

“Mifimpawlih fimnak cu ka ṭhiatbăl ding ih,
Khawruat thiam pawlih theihthiamnak cu zianghmanlo ah ka cangter ding,”

tiih ngan a si.

20 ^aKhui tawkah mifim cu a um? Dānthiam cu khuiah a um? Tuih san miêltu cu khuiah so? Hi leitlun fimnak cu Pathian in atnak ah a canter a si lo maw? 21 ^bZiangahtile Pathian fimnak ah leitlun mipawl in anmai fimnak in Pathian an rak theih lo hnuah, thusim atthlak hmangih a zumtupawl rundam cu Pathian lunghmui zawng a si. 22 ^cZiangahtile Jew-pawl cun hminsinnak an phût ih, Grikpawl cun fimnak an hawl. 23 ^dAsinan kannih cun Khrih khĕnbet thu kan sim a si. Cucu Jew-pawl hrangah tlûknak a si ih, Grikpawl hrangah cun atthlak a si. 24 ^eAsinan kawh mi Jew-pawl le Grikpawl hrangih kan phuan mi cu Khrih a si, cuih kan phuan mi cu Pathian huham le Pathian fimnak a si. 25 ^fZiangruangahtile Pathian atnak cu minung fimnak hnakin a fimsawn ih, Pathian cahlonak cu minung cahnak hnakin a caksawn.

1:20^a Jer 8:9; Rom 1:22; 2Ko 4:4; Gal 1:4

1:21^b Rom 3:22; 11:14

1:22^c Mat 12:38; Joh 2:11

1:23^d Luk 2:34; Gal 3:1

1:24^e Rom 1:16; 8:28; Kol 2:3

1:25^f 2Ko 13:4

Bawipa hnen lawngih Tluangkhawn

26 ^aZiangahtile u le nau tla, Pathian in a lo kawh laiah khan ziang vek mi nan si ti kha cîng ringring uh. Milai tahnak ih mifim nan tam lo, thiltithei nan tam lo, zah tlak khal nan tam lo. 27 ^bAsinan mifimpawl ningzakter dingah Pathian in leitlun ih thil â pawl a hril ih, micakpawl ningzakter dingah Pathian in leitlun ih thil cak lo pawl a hril. 28 ^cThil um mipawl zianghmanlo ih an can thei nak dingah, leitlun ih thil pawimawh lo pawl, nautat mi thilpawl le thil um lo pawl Pathian in a hril a si. 29 ^dCuruangah Pathian hmaiah zohman an tluangkhâwng thei lo. 30 ^eAmah Pathian ruangah nannih cu Khrih Jesu ah nan um. Khrih cu Pathian hnen ihsin kan hrangah fimnak, dingfelnak, thianhlimnak le tlennak ih tuah a si. 31 ^fCuruangah,

1:26^a Rom 8:28

1:27^b Rom 1:22; Jam 2:5

1:28^c Rom 4:17

1:29^d Efe 2:9

1:30^e Jer 23:5-6; Rom 3:24; 16:3; Fil 3:9

1:31^f Jer 9:23-24; 2Ko 10:17

“Tluang a khawngtu cun Bawipa ah tluangkhâwng seh,”

tiih ngan mi vek khan a si.

2

Khrih Khĕnbet Thu

1 Cule u le nau tla, nan hnenah Pathian thu phuang dingih ka rat laiah khan, ṭawngkam thiam zet le fimnak thawn ka ra lo. 2 ^aZiangahtile nan lakah Jesu Khrih le khĕnbet ih a um thu siarlo, a dang zianghman thei lo dingin thutluknak ka nei. 3 ^bNan hnenih ka um laiah khan cak lo, ṭih le nasa zetih khūrin ka um. 4 ^cCule ka ṭawng mi le ka phuan mipawl hi mihip thei minung fimnak ṭawngkam thawn a si lo, cuhnakin ka ṭawngkampawl cun Thlarau le huham an langter sawn a si. 5 ^dCuti cun nan zumnak cu minung fimnak ah ding loin, Pathian huham ih a dīn sawn thei nak dingah a si.

2:2^a Gal 6:14

2:3^b 2Ko 7:15; 11:29-30

2:4^c Rom 15:13

2:5^d 2Ko 4:7

Thuthangṭha cu Van lam Fimnak

6 ^aAsinan mipitlingpawl lakah cun fimnak thu kan sim, asinan cuih fimnak cu tuih san fimnak a si cuang lo ih, a hloral ding mi tuih san uktupawl hnen ihsi khalin a si fawn lo. 7 ^bCuhnakin Pathian fimnak cu thuthup hmangin kan sim sawn a si. Cumi cu, leilung sēm hlan ihsin kan ropitnak ding hrangih, Pathian ih a ruat cia mi le a thuh mi fimnak a si. 8 ^cCumi cu tuih san uktu pakhat hmanin an thei lo; ziangahtile rak thei hai sehla cu, ropitnak Lal cu an khengbĕt lo ding.

2:6^a Efe 4:13; Fil 3:15; Heb 5:14

2:7^b Rom 16:25

2:8^c Apo 7:2; Jam 2:1

9 ^aAsinan,

2:9^a Isa 64:4

“Pathian in amah duhdawtupawl hrangih a rak timtuah cia mi thilpawl cu
Zawih mit khal in a hmu dah lo ih,
Zawih hna khal in a thei dah lo.
Zohman in an thinlung sungin an ruat dah lo,”

tiih ngan vek khan a si.

10 ^aAsinan Pathian in kan hnenah cumi cu a Thlarau in a phuanglang zo. Ziangahtile Thlarau cun thil hmuahhmuah a hawlsuak, a si, Pathian-ih thil thûk pawl cu. 11 ^bZiangahtile amai sungih a um mi a thlarau siarlo in, minung ruahnak cu zo in so thei? Cuti vek thothoin Pathian Thlarau siarlo zohman in Pathian ruahnak an thei lo. 12 ^cKan hnenah Pathian in a lakih in pek mi thilpawl kan theih thei nak dingah, leitlun thlarau si loin, Pathian hnen ihsin a ra mi Thlarau kan co sawn a si.

2:10^a Mat 13:11; Joh 14:26; 2Ko 12:1, 7; Gal 1:12; Efe 3:3, 5

2:11^b Thf 20:27; Jer 17:9

2:12^c Rom 8:15; Jam 2:5

13 Cule cuih thilpawl kan sim tikah, minung ih in zirh mi fimnak ṭawngkampawl thawn kan sim lo, Thlarau Thianghlim ih in zirh mi ṭawngkam hmangin kan sim sawn a si. Thlarau lam thilpawl cu thlarau lam thilpawl hmangin kan khaikhin. 14 ^aKhawvel mi cun Pathian Thlarau thilpawl a cohlang lo, ziangahtile cupawl cu a hrangah cun atthlak an si ih, cuih thilpawl cu thlarau lawngin a thleidan thei ruangah a theih khal a thei thei lo. 15 ^bAsinan thlarau mi cun thil ziangkim a ṭhenfel thiam, amah tu cu zohman in an ṭhenfel thiam lo. 16 ^cZiangahtile, “Amah zirh thei dingin zo in so Bawipaih lungthin thei?” Asinan kannih cun Khrih-ih lungthin kan nei a si.

2:14^a Joh 14:17

2:15^b Gal 6:1

2:16^c Isa 40:13; Joh 15:15; Rom 11:34

3

Ṭhenṭhêkawknak cu Tisa a Si

1 ^aCule u le nau tla, thlarau mipawl hnenih sim vekin nan hnenah thu ka sim thei lo. Nan hnenah cun tisa mi le Khrih ih nausenpawl hnenih sim vekin thu ka lo sim sawn a si. 2 ^bRawl hak si loin hnawi ti in ka rak lo câwm hai; ziangahtile atu tiangah rawl hak nan dawngsáwng thei hrih lo ih, atu hmanah nan dawngsáwng thei hrih cuang lo, 3 ^cziangahtile nannih cu tisa mi nan si hrih lai a si. Ziangahtile iksiknak, doawknak le ṭhenawknak cu nan lakah a um, cuti a si ruangah nannih cu tisa mi nan si lo maw? Khawvel mipawl vekin nan nung a si lo maw? 4 Ziangahtile mi pakhat in, “Kei cu Paul-ih pawl ka si,” a ti ih, a dang pakhat in, “Kei cu Apollos-ih pawl ka si,” nan ti ih, nannih cu tisa mi nan si lo maw?

3:1^a Rom 7:14

3:2^b Joh 16:12; Heb 5:12-14; 1Pe 2:2

3:3^c Rom 13:13; Gal 5:20

5 ^aPaul cu zo a si? Apollos cu zo a si? Kannih cu Bawipa ih in pek fingfing dān vekin, zumnak ih nanmah a lo hruaitu rawngbawltu men lawng kan si. 6 ^bKei in ka phun ih, Apollos in ti a tawih. Asinan a ṭhangtertu cu Pathian a si. 7 Curuangah a phuntu le ti tawihtu cu an thupi lo, a ṭhangtertu Pathian lawng hi a thupi a si. 8 ^cA phuntu le ti a tawihtu cu pumkhat an si ih, mi kip in an hnaṭuan mi vekin lawmman an ngah fingfing ding.

3:5^a Apo 18:24; 2Ko 6:4; Efe 3:7; Kol 1:23, 25

3:6^b Apo 18:4-11

3:8^c Mat 25:21

9 ^aZiangahtile kannih cu Pathian-ih hnaṭuanpi kan si; nannih cu Pathian-ih ló nan si, Pathian-ih inn khal nan si. 10 ^bKa hnenih pek mi Pathian zangfahnak bangtukin, innsak thiam mifim bangin kei in lungphum ka phum ih, mi dang in cumi parah an sak. Asinan mi kip in cumi parah ziangtin an sak ti kha fimkhur hai seh. 11 ^cZiangahtile zohman in phum zo mi lungphum siarlo, a dang lungphum an phum thei lo, cuih lungphum cu Jesu Khrih a si. 12 Cuih lungphum parah zokhal in sui in simaw, ngun in simaw, lung mankhung in simaw, zanthing in simaw, hrampi in simaw, fang kuang in simaw a sak asile, 13 ^dmi kip hnaṭuan cu fiangten lăngter an si leh ding; ziangahtile cuih Ni in cumi cu a thăn ding. Ziangruangahtile cumi cu meisa in a pholang ding. Cule meisa in mi kip hnaṭuan cu ziang vek a si ti a hniksak ding. 14 Zokhal a hnaṭuan, cuih lungphum parih a sak mi a tān asile, lawmman a ngah ding. 15 ^eZokhal a hnaṭuan mi a kăng asile, a hloh ding, asinan amah cu meisa sung ihsi luat vekin rundam a si ding.

3:9^a Isa 61:3; Mar 16:20; 2Ko 1:1, 6; Efe 2:20-22; 1Th 3:2; 1Pe 2:5

3:10^b Rom 12:3; 15:20; Efe 2:20

3:11^c Isa 28:16; Efe 2:20

3:13^d Jer 23:28-29; Mal 3:3; 2Ko 5:10; 2Ti 1:12

3:15^e Jud 1:23

16 ^aNannih cu Pathian temple nan si ih, nan sungah Pathian Thlarau a cêng ti nan thei lo maw? 17 Zokhal Pathian temple a siatsuahtu cu, Pathian in a siatsuah ve ding. Ziangahtile Pathian temple cu a thianghlim a si, cuih temple cu nanmah hi nan si.

3:16^a Rom 8:9; 2Ko 6:16; Efe 2:21-22; Heb 3:6

18 ^aZokhal amah le amah bumaw hlah seh. Nan lakih mi pakhat khat in tuih san ah mifim ih a ruahawk asile, mifim a si thei nak dingah mi-â ah cang ta seh. 19 ^bZiangahtile hi leitlun fimnak cu Pathian hmaiah cun atthlak a si. Ziangahtile,

3:18^a Isa 5:21; Gal 6:3

3:19^b Job 5:13; Rom 1:22

“Pathian in mifimpawl cu anmai hrăwkhrawlnak in a awk hai,”

20 ^acuihtlunah,

3:20^a Sam 94:11

“Bawipa in mifimpawlih ruahnakpawl a thei,
Zianghmanlo an si ti a thei,”

tiih ngan a si.

21 ^aCuruangah zohman in milai ah tluangkhâwng hlah seh. Ziangahtile thil hmuahhmuah hi nan ta a si: 22 ^bPaul siseh, Apollos siseh, Kefas siseh, leitlun siseh, nunnak le thihnak siseh, atu-ih a um mi thilpawl le a ra lai ding mi thilpawl siseh, thil hmuahhmuah hi nan ta a si. 23 ^cCule nannih cu Khrih ta nan si ih, Khrih cu Pathian ta a si.

3:21^a Rom 8:32

3:22^b Rom 8:38

3:23^c 2Ko 10:7; Gal 3:29

4

Apostolpawlih Rawngbawlnak

1 ^aKannih cu Khrih sál le Pathian thuthup kilkhawitu ah mi in in ruat hai seh. 2 Cuihtlunah thilri kilkhawitu cu mirinum a si a ṭul. 3 Nanmah in simaw, milai thuṭhennak in simaw thu in ṭhen asile, cucu ka hrangah thil tenau zet a si. Thungaiten, keimah le keimah hman thu ka ṭhenaw lo. 4 ^bZiangahtile keimah le keimah zianghman mawhthlukawknak ka nei lo, asinan cumi cun thiam i coter cuang lo, thu i ṭhentu cu Bawipa a si sawn. 5 ^cCuruangah Bawipa a rat hlanlo, a tikcu a kim hlanah zianghman thuṭhen hlah uh. Anih cun thim lakih thuh mi thilpawl kha tleu ah a lasuak ding ih, thinlung ih tumtah mipawl khal a langter ding. Cun mi kip in Pathian ih lăwm an co ding.

4:1^a Rom 16:25; Tit 1:7

4:4^b Apo 23:1; Rom 2:13; 2Ko 10:18

4:5^c Job 12:22; Mat 7:1-2; Rom 2:29; 1Th 2:19

6 U le nau tla, an ngan mi lan ih nan ruahlonak dingah kanmah ih nan zir ding mi, hi thilpawl cu nan ṭhatnak dingah, keimah le Apollos ah ka bĕn a si, cutin nan lakah zohman in pakhat hril tahratin a dang pakhat dokalhin nan puarthaulonak dingah a si. 7 ^aZiangahtile zo in so mi dang hnakih danglam deuh dingin a lo tuah? Na dăwn lo mi thil na neih mi ziang a um? Na dăwn asile, dáwng lo vekin ziangah so tluang na khawn?

4:7^a Joh 3:27; Rom 12:3, 6

8 ^aNannih cu nan khăwpkham zo! Nannih cu nan lian zo! Kanmah tel loin siangpahrang vekin nan uk. Kannih khal nanmah thawn kan uk thei nak dingah, nannih hin uk uhla ka va duh tak em! 9 ^bZiangahtile thah dingih ruat cia mi vekin kannih apostolpawl hi Pathian in a netabikah in ret tiah ka ruat; ziangahtile kannih cu leilung tlun le vancungmipawl le milaipawl zohnuamih tuah mi kan si. 10 ^cKannih cu Khrih ruangah mi-â kan si, nannih bélte Khrih ah mifim nan si. Kannih cu kan cak lo, nannih bélte nan cak. Nannih cu upat nan si, kannih bélte nautat kan si. 11 ^dAtu cān tiang rori rilrawng le tihâlin kan um, hnipuan ṭet hnianghniten kan um, mi in an kuttum in in thăwng, inn khal kan nei lo. 12 ^eCule kan kut in hnaṭuan har zet ṭuanin kan um. In zăwkzet tikah, thlawsuah kan pe; in hrem tikah, kan tuar cuahco. 13 ^fIn thangsiat tikah, ṭawngkam thlumte thawn kan sawn. Kannih cu leitlun hnawmhne vekah le thil hmuahhmuah ih bawrhhlawh vekah tuihni tiangin kan cang.

4:8^a Thu 3:17-18

4:9^b Sam 71:7; Rom 8:36; Heb 10:33

4:10^c Apo 17:18; 2Ko 11:19

4:11^d Rom 8:35; 2Ko 11:23-27

4:12^e Mat 5:44; Apo 18:3; Rom 12:14; 1Pe 3:9

4:13^f Jer 20:18; Ṭah 3:45

Paul in Pa vekih mi a Kilkhawinak

14 ^aHih thilpawl hi nan ningzahnak dingah ka ngan lo, ka duhdawt zet mi ka falepawl vekin ralrinnak ka lo pe sawn a si. 15 Ziangahtile Khrih ah zirhtu mi 10000 nei khal uhla, pa cu tampi nan nei lo. Ziangahtile Khrih Jesu ah thuthangṭha hmangih ka hrin mi nan si. 16 ^bCuruangah keimah i cawng dingin ka lo ngen hai a si. 17 ^cCumi ruangah Timothy cu nan hnenah ka rak thlah, amah cu Bawipa ah mirinum le ka duhdawt zet mi ka fapa a si. Amah in Khrih ih ka nundānpawl cu a lo mangtersal ding. Cuih ka nundān cu hmun kip ih kawhhran kip ka zirh vek khan a si.

4:14^a 2Th 3:14

4:16^b Fil 3:17; 2Th 3:7, 9

4:17^c Apo 16:1; 1Ti 1:2

18 ^aNan hnenah keimah ra lo dingah nan ruat ih, mi hrekkhat cu nan puarthau. 19 ^bAsinan Bawipa in rem a ti asile, nan hnenah ka ra cing ding, cule mipuarthaupawlih ṭawngkam si loin an huham cu ka thei ding. 20 ^cZiangahtile Pathian uknak cu ṭawngkam ah a um lo ih, huham sawnah a um a si. 21 ^dZiang so nan duh? Nan hnenah fungfêk thawn ka ra ding maw? Asilole duhdawtnak le nunnemnak thinlung thawn so ka rat ding?

4:18^a Jer 43:2

4:19^b Apo 18:21; 2Ko 1:15-16

4:20^c Rom 14:17; 15:13

4:21^d 2Ko 1:23

5

Kawhhran sungih Nunau-Mipa Sualnak

1 ^aNan lakah nunau-mipa sualnak a um tiah hmun tampi ah mi in an rel. Cuih nunau-mipa sualnak cu Zentelpawl lak hmanah a um dah lo, mi pakhat in a paih nupi a lâksak. 2 Cule nanmah cu nan duhaw lai hrih. Cuvek a tuahtu cu nan lak ihsin lâkhlo a si thei nak dingah riahse ding sawn nan si. 3 ^bZiangahtile thungaiten, kei cu nan hnenah taksa pum in ka um lo nân, thlarau in ka um. Nan hnenih um vekin cuvek a tuahtu pa cu thu ka ṭhensak zo. 4 ^cKan Bawipa Jesu Khrih hmin ih hmunkhat ih nan umkhawm tikah, ka thlarau cu nan hnenah a um, kan Bawipa Jesu Khrih-ih huham khal a um ve. 5 ^dCu pa cu Bawipa Jesu-ih Ni ah a thlarau rundam a si thei nak dingah, a taksa cu siatrál dingin Setan hnenah pe uh.

5:1^a Dnp 22:30

5:3^b Kol 2:5; 1Th 2:17

5:4^c 2Th 3:6

5:5^d Mat 4:10; 1Ti 1:20

6 ^aNan uarawk hi a ṭha hrimhrim lo. Thilnu málte in sang hlăwm pumpuluk a thoter thluh ti nan thei lo maw? 7 ^bCuruangah nannih cu thilnu rawi lo mi nan si vekin, sang hlăwm thar nan si thei nak dingah, thilnu hlun kha thaihlo uh. Ziangahtile kan Lanta Puai tuufano a si mi Khrih cu kan hrangih hlăn a si zo. 8 ^cCuruangah thilnu hlun, mi dang parih lungput siava le sualralnak thawn si loin, thilnu rawi lo sang, diknak le taknak thawn puai tuah uhsi.

5:6^a Mat 16:6, 12; Gal 5:9; Jam 4:16

5:7^b Mar 14:12; 1Pe 1:19

5:8^c Suah 12:14-15

9 ^aNan hnenih ca ka lo kuat mi sungah nunau-mipa sualnak a tuahtupawl cu kawm hlah uh, tiah ka rak ngan. 10 Cutiih ka ti tikah leitlun mi nunau-mipa sualnak a tuahtupawl, miduhhampawl, mi bumhmangpawl le milem bepawl kawm hlah uh, ka tinak a si lo. Cuti si ta sehla leitlun nan suahsan a ṭul ding. 11 ^bAsinan atu-ah unaupa, tiih nan kawh mi in nunau-mipa sualnak a tuah, a duhham, milem a bia, mi zăwkzet a hmang, zu a ri, mi a bum asile kawm hlah uh. Amah thawn rawl khal eitlang hrimhrim hlah uh, tiah ca ka lo kuat zo.

5:9^a Efe 5:11; 2Th 3:6, 14

5:11^b Rom 7:1; 16:17

12 ^aZiangahtile a leng lam mipawl thuṭhen dingah kei in ziang tuah ding so ka neih? Nannih cun kawhhran sung mipawl thu nan ṭhen ding a si lo maw? 13 ^bAsinan a leng lam mipawl cu Pathian in thu a ṭhen hai a si. Curuangah cuih miṭha lo cu nan lak ihsin dawisuak uh.

5:12^a Mar 4:11

5:13^b Dnp 13:5; 17:7; 19:19; 22:21, 24; 24:7; Lai 20:13

6

Cuzah Thuṭhennak ih Thlenawk Thu

1 ^aNan lakih pakhat in mi dang thawn thuhla a neih asile, mithiangpawl hnenah si loin, midingfel lo pawl hnenah cuih thu cu an rel dingah a thlen ngam ding maw? 2 ^bMithiangpawl in leitlun mipawlih thu an ṭhen leh ding ti nan thei lo maw? Nanmah in leitlun mipawl thu nan ṭhensak leh asile, thuhla fate pawl cu thu nan ṭhen thei a si lo maw? 3 Vancungmipawl hman an thu kan ṭhen leh ding ti nan thei lo maw si? Hi dam sung nun thilpawl cu ziang tlukin so kan ṭhen sinsin ding? 4 Curuangah nannih in himi nun thuhla ah thuṭhen ding nan neih asile, kawhhran sungih mitenau ih ruah mipawl kha thuṭhentu dingah ruat uh! 5 ^cNan ning a zahnak dingah cucu ka ṭawng a si. Nan lakah mifim pakhat tal nan um lo maw si? Unau le unau lakih thubăwtcat thei tu pakhat te tal nan um lo maw? 6 ^dUnaupa in a unaupa kha cuzah thuṭhennak ah a fehpi sawn riangri ih, cucu zumlotupawlih hmaiah a si sapbai!

6:1^a Mat 18:17

6:2^b Mat 19:28; Luk 22:30

6:5^c Apo 1:15

6:6^d Rom 7:1; 2Ko 6:14-15; 1Ti 5:8

7 ^aCuruangah atu-ah nan lakah thil sual pakhat a um, ziangruangahtile pakhat le pakhat cuzah thuṭhennak ah nan feh. Ziangah so mi in nan parih thil sual an tuah nan sian men lo? Ziangah so nan thilri hloh cu nan tuar sawn men lo? 8 ^bCuti lamlam si loin, nannih cun thil sual nan tuah ih mi nan bum, cule cuih thilpawl cu nanmai unaupawl lala hnenah nan tuah. 9 ^cMidingfel lo pawl in Pathian uknak cu ro ah an co lo ding ti nan thei lo maw si? Bumin um hlah uh, nunau-mipa sualnak a tuahtupawl, milem betupawl, uirepawl, mihurpawl, tawka hur pawl, 10 ^dfifirpawl, miduhhampawl, zuripawl, ṭawng siakhâ hmangpawl le mibumhmangpawl cun Pathian uknak cu ro ah an co lo ding. 11 ^eCule nan lakih mi hrekkhat cu cuvek mi nan rak si dah. Asinan nannih cu Bawipa Jesu hmin le kan Pathian Thlarau ih khawlh mi, thianhlimter mi le thiamcoter mi nan si.

6:7^a Mat 5:39-40

6:8^b 1Th 4:6

6:9^c Pui 18:20, 22; Dnp 22:22; Mat 25:34; Gal 6:7; Jam 1:16

6:10^d 1Ti 1:10; Thu 21:8

6:11^e Apo 22:16; Rom 4:25; Efe 2:2

Nunau-Mipa Sualnak

12 Thil ziangkim hi ka hrangah tuah a thiang, asinan thil ziangkim hi ka hrangah hlawknak an si thluh kher lo. Thil ziangkim hi ka hrangah tuah a thiang, asinan ziang thuneihnak hnuai hmanah ka um lo ding. 13 ^aRawl cu pumpi hrangah a si ih, pumpi cu rawl hrangah a si, asinan Pathian in an pahnih in a siatrálter ding. Taksaruangpum cu nunau-mipa sualnak hrangah a si lo, Bawipa hrangah a si sawn, cule Bawipa cu taksaruangpum hrangah a si. 14 ^bPathian in Bawipa cu mithi lak ihsin a thoter ih, kannih khal a huham in in thoter leh ding. 15 ^cNan taksaruangpum cu Khrih-ih taksa ṭêk an si ti nan thei lo maw si? Khrih-ih taksa ṭêk pawl cu la tahratin hlawhhlang taksa ṭêk ah ka tuah ding maw? Tuah lamlam hlah! 16 ^dAsilole hlawhhlang thawi a pehzăwmawtu cu amah nu thawn taksa pumkhat ah an cang ti nan thei lo maw? Ziangahtile Pathian in, “Pahnih cu taksa pumkhat ah an cang ding,” tiah a ti.

6:13^a Rom 12:1; Kol 2:22

6:14^b Apo 2:24; Rom 6:5; Efe 1:14, 20; 1Th 4:16

6:15^c Rom 12:5

6:16^d Sem 2:24; Mat 19:5; Efe 5:31

17 ^aAsinan Bawipa a pehzăwmtu cu cuih Bawipa thawn thlarau pumkhat an si.

6:17^a Joh 17:21; Rom 8:9-11; Gal 2:20

18 ^aNunau-mipa sualnak tlansan uh. Minung in a tuah mi a dang sualnak kip in taksaruangpum lengah a si, asinan nunau-mipa sualnak a tuahtu cu amai taksaruangpum ah a sual a si. 19 ^bAsilole nan taksaruangpum cu Pathian hnen ihsi nan neih mi nan sungih um Thlarau Thianghlim ih temple a si ti le nanmah cu nanmai ta nan si lo ti nan thei lo maw? 20 ^cZiangahtile nannih cu man ih lei mi nan si; curuangah Pathian-ih ta a si mi nan taksaruangpum le nan thlarau in Pathian sunlawih uh.

6:18^a Rom 6:12; Gal 5:19; Efe 5:3; 1Th 4:3; Heb 13:4

6:19^b Joh 2:21; Rom 14:7

6:20^c Mat 20:28; Apo 20:28; Fil 1:20; Thu 5:9

7

Nupa Umtudān Ding

1 Cun ka hnenih nan rak ngan mi thilpawl thawn pehparin: “Mipa hrangah nunau dai lo a ṭha.” 2 Sikhalsehla nunau-mipa sualnak hrial dingah mipa kip in nupi bul nei cio hai sehla, nunau kip in pasal bul nei cio hai seh. 3 ^aPasal in a nupi hnenah a co ding phu duatnak pe seh, cule cuti vek thothoin nupi khal in a pasal hnenah tuah ve seh. 4 Nupi in amai taksaruangpum parah thuneihnak a nei lo, a pasal in a nei sawn. Cuti vek thothoin pasal khal in amai taksaruangpum parah thuneihnak a nei lo ih, a nupi in a nei sawn a si. 5 ^bCān tawite sung rawl ulhnak le thlacamnak ih nan pekawk thei nak dingah tiih lungkimtlangnak nan neih ti dah lo ahcun, khat le khat nupa ihtlangnak kha êl-aw hlah uh. Setan in sual a lo fawrhlonak dingah umtlangsal uh. Culole sūpawk thei nak nan tlaksam ruangah Setan in sual a lo fawrh pang ding. 6 ^cPathian in i sĕn ruangah hihi ka sim a si, Pathian-ih thupek cu a si lo. 7 ^dZiangah cutin ka ti tile, mipa zaten keimah vekin um hai sehla ka duh. Asinan mi kip in anmai thilpek fingfing Pathian hnen ihsin an nei, pakhat in thilpek phun khat a nei ih, mi dang in phun dang a nei ve.

7:3^a Suah 21:10; 1Pe 3:7

7:5^b Suah 19:15; 1Sam 21:4-5; Mat 4:10; 1Th 3:5

7:6^c 2Ko 8:8

7:7^d Mat 19:11-12; Rom 12:16

8 Asinan nupi-pasal nei lo pawl le nuhmeipawl hnenah ka sim a si: keimah vekih an um asile, a ṭha. 9 ^aAsinan an sūpawk thei lo a si ahcun, nupi-pasal nei lawlaw hai seh. Ziangahtile nupi-pasal neih cu câkhiarnak nasa zet thawi um rero hnakin a ṭhasawn.

7:9^a 1Ti 5:14

10 ^aNupi-pasal nei cia pawl hnenah keimai thupek si loin, Bawipaih thupek ka lo pe: nupi in a pasal ṭhen hlah seh. 11 ^bAsinan a ṭhen a si hmanah, pasal nei loin umlan seh, asilole a pasal thawn remawsal hai seh. Cule pasal khal in a nupi ṭhen hlah seh.

7:10^a Mal 2:14-16; Luk 16:18

7:11^b Rom 7:2-3

12 ^aA dangpawl hnenah Bawipaih sim mi si loin keimah in ka sim hai: unau zokhal in zumlotu nupi a rak nei ih cu nu in amah thawi umtlang a lungkim asile, cu nu cu ṭhen hlah seh. 13 Cule zumlotu pasal neitu nunau kha a pasal in amah thawi umtlang a lungkim asile, tân hlah seh. 14 ^bZiangahtile zumlotu pasal cu a nupi ruangah thianter a si ih, zumlotu nupi khal a pasal ruangah thianter a si. Cuti rak si lo sehla, nan fātepawl cu an bawrhhlawh ding, asinan annih cu atu-ah an thianghlim a si. 15 ^cAsinan zumlotu in a ṭhen asile, ṭhen ko seh; cumi thu ah cun, unaupa asilole unaunu cu ṭemṭawn a si lo. Asinan Pathian in kannih cu remawtei nung dingah in ko a si. 16 ^dZiangahtile maw nupi, na pasal na rundam ding le ding lo na thei maw si? Asilole maw pasal, na nupi na rundam ding le ding lo ziangtin so na thei?

7:12^a 2Ko 11:17

7:14^b Mal 2:15

7:15^c Rom 14:19

7:16^d Rom 11:14; 1Pe 3:1

Pathian ih a lo Kawhdān vekin Um Aw

17 ^aAsinan Pathian in mi kip hnenih a zem kel vekin le Bawipa in mi kip a kawh hai kel vekin um hai seh. Cumi cu kawhhran zate hnenih thu ka pek mi a si. 18 ^bSerh zim tan a co mi, Pathian ih kawh mi an um maw? An um asile, serh zim tan lo mi ah cang hlah seh. Serh zim tan lo mi, Pathian ih kawh mi an um maw? An um asile serh zim tan hlah seh. 19 ^cSerh zim tan siseh, tan lo siseh, zianghman a si lo. Pathian thupekpawl thlun lawng hi a thupi mi a si. 20 Mi kip in Pathian in a kawh laiih a sinak kel vek khan um ko hai seh. 21 Pathian in a lo kawh laiah nang cu sál na simaw? Cumi in na khawruah lo harter hlah seh. Asinan luatter theih na si le, cumi cu hmang sawn aw. 22 ^dZiangahtile sál a si laiah Pathian in Bawipa ah a kawh mi cu Bawipaih miluat a si. Cuti vek thothoin miluat a si laiah Pathian in Bawipa ah a kawh mi cu Khrih-ih sál a si. 23 Nannih cu man ih lei mi nan si, milai sál ah cang hlah uh. 24 U le nau tla, mi kip in Pathian in a lo kawh laiih nan sinak kel ah khan Pathian thawn umtlang ringring uh.

7:17^a Rom 12:3; 2Ko 8:18

7:18^b Apo 15:1-2

7:19^c Rom 2:25-27; Gal 5:6; Kol 3:11

7:22^d Joh 8:32, 36; Rom 6:22

Nupi le Pasal Nei Lo Pawl le Nuhmei Pawl

25 ^aNupi le pasal nei hrih lo pawlih thuhla ah cun: Bawipa hnen ihsin thupek ka nei lo: asinan rinsan tlak mi si dingah Bawipa hnen ihsin zahngainak ka rak co ruangah ka ruahnak ka suah a si. 26 Tulai vansannak ruangah mipa cu a si kel vek khan um ko sehla a ṭha tiah ka ruat. 27 Nupi ah ṭemṭawn na simaw? Phawihnak hawl hlah. Nupi ihsin mizalen na simaw? Nupi hawl hlah. 28 Asinan nupi na neih asile, sual tuah na si lo. Fala him pakhat in pasal a neih asile, thil sual a tuah lo. Asinan nupi le pasal neipawl cun himi nun ah buainak an táwng ding, asinan kei cun cumi ihsin lo luatter ka duh.

7:25^a 2Ko 4:1; 8:8; 1Ti 1:13, 16

29 ^aAsinan u le nau tla, hihi ka sim a si, cān málte lawng a um a si, atu thawkin nupi neipawl in nei lo vekin nung hai seh. 30 A ṭappawl in ṭap lo vekin, lungawi aipuang mipawl in lungawi aipuang lo vekin, thil leitupawl khal in zianghman nei lo vekin um hai seh. 31 ^bHi leitlun thil hmangtupawl khal in hmang luar tuk lawmmam lo vekin um hai seh. Ziangahtile hi leitlun milai umtudān hi a hloral rero a si.

7:29^a Rom 13:11-12

7:31^b Heb 12:27

32 ^aNannih cu dawnharnak ihsin luat uhla ka lo duhsak. Nupi nei lo tu cun ziangtin Bawipa a lung ka hmuiter ding, tiin Bawipaih thilpawl a ngaihtuah. 33 Asinan nupi neitu cun ziangtin ka nupi a lung ka hmuiter ding, tiin leitlun thilpawl a ngaihtuah. 34 ^bNupi le fala him lak khalah danglamnak a um. Pasal nei lo nunau cun a taksaruangpum le a thlarau a thianhlim thei nak dingah, Bawipaih thilpawl a ngaihtuah. Asinan pasal nei nunau cun a pasal lung a hmuiter thei nak dingah, leitlun thilpawl a ngaihtuah. 35 ^cCule himi hi nanmai hlawknak ding hrangah ka sim a si, nan hmaiih thangkam ka tum a si lo. Mawi zetin nan nun ih, zianghman in lo hnaihnăwk lo ih, Bawipa lawng nan rĕn thei nak dingah hihi ka sim a si.

7:32^a 1Ti 5:5

7:34^b Luk 2:37

7:35^c Sam 86:11

36 Asinan mipa zokhal a fala himte parah mawi loin ka um, tiah amah le amah a ruataw ih, a pasal neih kum khal a luan cuahcoih, cu nu in pasal neih a ṭul a si ahcun, cu pa cun a duh vekin tuah ko seh. Thil sual a tuah lo; neiaw hai seh. 37 Sikhalsehla mipa in a thinlung in hngetkhoh zetin a ding, ṭul tinak a nei lo, asinan amai duhnak tlunah thuneihnak a nei thei ih, a thinlung in cuih fala him cu ṭhi lo dingih a ruahcat asile, a ti ṭha a si. 38 ^aCuruangah nupi ṭhitu cun a ti ṭha a si, asinan nupi ṭhi lo tu in a ti ṭha sinsin.

7:38^a Heb 13:4

39 ^aNupi cu a pasal a nun sung hmuah cu Dān in a pasal ah a ṭemṭawn. Asinan a pasal a thih asile, Bawipa ih um mi rori a duh mi nei dingah a zalen a si. 40 Asinan kei ka ruahdān ah cun mi dangih nupi si lo teih a um asile, a lungawi sawn ding. Cule kei khal in Pathian Thlarau nei ah ka ruataw ve a si.

7:39^a Rom 7:2-3; 2Ko 6:14

8

Milem hnenih Hlăn Mi Thil

1 ^aCule milempawl hnenih an hlăn mi thilpawl thuhla ah cun: kan zaten theihnak kan nei ti kan thei. Theihnak cun mi a puarthauter, asinan duhdawtnak cun mi a tuahṭha. 2 ^bCule mi pakhat khat in thil ziang simaw thei ih a ruahawk asile, a theih ding vekin a thei hrih lo a si. 3 ^cAsinan mi pakhat khat in Pathian a duhdaw asile, cu pa cu Pathian in a thei.

8:1^a Apo 15:20; Rom 15:14

8:2^b 1Ti 6:4

8:3^c Jer 1:5; Rom 8:29; Gal 4:9

4 ^aCuruangah milempawl hnenih hlăn mi thil ei thuhla ah cun, leitlun ah milem cu zianghman a si lo ti le Pathian amah pakhat siarlo a dang Pathian a um lo ti kan thei. 5 ^bVan ah siseh, lei ah siseh pathian tiih an kawh mi tampi rak um hman hai sehla (“pathian” tampi, “bawi” tampi an um vekin), 6 ^ckannih hrang lawngte ah cun Pathian pakhat, Pa lawng a um. Thil hmuahhmuah hi amah hnen ihsin an si ih, kannih cu amah hrangah kan um. Kan hrangah Bawi pakhat Jesu Khrih a um ih, thil hmuahhmuah hi amah ruangih um le kannih khal amah thawngih nung kan si.

8:4^a Suah 34:15; Dnp 6:4; Sam 86:10; Apo 14:15; Gal 4:8; Efe 4:6; 1Ti 2:5

8:5^b 2Th 2:4

8:6^c Mal 2:10; Joh 1:3; Rom 11:36; Efe 4:5

7 ^aSikhalsehla mi kip in cuih theihnak cu an nei lo: mi hrekkhat cun atu tiangin milem hmaiih an hlăn mi rawl an ei tikah, milem hnenih hlăn mi a si ti ruatin an ei; cule cumi cun a cak lo mi an sia le ṭha theihnak cu a bawrhbangter. 8 ^bAsinan rawl cun Pathian hnenah dinhmun ṭha ah in ret cuang lo. Ziangahtile kan ei khal asile, ṭhatdeuh nak kan nei cuang lo ih, kan ei lo a si khalle, kan siat phah cuang lo.

8:7^a Rom 14:14

8:8^b Rom 14:17

9 ^aAsinan himi nan zalĕnnak hin a cak lo mipawl a tlukterlonak dingah va fimkhur uh. 10 Ziangahtile nang cun theihnak na nei ih, milem biaknak inn ah rawl ei dingih na to kha a sia le ṭha theihnak a cak lo mi pa in a lo hmuh a si ahcun, milem hmaiih hlăn mi thilpawl cu ei dingah a ral a ṭhater lo ding maw? 11 ^bCule na theihnak ruangah a hrangih Khrih a thi mi a cak lo mi unaupa kha a hloral ding maw? 12 ^cNannih in unaupawl parah cuti vekih sual nan tuah ih a cak lo mi a sia le ṭha theihnak nan tuahmawh tikah, Khrih parah sual nan tuah a si sawn. 13 ^dCuruangah rawl in ka unau a tlukter ding a si ahcun, ka unau ka tlukterlonak dingah ziangtik hmanah sa ka ei nawn lo ding.

8:9^a Rom 14:1; 2Ko 6:3; Gal 5:13

8:11^b Rom 14:15

8:12^c Mat 18:6; 25:40, 45

8:13^d Mat 5:29

9

Paul-ih Pumpekawknak

1 ^aKeimah cu apostol ka si lo maw? Keimah cu mizalen ka si lo maw? Kan Bawipa Jesu Khrih cu ka hmu zo a si lo maw? Nannih cu Bawipa ih ka ṭuansuah mi nan si lo maw? 2 ^bMi dang in apostol ih in ruah lo a si hmanah, nan hnenah cun rinhlelh ding um loin apostol ka si hrimhrim. Ziangahtile nanmah hi Bawipa ah apostol ka sinak hminsinnak cu nan si.

9:1^a 2Ko 12:12

9:2^b 2Ko 3:2-3

3 I zăwihliahtupawl hnenih ka humawknak cu hitin a si: 4 ^akannihpawl hin in le ei thei nak kan nei lo maw si? 5 ^bApostol dang pawl, Bawipaih naulepawl le Kefas bangin zumtu nupi hruai thei nak kan nei ve lo maw si? 6 ^cAsilole pumcawmnak hrangah hnaṭuan lo dingin kei le Barnabas lawng hi thuneihnak nei lo kan si cuangce maw si? 7 ^dZo so mah te tumaw ih, ralkap ṭuan? Zo so sabit hmuan tuah ih a rah ei lo um? Zo so tuu khāl tahratih tuu hnawi ti in loih um?

9:4^a Apo 18:3

9:5^b Mat 12:46

9:6^c Apo 4:36

9:7^d Dnp 20:6; Thf 27:18; 2Ti 2:3-4

8 Cuih thilpawl cu milai vekin ka sim maw? Dān khal in cu vekin a sim a si lo maw? 9 ^aZiangahtile Mosi Dān sungah, “Caw cang in thlairawl a cīl laiah a hmur na ṭem lo pei,” tiih ngan a si.

9:9^a Dnp 22:1-4; 25:4; Thf 12:10; 1Ti 5:18

Pathian in caw cang pawl lawng maw a ngaihsak? 10 ^aAsilole Pathian in cumi cu kanmai hlawknak ding hrangah a sim maw? Rinhlelh ding um loin cuih thu cu kan hlawknak dingih ngan a si. Lei lettu cun fang ah ding ruahsannak a nei ih, ruahsannak thawi fang cīltu in a cīl mi fang ei ding a ruahsan a si. 11 ^bNan hnenah thlarau lam thilpawl kan tuh zo asile, nan hnen ihsin leitlun thilpawl at khal nungla, cucu thil pipa a simaw? 12 ^cMi dang in nan parah nan neih mi thil co thei nak an neih a si ahcun, kannih hi nei sinsin ding kan si lo maw?

9:10^a Thf 11:25; Rom 4:23-24; 2Ti 2:6

9:11^b Rom 15:27; Gal 6:6

9:12^c Apo 18:3; 2Ko 6:3

Sikhalsehla cuih thuneihnak cu kan hmang ve lo, cuhnakin Khrih-ih thuthangṭha kan dawnkhamlonak dingah thil ziangkim hi kan tuar ṭenṭo sawn a si. 13 ^aTemple sungih thil thianghlim pawl lakih rawngbawltupawl cun cuih thil thianghlim pawl cu an ei ih, biakṭheng ih rawngbawltupawl cun biakṭheng thilpawl an co ve ti nan thei lo maw? 14 ^bCuti vek thothoin thuthangṭha simtupawl cu thuthangṭha ihsin pum câwmaw dingin Bawipa in thu a pe zo.

9:13^a Pui 6:16, 26; Dnp 18:1

9:14^b 1Ti 5:18

15 ^aAsinan hih thilpawl hi kei cun pakhat hman ka hmang lo ih, ka parah cu vekih nan tuah dingah hih thupawl hi ka ngan fawn lo. Ziangahtile Bawipa ih ka tluangkhawnnak hi mi zokhal in zianghmanlo ih an canter ding hnak cun thih hi ka hrangah a ṭhasawn. 16 ^bThuthangṭha hi phuang hman ningla, tluangkhawn ding zianghman ka nei lo, ziangahtile phuang loin ka um thei lo; a si, thuthangṭha ka phuan lo a si ahcun, ka hmakhua a pit ding! 17 ^cZiangahtile cumi cu keimai duhhrilnak in ka ti asile, lawmman ka ngah ding; asinan ka duhhrilnak si loih ka ṭuan asile, ṭuanvo hleice kilter ka si tinak a si. 18 ^dCuti asile ka lawmman cu ziang a si? Thuthangṭha ih ka covo ka hman thluh lo nak dingah, thuthangṭha ka phuan tikah Khrih-ih thuthangṭha cu hlawh la loih ka phuan hi a si.

9:15^a Apo 18:3; 2Ko 11:9-10

9:16^b Apo 9:15; Rom 1:16

9:17^c Gal 2:7

9:18^d 2Ko 11:7

19 ^aZiangahtile kei cu mi hmuahhmuah hnen ihsin miluat si khal ningla, mi a tam theipatawpih ka ngah thei nak dingah, mi hmuahhmuah ih sál ah keimah le keimah ka tuahaw. 20 ^bJew-pawl ka ngah thei nak dingah, Jew-pawl hnenah cun Jew vekin ka um. Dān hnuaiih umpawl ka ngah thei nak dingah, Dān hnuaiih um mipawl hnenah cun Dān hnuaiih um vekin ka um. 21 ^cDān nei lo pawl ka ngah thei nak dingah, Dān nei lo pawl hnenah cun Dān nei lo mi vekin ka um. Pathian hmaiah Dān nei lo si si loin, Khrih dān hnuaiih um mi si sawn siin, 22 ^dmicak lo pawl ka ngah thei nak dingah, micak lo pawl hnenah cun micak lo vekin ka um. Ziangmaw ti talih mi hrekkhat ka run thei nak dingah, mi hmuahhmuah hnenah thil ziangkimah ka cang. 23 Nanmah thawn thuthangṭha ah covo neitu ka si thei nak dingah, thuthangṭha ruangah hipawl hi ka tuah a si.

9:19^a Mat 18:15; 2Ko 4:5; Gal 5:13; 1Pe 3:1

9:20^b Apo 16:3; Rom 11:14; 16:3

9:21^c Rom 2:12, 14; Gal 6:2

9:22^d Rom 14:1, 11-14

24 ^aTlan zuamawknak ih mi an tlan tikah an zaten an tlân, asinan mi pakhat lawngin nehman a ngah ti nan thei lo maw? Nehman ngah dingin cuti vek cun tlân uh. 25 ^bCule zuamawknak ih mi a zuamtu cun thil ziangkimah a sūpaw. A siat thei mi lukhum ngah dingah cutin an tuah. Asinan kannih cun a siat thei lo mi nehman ngah dingah cutin kan tuah ve a si. 26 ^cCuruangah hmuitin mi nei loin ka tlân lo. Cun thli a thawng rero tu vek menin ka thawng lo. 27 ^dCuhnakin mi dang hnenih thu ka phuan hnuah Pathian in tling lo i tilonak dingah, ka taksaruangpum cu nasa zetin ka thunun ih ka thu hnuaiah ka ret sawn a si.

9:24^a Gal 2:2; Fil 2:16; Kol 2:18; 2Ti 4:7; Heb 12:1

9:25^b Jam 1:12; 1Pe 5:4; Thu 2:10

9:26^c 1Ti 6:12

9:27^d Rom 8:13

10

Israel Thuanthu ihsi Ralrin Peknak

1 ^aCuihhleiah, u le nau tla, kan pupápawlih thuhla thei loih nan um ka duh lo, an zaten mero hnuaiah an um ih, tifinriat an tánsuak. 2 ^bMosi hnenah an zaten mero sungah le tifinriat sungah baptisma an co. 3 ^cAn zaten thlarau rawl bangrep an ei. 4 ^dCule an zaten thlarau ti bangrep an in. Ziangahtile anmah a rak thluntu thlarau lam Lungpi ihta an in, cuih Lungpi cu Khrih a si. 5 ^eAsinan mi tamsawn in Pathian lung an hmuiter hrimhrim lo, ziangahtile annih cu Pathian in ramṭhing ah a thiter hai.

10:1^a Suah 13:21; 14:22, 29; Rom 11:25

10:2^b Rom 6:3

10:3^c Joh 6:31

10:4^d Suah 17:6; Mip 20:11

10:5^e Mip 14:29; Heb 3:17; Jud 1:5

6 Annih in thil ṭha lo pawl nasa zetih an câk vekih kan câk ve lo nak dingah, cuih thilpawl cu kan hrangah kan zohṭhim ding mi an si. 7 ^aCule anmah lakih mi hrekkhat in milem an biak vekin be ve hlah uh. “Mipi cu ei le in dingah an to ih, lek dingah an tho,” tiih ngan vek khan a si. 8 ^bCun an lakih mi hrekkhat in nunau-mipa sualnak an rak tuah vekin tuah ve hlah uhsi, cule ni khat ah anmah lakih mi 23000 cu an tlu ih an thi. 9 ^cAn lakih mi hrekkhat in Khrih an hniksak vekin, hniksak ve hlah uhsi. Pathian in anmah cu rulpawl a cukthatter. 10 ^dCule anmah lakih mi hrekkhat an phunzai vekin phunzai hlah uhsi, cule annihpawl cu siatsuahtu in a siatsuah thluh hai a si.

10:7^a Suah 32:4, 6, 19

10:8^b Mip 25:1-9

10:9^c Suah 17:2; Mip 21:5-6

10:10^d Mip 16:41, 49; 1San 21:15; Heb 11:28

11 ^aKan zohṭhim dingah cuih thil zaten an parah a thleng a si, san cemnak ih a rak man mi kanmahpawl ralrin peknak ah cupawl cu ngan an si. 12 ^bCuruangah dingih a ruatawtu cu fimkhur seh, cu lo asile a tlu pang ding. 13 ^cMi zo cio par khalih a thleng mi siarlo nan parah sualfawrhnak a thleng lo. Asinan Pathian cu a rinum a si. Anih cun nan tuar thei lo ding mi sualfawrhnak nan hnenih thlenter a siang lo ding. Cuih sualfawrhnak nan tuartheinak dingah tlansuahnak lamzin a lo tuahsak ding.

10:11^a Rom 3:11; 4:24

10:12^b Rom 11:20; 2Ko 1:24

10:13^c 2Pe 2:9

14 ^aCuruangah ka duhdawt mitla, milem biaknak ihsin tlân uh. 15 Mifimpawl hnenih thusim vekin ka lo sim a si, ka lo sim mi thu hi nanmah ten thuṭhen uh. 16 ^bThlawsuah kengtu no kha thlawsuah kan pe, cuih no cu Khrih thisen ih kan pawlkăwmawknak hi a si lo maw? Sang kan phel tikah khan, Khrih taksaruangpum ah kan pawlkăwmaw a si lo maw? 17 ^cZiangahtile kannih cu tampi si hman nungla taksaruangpum pakhat kan si, ziangahtile kan zaten cuih sang hlăwm pakhat cu kan ṭawmaw a si.

10:14^a Heb 6:9; 1Pe 2:11; 1Joh 2:7; 5:1; Jud 1:3

10:16^b Mat 14:19; 26:26-28

10:17^c Rom 12:5

18 ^aTaksa lamih Israel a si mipawl khi zoh hnik uh: raithawinak sa a eitupawl kha biakṭheng ṭawmpitu an si ve lo maw? 19 Cuti asile ka sim mi cu ziang a si? Milem cu ziang so a si, ka ti maw si? Asilole milempawl hnenih an thawi mi kha ziang so a si ka tinak a simaw? 20 ^bSi hlah e, ka lo sim mi cu, Zentelpawlih thawiawknak thilpawl cu Pathian hnenah si loin khawsiapawl hnenah an thawi a si, ti hi a si sawn. Khawsiapawl thawn pawlkăwmawknak nan neih ding ka duh lo. 21 ^cBawipaih no le khawsiapawlih no cu nan inkăwp thei lo; Bawipaih cabuai ta le khawsiapawlih cabuai ta khal nan eikăwp thei lo. 22 ^dAsilole Bawipa cu thîkthuse ko kan tăwkhrawk maw? Kannih cu amah hnakin kan caksawn maw?

10:18^a Pui 7:6, 14-15

10:20^b Pui 17:7; Thu 9:20

10:21^c 2Ko 6:15-16

10:22^d Ths 6:10; Isa 45:9; Jer 44:8

Ziangkim Pathian Sunlawinak ding Hrangah

23 Thil ziangkim hi ka hrangah tuah a thiang, asinan thil ziangkim tuah hi ka hrangah hlawknak a si lo. Thil ziangkim hi ka hrangah tuah a thiang, asinan thil ziangkim in mi a tuahṭha lo. 24 ^aZohman in amai hlawknak lawng hawl hlah seh, cuhnakin mi kip in mi dang hlawknak ding hawl sawn hai seh.

10:24^a Rom 15:1-2; Fil 2:4, 21

25 ^aSa zuarnak ih an zuar mi pauhpauh cu nan sia le ṭha theihnak ruangah, thu zianghman sut loin ei uh. 26 ^bZiangahtile, “Leilung cu Bawipaih ta a si, a sungih um hmuahhmuah thawn.”

10:25^a Apo 10:15

10:26^b Suah 9:29; Job 41:11; Sam 24:1; 50:12; 1Ti 4:4

27 ^aAn lakih zumlotu pakhat khat in rawl ei a lo sawm ih feh nan duh asile, nan sia le ṭha theihnak ruangah thu zianghman sut lo ten nan hmaiih a lo hun mi pauhpauh cu ei uh. 28 Asinan mi pakhat khat in na hnenah, “Himi cu milem hnenih hlăn mi sa a si,” a lo ti asile, a lo simtu pa ruangah le a sia le ṭha theihnak ruangah, cumi cu ei hlah aw. Ziangahtile, “Leilung le a sungih a um mi zaten Bawipaih ta an si.” 29 Nangmai sia le ṭha theihnak hrangah si loin cu paih, “Sia le ṭha theihnak,” ruangah ka sim a si sawn. Mi dang pakhat sia le ṭha theihnak in ka zalĕnnak cu ziangah so maw thu i ṭhensak ding? 30 ^bLungawi thu simnak thawn ka ei asile ziangah so cumi hrangih lungawi thu ka sim mi ah anih in keimah dokalhin ṭawng ṭha lo a ṭawng riangri?

10:27^a Luk 10:7

10:30^b Rom 14:6

31 ^aCuruangah nan ei ah siseh, nan in ah siseh, nan tuah mi pauhpauh cu, Pathian sunlawinak hlirah tuah uh. 32 ^bJew-pawl hnenah siseh, Grikpawl hnenah siseh, Pathian kawhhran hnenah siseh tlûknak ding zianghman tuah hlah uh. 33 ^cThil ziangkimah mi zate lung ka hmuiter, ka tuah vekin nan tuah ding a si. Keimai hlawknak ka hawl lo, cuhnakin mi tampi rundam an si thei nak dingah, mi tampi ih hlawknak ka hawl sawn a si.

10:31^a Zek 14:21; Kol 3:17

10:32^b Mat 5:29; 2Ko 6:3; 1Ti 3:5, 15

10:33^c Rom 11:14; 15:2

11

1 ^aKei in Khrih nun ka cawn vekin, nannih khal in i cawng ve uh.

11:1^a Rom 15:3; 1Pe 2:21

Lu Khuhawk Thu

2 ^aU le nau tla, thil ziangkimah in máng ih nan hnenih ka lo pek sâwngsin mi vek khan, thurosiahpawl nan kaih hnget ruangah ka lo lawm a si. 3 ^bAsinan hihi nan theih dingah ka duh, mipa kip ih lu cu Khrih a si, nunauih lu cu mipa a si, cule Khrih-ih lu cu Pathian a si. 4 ^cMipa zokhal a lu khuh tahratih thlacamtu le profet thuphuanih thuphuangtu cun a lu a upat lo a si. 5 ^dAsinan nunau zokhal lu khuh loih thlacam le profet thuphuanih thuphuangtu cun a lu a upat lo a si, ziangahtile cutiih a tuah asile, a lu a metkawlh mi nunau thawn a bangrep. 6 Ziangahtile nunau in a lu a khuh lo asile, a lu khal metkawlh lawlaw seh. Asinan nunau hrangah lu ziahkawlh, asilole lu mehkawlh cu ningzakza a si. Curuangah nunau cu a lu khuh seh. 7 ^eZiangahtile mipa cu Pathian-ih hmuihmel le ropitnak a si ruangah, a lu khuh hrimhrim hlah seh; asinan nunau cu mipaih ropitnak a si. 8 ^fZiangahtile mipa cu nunau ihsin a si lo, nunau sawn kha mipa ihsin a si. 9 ^gMipa cu nunau hrangih sersiam a si lo, nunau sawn kha mipa hrangih sersiam a si. 10 Cumi ruangah nunau cun vancungmipawl ruangah a lu parah ^hthuneihnak hminsinnak nei seh. 11 Sikhalsehla Bawipa ah cun mipa cu nunau lakah a zalen lo ih, nunau khal mipa lakah a zalen lo. 12 ⁱZiangahtile nunau cu mipa ihsi ra um mi a si, cuti vek thothoin mipa khal nunau ihsin ra um mi a si ve; asinan thil ziangkim hi Pathian hnen ihsi ra um mi an si.

11:2^a 2Th 2:15

11:3^b Sem 3:16; Efe 1:22; 5:23

11:4^c Apo 11:27

11:5^d Dnp 21:12; Apo 21:9

11:7^e Sem 1:26; Jam 3:9

11:8^f Sem 2:21-23; 1Ti 2:13

11:9^g Sem 2:18

11:10^h thuneihnak: Nunau in mipa tlunih thuneihnak si loin, mipa in nunau tlunah thu a neihzia lăngternak a si sawn.

11:12ⁱ Rom 11:36

13 Nunau in lu khuh loin Pathian hnenih thla a cam ding cu a mawi maw mawi lo? Nanmah ten thuṭhenaw hnik uh. 14 Mipa sám saupi zuah cu a hrangah ningzakza a si ti leitlun zephung khal in a lo zirh a si lo maw? 15 Asinan nunau in sám saupi a neih asile, cucu a ropitnak a si; ziangahtile a khuhawknak dingah Pathian in sám a pe. 16 Asinan cuih thu ah mi pakhat khat in el a duh asile, a dang nunphung kan nei lo. Pathian kawhhranpawl khal in nunphung dang an nei lo.

Bawipaih Zanriah

17 Hmunkhat ih nan punkhawmawknak hi ṭhatsinnak hrangah si loin, siat sin nak hrangah a si ruangah, cuih thu nanmah ka lo zirh tikah khan ka lo lawm lo. 18 Ziangahtile a pakhatnak ah kawhhran ih nan ratkhawm tikah, nan lakah ṭhenṭhêkawknak a um a si, tiah ka thei ih, cuih ka theih mi cu ka zum nawn ko. 19 ^aZiangahtile nan lakih Pathian ih a pawm mipawl lăngter an si thei nak dingah, nan lakah feh sual pawl khal an um tengteng ding a si. 20 Curuangah hmun pakhat ih nan ratkhawm tikah, cucu Bawipaih zanriah ei dingah a si lo. 21 ^bZiangahtile mi tin in nan ei tikah mai bul zanriah nan ei hmaisa cio. Cule mi pakhat cu rilrawngin a um ih, a dang pakhat cu a ri. 22 ^cEi le in dingah inn nan nei a si lo maw? Pathian kawhhran nan nautat ih thil zianghman nei lo pawl an ning nan zakter a si lo maw? Nan hnenah ziang ka sim ding? Himi ah ka lo lawm ding maw? Ka lo lawm lo a si.

11:19^a 1Joh 2:19

11:21^b 2Pe 2:13; Jud 1:12

11:22^c Jam 2:6

23 ^aZiangahtile Bawipa hnen ihsin ka ngah mi cu ka lo pe sin a si. Phiarsawm a si zan ah Bawipa Jesu in sang cu a lâk ih, 24 lungawi thu a sim hnuah, a phel. Cule, “La uhla ei uh; hi hi nan hrangih phel mi ka taksa a si, keimah in cīn ringring nak dingah himi hi run tuah uh,” tiah a ti. 25 ^bCuvek thothoin zanriah an ei hnuah, no cu a la ih, “Hih no hi ka thisen ih thukham thar a si. Hih no nan in tinten keimah in cīn ringring nak dingah in uh,” tiah a ti.

11:23^a Gal 1:12

11:25^b Luk 22:20

26 Ziangahtile hih sang nan ei tinte le hih no nan in tinten, Bawipaih thihnak cu a ratsal hlanlo nan phuang a si.

27 ^aCuruangah zokhal himi Bawipaih sang le no tlak lo piin a ei ih a intu cu Bawipaih taksaruangpum le thisen parah sual a tuah a si. 28 ^bAsinan mi pakhat in amah le amah cekfelaw ta sehla, cuih sang cu ei in cuih no cu in seh. 29 Ziangahtile tlak lo piin a ei ih a intu cu amah thuṭhennak hrangah a ei ih a in a si, anih cun Bawipaih taksaruangpum thuhla cu a theihliah lo. 30 ^cHimi ruangah nan lakah mi tampi cak lo le dam loin an um ih, mi tampi an thi. 31 ^dZiangahtile kanmah le kanmah thu kan ṭhenawk asile, thuṭhen kan si lo ding. 32 ^eAsinan Bawipa in thu in ṭhen tikah, leitlun mipawl thawi thiam lo in coterlonak dingah nun in sim a si.

11:27^a Heb 10:29

11:28^b 2Ko 13:5

11:30^c Mat 9:24

11:31^d 1Joh 1:9

11:32^e Thf 3:11-12; Joh 15:18-19; Heb 12:7-10; Thu 3:19

33 Curuangah ka u le ka nau tla, Bawipaih zanriah ei dingih nan ratkhawm tikah, pakhat le pakhat hngakaw uh. 34 Zokhal a ril a rawn asile, inn ah ei sawn seh, culole thuṭhen tuar dingih ratlangkhawm nan si pang ding. Cule a tāng lai mi thupawl cu ka rat tikah ka tifel leh ding.

12

Thlarau Thilpekpawl

1 ^aU le nau tla, atu-ah thlarau thilpekpawl thuhla ah thei loih nan um ding ka duh lo. 2 ^bRairing mi nan rak si laiah cun, an lo hruainak nak ah, a ṭawng thei lo mi milempawl hnenah hruai nan si ti nan thei. 3 ^cCuruangah zohman in Pathian Thlarau in Jesu cu camsiat si seh, tiah an ṭawng kel lo ih, Thlarau Thianghlim ihsi lo cun zohman in Jesu cu Bawi a si, tiah an ti thei lo ti ka lo theihter a si.

12:1^a Rom 1:11; 11:25

12:2^b Jer 10:5; Hab 2:18-19; Efe 2:2

12:3^c Joh 13:13; Rom 9:3; 1Joh 4:2-3

4 ^aThilpek a phunphun a um, asinan Thlarau cu pakhat a si. 5 Rawngbawlnak dangdang a um, asinan Bawipa cu pakhat a si. 6 ^bCule hnaṭuandān a phunphun a um, asinan mi zate hnenih thil ziangkim a ṭuantu Pathian cu pakhat a si. 7 ^cHlawktăwnnak ding hrangah Thlarau phuanlăngnak cu mi kip hnenah pek a si sawn. 8 ^dZiangahtile Thlarau in mi pakhat hnenah fimnak kamsuakthu a pe. Cuih Thlarau thotho in a dang pakhat hnenah theihnak kamsuakthu a pe. 9 ^eCuih Thlarau thotho cun a dang hnenah zumnak a pe, cuih Thlarau thotho in mi dang hnenah tidamnak thilpek a pe. 10 ^fA dang hnenah thilmakpawl tuah thei nak, a dang hnenah profet thuphuanih thuphuan thei nak, mi dang hnenah thlaraupawl thleidan thei nak, mi dang hnenah ṭawng phun dangdangih ṭawng thei nak, a dang hnenah ṭawng phun dangdang leh thei nak a pe. 11 Asinan cupawl hmuahhmuah cu Thlarau bangrep le pakhat ih cangvaihnak a si, a duhdān vekin mi kip hnenah thilpekpawl cu a zem fingfing.

12:4^a Rom 12:4-8; Efe 4:11; Heb 2:4

12:6^b Efe 4:6; Fil 2:13

12:7^c Efe 4:11-12

12:8^d 2Ko 8:7

12:9^e Mat 10:1; 17:19-20

12:10^f Mar 16:17; Gal 3:5; Efe 4:11; 1Joh 4:1

Ruangpum Pakhat ah Pêng Tampi

12 ^aTaksaruangpum cu pakhat lawng si khal sehla, ṭêk tampi a nei. Taksa ṭêk hmuahhmuah cu tam hman hai sehla, taksaruangpum pakhat a si, Khrih khal cuvek a si ve. 13 ^bZiangahtile Jew-pawl siseh, Grikpawl siseh, sálpawl siseh, miluatpawl siseh, kan zaten taksaruangpum pakhat ah, Thlarau pakhat in baptisma in rak pe. Kan zaten Thlarau pakhat ah in dingin in tuah.

12:12^a Rom 12:5

12:13^b Mar 1:8; Rom 6:3; Gal 3:28; Efe 2:18; Kol 3:11

14 Ziangahtile taksaruangpum cun ṭêk pakhat lawng a nei lo ih, ṭêk tampi a nei a si. 15 Ke in, “Kei cu kut ka si lo ruangah taksaruangpi-ih ta ka si lo,” ti hnik sehla, cutiih a ti ruangah taksaruangpi-ih ta a si lo ngaingai maw? 16 Cule hna in, “Kei cu mit ka si lo ruangah taksaruangpi-ih ta ka si lo,” ti hnik sehla, cutiih a ti ruangah taksaruangpi-ih ta a si lo ngaingai maw? 17 Taksaruangpum pumhlum hi mit si thluh hnik sehla, ziangtin a ngaithla thei ding? Taksaruangpum pumhlum hi hna hlir si hnik sehla, ziangtin rim a hnīm thei ding? 18 Asinan atu-ah Pathian in amai duhdān vekin, taksa ṭêk zaten taksaruangpi ah a ret cio hai. 19 Cule taksa ṭêk an zaten ṭêk pakhat lawng si ta hnik sehla, taksaruangpi cu khuiah so a um ding?

20 ^aAtu-ah thungaiten, taksa ṭêk cu tampi a um nân, taksaruangpi cu pakhat a si. 21 Cule mit in kut hnenah, “Ka lo ṭul lo,” tiah a ti thei lo ih, lu in ke hnenah, “Ka lo ṭul lo,” tiah a ti thei fawn lo. 22 Lamlam ah, taksaruangpumih siat áwlsawn zet a bang mi ṭêk hrekkhat cu a ṭul bik mi sawn an si. 23 Cule upat tlak lem loih kan ruah mi taksa ṭêk pawl, cupawl cu kan upat nasasawn ṭheu. Cun kan taksa ṭêk zahpi mipawl kha mawiten kan thuam. 24 Asinan a mawi mi kan taksa ṭêk hrekkhat cun ṭul mi an nei lo. Pathian in taksa ṭêk pawl cu pumkhat ah remten a kăwm, upatnak a tlasam mi taksa ṭêk pawl cu upatnak tamsawn Pathian in a pe. 25 Taksaruangpum ah ṭhenṭhêkawknak a umlonak dingah cuti vekin a tuah. Cuih taksa ṭêk pawl cun pakhat le pakhat bangrepin ngaihsakawktăwnnak an neih sawn nak dingah a si. 26 Taksa ṭêk pakhat in a tuar tikah, taksa ṭêk zaten an tuarpi ve. Asilole taksa ṭêk pakhat cu upat a si tikah taksa ṭêk zaten an lungawi aipuanpi ve.

12:20^a Rom 12:5

27 ^aNannih cu Khrih-ih taksaruangpum nan si ih, pumpak cio hi cuih taksaruangpumih ṭêk nan si fingfing. 28 ^bPathian in a pakhatnak ah apostolpawl, a pahnihnak ah profetpawl, a pathumnak ah zirhtupawl, cuih hnuah thilmakpawl, cun tidamnak thilpekpawl, mibăwm thei nak thilpekpawl, mi hohat thei nak thilpekpawl le ṭawng phun dangdang ṭawng thei nak thilpekpawl cu kawhhran ah a ret. 29 An zaten apostol an simaw? An zaten profet an simaw? An zaten zirhtu an simaw? An zaten thilmak tuahtu an simaw? 30 An zaten tidamnak thilpekpawl an nei maw? An zaten ṭawng phun dangdang in an ṭawng maw? An zaten cuih ṭawng phun dangdang cu an let maw? 31 Thilpek ṭhabik pawl cu nasa zetin câk sawn uh. Cule lamzin ṭhasin ka lo hmuh hrih ding.

12:27^a Rom 12:5; Efe 1:23; Kol 1:18, 24

12:28^b Mar 16:17; Rom 12:6-8; Efe 4:11

13

Duhdawtnak Diktak

1 ^aMinung ṭawngpawl le vancungmi ṭawngpawl in ṭawng hman ningla, duhdawtnak ka neih si lo ahcun, kei cu dar awn vek men le dar sumsel awn vek men ka si. 2 ^bCule profet thuphuanih thuphuan thei nak thilpek neiin, thuthup hmuahhmuah theithiamin le theihnak hmuahhmuah neiin, cule tlangpawl ṭhawn thei nak zumnak hmuahhmuah nei hman ningla, duhdawtnak ka neih si lo ahcun, zianghmanlo men ka si. 3 ^cMifarahpawl cawmnak ah ka neih mi thil hmuahhmuah pe thluh in, ka taksaruangpum hi ur dingah pe hman ningla, duhdawtnak ka neih si lo ahcun, ka hrangah hlawknak zianghman a um lo.

13:1^a Mar 16:17

13:2^b Mat 17:20; Apo 11:27; 2Ko 8:7; Efe 4:11

13:3^c Dan 3:28; Luk 19:8; Apo 2:45

4 ^aDuhdawtnak cu a thin a sau ih ngil a nei; duhdawtnak cun mi a iksik lo, a duhaw lo ih, a puarthau fawn lo; 5 ^bmawi loin a nung lo, amai hlawknak lawng a hawl lo, áwlten a thin a heng lo ih, thil ṭha lo a ruat lo, 6 ^cdingfellonak ah a ai a puang lo ih, thutak ah lungawi aipuangin a um sawn; 7 ziangkim a khuh thluh, ziangkim a zum, ziangkim a ruahsan ih, ziangkim a tuarsuak thei.

13:4^a 1Th 5:14

13:5^b Job 14:16-17; Thf 10:12; 1Pe 4:8

13:6^c 2Th 2:12; 3Joh 1:3-4

8 Duhdawtnak cu a cem dah lo. Asinan profet thuphuanih thuphuan thei nak hi um khal sehla, a hloral leh ding; ṭawng phun dangdangih ṭawng thei nak hi um khal sehla an tawp leh ding; theihnak a um khalle, a hloral leh ding. 9 Ziangahtile kim loin kan thei ih, kim loin profet thuphuanin thu kan phuang. 10 ^aAsinan a famkim mi a ra thlen tikah cun, a kim lo mi hi hlohralter a si leh ding.

13:10^a Fil 3:12

11 ^aNauhak ka si laiah, nauhak vekin ka ṭawng, nauhak bangtukin ka theithiam ih, nauhak vekin ka ruat; asinan ka pitlin tikah cun nauhak thilpawl cu ka hlăwn thluh. 12 ^bZiangahtile atu-ah cun thlalang sungah kan hmu diadi a si, asinan cu tikcān ah cun hmaităwnin kan hmu leh ding. Atu-ah cun famkim loin ka thei, asinan cu tikcān ah cun Pathian ih i theih thluh vekin thil ziangkim ka thei thluh ve leh ding.

13:11^a Sam 131:2

13:12^b Sem 32:30; Job 19:26; 26:14; Gal 4:9; 1Joh 3:2

13 ^aCule atu-ah hi thil pathum, zumnak, ruahsannak le duhdawtnak an um; asinan hipawl lakih a ropibik cu duhdawtnak hi a si.

13:13^a Mat 22:37-40; Rom 5:2-5; Gal 5:6; Efe 4:2-5; Kol 1:4-5; 1Th 1:3; Heb 6:10-12; 1Joh 4:7-12, 16

14

Thusim a Cungnunzia

1 ^aDuhdawtnak hi dawi uhla, thlarau thilpekpawl cu câk uh, a hleicein profet thuphuanih thuphuan hi câk uh. 2 ^bZiangahtile ṭawng dangih a ṭawngtu cun minung hnenah a ṭawng lo ih, Pathian hnenah a ṭawng sawn a si, ziangahtile zohman in a ṭawng mi an theithiam lo; sihmansehla thlarau ah cun thuthuppawl a sim a si. 3 ^cAsinan profet thuphuanih thuphuangtu cun minung hnenah tuahṭhatnak thu, thazang peknak thu le hnangamnak thu a sim. 4 ^dṬawng dangih a ṭawngtu cun amah le amah a tuahṭhaaw, asinan profet thuphuanih thuphuangtu cun kawhhran a tuahṭha. 5 ^eNan zaten ṭawng dangdang in ṭawng uhla ka duh, asinan profet thuphuanih thu nan phuan ding cu ka duh sawn, ziangahtile ṭawng dangdangih ṭawngtu in kawhhran tuahṭhatnak dingah a leh lo a si ahcun, profet thuphuanih thuphuangtu cu a ropisawn a si.

14:1^a Efe 4:11

14:2^b Mar 16:17

14:3^c Rom 14:19

14:4^d Mar 16:17

14:5^e Mip 11:29

Ṭawng dangih Ṭawng Thilpek

6 ^aKa u le ka nau tla, atu-ah ṭawng dangdangih ṭawngin nan hnenah ra hnik ningla, cumi cun ziang hlawknak a lo pe pei? Pathian ih thuphuansuah mi in siseh, theihnak in siseh, profet thuphuanih thuphuan thei nak in siseh, asilole zirhnak in siseh nan hnenih ka sim lawngah cumi cun a lo hlawkter a si. 7 Nunnak nei lo mi thilpawl, phirivau le ṭingṭang hmanin aw an suah tikah, anmai aw dik an suah lo asile, zohman in phirivau an tum ti le ṭingṭang an tum ti an thei thei lo ding. 8 ^bZiangahtile tawtawrawt khal in aw fiang a suah lo asile, zo so ral do dingah a tim a tuah ding? 9 Cuti vek thothoin nan hnen khalah a si, nannih in theihthiam áwl mi lei ṭawngkampawl nan ṭawng lo asile, ziang nan ṭawng ti ziangtin mi in an thei ding? Ziangahtile nannih cu thli lakih ṭawng rero men nan si ding. 10 Rinhlelh ding um loin, leilung tlunah ṭawng phun dangdang tam zet a um ih, cupawl cun sullam an nei fingfing. 11 ^cCuruangah mi pakhat in ka hnenah a ṭawng ih a ṭawng miih sullam ka theih lo ahcun, a hrangah kei cu barbaros-mi vek ka si ding ih, anih khal ka hrangah ram dang mi vek a si ve ding. 12 Cuti vek thothoin nan hnen khalah a si, thlarau lam thilpekpawl nasa zetin nan câk, cutiih nan câknak ah kawhhran tuahṭhat thiam zet tu si ding cu câk uh.

14:6^a Rom 6:17; 2Ko 8:7; Efe 1:17

14:8^b Mip 10:9; Jer 4:19

14:11^c Sem 11:7

13 Curuangah ṭawng dangih a ṭawngtu cun a leh thei nak dingah thlacam seh. 14 Ziangahtile ṭawng dangih thla ka cam asile, ka thlarau in thla a cam, asinan ka theihthiamnak cun rah zianghman a suah lo. 15 ^aCuti asile, ziangtin kan ti ding? Thlarau thawn thla ka cam ding ih, theihthiamnak thawn khal ka cam ding. Thlarau thawn hla ka sak ding ih, theihthiamnak thaw khalin ka sak ding. 16 ^bCu lo asile na thlarau ih Pathian na thangṭhat tikah, leng lam mi cu tawkih a umtu pa cun ziang na sim ti a theithiam lo ruangah, Pathian hnenih lungawi thu na sim tikah cu pa cun ziangtin, “Amen,” tiah a ti thei ding? 17 Ziangahtile lungawi thu cu na sim ṭha taktak ko, asinan cu pa cu tuahṭhat a si cuang lo.

14:15^a Efe 5:19

14:16^b Dnp 27:15-26; 1San 16:36; Neh 8:6; Sam 106:48; Mat 14:19; Thu 5:14

18 Nannihpawl hmuahhmuah hnakin ṭawng dangdangih ka ṭawng tamsawn ruangah ka Pathian hnenah lungawi thu ka sim a si. 19 Sikhalsehla kawhhran sungah cun ka ṭawngkam in mi dang khal ka zirh thei nak dingah ṭawng dangih kam 10000 ka ṭawng hnakin ka theihthiamnak thawi ṭawngkam kam nga ṭawng ka duh sawn.

20 ^aKa u le nau tla, theihthiamnak ah nauhak si hlah uh; sikhalsehla mi dang parih lungput ṭha lo thu lamah cun nausen si uhla, theihthiamnak lamah cun pitling sawn uh.

14:20^a Jer 4:22; Mat 10:16; Rom 16:19; Efe 4:14; Heb 5:12-13; 1Pe 2:2

21 ^aDān bu sungah hitin nganin a um,

14:21^a Dnp 28:49; Isa 28:11-12; Joh 10:34

“Hi minungpawl hnenah
Ram dang ṭawngpawl a ṭawngtu le ram dang mipawlih hmur hmangin
Ka ṭawng ding;
Cutin tuah khal ningla in ngai cuang lo ding,”

tiah Bawipa in a ti.

22 Curuangah ṭawng phun dangdang cu zumtupawl hrangah si loin, zumlotupawl hrangih hminsinnak a si. Asinan profet thuphuanih thuphuan thei nak cu zumlotu hrangah si loin, zumtu hrangah a si sawn. 23 ^aCuruangah kawhhran mi zaten hmun pakhat ah rakhawmin nan zaten ṭawng phun dangdangih nan ṭawng asile, cu tawkah zir lo mi le zumlotu an rat tikah nannih cu mi-â an si an lo ti lo ding maw? 24 Asinan kawhhran mi zaten profet thuphuanih thu an phuan a si ahcun, zumlotu le zir lo mi a ra luh tikah an zaten anih cu a sualnak an theisuakawter ding ih, an zaten anih cu an hmusuakawter ding. 25 ^bCuti vek cun a thinlung ih thuthuppawl cu phuanlăng a si ding. Cule a băwkkhup ding ih, Pathian a be ding, cule nan hnenah Pathian a um taktak a si, tiah a thăn ding.

14:23^a Apo 2:13

14:25^b Isa 45:14; Zek 8:23; Rom 2:16

Mipi Khawmnak ih Thlarau Thilpek Hman

26 ^aKa u le ka nau tla, ziangtin a si? Nan khawmawk tikah pakhat cio in Sam hlasak ding siseh, thuzirh ding siseh, ṭawng dang siseh, Pathian-ih thuphuansuah mi siseh, ṭawng dang leh thei nak siseh nan nei. Thil ziangkim hi tuahṭhatawktăwnnak hrangah tuah si seh. 27 Mi pakhat khat in ṭawng dang in a ṭawng asile, mi pahnih asilole a tambik ah mi pathum si hai seh, pakhat hnu pakhat ṭawng hai sehla, mi dang pakhat in an ṭawng let seh. 28 Asinan lettu a um lo asile, a ṭawngtu cu kawhhran sungah daiten um seh. Amah le amah hnenah le Pathian hnenah ṭawng seh.

14:26^a Rom 7:1; 14:19; Efe 5:19

29 Profetpawl cun pahnih, asilole pathum in thuphuang hai sehla, a dangpawl in thu rak ṭhenfel hai seh. 30 Asinan a kiangih to mi dang hnenah thil pakhat khat phuanlăng asile, a hmaisa pa cu daiten rak um men seh. 31 Ziangahtile mi kip in an zir ih thazang an ngah thei nak dingah, nan zaten profet thuphuan in pakhat hnu pakhat thu nan phuang thei. 32 ^aProfetpawlih thlarau cu profetpawlih thu hnuaiah a um. 33 ^bZiangahtile Pathian cu buainak Pathian a si lo ih, mithiangpawlih kawhhran hmuahhmuah ah daihnak a um vekin, anih cu daihnak Pathian a si sawn.

14:32^a 1Joh 4:1

14:33^b Apo 9:3; Rom 15:33

34 ^aKawhhranpawl ah nan nunaupawl cu daiten um hai seh, ziangahtile annih cu ṭawng sian an si lo, Dān ih a sim vekin, annih cu tlulut sawn men hai seh. 35 Thil ziangkhal zir an duh asile, inn ah an pasal sut hai seh; ziangahtile nunau hrangah kawhhran sungih ṭawng cu ningzakza a si.

14:34^a Sem 3:16; Efe 5:22; 1Ti 2:11-12

36 ^aAsilole Pathian kamsuakthu cu nanmah hnen ihsin maw a thawk? Asilole nanmah hnen lawngah maw a thlen? 37 ^bMi zokhal amah le amah profet le thlarau mi ih a ruahawk asile, nan hnenih ka ngan mi thupawl hi Bawipaih thupek an si ti thei seh. 38 Asinan mi pakhat khat in cumi cu a theihthiam lo asile, thei loin um men seh.

14:36^a Heb 4:12

14:37^b Apo 11:27; 2Ko 10:7; 1Joh 4:6

39 ^aCuruangah u le nau tla, profet thuphuanih thuphuan ding hi nasa zetin câk uhla, ṭawng phun dangdangih ṭawng ding hi kham hlah uh. 40 ^bThil ziangkim hi mawi zet le fel zetin tuah si seh.

14:39^a Efe 4:11

14:40^b Kol 2:5

15

Khrih Thawhsalnak

1 ^aCuihtlunah u le nau tla, nan hnenih ka rak phuan zo mi, nan rak cohlan zo mi le nan dīnnak khal a si mi thuthangṭha cu nan hnenih thănsal ka duh. 2 ^bNan hnenih ka rak phuan mi kamsuakthu kha nan kaih hnget asile, cumi hmangin rundam nan si. Cu lo asile nan zum lak men a si.

15:1^a Isa 40:9; Rom 2:16; Gal 1:8

15:2^b Rom 1:16; 11:22

3 ^aZiangahtile a hmaisabikah keimah khalih ka rak cohlan ve mi cu nan hnenah ka rak lo pe sâwngsin. Cumi cu hitin a si, Cathiangpawl ih a sim vekin Khrih cu kan sualpawl hrangah a thi. 4 ^bAn phum ih, Cathiangpawl ih a sim vekin a ni thumnak ah a thosal. 5 ^cCule anih cu Kefas hnenah a lang, cun mi hleihnih pawl hnenah a lang. 6 ^dCuih hnuah vei khatte unau 500 leng lo hnenah a lang, cupawl lakih a tamsawn cu atu tiang an nung lai, asinan a hrekkhat cu an itthat zo. 7 ^eCuih hnuah James hnenah a lang, cun apostolpawl hmuahhmuah hnenah a lang. 8 ^fCun a netabikah a tikcucān lo ih suak, keimah hnen khalah a lang ve.

15:3^a Isa 53:5; Mat 24:27; Joh 1:29; Apo 17:2; Gal 1:4, 12; 1Pe 2:24

15:4^b Mat 16:21; Joh 2:21-22

15:5^c Mar 16:14; Luk 24:34, 36-43

15:6^d Mat 9:24

15:7^e Luk 24:33, 36-37; Apo 1:3-4; 15:13

15:8^f Gal 1:16

9 ^aZiangahtile kei cu apostolpawl hmuahhmuah lakah a thupi lo bik ka si, Pathian kawhhran ka hrem ruangah apostol tiih kawh tlak hman ka si lo. 10 Asinan ka sinak hi Pathian zangfahnak ruangih si ka si, ka parih zangfahnak i pek mi cu rahsuah nei lo a si lo. An zate hnakin tamsawn ka ṭuan; asinan a ṭuantu cu keimah ka si lo, ka hnenih um Pathian zangfahnak in a ṭuan sawn a si. 11 ^bCuruangah keimah in siseh, annih in siseh, cuih thuthangṭha cu kan phuang ih nannih in cucu nan rak zum.

15:9^a Apo 8:3; 15:10; 2Ko 12:11; Efe 3:8; Fil 2:13; Kol 1:29; 1Ti 1:15

15:11^b Gal 2:6

Mithi Thawhsalnak

12 ^aMithi lak ihsin Khrih a thosal ti hi kan phuang, cutin kan phuang ko na cingin nanmah lakih mi hrekkhat cun mithi thawhsalnak a um lo, tiah nan ti, ziangtin cutin nan ti thei? 13 Mithi thawhsalnak a um lo asile, Khrih khal a thosal lo tinak a si ding. 14 ^bCule Khrih a thawhsal lo asile, kan thusim mi cu zianghmanlo men a si ding ih, nan zumnak khal zianghmanlo men a si ding. 15 ^cA si, kannih cu Pathian thutheihpitu dik loih hmuh kan si ding, ziangruangahtile mithi an thawhsal taktak lo a si ahcun, a thosal lo pi Khrih kha Pathian in Khrih a thosalter tiah Pathian thuhla kan rak theihter a si ding. 16 Ziangahtile mithi an thawhsal lo a si ahcun, Khrih khal a thosal lo tinak a si ding. 17 ^dKhrih cu thawhter a si lo ahcun, nan zumnak cu ṭhathnemnak nei lo a si ding ih nanmah khal nan sualpawl ah nan rak um hrih lai tinak a si ding! 18 ^eCun Khrih ih a itthat mipawl khal an hloral lan ta tinak a si ding. 19 Hi nun sung hrang lawngah Khrih ah ruahsannak kan neih asile, mi dang hmuahhmuah hnakih zangfahumzabik kan si ding.

15:12^a Joh 11:24; 2Ti 2:18

15:14^b 1Th 4:14

15:15^c Apo 2:24

15:17^d Rom 4:25

15:18^e Mat 9:24

20 ^aAsinan atu-ah Khrih cu mithi lak ihsin a thosal ih, a itthat mipawlih rah hmaisabikah a cang. 21 ^bMi pakhat ruangin thihnak a ra ih, mithi lak ihsin thawhsalnak khal mi pakhat ruangin a ra. 22 ^cAdam ah mi hmuahhmuah an thih vekin, cuti vek thothoin Khrih ah mi hmuahhmuah nunter an si ve ding. 23 ^dSihmansehla anmai cān cio ah mi kip an tho ding: Khrih cu rah hmaisabik a si, cuih hnuah, Khrih a ratsal tikah Khrih ta a si mipawl an tho ding. 24 ^eCun Khrih in uknak hmuahhmuah, thuneihnak hmuahhmuah le huham cu zianghmanlo ah a cangter ding ih a uknak cu Pa Pathian hnenih a hlăn hnuah, san cemnak cu a ra thleng ding. 25 ^fZiangahtile anih cun a ral zaten a ke hnuaiih a ret thluh hlanlo a uk ding. 26 ^gSiatbăl ding mi a netabik ral cu thihnak a si. 27 ^hZiangahtile, “Pathian in thil hmuahhmuah cu Khrih-ih ke hnuaiah a ret ṭheh.” Asinan, “Thil hmuahhmuah cu Khrih-ih ke hnuaiah a ret ṭheh,” a ti tikah, thil hmuahhmuah a ke hnuaiih rettu cu a huaptel ve lo ti a fiang.

15:20^a Mat 9:24; Apo 26:23; 1Pe 1:3

15:21^b Rom 5:12

15:22^c Rom 5:14-18

15:23^d 1Th 2:19

15:24^e Dan 2:44; Rom 8:38; 2Pe 1:11

15:25^f Isa 9:7; Mat 22:44

15:26^g 2Ti 1:10; Thu 20:14

15:27^h Sam 8:6; Mat 22:44; 28:18

28 ^aFapa hnuaiah thil ziangkim ret thluh a si tikah, Fapa hnuaiih thil ziangkim ret thluh tu Pathian hnuaiah Fapa amah rori khal a retaw ding ih, Pathian cu ziangkimih ziangkim a si thei ding.

15:28^a Fil 3:21

29 Cuti a si lo ahcun, a thi mipawl hrangih baptisma a cotupawl hin, mithi an thawhsal riai lo asile, ziang an tuah pei? Ziangah so mithipawl hrangah baptisma an co? 30 ^aCule ziangah so kannihpawl hi ṭihphângih kan um ringring? 31 ^bKhrih Jesu kan Bawipa ah nanmah ih tluangkhawnnak ka neih mi thawngin, ni tin ka thi a si ti ka nĕmhnget. 32 ^cMilai sualawkdān vekih Efesa khua ah sahrangpawl thawn rak sualaw nungla teh, ka hrangah hlawknak ziang a um ding? Mithi an thawhsal lo asile,

15:30^a 2Ko 11:26

15:31^b Rom 8:36

15:32^c Isa 22:13; Luk 12:19; Apo 18:19; 2Ko 1:8

“Ei uhsi la in uhsi, ziangahtile thaisun ah kan thi ding,”

tiah kan ti pei cu!

33 ^aBumin um hlah uh, “Miṭha lo pawl thawi kawmawknak cun nuncan ṭha a siatsuah.” 34 ^bDingfelnak ah ṭhangharh uhla, thil sual tuah hlah uh; ziangahtile mi hrekkhat cun Pathian an thei lo. Cuih thu cu nan ning a zahnak dingah ka sim a si.

15:33^a Thf 22:24-25

15:34^b Gal 4:8

A Sunglawi Mi Taksaruangpum

35 ^aAsinan mi hrekkhat in, “Mithipawl cu ziangti vekin thawhter an si? Ziang taksaruangpum thawn an tho?” tiah an ti ding. 36 ^bNang mi-â, na tuh mi thlaici kha a thih lo ahcun a nung thei lo. 37 Cule thlaici na tuh tikah a ra um ding mi a kung kha na tuh lo, cuhnakin sangvut siseh, thlaici dang siseh, a ci lawng na tuh sawn a si. 38 ^cAsinan Pathian in cuih thlaici hrangah a duhdān vekin kung a pe hai ih, thlaici zate hrangah anmai kung cio a pe fingfing.

15:35^a Eze 37:3; Rom 9:19

15:36^b Luk 11:40; Joh 12:24

15:38^c Sem 1:11

39 Titsa hmuahhmuah hi titsa phun khat an si lo, minungpawlih titsa a dang, ramsapawlih titsa a dang, ngapawlih titsa a dang, vatepawlih titsa khal a dang. 40 Van taksa a um ih, lei taksa khal a um; asinan van taksa ropitnak cu a dangih, lei taksa ropitnak khal a dang. 41 ^aNi ropitnak a dangih, thlapi ropitnak a dang, arsipawlih ropitnak khal a dang. Arsi le arsi khal ropitnak ah an bangaw lo.

15:41^a Sam 8:1, 3; 19:4-6

42 ^aMithi thawhsalnak khal cuti vek thotho a si. Taksaruangpum cu ṭawih thei in tuh a si ih, ṭawih thei loin thawhter a si. 43 ^bTaksaruangpum cu santlailo zetih tuh a si ih, ropi zetin thawhter a si. Cak lo zetih tuh a si ih, huham neiih thawhter a si. 44 Lei taksaruangpum cu lei taksaruangpum in tuh a si ih, thlarau taksaruangpum ih thawhter a si. Lei taksaruangpum a um ih, thlarau taksaruangpum khal a um. 45 ^cCumi cu, “Milai hmaisa Adam cu a nung mi lei taksaruangpum ah a cang,” tiih ngan vek khan a si. Adam neta cu nunnak petu thlarau a si.

15:42^a Dan 12:3; Mat 13:43

15:43^b Fil 3:21; Kol 3:4

15:45^c Sem 2:7; Joh 5:21; Rom 5:14; 8:2

46 Sikhalsehla a pakhatnak cu thlarau lam milai a si lo, anih cu lei milai a si sawn, cuih hnuah thlarau lam milai a ra. 47 ^aMilai pakhatnak cu leilung mi, leivut ihsin tuah mi a si; a pahnihnak milai cu van ihsin a ra mi Bawipa a si. 48 ^bLeivut ih tuah mi milaipawl cu, cuih leivut ih tuah mi milai pa vek kha an si. Cule van ih um mipawl cu, cuih van milai pa vek kha an si. 49 ^cLeivut ih tuah mi milai băngnak kan ken bangin, van milai pa băngnak khal kan keng ding a si.

15:47^a Sem 2:7; Sam 90:3; Joh 3:13, 31

15:48^b Fil 3:20

15:49^c Sem 5:3; Rom 8:29

Kan Nehnak Netabik

50 ^aU le nau tla, atu-ah hihi ka sim a si, milai titsa le thisen cun Pathian uknak cu ro ah a co thei lo ih, a ṭawih thei mi in a ṭawihrál thei lo cu ro ah a co thei fawn lo. 51–52 ^bNgai hnik uh, thuthup ka lo sim a si: kan zaten kan itthat ṭheh lo ding, tawtawrawt netabik a ăwn tikah rei lo te sungah, mit ṭhep karah tidanglam kan si ding. Ziangahtile tawtawrawt a awn ding ih mithipawl cu ṭawihrál thei loin an tho ding, cule tidanglam kan si ding. 53 ^cZiangahtile a ṭawihrál thei mi hi taksaruangpum hin a ṭawihrál thei lo mi a hruh tengteng ding ih, a thi thei mi hi taksaruangpum hin a thi thei lo mi a hruh tengteng ding.

15:50^a Mat 25:34; Efe 6:12; Heb 2:14

15:51-52^b Mat 9:24; 24:31; Joh 5:25; 2Ko 5:4; Fil 3:21

15:53^c 2Ko 5:2, 4

54 ^aCule a ṭawihrál thei mi hin a ṭawihrál thei lo mi a hruh ih a thi thei mi hin a thi thei lo mi a hruh tikah,

15:54^a Isa 25:8; Heb 2:14; Thu 20:14

“Thihnak cu nehnak in a dawlh ṭheh,
55 ^aMaw Thihnak, na mi hĕnnak hmanrua cu khuiah so?
Maw Mithi Khua, na nehnak cu khuiah so?”

15:55^a Hos 13:14; Apo 13:14

tiih ngan mi cu a thlengkim ding.

56 ^aThihnakih mi hĕnnak hmanrua cu sual a si ih, sualih cahnak cu Dān hi a si. 57 ^bAsinan kan Bawipa Jesu Khrih zarih nehnak in petu, Pathian hnenah lungawi thu um seh.

15:56^a Rom 4:15; 5:12

15:57^b Rom 8:37; 2Ko 2:14; Heb 2:14-15

58 ^aCuruangah ka duhdawt mi u le nau tla, nan ṭuanbăngnak cu Bawipa ah a lak men a si lo ti nan theih ruangah ding hnget uh, ṭhawn theih loin um uhla, catbang loin Bawipaih hnaṭuannak ah peaw sinsin uh.

15:58^a Isa 65:23

16

Mithiangpawl hrangih Thawhhlawm

1 ^aAtu-ah mithiangpawl hrangih thawhhlawm khawn thuhla ah, Galatia peng ih um kawhhranpawl hnenih thu ka rak pek vek khan nannih khal in tuah ve uh. 2 ^bZarh khat ih a ni khatnak ah mi kip in malsawm nan dawndān cio vekin rak rethran uhla, rak khawl cia uh, cutin nan hnenih ka rat tikah sumpai nan khawn a ṭul nawn lo ding. 3 ^cCule ka rat tikah siang zetih nan thilpek cu, Jerusalem ih fehpitu dingah nan ca sungih rem nan ti mipawl cu ka thlah hai ding. 4 Keimah rori feh a remcān asile, annih cu ka zawngah an feh ve sawn ding.

16:1^a Apo 9:13; 16:6; 24:17

16:2^b Apo 20:7; 2Ko 9:4-5

16:3^c 2Ko 3:1

Khualtlawng dingih Ruahmannak

5 ^aMasidonia peng ka paltlăng tikah nan hnenah ka ra ding, ziangahtile Masidonia peng cu ka paltlăng ding a si. 6 ^bCule ka khualtlawnnak khui tawk hmun khalih in thlah thei nak dingah, thlatang sung hmuahhmuah nan hnenah ka câm khal a si men thei. 7 ^cZiangahtile atu ka feh phahih nanmah lo hmuh men cu ka duh lo; netaah Bawipa in i sian asile, nanmai hnenih cān tawkfang cām ding ka beisei sawn a si. 8 ^dAsinan Pentikos puai tiang Efesa khua ah ka cām ding. 9 ^eZiangahtile ka hrangah a kau zet mi le hmual nei sângka a áwngaw ih, dodaltu tampi khal an um ve.

16:5^a Apo 16:9

16:6^b Rom 15:24; Tit 3:13

16:7^c Apo 18:21

16:8^d Apo 18:19

16:9^e Apo 14:27

10 ^aTimothy a ra thlen asile, thlaphâng loih nan hnenih a um thei nak dingah rak ngaihsak uh; ziangahtile anih cun Bawipaih hna ka ṭuan vekin a ṭuan ve. 11 ^bCuruangah zohman in amah cu nautat hlah hai seh. Ka hnenih a rat thei nak dingah hnangamten thlah uh; ziangahtile unaupawl zawngih amah a rat ding cu ka thlir a si.

16:10^a Apo 16:1

16:11^b Apo 15:33; 3Joh 1:6

12 ^aKan unaupa Apollos thuhla ah cun, unaupawl zawngah nan hnenih ra dingin nasa zetin tha ka pe, asinan atu-ah cun rat a duh lo, cān remcâng a neih tikah a ra leh ding.

16:12^a Apo 18:24

Thazang Peknak Netabik

13 ^aRalring uh, zumnak ah dīng hnget uh, pacang zetin um uhla, cak zetin um uh. 14 Nan tuah mi zaten duhdawtnak ih tuah si seh.

16:13^a Gal 5:1; Efe 6:10; Fil 1:27; 1Th 3:8; Tit 1:9

15 ^aU le nau tla, Stefanas teih sungkua cu Akaia peng ih rah hmaisabik an si ti nan thei. Annih cu mithiangpawl rennak ah an rak peaw zet. 16 ^bCuvek mipawl hnenah le zokhal kan hnaṭuanpi a si mi le nasa zetih hna a ṭuantupawl hnenah tlulut dingin ka lo ngen a si. 17 ^cStefanas, Fortunaṭas le Akaikas an rak thlen ruangah ka lung a awi, ziangahtile nannih ih nan rak tuah lo mipawl kha annih in an rak pe thluh. 18 ^dZiangahtile annih cun ka thlarau le nan thlarau cu tha thar an pe. Curuangah khavek mipawl kha rak lawm uh.

16:15^a Apo 9:13; 18:12; 24:17; Rom 16:5

16:16^b 1Th 5:12; Heb 13:17

16:17^c 2Ko 11:9; Fil 2:30

16:18^d Rom 15:32; Fil 2:29; Flm 1:7

Cibaibûknak Netabik

19 ^aAsia peng ih kawhhranpawl hmuahhmuah in cibai an lo bûk. Akuila le Prisilla in an inn ih a um mi kawhhran thawn lungawi zetin Bawipa ah cibai an lo bûk. 20 Unaupawl hmuahhmuah in cibai an lo bûk.

16:19^a Apo 2:9; 18:2; Rom 16:5

Pakhat le pakhat hnămawknak thianghlim in cibaibûkaw uh.

21 ^aKeimah, Paul in hih cibaibûknak hi ka kut rori in ka ngan.

16:21^a Gal 6:11; Kol 4:18; Flm 1:19

22 ^aZokhal Bawipa Jesu Khrih a duhdaw lo asile, anih cu ^bAnathema in um seh. ^cMaranatha!

16:22^a Rom 9:3; Efe 6:24; Thu 22:20

16:22^b Anathema: Grik ṭawng a si ih, “Camsiat,” tinak a si.

16:22^c Maranatha: Aramik ṭawng a si ih, “Bawipa ra aw,” tinak a si.

23 ^aBawipa Jesu Khrih-ih zangfahnak cu nan hnenah um seh.

16:23^a Rom 16:20

24 Khrih Jesu ih um nan zate hnenah ka duhdawtnak um hram seh. Amen.