About Bible Thianghlim | ©

BibleThianghlim – Thuphuan

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

Thuphuan

12345678910
11121314151617181920
2122

• A ngantu: John
• A siartu: Asia Minor ih kawhhran pasarih
• Ngan kum: A.D. 95

Apostol John in Thukham Thar ah cabu panga a ngan. Cupawl cu Thuthangṭha John, John cakuat pakhatnak, John cakuat pahnihnak, John cakuat pathumnak le Thuphuan tla hi an si. John cu apostol a si vekin, Jesu leitlun ih rawng a bawl laiah Khrih thawn an rak tlanglêngtlang. A cangan mi hi huham thawn a khat mi Jesu-ih kamsuakthu le thil ti mipawl rak hmutu dinhmun ih a ngan mi an si. Cuihhleiah John in thosal Jesu khal a hmu. John cu A.D. 95 hrawngah Patmos tikulh ah thawng a rak tla. Hivek nun harsa a tawn laiah ropi zetih Jesu Khrih phuanlăngawknak a hmu. Thuphuan cabu hi Patmos tikulh ih a phuanlăngawk ṭumah Khrih in John a rak sim mi ngankhum mi a si.

Hih Thuphuan cabu in John le kum zabi pakhatnak ih zumtupawl thazang a cakter zet ding. Anmai san ih uktu cu Domisian a si. Rom siangpahrang in zumtupawl hrem dingin thu a rak pe ngaingai lo nân, anmah huat ding tha a rak pe. Thuphuan bung 2-3 ih kawhhranpawl hnenih cakuatpawl in cuih huatnak cu a langter. Zumtu rinumteih nung dingah cun nunsimnak, nunzirhnak le thapeknak pawl a ṭul. Curuangah Jesu in John hnenah kawhhranpawl in an siar, an theih le an thlun dingah hi simsungnak thupawl hi a nganter (1:3).

Hih cabu hi larnak a hmuh hnuih John-ih a ngan mi a si. Curuangah hi cabu hi simsungnak tiin a ko (1:3; 22:7, 10, 18, 19). A thu tambik cu leitlun le Pathian ih ralpawl parih a ra thleng lai ding mi dāntatnakpawl simsungnak thu a si. Khrih in a ralpawl parah nehnak a co ding. Thuphuan cabu hi Khrih-ih tlennak hnaṭuan cemnak ropi thu a simsung. Thuphuan hi simsungnak cabu a si nân, John in kawhhranpawl hnenah cakuat pakhat vekih a ngan mi a si. A net tiang thulung le rinumin um dingah tha a pe.

Thuphuan in Khrih-ih nehnak le leitlun ih Pathian uknak a langter. “Thah mi Tuufano cu huham, lennak, fimnak, cahnak, cawimawinak, ropitnak le thangṭhatnak co tlak a si” (5:12).

1

Thuhmaihruai

1 ^aHihi Jesu Khrih-ih Thuphuan a si, a siahhlawhpawl hnenih hmuh dingah Pathian in Jesu Khrih hnenih a pek mi, a rei hlanih thil rung thleng tengteng ding mipawl an si. Cucu Pathian in a vancungmi thlahin a siahhlawh John hnenah a run theihter. 2 ^bJohn cun Pathian kamsuakthu le Jesu Khrih-ih theihternak le a hmuh mi thil zaten a theihter. 3 ^cHi simsungnak ṭawngkampawl a siartu le a ngaithlatu le a sungih ngan mi thupawl a thluntu cu mithlawsuak an si, ziangahtile cān a nai zo.

1:1^a Dan 2:28; Joh 12:49

1:2^b 1Ko 1:6; Heb 4:12

1:3^c Luk 11:28; Rom 13:11

Cibaibûknak le Faknak

4 ^aJohn in Asia peng ih um mi kawhhran pasarih pawl hnenah:

1:4^a Isa 11:2; Rom 1:7

A um lai mi le a rak um zo mi le a ra leh ding mi hnen ihsin le a laltokham hmaika ih um Thlarau pasarih pawl hnen ihsin zangfahnak le hnangamdaihnak nan hnenah um hram seh. 5 ^aCule theihpitu rinum a si mi, mithi lak ihsi suak hmaisabik, leitlun siangpahrangpawl uktu a si mi, Jesu Khrih hnen ihsin zangfahnak le hnangamdaihnak nan hnenah um hram seh.

1:5^a Isa 55:4; Joh 18:37; Rom 3:25; 8:37; Kol 1:18; 1Ti 6:15

Anih cu in duhdawtu le amai thisen rori ih kan sualpawl in khawlhfaisaktu a si. 6 ^aCun anih cu Pathian le a Pa hnen lamih siangpahrang le puithiam ih in tuahtu a si. A hnenah thangṭhatnak le thiltitheinak cu kumkhuain kumkhua tiang um hram seh. Amen.

1:6^a Rom 11:36; 15:6; 1Pe 2:5

7 ^aNgai hnik uh, anih cu mero thawn a ra ding, cule mit zaten amah cu an hmu ding, amah a suntupawl rori khal in an hmu ding. Cule leitlun ih hnám hmuahhmuah in amah an ṭah ding. A si, Amen.

1:7^a Dan 7:13; Zek 12:10; Mat 16:27; Luk 17:30; Joh 19:34, 37; 1Ko 1:7; 1Th 2:19

8 “Kei cu Alfa le Omega, Thawknak le Cemnak, a um lai mi, a um zo mi le a ra leh ding mi, Ziangkimtithei ka si,” tiah Bawipa in a ti.

Mi Pakhat, Minung Fapa Vek

9 ^aKei, John, nan unaupa, harsatnak le Jesu Khrih-ih uknak le tuarfainak ṭawmpitu cu Pathian kamsuakthu ruangah le Jesu Khrih theihpinak ruangah Patmos tikulh an ti mi ah ka um. 10 ^bBawipaih ni ah Thlarau in ka um, cule ka dung lam ihsin tawtawrawt aw vek aw ring zetin, 11 ^c“Kei cu Alfa le Omega, Hmaisabik le Netabik ka si. Cule na hmuh mi cu cazual sungah ngan awla, Asia peng ih a um mi: Efesa khua, Smirna khua, Pergamos khua, Thiatira khua, Sardis khua, Filadelfia khua le Laodisia khua pawl ih a um mi kawhhran pasarih hnenah kuat aw,” a ti ka thei.

1:9^a Apo 14:22; 2Ko 1:7; Fil 4:14; 2Ti 2:12; Heb 4:12

1:10^b Apo 20:7

1:11^c Apo 16:14; 18:19; Kol 2:1

12 ^aCun i betu hmu dingah ka heraw. Cule ka herawk tikah, sui meito ṭhuam pasarih ka hmu. 13 ^bMeito ṭhuam pasarih laiah Minung Fapa a bang mi Pa cu a kephah tiangin sinfen a hruk ih, a ṭāng ah sui ṭāngkhap a khap. 14 ^cA lu le a sám cu tuu hmul le vur vekin a var ih, a mit cu meisa alh vek a si. 15 ^dA ke cu rawhtitnak meisa vâm sungih rawh thianhlim zo mi dar tle vek a si ih, a aw cu tidai tampi aw vek a si. 16 ^eA vawrh lam kut ah arsi pasarih a keng ih, a kâ ihsin kap hnih hriam ralnâm hriam zet a suak, cule a hmel cu sun ni ling zet vek a si.

1:12^a Suah 25:31-40; Zek 4:2

1:13^b Isa 6:1; Eze 1:26; Dan 7:13; 10:8

1:14^c Dan 7:9

1:15^d Eze 1:7; 43:2; Dan 10:6

1:16^e Lai 5:31; Isa 1:20; Mat 17:2; Heb 4:12

17 ^aCule amah ka hmuh tikah, a ke hramah mithi vekin ka tlu. Cu tikah anih in a vawrh lam kut cu ka parah a suang ih ka hnenah, “Ṭih hlah, keimah hi Hmaisabik le Netabik ka si. 18 ^bKei cu a nung mi le a thi dah zo mi ka si, ngai hnik, kei cu kumkhuain ka nung. Amen. Mithi khua le Thihnak tawhfungpawl ka nei.

1:17^a Isa 41:4; Eze 1:28; Dan 8:17-18; Mat 14:27

1:18^b Dnp 32:40; Dan 4:34; Rom 6:9

19 ^a“Na hmuh zo mi thilpawl le atu-ih a um rero lai mi thilpawl le lehhnuih a um leh ding mi thilpawl cu ngan aw. 20 ^bKa kut vawrh lamih arsi pasarih na hmuh mi le sui meito ṭhuam pasarih na hmuh miih thuthup cu hihi a si: arsi pasarih cu kawhhran pasarih pawlih vancungmi an si ih, meito vannak pasarih cu kawhhran pasarih pawl kha an si.

1:19^a Heb 2:2

1:20^b Mat 5:14-15

2

Efesa Kawhhran Hnenah

1 ^a“Efesa kawhhran vancungmi hnenah:

2:1^a Apo 18:19

‘A kut vawrh lamih arsi pasarih keng ih, sui meito ṭhuam pasarih lakih vâk rero tu in, 2 ^a“Na hnaṭuan mipawl, na ṭuan băngnakpawl le na tuarfainakpawl, miṭha lo pawl na zāwi thei lozia pawl ka thei. Apostol si si loih apostol tiawpawl na hniksak ih, thuphan per an si ti na rak hmu zo. 3 ^bCun na tuar ṭenṭo ih, tuarfainak na nei, ka hmin ruangah na ṭuanbāng zet ih, na cau lo. 4 ^cSihmansehla lo dĕmnak ka nei, cucu na duhdawtnak hmaisa na tlansan mi kha a si. 5 Curuangah khui tawkin na tlu ti cîng ringring awla, lungthlĕngin, na tuah mi thil hmaisa pawl kha tuahsal aw. Culole na hnenah zamrang zetin ka ra ding ih, na lung na thleng lo asile na meito ṭhuam cu a hmun ihsin ka ṭhawn ding. 6 Asinan hihi na nei, Nikolas thluntupawlih thil tipawl na hua, cucu kei khal in ka hua ve.

2:2^a 2Ko 11:13; 1Joh 4:1

2:3^b Joh 15:21

2:4^c Jer 2:2; Mat 24:12

7 ^a“Thlarau in kawhhranpawl hnenih a sim mi hi hna a neitu cun thei seh. Nehtu hnenah Pathian Paradise ih a um mi nunnak thingkung ihsin a ei dingah ka pe ding,” ti mi thilpawl hi a sim,’ tiin ngan aw.

2:7^a Sem 2:9; Mat 11:15; Luk 23:43; Joh 16:33

Smirna Kawhhran Hnenah

8 “Cule Smirna kawhhran vancungmi hnenah:

‘Hmaisabik le Netabik, a thi ih a nungsaltu in, 9 ^a“Na hnaṭuan mipawl, na harsatnak le na retheihnak ka thei, asinan na lian. Cule Jew-mi si lo, Jew-mi ka si tiawpawlih an lo relsiatnak ka thei, annih cu Setan-ih sinakok an si. 10 ^bNa tuar ding mi thilpawl hi zianghman ṭih hlah. Ngai hnik, hniksak nan si thei nak dingah Diabol cun nan lakih mi hrekkhat cu thawng a lo thla cing ding. Cun ni hra sung harsatnak nan tuar ding. Thih tiang rinumin um aw, cule nunnak lallukhum ka lo pe ding. 11 Thlarau in kawhhranpawl hnenih a sim mi hi hna a neitu cun thei seh. Nehtu cu vei hnih thihnak in a tuahmawh hrimhrim lo ding,” ti mi thilpawl hi a sim,’ tiin ngan aw.

2:9^a Mat 4:10; 2Ko 6:10; Jam 2:5

2:10^b Dan 1:12, 14; Mat 10:22; 1Ko 9:25

Pergamos Kawhhran Hnenah

12 “Cule Pergamos kawhhran vancungmi hnenah:

‘Ralnâm kap hnih hriam neitu in, 13 ^a“Na hnaṭuan mipawl le na cēnnak hmun cu Setan-ih laltokham umnak hmun a si ti ka thei. Cule ka hmin na kai hnget ih, ka martar rinum Anṭipas, nan lakah Setan cēnnak hmun ih an rak thah lai khalah khan keimah i zumnak na phatsan lo.

2:13^a Mat 4:10

14 ^a“Asinan kha tawkah Balaam-ih zirhnak pawmtupawl na umpi hai ruangah lo dĕmnak thil málte ka nei. Israel-mipawl hmaika ah tlûknak ret dingin Balaam cun Balak a rak zirh. Cuih an tlûknak cu milem hnenih an hlăn mi thil ei ding le nunau-mipa sualnak tuah dingin a si. 15 Cuvek thothoin Nikolas thluntupawlih zirhnak pawmtupawl khal na umpi, cuih zirhawknak cu ka hua. 16 Lungthlĕng aw, cu lo asile na hnenah zamrang zetin ka ra ding ih, ka kâ ih ralnâm in cupawl cu ka do hai ding.

2:14^a Apo 15:20; 1Ko 6:13; 2Th 2:8; 2Pe 2:15

17 ^a“Thlarau in kawhhranpawl hnenih a sim mi hi hna a neitu cun thei seh. Nehtu hnenah ei dingih thuh mi manna ka pe ding. Lung var ka pe ding ih, cuih lung parih hmin thar ngan mi cu a cotu siarlo zohman in an thei lo,” ti mi thilpawl a sim,’ tiin ngan aw.

2:17^a Isa 56:5; Joh 6:49-50; 16:33

Thiatira Kawhhran Hnenah

18 ^a“Cule Thiatira kawhhran vancungmi hnenah:

2:18^a Mat 4:3; Apo 16:14

‘Pathian Fapa, a mit meisa alh bang le a ke dar tle vek a si mi in, 19 “Na hnaṭuan mipawl, na duhdawtnak, na rawngbawlnak, na zumnak, na tuarfainak pawl ka thei. Na hnaṭuan netabik pawl cu a hmaisabik pawl hnakin a nasasawn ti ka thei.

20 ^a“Cuti si hman sehla khaih nunau, Jezebel, profet tiaw nu kha ka siahhlawhpawl nunau-mipa sualnak tuah ding le milem hnenih hlăn mi thil ei ding a zirh hai ding le a hruaipēn ding na sian ruangah lo dĕmnak thil málte ka nei. 21 ^bCule a nunau-mipa sual tuahnak ihsin lungthlĕng dingah cān ka pe nân, a lung a thlĕng cuang lo. 22 Ngai hnik, amah cu mina ihkhun ah ka hlăwn ding ih, amah thawi a uiretupawl khal an thil tuah mipawl ihsin an lung an thlĕng lo asile, harsatnak rapthlak sungah ka thla hai ding. 23 ^cA fātepawl cu thihnak in ka that ding ih, keimah cu ruahnak lungthin le thinlung zohtu ka si ti kawhhran zaten an thei ding. Cule nan hnaṭuandān vek cio in ka lo rūlsal ding.

2:20^a 1Sp 16:31; 2Sp 9:7; Apo 15:20

2:21^b Rom 2:4-5; 2Pe 3:9

2:23^c 1Sam 16:7; 1Sp 8:39; Sam 139:1-2, 23; Thf 21:2; Jer 17:10; Mat 16:27; Luk 16:15; Rom 8:27; 1Th 2:4

24 ^a“Cun cuih zirhnak pawm loih, ‘Setan-ih thu thûk,’ an ti mipawl a thei lo tu nannih, Thiatira khua ih a tāng mipawl hnenah ka lo sim, nan parah phurrit dang ka ṭhum lo ding. 25 ^bSikhalsehla nan rak neih cia mi kha cu ka rat tiangin kai hnget uh.

2:24^a Apo 15:28

2:25^b Mat 16:27

26 ^a“Cule nehtu le ka hnaṭuanpawl a cemnet tiangih a kiltu hnenah miphunpawl parih thuneihnak ka pe ding.

2:26^a Sam 2:8; Mat 10:22; Joh 16:33

27 ^a‘Anih cun thir kianghrăwl in a uk hai ding ih,
Bel tuahtu paih belpawl bangin annih cu hlăwnkuai nêknêk an si ding.’

2:27^a Sam 2:9; Isa 30:14; Jer 19:11

Ka Paih hnen ihsin thuneihnak ka hmuh vekin, an hnen khalah thuneihnak ka pe ve hai ding. 28 Cule amah cu deirel arsi ka pe ding.

29 “Thlarau in kawhhranpawl hnenih a sim mi hi hna a neitu cun thei seh,” ti mi thilpawl a sim,’ tiin ngan aw.

3

Sardis Kawhhran Hnenah

1 ^a“Cule Sardis kawhhran vancungmi hnenah:

3:1^a 1Ti 5:6

‘Pathian Thlarau pasarih le arsi pasarih neitu pa in, “Na hnaṭuan mipawl ka thei, nung hmin na pu nân na thi a si. 2 Ralring awla, a thi zikte mi, a tāng mi thilpawl kha cakter aw, ziangahtile na hnaṭuan mipawl Pathian hmaika ah famkim tawkin ka hmu lo. 3 ^aCuruangah ziangtin na cohlang ih na ngaithla ti kha cîng ringring aw; kai hnget awla, lungthlĕng aw. Curuangah na ralrin lo asile, na hnenah fifir vekin ka ra ding, ziangtik cān ah na hnenah ka ra ding ti na thei hrimhrim lo ding.

3:3^a Luk 12:39

4 ^a“Sardis khua ah an sinfen bawrhbangter lo tu mi málte na nei. Annih cu sinfen var hruhin ka zawngah an leng ding, ziangahtile annih cu an tling a si. 5 ^bA nehtu cu sinfen var hruhter a si ding ih, Nunnak Cazual sung ihsin a hmin ka phiathlo hrimhrim lo ding; cuhnakin a hmin cu ka Paih hmaika ah le a vancungmipawlih hmaika ah ka ṭăn sawn ding a si. 6 Thlarau in kawhhranpawl hnenih a sim mi hi hna a neitu cun thei seh,” ti mi thilpawl a sim,’ tiin ngan aw.

3:4^a Jud 1:23

3:5^b Mat 10:32; Joh 16:33

Filadelfia Kawhhran Hnenah

7 ^a“Cule Filadelfia kawhhran vancungmi hnenah:

3:7^a Isa 22:22; Mat 16:19; Mar 1:24; Joh 5:20

‘Cuih thilpawl hnuah, a thianghlim mi, a dik mi, David-ih tawhfung neitu, a ăwn mi cu zohman ih khar theih lo le a khar mi cu zohman ih ăwn theih lo pa in, 8 ^a“Na hnaṭuan mipawl ka thei. Ngai hnik, na hmaika ah ăwn mi sângka ka ret ih, cucu zohman in an khar thei lo ding. Ziangahtile cahnak málte na nei, ka kamsuakthu na rak kilkhawi ih, ka hmin na phatsan lo. 9 ^bNgai hnik, Setan sinakok ih mi, Jew-mi si lo, Jew-mi ka si tiih thuphan pertupawl kha ka thlah hai ding. Ngai hnik, na ke hramah rain, ka băwkkhupter hai ding ih, ka lo duhdawt ti khal ka theihter hai ding. 10 ^cTuarfainak nei dingih thu ka lo pek mi na kilhim ruangah, leilung parih cêng mipawl hniksak dingah leitlun hmuahhmuah ih a ra thleng ding mi hniksaknak tikcucān ihsin kei khal in ka lo kilhim ve ding.

3:8^a Apo 14:27

3:9^b Isa 43:4; 49:23; Rom 8:37

3:10^c Mat 24:14; 2Pe 2:9

11 ^a“Ngai hnik, ka ra cing ding! Zohman in na lallukhum an lo lâksaklonak dingah, na neih cia mi kha kai hnget aw. 12 ^bA nehtu cu ka Pathian temple sungih ṭhuam ah ka tuah ding ih, anih cu a lengah a suak nawn lo ding. A parah ka Pathian hmin le ka Pathian khawpi hmin ka ngan ding ih, a parah ka hmin thar ka ngan ding; cumi cu van ihsin, ka Pathian hnen ihsi a rung ṭum mi Jerusalem Thar cu a si.

3:11^a Mat 16:27; 1Ko 9:25

3:12^b Eze 48:35; Joh 16:33; Gal 2:9; 4:26

13 “Thlarau in kawhhranpawl hnenih a sim mi hi hna a neitu cun thei seh,” ti mi thilpawl a sim,’ tiin ngan aw.

Laodisia Kawhhran Hnenah

14 ^a“Cule Laodisia kawhhran vancungmi hnenah:

3:14^a Thf 8:22; Joh 1:3; 18:37; Kol 1:16, 18; 2:1

‘Cuih thilpawl hnuah, Pathian sersiam miih Hrampi, Theihpitu Rinum le Dik, Amen in, 15 ^a“Na hnaṭuan mipawl ka thei, nang cu daih khal na dai lo ih, sat khal na sa lo. Na daih simaw, na sat simaw ka duh. 16 Cuti cun nang cu dai si lo, sa si lo, hlum fangfang na si ruangah ka kă sung ihsin ka lo khaksuak ding. 17 ^bZiangruangahtile nang in, ‘Ka lian, thilri thawn ka neinung ih, ṭulsăm mi zianghman ka nei lo,’ na ti ih, mizawnzai, zangfahumza, mifarah, mitcaw le taklawng ih um na sizia na theiaw lo a si. 18 ^cNa len thei nak dingah meisa sungih hniksak mi sui, na taklawng ningzahnak a lănglonak dingah na hruh ding mi sinfen var siseh, khua na hmuh thei nak dingah na mit hnih ding mitna si ka hnenah lei dingin thurawn ka lo pe a si.

3:15^a Rom 12:11

3:17^b Thf 13:7; Hos 12:8; 1Ko 4:8

3:18^c 1Pe 1:7

19 ^a“Ka duhdawt mi pauhpauh cu ka kawk ih nun ka sim ṭheu. Curuangah ṭhahnemngai awla, lungthlĕng aw. 20 ^bNgai hnik, sângka hramah dīngin ka king. Zokhal ka aw a thei ih sângka a ăwn ahcun a hnenah ka lut ding ih, a hnenah zanriah ka ei ding, cule anih khal ka hnenah a ei ve ding. 21 ^cKa neh ih, ka Pa hnenah a laltokham ih ka to bangin a nehtu cu ka laltokham ah, ka hnenah ka toter ve ding.

3:19^a Dnp 8:5; Thf 3:12; 1Ko 11:32; Heb 12:5-6

3:20^b Mat 24:33; Luk 12:36; Rom 8:10; Jam 5:9

3:21^c Mat 19:28; Joh 16:33

22 “Thlarau in kawhhranpawl hnenih a sim mi hi hna a neitu cun thei seh,” ti mi thilpawl a sim,’ tiin ngan aw,” tiah a ti.

4

Van ih Laltokham

1 ^aCuih thilpawl hnuah ka hun zoh ih, ngai hnik, van ah sângka a áwngaw. Cule a hmaisabikih ka theih mi tawtawrawt aw vekih i betu khan, “Hi tawkah hung so aw, hi hnuih thil ra thleng tengteng ding mipawl ka lo hmuh ding,” tiah i ti.

4:1^a Mat 3:16

2 ^aHmakhatteah kei cu Thlarau in ka um: cule, ngai hnik, laltokham pakhat cu van ah retin a um ih, cuih laltokham ah cun Mi pakhat a to. 3 ^bCule cuih a totu Pa cu jasper le sardias lung mankhung vekin a lang. Cuih laltokham kimvel cu vangro, emerald lung mankhung vekih lang mi in a kulh. 4 Cuih laltokham kimvelah laltokham 24 a um. Cuih laltokhampawl parah upa 24, kâwrfual var hruhin an to kha ka hmu; cule an lu ah sui lallukhum an khum. 5 ^cCule cuih laltokham ihsi cun nimthlakaupawl, khawripawl le awpawl an ra suak. Laltokham hmaiah a alh mi meito pasarih an um, cupawl cu Pathian Thlarau pasarih pawl kha an si.

4:2^a 1Sp 22:19; Isa 6:1; Eze 1:26-28; Dan 7:9

4:3^b Eze 1:28

4:5^c Suah 19:16; Zek 4:2

6 ^aLaltokham hmaiah khrisṭal vek a si mi thlalang tifinriat a um. Cule laltokham laiah siseh, a kimvelah siseh, dung lam le hmai lam mit ih a khat mi thilnung pali an um. 7 ^bA pakhatnak thilnung cu kiosa vek a si, a pahnihnak thilnung cu caw pa no vek a si, a pathumnak thilnung cun minung vekin mithmai a nei ih, a palitnak thilnung cu a zam mi muvanlai vek a si. 8 ^cCuih thilnung pali pawl cun thla paruk cio an nei ih, an leng lam le sung lam cu mit in a khat. Cule annih in,

4:6^a Eze 1:5, 18

4:7^b Eze 1:10

4:8^c Isa 6:2-3; Eze 1:18

“Bawipa Pathian Ziangkimtithei,
A um zo mi le a um lai mi le a um leh ding mi cu,
A thianghlim, a thianghlim, a thianghlim,”

tiah sun le zan cawl loin an ti.

9 ^aCuih thilnung pali pawl cun kumkhua kumkhuaih a nung mi laltokham ih a totu Pa hnenah cawimawinak, upatnak le lungawinak an hlăn tiktikah, 10 ^bupa 24 pawl cu laltokham ih a totu Pa hmaiah an băwkkhup ih, kumkhua kumkhuaih a nung mi cu an bia, cule an lallukhumpawl cu laltokham hmaiah an sep ih,

4:9^a Sam 47:8

4:10^b Dnp 33:3

11 ^a“Maw Bawipa, nang cu ropitnak siseh, sunparnak siseh, huham siseh co tlak na si.
Ziangahtile nang in ziangkim na sersiam ih,
Nangmai duhnak ruangih ra um le sersiam mi an si,”

4:11^a Apo 14:15

tiah an ti.

5

Cazual le Tuufano

1 ^aCule laltokham parih a totu Paih vawrh lam kut ah a sung lam le a leng lamih ngan mi cazual, erhpitnak pasarih ih erhpit mi cu ka hmu. 2 Cun a cak zet mi vancungmi pakhat ka hmu ih, aw ring zetin, “Zo so hih cazual pharh ih, a erhpitnakpawl phawih tlak um?” tiah a au. 3 Cule van ih a um mi siseh, leitlun ih a um mi siseh, lei hnuaiih a um mi khal siseh, zohman cuih cazual pharh thei tu simaw, a sung lam zoh thei tu simaw an um lo. 4 Cuih cazual cu siar dingah pharh ih a sung lam khal zohtu dingah a tlak mi zohman hmuh an si lo ruangah, nasa zetin ka ṭap. 5 ^bCun upapawl lakih pakhat in ka hnenah, “Ṭap hlah, ngai hnik, Judah hnámih Kiosa, David-ih Búlhram cun cuih cazual pharh ding le a erhpitnak pasarih pawl phawih dingah a neh zo,” tiah i ti.

5:1^a Isa 29:11; Eze 2:9-10; Dan 12:4

5:5^b Sem 49:9; Isa 11:1, 10; Rom 15:12; Heb 7:14

6 ^aCule ka zoh ih, ngai hnik, laltokham le thilnung pali le upapawl lakah thah zo mi vek Tuufano dîng ka hmu, cuih Tuufano cun ki pasarih le mit pasarih a nei. Cupawl cu leitlun pumpuluk ih thlah mi Pathian Thlarau pasarih pawl an si. 7 Cun anih cu a ra ih, laltokham parih a totu Paih kut vawrh lamih cazual cu a lâk. 8 ^bCun cuih cazual a lâkngah tikah thilnung pali le upa 24 pawl cu ṭingṭang le rimhmui thawi a khat mi sui kheng kûm keng cio in Tuufano hmaika ah cun an băwkkhup. Cuih rimhmuipawl cu mithiangpawlih thlacamnak a si. 9 ^cCule hla thar an sak ih,

5:6^a Zek 4:10; Joh 1:29

5:8^b Sam 141:2

5:9^c Sam 40:3; 91:1; Isa 42:10; 1Ko 6:20; Heb 9:12

“Nang cu cuih cazual latu dingah le
A erhpitnakpawl phawihtu dingah na tlak a si.
Ziangahtile nang cu thah na si zo ih,
Nang cun na thisen in hnám kip, ṭawng kip, mi kip le phun kip lak ihsin
Pathian hrangah in rak tlen zo.
10 ^aCule kan Pathian hrangah kannih cu siangpahrang ah le puithiam ah in rak tuah zo.
Cun lei parah kan uk ding,”

5:10^a 1Pe 2:5

tiah an ti.

11 ^aCun ka hun zoh ih, laltokham le thilnungpawl le upapawlih kimvelah cun vancungmi tampi aw ka thei. Cuih vancungmipawlih tam lam cu siar cawk lo le thawng tampi an si. 12 Cupawl cun aw ring zetin,

5:11^a Dan 7:10; Heb 12:22; Jud 1:14

“Thah mi Tuufano cu
Huham, lennak, fimnak, cahnak, cawimawinak, ropitnak le thangṭhatnak co tlak a si!”

tiah an ti.

13 ^aCule van ah siseh, leitlun le lei hnuai khalah siseh, tifinriat sungih a um mi siseh, cuih sungih a um mi hmuahhmuah cun,

5:13^a 1San 29:11; Rom 11:36; Fil 2:10

“Laltokham ih a totu le Tuufano hnenah cun, thangṭhatnak siseh, cawimawinak siseh, ropitnak siseh, huham siseh kumkhuain kumkhua tiang um hram seh!”

tiah an ti ka thei.

14 Cun thilnung pali pawl cun, “Amen!” tiah an ti. Upa 24 pawl khal cun kumkhuain kumkhua tiang a nung mi Pa cu băwkkhupin an bia.

6

Erhpit Mi Pasarih

1 Cun Tuufano in erhpitnak pasarih lakih pakhat a phawih lai kha ka hmu. Cule thilnung pali pawl lakih pakhat in khawri aw bangtukin, “Ra awla, zoh hnik,” tiih a ti ka thei. 2 ^aCule ka hun zoh ih, ngai hnik, rang var pakhat ka hmu, a parih a totu pa cun thál pakhat a keng. Cule a hnenah lallukhum an pe ih, neh ding le neh vivo dingin a fehsuak.

6:2^a Sam 45:4; Zek 1:8; 6:11

3 Erhpitnak pahnihnak a phawih tikah, thilnung pahnihnak in, “Ra awla, zoh hnik,” tiih a ti ka thei. 4 ^aA dang rang pakhat a ra suak, cuih rang cu a sen. Cule pakhat le pakhat an thahawktăwn thei nak dingah a parih a totu pa hnenah leilung ihsin daihnak lâkhlo thei nak huham an pe, a hnenah ralnâm tumpi khal an pe.

6:4^a Zek 1:8; 6:2; Mat 10:34

5 Erhpitnak pathumnak a phawih tikah, thilnung pathumnak in, “Ra awla, zoh hnik,” tiih a ti ka thei. Cule ka zoh ih, ngai hnik, rang dum pakhat a um; a parih a totu pa cun a kut ah cuai thlainak pakhat a keng. 6 ^aCule thilnung pali pawl lak ihsin aw pakhat ka thei ih, “Dinari paisa pakhat in sangvut ^bkhoinik khat, barli sangvut khoinik thum ah dinari paisa pakhat, asinan hriak le sabit zu cu na siatsuah lo pei,” tiah a ti kha ka thei.

6:6^a Eze 4:16

6:6^b khoinik: Grik ṭawng a si ih khoinik khat cu no li hrawng a si.

7 Erhpitnak palitnak a phawih tikah, thilnung palitnak in, “Ra awla, zoh hnik,” tiih a ti ka thei. 8 ^aCun ka zoh ih, ngai hnik, rang râm pakhat a um, a parih totu paih hmin cu “Thihnak” a si. Cule mithi khua in amah cu a run thlun. Cun an hnenah leilung tlun mi ṭhen li ih ṭhen khat, ralnâm in siseh, rilrawnnak in siseh, thihnak in siseh, leilung sahrangpawl in siseh that dingin huham pek an si.

6:8^a Jer 15:2-3; Eze 5:12, 17; Hos 13:14; Zek 6:3

9 ^aErhpitnak pangatnak a phawih tikah, Pathian kamsuakthu ruangah le an pawm mi theihternak thu ruangih thah a tuar mipawlih thlarau cu biakṭheng hnuaiah ka hmu hai. 10 ^bCule ring zetin, “Maw Bawipa, a thianghlim mi le a dik mi, leitlun ih a cêng mipawl parah ziangtik tiang so thuṭhen loin le kan thisen phuba la loin na um ding?” tiah an au. 11 ^cCun an hnenah kâwrfual râng pek cio an si. Cule anmah bangtukih thah a si ding mi an sálpipawl le an unaupawl thah kim an si hlanlo, cān málte sung cawl hrih dingih sim an si.

6:9^a Suah 29:12; Pui 4:7; Rom 1:2; Heb 4:12

6:10^b Dnp 32:43; 2Sp 9:7; Sam 79:10; 119:84; Zek 1:12; Luk 2:29; 2Pe 2:1

6:11^c Heb 11:40

12 ^aErhpitnak paruknak a phawih tikah, ngai hnik, ling nasa zet a hnîn, ni cu buri hmul dum vekah a cang ih, thlapi cu thisen vekah a cang. 13 ^bCule thlipi in theipi kung a nuai ruangih a kuhpawl an tlak vekin, van arsipawl cu lei ah an tla. 14 ^cCun van cu cazual vekin a zualawhlo ih, tlang le tikulh zaten an umnak hmun ihsin an ṭhawn ṭheh.

6:12^a Sam 97:4; Isa 29:6; 50:3; Eze 38:19; Mat 24:29

6:13^b Isa 34:4; Mat 24:29

6:14^c Sam 46:2; Isa 54:10; Jer 4:24; Eze 38:20; Nah 1:5; 2Pe 3:10

15 ^aCule leilung ih siangpahrangpawl, mithupipawl, milianpawl, ralbawipipawl, micakpawl, sál hmuahhmuah le miluat hmuahhmuah cu lungpûk sungah le tlang ih lungpi karlakah an relh. 16 ^bCun tlangpawl le lungpipawl hnenah, “In nĕn uhla, laltokham parih a totu paih hmai ihsin le Tuufano-ih thinlingnak ihsin in phen uh! 17 ^cZiangahtile a thinlingnak ni rapthlak cu a ra thleng zo a si hi, zo so a ding thei ding?” tiah an ti.

6:15^a Isa 2:10, 19, 21

6:16^b Hos 10:8; Luk 23:30

6:17^c Sam 76:7; Joe 1:15; Nah 1:6; Zek 1:14-15; Mal 3:2

7

Israel-mi 144000

1 ^aCuih thilpawl hnuah leilung par, tifinriat parah le ziang thingkung par hmanih thli hrang lo dingin, lei thli pali cu kaiin leilung kil li ih a dīng mi vancungmi pali ka hmu. 2 ^bCun nisuahnak lam ihsin a hung suak mi, a nung mi Pathian-ih tacik khĕnnak a nei mi a dang vancungmi pakhat ka hmu. Cule anih cun leilung le tifinriat siatsuah dingih thupek mi vancungmi pali hnenah aw ring zetin, 3 ^c“Kan Pathian siahhlawhpawl an cal ih tacik kan khĕn thluh hlanlo leilung siseh, tifinriat siseh, thingkungpawl siseh siatsuah hlah uh,” tiah a au. 4 Cule tacik khĕn mipawlih an mipum zat cu ka hna in ka thei. Israel-mipawlih hnám kip ihsin tingkhat le thawng sawmli le thawngli cu tacik khĕn an si.

7:1^a Isa 11:12; Jer 49:36; Eze 37:9; Dan 7:2; Zek 6:5; Mat 24:31

7:2^b Mat 16:16

7:3^c Eze 9:4

5 Judah hnám ihsin mi 12000 cu tacik khĕn an si, Reuben hnám ihsin mi 12000 cu tacik khĕn an si, Gad hnám ihsin mi 12000 cu tacik khĕn an si, 6 Asher hnám ihsin mi 12000 cu tacik khĕn an si, Naftali hnám ihsin mi 12000 cu tacik khĕn an si, Manasseh hnám ihsin mi 12000 cu tacik khĕn an si, 7 Simeon hnám ihsin mi 12000 cu tacik khĕn an si, Levi hnám ihsin mi 12000 cu tacik khĕn an si, Issakar hnám ihsin mi 12000 cu tacik khĕn an si, 8 Zebulun hnám ihsin mi 12000 cu tacik khĕn an si, Joseph hnám ihsin mi 12000 cu tacik khĕn an si, Benjamin hnám ihsin mi 12000 cu tacik khĕn an si.

Puan Var Sĭn Mipi Tam Zet

9 Himi thilpawl hnuah ka hun zoh ih, ngai hnik, zohman ih siar cawk lo mipi ka hmu. Cuih mipi cu phun kip le hnám kip le mi kip le ṭawng kip ihsi a ra mi an si. Kâwrfual var hruhin an kut in ṭhulhfau hnah an keng ih, laltokham hmai le Tuufano hmaiih an dīn kha ka hmu. 10 ^aCule annih in aw ring zetin, “Laltokham parih a totu kan Pathian le Tuufano hnenah rundamnak a um!” tiah an au.

7:10^a Sam 3:8

11 Vancungmi zaten laltokham le upapawl le thilnung pali pawlih kimvelah an ding. Cule laltokham hmaiah cun băwkkhupin, Pathian an bia.

12 ^a“Amen! Thangṭhatnak siseh, ropitnak siseh, fimnak siseh,
Lungawi thu simnak siseh, cawimawinak siseh, huham siseh, cahnak siseh a kumkhuain kumkhua tiang
Kan Pathian hnenah um hram seh. Amen,”

7:12^a Rom 11:36

tiah an ti.

13 Cun upapawl lakih pakhat cun a sawn ih ka hnenah, “Hi kâwrfual var hruhtupawl hi zo an si, khui tawk ihsin an ra?” tiah i ti.

14 ^aCule kei in a hnenah, “Bawipa, nangmah in na thei,” tiah ka ti.

7:14^a Heb 9:14; 1Joh 1:7

Cun anih in ka hnenah, “Hipawl hi harsatnak rapthlak sung ihsi a ra suak mi an si ih, an kâwrfual kha Tuufano thisen ah sawp in, an varter. 15 ^aCuruangah annih cu Pathian laltokham hmaiah an cêng ih, a sun a zanin a hmun thianghlim ah a rawng an bawl. Cule laltokham parih a totu Pa cu an lakah a um ding. 16 ^bAnnih cu an ril a râwng nawn lo ding ih, an ti khal a hâl nawn lo ding. Ni khal in a sat hai nawn lo ding ih, ziang satnak khal an tuar lo ding. 17 ^cZiangahtile laltokham laiih um, Tuufano in anmah cu tuu khāltu bangin a kilkhawi hai ding ih, nunnak tihna umnak ah a hruai hai ding. Cule Pathian in an mit ihsin mitthli hmuahhmuah cu a hnulhlo thluh ding,” tiah i ti.

7:15^a Isa 4:5-6

7:16^b Isa 49:10; Joh 6:35

7:17^c Isa 25:8; Joh 10:11

8

Erhpit Mi Pasarihnak le Sui Rimhmui Urtu

1 Tuufano in erhpitnak pasarihnak a phawih tikah, van ah nazi hrek hrawng a dai ṭhepṭhep. 2 ^aCule Pathian hmaika ih a dīng mi vancungmi pasarih pawl cu ka hmu ih, an hnenah tawtawrawt pasarih pek an si. 3 ^bCun a dang vancungmi a ra ih, rimhmui urnak sui ih tuah mi meiling khēng pakhat kengin biakṭheng kiangah a ding. Mithiangpawl hmuahhmuah ih thlacamnak thawn laltokham hmai, sui biakṭheng parih a hlăn thei nak dingah rimhmui tam zet a hnenah pek a si. 4 ^cCule rimhmui khu cu vancungmi kut ihsin mithiangpawlih thlacamnak thawn Pathian hmaika ah a hung kai. 5 Cun cuih vancungmi cun rimhmui urnak meiling khēng cu a lâk ih biakṭheng meisa thawn a khatter, cule leilung parah a hlăwn. Cun awthâwmpawl siseh, khawripawl siseh, nimthlakaupawl siseh, linghnîn siseh a um.

8:2^a Mat 24:31

8:3^b Suah 30:1-6; Heb 9:4

8:4^c Sam 1:2

Tawtawrawt Pasarih

6 Cun tawtawrawt pasarih kengtu vancungmi pasarih pawl cu an tawtawrawt phaw dingin an timtuahaw.

7 ^aA pakhatnak vancungmi in a tawtawrawt a phaw ih, thisen thawi a rawiaw mi, rial le meisa a umcih ih, cupawl cu leilung parah hlăwnthlak an si. Cule thingkung ṭhen thum ih ṭhen khat a kāng ih, hrampi hring hmuahhmuah khal an kāng ṭheh.

8:7^a Eze 38:22

8 ^aCun a pahnihnak vancungmi in a tawtawrawt a phaw ih, tlang tumpi meisa kāng lai vek cu tifinriat sungah hlăwnthlak a si. Cule tifinriat ṭhen thum ih ṭhen khat cu thisen ah a cang. 9 Cule sersiam mi, tifinriat sungih um nunnak neipawl ṭhen thum ih ṭhen khat an thi ih, lăwngpawl khal ṭhen thum ih ṭhen khat an siat thluh.

8:8^a Jer 51:25

10 ^aCun a pathumnak vancungmi in a tawtawrawt a phaw ih, meito vekih alh arsi tûm zet pakhat cu van ihsin tivapawl le tihnapawl ṭhen thum ih ṭhen khat parah a tla. 11 ^bCuih arsi hmin cu ^ckhâtnak tiah an ko, tidai ṭhen thum ih ṭhen khat cu la-ana kung khâ ah a cang. Cule tidai cu a khât tuk ruangah cuih tidai ruangah mi tampi an thi.

8:10^a Isa 14:12

8:11^b Jer 9:15

8:11^c khâtnak: Hih ṭawngfáng hi Grik in apsinthos a si ih, Hebru ṭawng ih la-ana kung khâ ti mi thawn an bangaw. Hih kung hi a khâ zet.

12 ^aCun a palitnak vancungmi in a tawtawrawt a phaw ih, ni ṭhen thum ih ṭhen khat, thlapi ṭhen thum ih ṭhen khat le arsi ṭhen thum ih ṭhen khat cu tidanglam an si, cutin cupawlih ṭhen thum ṭhen khat cu a thim. Sun khal ṭhen thum ih ṭhen khat a vâng lo ih, zan khal cuvek thothoin a si ve.

8:12^a Suah 10:21-23; Eze 32:7

13 Cule ka hun zoh ih, van ih a zam mi vancungmi pakhat ka hmu. Cuih vancungmi in aw ring zetin, “Vancungmi pathum pawl in an phawt lai ding mi tawtawrawt aw ruangah leitlun ih a um mipawl an hmakhua a pit a si, an hmakhua a pit a si, an hmakhua a pit a si!” tiah a au.

9

1 ^aCun a pangatnak vancungmi in a tawtawrawt a phaw ih, arsi pakhat van ihsin leilung ih a tla cia mi cu ka hmu. A hnenah taw net nei lo khur tawhfung pek a si. 2 ^bCule anih cun taw net nei lo khur a áwng ih, cuih khur ihsin meikhu, rawhtitnak mei nasa zet khu vek a hung suak. Cun cuih khur ih meikhu ruangah ni le boruak cu an thim. 3 ^cCun cuih meikhu ihsin kharbawk leilung parah an ra suak ih, cuih kharbawkpawl cu leilung ih tlangkaikuangpawl in thuneihnak an neih vekin an hnenah thuneihnak pek an si. 4 Cuih kharbawkpawl cu lei ih hrampi siseh, ziang thil hring le ziang thingkung hman siatsuah loin, an cal ih Pathian tacik nei lo minungpawl lawng siatsuah dingih thupek an si. 5 Cule cuih kharbawkpawl cu minung that loin, thla nga sung hrem sawn dingin thuneihnak pek an si. Mi an hrem tikih a natzia cu tlangkaikuang in mi a hĕn tikih a nat vek kha a si. 6 ^dCuih cān ah minung in thihnak an hawl ding ih, an hmu hrimhrim lo ding. Thih an duh ding ih, thihnak in a tlansan hai ding.

9:1^a Luk 8:31

9:2^b Sem 19:28; Suah 19:18; Joe 2:2; Luk 8:31

9:3^c Suah 10:12-15

9:6^d Job 3:21; Jer 8:3

7 ^aCuih kharbawkpawlih pianzia cu ral donak hrangih a tiar mi rang vek an si. An lu parah sui lallukhum vek an khum ih, an hmai cu minung hmai vek an si. 8 ^bNunau sám vek an nei ih, an hâ cu kiosa hâ vek a si. 9 ^cCule thir awmphaw vek a si mi awmphaw an nei ih, an thla zâp awn cu ral do dingih a tlân mi rang lêng tampi awn tlurtlo vek a si. 10 Cuih kharbawkpawl cun tlangkaikuang mei vek mei an nei ih, an mei ah mi hĕnnak hmanrua a um. Thla nga sung minungpawl siatsuah thei nak thuneihnak an nei fawn. 11 ^dCule anmah uktu siangpahrang an nei ih, cuih an siangpahrang cu taw net nei lo khur ih vancungmi a si. A hmin cu Hebru ṭawng in ^eAbaddon a si ih, Grik ṭawng in a hmin cu ^fApollyon a si.

9:7^a Dan 7:8; Joe 2:4

9:8^b Joe 1:6

9:9^c Joe 2:5

9:11^d Sam 88:11; Luk 8:31

9:11^e Abaddon: Siatralnak.

9:11^f Apollyon: Siatsuahtu.

12 Hmakhuapihnak pakhat cu a cem zo. Ngai hnik, hipawl hnuah hmakhuapihnak pahnih a ra lai ding.

13 ^aCun a paruknak vancungmi in a tawtawrawt a phaw ih, Pathian hmaika ih um sui biakṭheng ih ki pali ihsin aw pakhat ka thei. 14 ^bCuih aw cun tawtawrawt kengtu a paruknak vancungmi hnenah: “Zufraṭis tiva pi ih ṭawn mi vancungmi pali kha phawih aw,” tiah a ti. 15 Cule cuih vancungmi pali cu thlah an si ih, annih cu hih nazi le ni le thla le kum ih minung ṭhen thum ih ṭhen khat that dingah rak timtuah mi an si. 16 Cun rang ralkap mipum zat cu ting thawnghnih an si tiah hna in ka thei. 17 ^cCule larnak ah cun rangpawl le an parih topawl cu hiti vekin ka hmu hai: meisa vekih sen, dumpâwl le kât vekih aire awmphaw an hruh. Rangpawlih lu cu kiosa lu vek an si ih, an kâ ihsin mei le meikhu le kât alh a suak. 18 Cuih thil pathum, rangpawlih kâ sung ihsin a suak mi meisa, meikhu le kât meisa pawl in minung ṭhen thum ih ṭhen khat an that. 19 Ziangahtile an thuneihnak cu an kâ le an mei ah a um. Ziangahtile an mei cu rul vek a si ih, an mei ah lu an nei, cumi in mi an tuahmawh.

9:13^a Suah 30:1-3

9:14^b Sem 15:18; Dnp 1:7; Jos 1:4; Isa 11:15

9:17^c Sam 11:6; Isa 30:33; Eze 38:22

20 ^aCun cuih hremnakpawl ih thah lo mi, a tāng mipawl cu khawsiapawl le sui, ngun, dar, lungto le thing ih tuah mi, khua a hmu thei lo mi, a thei thei lo mi, a feh thei lo mi milempawl be lo dingin, an kut ih tuah mi thilpawl ihsin an lung an thlĕng cuang lo. 21 ^bCule an laithahnak, an dawi hmannak, nunau-mipa sual an tuahnak le an rûkrûknak pawl ihsin an lung an thlĕng cuang lo.

9:20^a Dnp 4:28; Sam 115:4-7; Jer 1:16; Dan 5:23; Mik 5:13; Apo 7:41; 1Ko 10:20

9:21^b Isa 47:9, 12

10

Vancungmi le Cazual Fate

1 ^aA cak zet mi a dang vancungmi, mero thawi thuamaw, van ihsi rung ṭum ka hmu. A lu ah vangro a zām ih, a hmai cu ni vek a si, a ke cu meisa ṭhuam vek an si. 2 A kut in kau cia mi, cazual fate a keng. A vawrh lam ke cu tifinriat parah a ret ih, a keh lam ke cu leilung parah a ret. 3 ^bCule kiosa hûk vekin, aw ring zetin cuih vancungmi cu a au ih a au ṭheh tikah, khawri pasarih pawl in an aw an suah. 4 ^cCun khawri pasarih pawl in an aw an suahngah tikah ngan ka tum; asinan van ihsin aw pakhat in ka hnenah, “Khawri pasarih pawl ih sim mi thilpawl cu hminsin aw, ngan hlah,” tiah i run ti.

10:1^a Eze 1:28; Mat 17:2

10:3^b Hos 11:10

10:4^c Dan 8:26

5 ^aKa hmuh mi, tifinriat par le leilung parih ding vancungmi in a kut cu van lamah a phar ih, 6 ^bkumkhuain kumkhua tiang a nung mi, van le a sungih um thilpawl, leilung le a sungih um thilpawl, tifinriat le a sungih um a sersiam mi thilpawl salin, tikcucān a um nawn lo ding tiin sia a săm. 7 ^cAsinan a pasarihnak vancungmi in a tawtawrawt a phawt zik tikah a siahhlawh profetpawl hnenih a rak thăn zo mi Pathian thuthup kha a kim thluh thlang ding, tiah a ti.

10:5^a Dnp 32:40

10:6^b Sem 14:22; Suah 6:8; Mip 14:30; Sam 115:15

10:7^c Amo 3:7; Mat 24:31; Rom 16:25

8 Cun van ihsi ka theih mi aw khan in run be leh sal ih, “Feh awla, tifinriat par le leilung parih dîng vancungmi kut sungih kau cia mi cazual fate kha va la aw,” tiah i ti.

9 ^aCuih vancungmi hnenah cun ka va feh ih, a hnenah, “Khaih cazual fate kha i pe aw,” tiah ka ti.

10:9^a Jer 15:16; Eze 2:8-3:3

Cule anih in ka hnenah, “La awla, ei thluh aw, na pum a khâter ding, asinan na kă sungah cun khuai tizu bangin a thlum ding,” tiah i ti. 10 Cun cuih cazual fate cu vancungmi kut ihsin ka lâk ih, ka ei thluh. Cuih cazual fate cu ka kâ sungah cun khuai tizu bangin a thlum. Asinan ka ei thluh veten ka pum cu a khâ. 11 ^aCule anih in ka hnenah, “Minung tampi, miphunpawl, ṭawngpawl le siangpahrangpawl hnenah profet thuphuan in thu na phuang leh sal tengteng ding,” tiah i ti.

10:11^a Eze 37:4; Dan 3:4

11

Theihpitu Pahnih

1 ^aCun kianghrăwl vek a si mi tahnak phai kung in pe ih, cuih a dīng mi vancungmi cun, “Tho awla, Pathian temple hmun thianghlim le biakṭheng le a sungih Pathian a betupawl cu tah aw. 2 ^bAsinan temple hmun thianghlim leng lamih tual cu tân aw, tah hlah, ziangahtile cumi cu Zentelpawl hnenih pek a si zo. Annih cun khawpi thianghlim cu thla 42 sung an ke hnuaiah an palbĕt ding. 3 ^cCule ka thutheitu pahnih hnenah huham ka pe ding ih, annih cun buri hnipuan hrukin ni 1260 sung profet thuphuan in thu an phuang ding,” tiah a ti. 4 ^dHite cu lei Pathian hmaiih dîng, olif thing pahnih le meito ṭhuam pahnih an si. 5 ^eCule mi pakhat khat in anmah tuahmawh a tum asile, an kâ ihsin meisa a suak ih, an ralpawl cu an kangrál thluh. Cule mi pakhat khat in annih cu tuahmawh a tum asile, amah cu cuti vekih thah tengteng a si ding. 6 ^fHi theihpitu pahnih hin profet thuphuanih thu an phuan sung hmuah ruah sur lo ko van khar thei nak thuneihnak an nei. Cule an duh tikcān pauhih thisen ih canter thei nak tipi parah thuneihnak le leilung hi hremnak hmuahhmuah ih tidanglam thei nak thuneihnak an nei.

11:1^a Eze 40:3

11:2^b Eze 40:17; Dan 7:25; Luk 21:24

11:3^c Sem 37:34; 2Sam 3:31; Neh 9:1; Jon 3:5

11:4^d Sam 52:8; Jer 11:16; Zek 4:3, 11, 14

11:5^e Mip 16:29, 35; 2Sam 22:9; 2Sp 1:10; Jer 5:14

11:6^f Suah 7:17; Luk 4:25

7 ^aAn thutheihternak an ṭheh tikah, taw net nei lo khur ihsi a hung suak mi sahrang in anmah cu a do ding, a neh hai ding ih, a that hai ding. 8 ^bCule an ruak cu khawpi ropi zin ah hlŭm an si ding, cuih khawpi ropi cu thlarau lamin Sodom le Izip tiih kawh a si. Cuih hmun ah kan Bawipa khal khĕnbet a si. 9 ^cCun minungpawl, hnámpawl, ṭawngpawl le miphunpawl in an ruak cu ni thum le a hrek sung an zoh ding ih, thlān ih phum an siang lo ding. 10 ^dCule cuih profet pahnih cun leitlun ih cêngpawl an tinat ruangah an thih tikah, leitlun ih cêngpawl cu lungawi aipuangin an um ding ih, năwmnak an tuah ding, pakhat le pakhat thilpek an kuataw ding.

11:7^a Dan 7:21; Luk 8:31

11:8^b Isa 1:9; Jer 23:14; Eze 16:46; Heb 13:12

11:9^c Sam 79:2-3

11:10^d Neh 8:10, 12

11 ^aCun ni thum le a hrek hnuah Pathian hnen ihsin an sungah nunnak Thlarau a rung lut ih an ke in an ding, cule anmah hmutupawl cu ṭihnak nasa zetin an khat. 12 ^bCule, “Hi tawkah hung so uh,” tiin van ihsin aw ring zet an thei. Cun mero lakah van ah an kaiso ih, an ralpawl in an hmu.

11:11^a Eze 37:5, 9-10, 14

11:12^b 2Sp 2:11; Apo 1:9

13 Culaifangah ling nasa zetin a hnîn ih, khawpi cu ṭhen hra ih ṭhen khat a cim. Cuih linghnīnnak ah mi 7000 an thi. Cule a tāng mipawl cu an thin a phâng ih van Pathian hnenah cawimawinak an pe.

14 Hmakhuapihnak pahnihnak cu a cem zo. Ngai hnik, hmakhuapihnak pathumnak a ra thleng cing ding.

Tawtawrawt Pasarihnak

15 ^aCun a pasarihnak vancungmi in a tawtawrawt a phaw ih van ah aw ring zet a suak, “Hi leitlun lalrampawl cu kan Bawipa le a Khrih-ih lalram ah an cang zo. Amah in kumkhuain kumkhua tiang a uk ding!” tiah an ti. 16 Cule Pathian hmaiih anmai laltokham parih to, upa 24 pawl cun băwkkhupin Pathian an bia.

11:15^a Sam 145:13; Dan 2:44; Mik 4:7; Zek 14:9; Mat 24:31; Luk 1:33

17 ^a“Maw Bawipa Pathian, Ziangkimtithei,
Atu-ih a um lai mi le a rak um zo mi le a ra leh ding mi,
Na huham ropi cu na la ih, na uk ruangah na hnenah lungawi thu kan lo sim a si.
18 Miphunpawl cu an thin a heng ih,
Na thinlingnak a rung thleng ve.
Mithipawl thu na ṭhen ding cān cu a rung thleng zo,
Cule na siahhlawh profetpawl le mithiangpawl, na hmin a ṭihzahtu, mithupi le
Mithupi lo pawl hnenih lawmman pek cān khal a rung thleng zo ih
Leilung siatsuahtupawl siatsuah cān khal a thleng a si,”

11:17^a Sam 30:12

tiah an ti.

19 ^aCun van ah Pathian temple cu a áwngaw ih, a thukham kuang cu temple sungah a ra lang. Cule nimthla a kau, awpawl a thang, khua a ri, ling a hnîn ih, rial nasa zetin a tla.

11:19^a Suah 25:10-22; 2San 5:7; Heb 9:4

12

Nunau Pakhat le Rulhreng

1 ^aCun van ah hminsinnak ropi zet a lang: nunau pakhat cu ni thawn a thuamaw, a ke thuaiah thlapi a um ih, a lu parah arsi hleihnih nei lallukhum a khum. 2 ^bCun cu nu cun fa a rai ih, fa a hrin zikah fahrin nat tuarin a au.

12:1^a Sem 37:9

12:2^b Isa 26:17; Gal 4:19

3 ^aCule van ah a dang hminsinnak a ra langsal: ngai hnik, lu pasarih le ki pahra nei, a lu parih lallukhum pasarih khum rulhreng sen tumpi a um. 4 ^bA mei in van ih arsi ṭhen thum ih ṭhen khat kha a dir ih, leilung ah a hlăwnthlak. Cule cuih rulhreng cu nau hring zikte nunaunuih hmaiah ^cnaute a suah veteih dawlh dingin a ding. 5 ^dCu nu cun miphun zate thir kianghrăwl thawi uktu ding mipa a hring. Cule a naute cu Pathian hnen, a laltokham ah cun cawisoh a si. 6 Cun ni 1260 sung an cawm thei nak dingah cuih nunau cu ramṭhing ih a hmun neih mi, Pathian ih a timtuahsak mi ah a tlân.

12:3^a Dan 7:7, 20

12:4^b Dan 8:10; Mat 2:16

12:4^c naute: Jesu a simnak a si.

12:5^d Sam 2:9; Apo 8:39

7 ^aCule van ah doawknak a um: Maikal le a vancungmipawl cun cuih rulhreng cu an do ih, rulhreng khal in a vancungmipawl thawn a do hai ve. 8 Asinan rulhreng le a vancungmipawl cun an neh lo ruangah, van ah umnak hmun an nei nawn lo. 9 ^bCun rulhreng maksak cu an hlăwnthlak, cuih khuahlan rulpi cu Diabol tiin le leilung pumpuluk bumtu Setan tiih kawh a si. Anih cu leilung ah an hlăwnthlak ih, a vancungmipawl khal amah zawngah hlăwnthlak an si ve.

12:7^a Mat 25:41; Jud 1:9

12:9^b Sem 3:1-7; Mat 4:10; 25:41; Luk 10:18; Joh 12:31

10 ^aCun van ah aw ring zet pakhat ka thei. Cuih aw cun, “Atu-ah cun rundamnak, cahnak, kan Pathian-ih lalram le a Khrih-ih thuneihnak cu a ra thleng zo, ziangahtile kan unaupawl hēktu, kan unaupawl Pathian hmaiih a sun a zan ih hēktu cu hlăwnthlak a si zo. 11 ^bCule annih in Tuufano thisen le an thutheihternak ṭawngkam in amah cu an neh ih, thih ngam tiangin an nunnak an ui lo. 12 ^cCuruangah nannih van le nannih a sungih cêngpawl lungawi aipuangin um uh! Diabol cun cān tawite lawng a nei ti theiin, nasa zetih thinlingin nan hnen lamih a rung ṭum ruangah leilung le tifinriat luahtupawl cu nan hmakhua a pit a si!” tiah a ti.

12:10^a Job 1:9-11; Zek 3:1; 1Pe 5:8

12:11^b Luk 14:26; Joh 16:33

12:12^c Sam 96:11; Isa 44:23

13 Cun rulhreng in leilung ah hlăwn a si ti a theih tikah, fapa naute a hringtu nu kha a hrem. 14 ^aCule cuih nunau cu amai umnak hmun ramṭhing ih a zam thei nak dingah muvanlai tum zet thla pahnih pek a si. Cu tawkah rulpi ih hmuh băn lo dingin cān khat le cānpawl le cān hrek sung cawm a si ding. 15 Cun rulpi cun cuih nunau kha tilian in a fĕnhlo thei nak dingah a kâ sung ihsin tilian vekin cuih nunau dungah ti a phûtsuak. 16 Asinan leilung in cuih nunau cu a bawm, leilung cu a kâ a ang ih, rulhreng in a kă sung ihsin a suahter mi tilian kha a dawlh thluh. 17 ^bRulhreng cu cuih nunau parah a thin a heng tuk lawmmam ih, nunau cithlah a tāng mipawl, Pathian thupek thluntupawl le Jesu Khrih thu theihter mi thluntupawl kha do dingin a fehsuak.

12:14^a Suah 19:4

12:17^b Sem 3:15; Joh 14:15

13

A Pakhatnak Sahrang

1 ^aCun tifinriat ih vunnel parah ka dīng ih, tifinriat ihsin a hung suak mi sahrang pakhat, lu pasarih le ki pahra nei ka hmu. A kipawl ah lallukhum pahra a um ih, a lupawl parah Pathian thangsiatnak hmin a um. 2 ^bCun ka hmuh mi sahrang cu tlavang vek a si, a ke cu savâwm ke vek a si ih, a kâ cu kiosa kâ vek a si. Cule rulhreng cun a hnenah a huham le a laltokham le thuneihnak nasa zet a pe. 3 Cule a lu pakhat cu thihpi tlakih tuahmawh mi vek khan ka hmu. Asinan thihpi tlak a si mi a hriamhma cu a dam ih, leitlun mi hmuahhmuah in cuih sahrang parah an mang a bang ih, amah an thlun. 4 ^cCun sahrang hnenih thuneihnak petu rulhreng cu an bia. Cule, “Hi sahrang vek zo so um? Zo in so amah cu a do thei ding?” tiah an ti.

13:1^a Dan 7:1-6; 11:36

13:2^b Dan 7:4-6

13:4^c Suah 15:11; Dan 7:8, 11, 20, 25; 2Th 2:4

5 Cule cuih sahrang hnenah thil ropi zetzet le Pathian thangsiat thusimnak kha pek a si ih, thla 42 sung cangvai dingin thuneihnak khal pek a si. 6 Cun anih in Pathian hmin le a biakbûk le van ih cêngpawl thangsiatin le Pathian thangsiatin a kâ a ang. 7 ^aMithiangpawl do ding le anmah neh ding cu a hnenah pek a si. Cule hnám kip, ṭawng kip le miphun kip parih thuneihnak cu a hnenah pek a si. 8 ^bLeilung tlunih cêng milai hmuahhmuah, leilung sersiam thawk ihsi thah a si mi Tuufano Nunnak Cazual sungih hmin ngan a si lo mi hmuahhmuah in sahrang cu an be ding.

13:7^a Dan 7:21

13:8^b Mat 25:34; Joh 1:29

9 Zokhal hna a neih asile thei seh.

10 ^aSál tānnak ih mi a hruaitu cu amah khal sál tānnak ah a feh ve ding. Ralnâm thawi mi a thattu cu amah khal ralnâm ih thah a si tengteng ding. Hi tawkah mithiangpawlih tuarfainak le zumnak a um.

13:10^a Jer 15:2; Heb 6:12

A Pahnihnak Sahrang

11 Cun leilung sung ihsi hung suak mi sahrang dang pakhat ka hmu, anih cun tuu fa no ki vek ki pahnih a nei ih, rulhreng vekin a ṭawng. 12 Cule amai hlanih sahrang hmaisasawn ih thuneihnak zaten cuih sahrang hmaisasawn hmaika ah cun a hmang. Leilung le a sungih cêngpawl cu thihpi tlak hriamhma damter a si mi sahrang pakhatnak kha a biakter hai. 13 ^aA pahnihnak sahrang cun hminsinnak nasa zetzet a tuah, van ihsi meisa tlakter tiangin milaipawl mithmuh ah a tuah. 14 ^bCule sahrang hmaisasawn mithmuh ah tuah dingih pek a si mi hminsinnakpawl hmangin lei ih cêngpawl cu a bum hai. Lei ih cêngpawl hnenah ralnâm ih tuahmawh ih nungsal mi sahrang lem tuah dingin a fial hai. 15 ^cA pahnihnak sahrang hnenah cuih sahrang pakhatnak lem sungih thaw pek thei nak huham pek a si, cutin sahrang lem cu a ṭawng thei ih, cuih sahrang lem be duh lo tu hmuahhmuah thahter thei nak a tuah thei fawn. 16 Cuih sahrang in mi hmuahhmuah, mitum siseh, mite siseh, milian siseh, mifarah siseh, sál siseh, miluat siseh, an vawrh lam kut ah siseh, an cal ah siseh hminsinnak a coter hai. 17 Cule cuih hminsinnak, asilole sahrang hmin, asilole sahrang hmin ih nambat neitu siarlo, zohman in an lei in an zuar thei lo ding.

13:13^a 1Sp 18:38; 2Sp 1:10; Mat 24:24; Luk 9:54

13:14^b 2Th 2:9

13:15^c Dan 3:3-6

18 Hi tawkah fimnak a um. Theihthiamnak neitu cun sahrang nambat cu tuak seh, ziangahtile cuih nambat cu mi pakhat nambat a si ih, a nambat cu 666 a si.

14

Tuufano le Mi 144000

1 ^aCun ka hun zoh ih, ngai hnik, Zion tlang parah Tuufano a dîng ka hmu. Cule amah thawn mi tingkhat le thawng sawmli le thawngli an um ih, an cal ah Tuufano-ih Paih hmin ngan a si. 2 Cule van ihsin aw ka thei ih, tidai tampi aw vek le khawri nasa zet aw vek a si. Cun ṭingṭang tumtupawlih an ṭingṭang tum aw khal ka thei fawn. 3 Annih in laltokham le thilnung pali le upapawl hmaiah cun hla thar si awm tak khi an sak. Cule cuih hla cu leilung ihsi tlen a si mi minung tingkhat le thawng sawmli le thawngli pawl siarlo zohman in an zir thei lo. 4 ^bHipawl cu nunaupawl thawi a bawrhbangawter lo mi an si. Ziangahtile annih cu mithiang an si. Hipawl cun Tuufano cu a fehnak kip ah an thlun. Minungpawl lak ihsin tlen an si ih, Tuufano le Pathian hrangah rah hmaisabik pawl an si. 5 ^cCule an kâ ah mi bumnak thu a um lo. Ziangahtile annih cu Pathian laltokham hmaiah sawisel ding um lo an si.

14:1^a Sam 2:6

14:4^b 2Ko 11:2; Jam 1:18

14:5^c Sam 32:2; Zef 3:13; Joh 1:47; Efe 5:27; 1Pe 2:22

Vancungmi Pathum

6 Cun leitlun ih a cêng mipawl, miphun kip, hnám kip, ṭawng kip le mi kip hnenih phuan ding mi kumkhaw thuthangṭha nei a dang vancungmi van ih a zam ka hmu. 7 ^aAnih cun aw ring zetin, “A thuṭhennak tikcucān a ra thlen zo ruangah Pathian cu ṭihzah uhla, a hnenah thangṭhatnak pe uh. Van siseh, leilung siseh, tifinriat siseh, tihnapawl siseh sersiamtu cu bia uh,” tiah a ti.

14:7^a Sam 34:9

8 ^aCule a dang vancungmi in a run thlun ih, “A tlu e, a tlu e, khawpi ropi Babilon cu! Ziangahtile miphun zaten a nunau-mipa sualnak thinlingnak sabit zu a inter thluh,” tiah a ti.

14:8^a Isa 21:9; Jer 51:8

9 Cun a pathumnak vancungmi in annih cu a run thlun hai ih, aw ring zetin, “Mi zokhal sahrang le a milem bia ih, a cal ah simaw, a kut ah simaw a hminsinnak a neih asile, 10 ^acu pa rori cun Pathian thinlingnak sabit zu, a aithawknak no sungah zianghman rawi loih thlet mi cu a in ding. A thianghlim mi vancungmipawlih hmaiah le Tuufano hmaiah meisa le kât ih hrem a si ding. 11 ^bCule anmah hremnak meikhu cu kumkhuaih kumkhuain tlun van ah a so ding ih, sahrang le amai lem a betupawl le a hmin ih hminsinnak neitu pauhpauh a sun a zan cawlhhahdamnak an nei lo ding,” tiah a ti. 12 ^cHi tawkah mithiangpawlih tuarfainak a um. Hi tawkah Pathian thupekpawl le Jesu zumnak a kilkhawitupawl an um.

14:10^a Isa 51:17; Jer 25:15; 51:7

14:11^b Isa 34:10

14:12^c Joh 14:15; Heb 6:12

13 ^aCun van ihsin aw pakhat ka thei ih, ka hnenah, “Ngan aw, ‘Atu thawkin mithi, Bawipa ih a thi mipawl cu mithlawsuak an si,’ ” tiah i ti.

14:13^a 1Ko 15:18; 1Th 4:16

“A si,” Thlarau cun a ti, “An ṭuanbăngnak ihsin an cawl ding ih, an hnaṭuan mipawl in a run thlun hai ding,” tiah i ti.

Leilung Rawl Khawm Cān

14 ^aCun ka hun zoh ih, ngai hnik, mero var ka hmu. Cuih mero parah cun Mi Pakhat, Minung Fapa a bang mi Pa cu a lu ah sui lallukhum a khum ih, a kut ah favah hriam zet kengin a to. 15 ^bCule a dang vancungmi pakhat cu temple ihsin a ra suak ih, cuih mero parih to Pa hnenah aw ring zetin, “Na favah hawi awla, at aw. Ziangahtile na ah ding cān a ra thleng zo, ziangahtile leilung thlairawl rah cu a hmin zo,” tiah a au. 16 Cun cuih mero parih to Pa cun a favah cu leilung ah a hawi ih, leilung ihta cu ah a si.

14:14^a Dan 7:13; Mat 17:5

14:15^b Jer 51:33; Joe 3:13; Mar 4:29

17 Cun a dang vancungmi pakhat van temple ihsin a ra suak leh ih, anih khal cun a hriam zet mi favah a nei ve. 18 Cule a dang vancungmi pakhat, meisa tlunih thuneihnak neitu cu biakṭheng ihsin a ra suak. Cule favah hriam zet nei vancungmi hnenah cun ring zetin a au ih, “Na favah hriam zet kha hawi awla, sabit rahpawl kha an hmin thluh zo ruangah, leilung ih sabit rah bawr zetzet pawl kha khawm thlang aw,” tiah a ti. 19 Cun cuih vancungmi cun a favah cu leilung ah a vun hawi. Cule leilung ih sabit cu a khawm ih, Pathian thinlingnak sabit sawrnak maksak sungah a vun thlak. 20 ^aCule khawpi lengih sabit sawrnak khur ah cun an palsawr. Cule sabit sawrnak khur ihsin thisen a luangsuak. Cuih thisen ih a khuh mi cu peng 200 hrawng a sau ih, rang kakharh thleng tiangih thûk a si.

14:20^a Sem 49:11; Dnp 32:14; Isa 63:3; Joe 3:13; Heb 13:12

15

Hremnak Pasarih Neitu Vancungmi Pasarih

1 ^aCun van ah a maksak zet mi le mangbangza a si mi hminsinnak dang pakhat, netabik hremnak pasarih nei vancungmi pasarih ka hmu, cuih hremnakpawl ah cun Pathian thinlingnak a kim.

15:1^a Pui 26:21

2 Cule thlalang le meisa rawiaw mi tifinriat vek ka hmu. Cule sahrang le amai lem le a hminsinnak le a hmin nambat parih nehnak cotupawl cu Pathian ṭingṭangpawl kengin thlalang tifinriat parah dīngin ka hmu hai fawn. 3 ^aAnnih in Pathian sál pa Mosi hla le Tuufano hla,

15:3^a Suah 15:1; Jos 1:1; Sam 111:2; 145:17

“Bawipa Pathian,
Ziangkimtithei, na hnaṭuan mipawl cu a ropi ih, mangbangza a si.
Nang, mithiangpawlih Siangpahrang, na lamzinpawl cu a dik in a hman a si.
4 ^aMaw Bawipa, zo so nangmah lo ṭihzah loin le na hmin thangṭhat loih um ding?
Ziangahtile nangmah lawng hi mithianghlim na si.
Miphun zaten an ra ding ih,
Na hmaika ah an lo be ding,
Ziangahtile na thuṭhennakpawl cu phuanlăng an si,”

15:4^a Sam 86:9; Isa 66:23; Jer 10:7

ti mi an sak.

5 ^aCuih thilpawl hnuah ka hun zoh ih, ngai hnik, van ih theihternak biakbûk hmun thianghlim cu a áwngaw. 6 ^bCule hmun thianghlim sung ihsin hremnak pasarih nei vancungmi pasarih pawl cu a thiangfai mi puan nem var an sĭn ih, an ṭāng ah sui ṭāngkhap khapawin an ra suak. 7 Cun thilnung pali lakih pakhat in vancungmi pasarih pawl hnenah kumkhua kumkhuaih a nung mi Pathian-ih thinlingnak thawi khat sui kheng kûm pasarih cu a pek. 8 ^cHmun thianghlim cu Pathian ropitnak le a huham khu in a khat, cule vancungmi pasarih pawlih hremnak pasarih cu kimter a si hlanlo zohman hmun thianghlim sungah an lut thei lo.

15:5^a Suah 38:21; Mip 1:50; Mat 3:16

15:6^b Eze 9:2; Dan 10:5

15:8^c Suah 40:34-35; 1Sp 8:10-11; 2San 5:13-14; Isa 6:4

16

Pathian Thinlingnak Kheng Kûm Pasarih

1 ^aCun hmun thianghlim sung ihsin aw ring zet pakhat in, vancungmi pasarih pawl hnenah, “Va feh uhla, Pathian thinlingnak kheng kûm pawl kha leilung parah burh uh,” tiah a ti ka thei.

16:1^a Sam 79:6; Zef 3:8

2 ^aCule a pakhatnak cu a feh ih, a kheng kûm cu leilung parah a burh. Cule sahrang hminsinnak nei milaipawl parah le amai lem betupawl parah rimse zet mi le a nâ zet mi hma a suak.

16:2^a Suah 9:9-11; Dnp 28:35

3 ^aCun a pahnihnak vancungmi in a kheng kûm kha tifinriat parah a burh. Cule cuih tifinriat cu mithi thisen vekah a cang ih, cuih tifinriat sungih um thilnung tinkim cu an thi ṭheh.

16:3^a Suah 7:17-21

4 ^aCun a pathumnak vancungmi in a kheng kûm cu tivapawl le tihnapawl parah a burh. Cule thisen ah an cang. 5 Cule tipi vancungmi in,

16:4^a Suah 7:17-21

“Atu-ih a um Mi le um zo Mi le a um lai ding Mi, maw Bawipa, nang cu midingfel na si.
Ziangruangahtile hiti vekin thu na rak ṭhen.
6 ^aZiangahtile annih cun mithiangpawl le profetpawlih thisen an suah.
Cule nang in pek tlak an si ruangah annih cu an in dingah thisen na pe hai,”

16:6^a Isa 49:26; Luk 11:49-51

tiah a ti ka thei.

7 Cule biakṭheng ihsin aw dang pakhat in, “A si ngai, Bawipa Pathian, Ziangkimtithei, na thuṭhennakpawl cu an dik ih an dingfel a si,” tiah a ti ka thei.

8 Cun a palitnak vancungmi in a kheng kûm cu ni parah a burh. Cule ni hnenah milaipawl meisa thawi khăng thei nak thuneihnak pek a si. 9 Cule milaipawl cu a sa zet mi ni sa in a kāng hai ih, cuih hremnakpawl parih thuneihnak neitu Pathian hmin cu an thangsiat; amah upatnak pe dingin an lung an thlĕng cuang lo.

10 ^aCun a pangatnak vancungmi in a kheng kûm cu sahrang tokham parah a burh. Cule a lalram cu thim in a khat ih, a nat tuk ruangah an lei an keu. 11 An natnakpawl le an hmapawl ruangah van Pathian an thangsiat ih, an thil tipawl ihsin an lung an thlĕng cuang lo.

16:10^a Suah 10:21-23; Isa 8:22

12 ^aCun a paruknak vancungmi in a kheng kûm kha Zufraṭis tiva pi parah a burh. Cule nisuahnak lam siangpahrangpawlih lamzin timtuah a si thei nak dingah a ti cu a kāngcat. 13 ^bCule rulhreng kâ sung, sahrang kâ sung le profet deu kâ sung ihsin a ra suak mi butlak vek thlarau bawrhhlawh pathum ka hmu. 14 ^cCupawl cu khawsiapawlih thlarau, hminsinnakpawl tuah ṭheu tu an si. Annih cu Ziangkimtithei Pathian-ih ni rapthlak, doawknak ih hruaikhawm dingin leitlun siangpahrangpawl hnenah le leitlun pumpuluk ah an fehsuak.

16:12^a Isa 11:15-16; 41:2

16:13^b Suah 8:6

16:14^c Mat 24:14, 24; 1Ti 4:1

15 ^a“Ngai hnik, fifir vekin ka ra ding. Ralring ih a sinfen a fingkhawitu cu mithlawsuak a si, culole taklawng in a um ding ih, a ningzahnak mi in an hmu pang ding.”

16:15^a Luk 12:37, 39

16 ^aCule thlarau pathum pawl cun siangpahrangpawl cu Hebru ṭawng in Armageddon an ti mi hmun ah an hruaikhawm.

16:16^a Lai 5:19; 2Sp 23:29-30; Zek 12:11

17 ^aCun a pasarihnak vancungmi in a kheng kûm cu thli lakah a burh. Cule van temple sungih laltokham ihsin, “Ṭheh a si zo!” tiin aw ring zet a ra suak. 18 ^bCule awpawl le khawripawl le nimthlakaupawl a ra um. Linghnîn maksak, cuti vekih a cak mi le a maksak mi lei milai an um thawk ihsin a um dah kel lo mi linghnîn a um. 19 Cun khawpi ropi cu ṭhen thum ah a ṭhenaw ih, miphunpawlih an khawpipawl khal an cim ṭheh. Cule a nasa zet mi a thinlingnak sabit zu no inter dingin Babilon khaw ropi cu Pathian in a máng. 20 Cun tikulh zaten an tlanhlo ṭheh ih, tlangpawl cu hmuh an si nawn lo. 21 ^cCule van ihsin rial tumpi pi, pakhat ah talent khat tluk rit milaipawl parah an tla. Hremnak cu a nasa tuk ih, cuih rial hremnak ruangah milaipawl in Pathian an thangsiat.

16:17^a Efe 2:2

16:18^b Dan 12:1; Mat 24:21

16:21^c Suah 9:23-25; Eze 13:13

17

Sahrang parih To Nunau

1 ^aCun kheng kûm pasarih keng, vancungmi pasarih lakih pakhat ka hnenah a ra ih hitin i sim, “Hi tawkah ra hnik, tidai tampi parih to a maksak zet mi hlawhhlang nu tlunih thuṭhennak ka lo hmuh ding. 2 Leitlun siangpahrangpawl cu amah thawn nunau-mipa sualnak an tuah ih, leitlun ih a um mi milaipawl cu a nunau-mipa sual tuahnak sabit zu ri-in an um,” tiah a ti.

17:1^a Isa 23:17; Jer 51:13

3 Vancungmi cun ramṭhing ah Thlarau in i hruai. Cule Pathian thangsiatnak hminpawl ih a khat mi lu pasarih le ki pahra nei sahrang senlar parih to nunau pakhat ka hmu. 4 ^aCuih nunau cun hnipuan sendup le senlar a hruk ih, sui le lung mankhung pawl le keplungpawl thawn a thuamaw. Cule a kut ah thil fihnungza pawl le a nunau-mipa sual tuahnak thil bawrhhlawh pawl thawi a khat mi sui no a keng. 5 Cule a cal ah,

17:4^a Jer 51:7; Eze 28:13

“THUTHUP, A ROPI ZET MI BABILON,
HLAWHHLANGPAWL LE LEITLUN
THIL FIHNUNGZA PAWLIH NU,”

tiih hmin ngan mi a um. 6 Cuih nunau cu mithiangpawlih thisen le Jesu ruangih martar tuarpawlih thisen ri-in ka hmu.

Cu nu ka hmuh tikah mak ti zetin ka mang a bang. 7 Cule vancungmi in ka hnenah, “Ziangah na mang a bang? Nunau le a phurtu sahrang, lu pasarih le ki pahra nei ih thuthup ka lo sim ding. 8 ^aNa hmuh mi sahrang kha hlanah a rak um dah zo, atu-ah cun a um lo, taw net nei lo khur sung ihsin a hung suak ding ih, siatralnak ah a feh ding. Cule leitlun ih cêngpawl, leilung hramthăwk ihsin Nunnak Cazual sungih hmin ngan lo mipawl in, hlanih rak um dah zo, atu-ih um lo, cule a um leh sal ding mi, sahrang an hmuh tikah an mang a bang ding.

17:8^a Luk 8:31

9 “Hi tawkah fimnak nei lungthin a um: lu pasarih cu cuih nunau tonak tlang pasarih an si. 10 Siangpahrang pasarih khal an si. Panga cu an tlu zo ih, pakhat cu a um lai, pakhat cu a ra lang hrih lo. Cule a ra lăng tik khalah cān tawite sung lawng a um ding. 11 Cun a rak um dah zo, cule atu-ih um lo mi sahrang kha a pariatnak a si, siangpahrang pasarih lakih tel a si ih, siatralnak ah a feh.

12 “Ki pahra na hmuh mi kha lalram a co hrih lo mi siangpahrang pahra an si, asinan sahrang thawn nazi pakhat sung siangpahrang vekin thuneihnak an cotlang ding. 13 Cuih siangpahrang pahra pawl cu lungthin pakhat an nei ih, an huham le an thuneihnak cu sahrang hnenah an pe ding. 14 ^aAnnih cun Tuufano cu an do ding ih, Tuufano cu bawipawlih Bawi, siangpahrangpawlih Siangpahrang a si ruangah annihpawl cu a neh hai ding. Cule a hnenih um mipawl cu kawh mi, hril mi, mirinum an si,” tiah i ti.

17:14^a Mat 22:14; Joh 16:33; 1Ti 6:15

15 ^aCun vancungmi cun ka hnenah, “Na hmuh mi hlawhhlang nuih tonak tipi cu minungpawl, mipi, miphunpawl le ṭawngpawl an si. 16 ^bCule sahrang parih na hmuh mi ki pahra pawl khan hlawhhlang nu cu an hua ding ih, zianghman nei lo le taklawng in an umter ding, a sa an ei ding ih, meisa in an ur ding. 17 ^cZiangahtile Pathian kamsuakthupawl a thlenkim lai hlanlo a tumtah mi an tuahnak dingah le lungthin pakhat an neihnak dingah le an lalram sahrang hnenih an peknak dingah, Pathian in an thinlung ah a fial hai. 18 Cule na hmuh mi nunau kha khawpi ropi, leitlun siangpahrangpawl uktu a si,” tiah i ti.

17:15^a Isa 8:7; Jer 47:2

17:16^b Eze 16:37, 39

17:17^c Jer 39:16; 2Ko 8:16

18

Babilon Tlûknak

1 ^aCuih thilpawl hnuah a dang vancungmi, van ihsin a rung ṭum ka hmu. Anih cun thuneihnak ropi a nei ih, a ropitnak in leilung a tlêt. 2 ^bCule anih cun aw ring zetin nasa zetin a au ih, “A tlu e, a tlu e, khawpi ropi Babilon cu! Anih cu khawsiapawl cēnnak le thlarau bawrhhlawh tinkim umkhawmnak le huatumza vate bawrhhlawh tinkim hrangih thawnginn ah a cang zo! 3 ^cZiangahtile miphun zaten a nunau-mipa sualnak thinlingnak sabit zu cu an in zo. Leitlun siangpahrangpawl cun amah thawn nunau-mipa sualnak an tuah ih, leitlun ih sumtuahpawl cun a năwmcennak khatliam cu an lenpi phah,” tiah a ti.

18:1^a Eze 43:2

18:2^b Isa 13:21-22; Jer 50:39; Zef 2:14-15

18:3^c Eze 27:9-25

4 ^aCule van ihsin aw dang in hitiih a ti ka thei, “Ka minungpawl, a sualpawl ih nan tellonak dingah le hrem a tuarnak nan tuar ve lo nak dingah a sung ihsin suak uh. 5 ^bZiangahtile cu nuih sualpawl cu van an thleng ih, Pathian in a thil tuah sualpawl kha a cîng ringring. 6 ^cNan parih a tuah mi vekin lehrūl uhla, a thil tuah mi vekin a letin lehrūl uh. A cawhrawinak no sungah a hrangah a letin căwkrawi uh. 7 ^dAmah le amah a rak ropitawkternak zat in le nuamcēn ih a rak um zat in hremnak le riahsiatnak pe uh. Ziangahtile a thinlung sungin, ‘Siangpahrang bawinu vekin ka to, nuhmei ka si lo ih, riahsiatnak cu ka hmu dah hrimhrim lo ding,’ tiah a tiaw. 8 ^eCuruangah hremnak a tuar ding mipawl thihnak, riahsiatnak le mangṭam pawl cu ni khat sungah an ra thleng ding ih, amah cu meisa ih urkăng thluh a si ding. Ziangahtile amah thu a ṭhentu Bawipa Pathian cu a cak a si.

18:4^a Sem 19:15; Isa 48:20; Jer 50:8; 2Ko 6:17

18:5^b Sem 18:20-21; Jer 51:9

18:6^c Sam 137:8; Isa 40:2; Jer 50:15, 29

18:7^d Sam 10:6; Isa 47:7-8; Eze 28:2-8; Zef 2:15

18:8^e Isa 9:14; Jer 50:31-32

9 ^a“Amah thawi nunau-mipa sualnak tuah ih, nuamcēn ih rak um, leitlun siangpahrangpawl cu a kăngnak meikhu an hmuh tikah amah an ṭah ding ih, an râk ding. 10 A tuar mi ṭih ruangah a hlatnak hmun ah dīngin, ‘Ala, ala, khaih Babilon khaw ropi, khaih a cak zet mi khawpi! Nazi pakhat sungah thuṭhen na sinak a ra thleng a si hi!’ tiah an ti ding.

18:9^a Jer 51:8; Eze 26:17-18

11 ^a“Cule leitlun ih sumtuahpawl zohman in an sumtuahnak thil an lei nawn lo ruangah cuih khawpi cu an ṭah ding ih riahsiain an um ding. 12 ^bAn zuar mi sui le ngun, lung mankhung le keplung, puan nem páte le puan sendup, pu puan le puan senlar, thing rimhmui phunphun le vui ho ih tuah mi bungbel a phunphun, thing mankhung ih tuah mi bungbel a phunphun le dar, thir le marbal lung, 13 ^cthingthak hmui le rimthaw, hriak rimhmui le frankinsense rimhmui, sabit zu le hriak, sangvut phut le sangvut, caw le tuu, rangpawl le rang lêngpawl, sálpawl le minung nunnakpawl cu an lei nawn lo. 14 Na thlarau ih câkhiar mi rahpawl cun an lo tlanhlohsan, lennak thil hmuahhmuah le thil duhnung hmuahhmuah cun an lo tlanhlohsan ih, cupawl cu ziangtik hmanah na hmusal nawn hrimhrim lo ding. 15 ^dHi thilpawlih sumtuahpawl, amah ih a lenter mipawl cu, a tuar mi hremnak an ṭih ruangah hlapi ah an dīng ding, an ṭap ding ih an râk ding. 16 Cule, ‘Ala, ala, puan nem páte, puan sendup, puan senlar hruhih sui le lung mankhung le keplung pawl thawi a thuamaw mi khaih khaw ropi cu, 17 ^enazi pakhat sungah kha tluk lennak maksak cu zianghmanlo ah a cang tariai,’ tiah an ti ding. Lăwng mâwngtupawl hmuahhmuah, lăwng ih khualtlawngpawl hmuahhmuah, lăwng hnaṭuantupawl hmuahhmuah le tifinriat ih sumtuahpawl hmuahhmuah cu hmun hlatpi ah an ding. 18 ^fCule a kăngnak meikhu an hmuh tikah an ṭap ih, ‘Hi khawpi ropi vek hi ziang khawpi so um dah?’ tiah an au.

18:11^a Eze 27:27, 31

18:12^b Eze 27:12-22

18:13^c Eze 27:13; 1Ti 1:10

18:15^d Eze 27:31

18:17^e Eze 27:28-30

18:18^f Eze 27:32

19 ^a“ ‘Ala, ala, hi khawpi ropi hi milian ih kan cannak a si, kannih tifinriat parih lăwng neipawl hmuahhmuah cu a thil mankhung pawl ruangah milian ah kan cang. Nazi pakhat sungah zianghmanlo ah a cang tariai,’ tiah au-in an lu ah leivut an phulhaw.

18:19^a Jos 7:6; Ṭah 2:10; Eze 27:30-31

20 ^a“Maw van, nannih apostol thianghlim pawl le profet thianghlim pawl, amah ruangah lungawi aipuangin um uh, ziangahtile Pathian in nan hrangah a parah phuba a la zo!” tiah a ti.

18:20^a Jer 51:48

21 ^aCun a cak zet mi vancungmi pakhat in rial lung tumpi vek lung pakhat a lâk ih, tifinriat sungah a hlăwn, cule, “Hiti vekin khawpi ropi Babilon cu nasa zetih hlăwnthlak a si ding ih, hmuhsal a si nawn hrimhrim lo ding. 22 ^bṬingṭang tumtupawl, awnmawi tumtupawl, phirivau tumtupawl le tawtawrawt phawtupawl ih aw cu na sungah theih a si nawn lo ding. Zungthiam, ziang vek zungthiam an si khalle na sungah hmuh an si nawn lo ding ih, rialnak awnthawm khal na sungah theih a si nawn hrimhrim lo ding. 23 ^cMeito tleu khal na sungah a vâng nawn hrimhrim lo ding ih, na sungah mo le mo neitu paih aw khal theih a si nawn hrimhrim lo ding. Ziangahtile na sumtuahpawl cu leitlun ih miropi zetzet pawl an rak si ih, na dawi thiamnak in miphun zaten bum an rak si. 24 ^dCule profetpawl, mithiangpawl le leilung tlunih thah mipawl hmuahhmuah ih thisen cu a sungah hmuh a si,” tiah a ti.

18:21^a Jer 51:63

18:22^b Isa 24:8; Jer 25:10; Eze 26:13

18:23^c Isa 23:8; Jer 7:34; Nah 3:4

18:24^d Jer 51:49; Mat 23:35

19

Van ah Thangṭhatnak

1 Cuih thilpawl hnuah van ah mipi tam zet aw ring zetin,

“Halleluiah!
Rundamnak, ropitnak, upatnak le huham cu Bawipa kan Pathian ta a si!
2 Ziangahtile a thuṭhennakpawl cu an dik ih, an fel.
A nunau-mipa sual tuahnak in leilung a bawrhhlawhtertu a maksak zet mi hlawhhlang nu cu thu a ṭhen zo ih, a siahhlawhpawlih thisen kha cu nuih parah phuba a la zo,”

tiah an ti. 3 ^aAnnih in,

19:3^a Isa 34:10

“Halleluiah! Cuih hlawhhlang nuih khu cu kumkhuaih kumkhua tiang a kaiso!”

tiah an tisal.

4 Upa 24 pawl le thilnung pali pawl in laltokham parih to Pathian cu băwkkhupin an bia ih, “Amen! Halleluiah!” tiah an ti.

5 ^aCun laltokham ihsin aw a ra suak mi cun,

19:5^a Sam 115:13; 134:1

“Nannih a siahhlawhpawl hmuahhmuah, nannih amah ṭihzahtu mithupipawl le mithupi lo pawl hmuahhmuah, kan Pathian thangṭhat uh!”

tiah a ti.

Tuufano Nupi Ṭhit Puai

6 Cule minung tampi aw vek le tidai tampi aw vek, a cak zet mi khawri aw vekin,

“Halleluiah! Ziangahtile Ziangkimtithei Bawipa Pathian in a uk a si, a ti ka thei.
7 ^aLungawi le aipuangih umin, amah cu upatnak pe uhsi, ziangahtile Tuufano nupi ṭhit puai a thleng zo ih, a nupi khal amah te rori in a timtuahaw zo,”

19:7^a Mat 22:2; Efe 5:32

tiih a ti kha ka thei.

8 ^aCule Tuufano nupi cu a thuamawknak dingah puan nem páte ṭha zet, fai le var cu pek a si, ziangahtile puan nem páte cu mithiangpawlih dingfelnak a si.

19:8^a Isa 61:10; Eze 44:17

9 ^aCun vancungmi cun ka hnenah, “ ‘Tuufano nupi ṭhit puai ih sawm mipawl cu mithlawsuak an si,’ tiin ngan aw,” in ti. Cule ka hnenah anih in, “Hih thupawl hi Pathian thudik an si,” tiah i ti.

19:9^a Luk 14:15

10 ^aCule amah be dingah a ke hramah ka băwkkhup. Asinan anih cun ka hnenah, “Kha tin ti hlah! Kei cu nangmah le Jesu-ih thutheihtertu na unaupawlih siahhlawhpi ka si. Pathian be aw! Ziangahtile Jesu-ih thutheihternak cu simsungnak thlarau hi a si,” tiah a ti.

19:10^a Apo 10:25-26

Rang Var parih To

11 ^aCun van áwngaw ka hmu ih, ngai hnik, rang var pakhat le a parih to Rinum le Dik an ti mi cu ka hmu fawn. Anih cun dingfelnak in thu a ṭhen ih, ral a do. 12 A mit cu meisa alh vek an si ih, a lu parah lallukhum tampi a khum. Hmin ngan mi a nei ih, amah siarlo zohman in an thei lo. 13 ^bAnih cu thisen sungih hnīm mi kâwrfual hruhter a si, cule a hmin cu “Pathian Kamsuakthu” tiih kawh a si. 14 Cule van ralkappawl cun puan nem páte, var le fai sĭnin rang var pawl parah toin amah cu an run thlun. 15 ^cCun a kâ sung ihsin ralnâm hriam pakhat a suak ih, cuih ralnâm in miphunpawl cu a sat hai ding. Cule anih cun thir kianghrăwl thawn a uk hai ding. Ziangkimtithei Pathian thinlingnak le a nasa zet mi sabit sawrnak khur ah cun a pálsawr hai ding. 16 ^dCule a kâwrfual par le a cāwn parah,

19:11^a Suah 15:3; Sam 96:13; Isa 11:4; Mat 3:16

19:13^b Isa 63:2-3; Joh 1:1

19:15^c Sam 2:9; Isa 11:4; 2Th 2:8

19:16^d 1Ti 6:15

“SIANGPAHRANGPAWLIH SIANGPAHRANG LE
BAWIPAWLIH BAWI,”

tiih ngan mi hmin a um.

17 ^aCun ni ih dîng vancungmi pakhat ka hmu ih, anih cun van ih a zam mi vate hmuahhmuah hnenah aw ring zetin, “Pathian ropi ih zanriah ah cun fĭnkhawmaw uh. 18 ^bSiangpahrangpawlih sa, ralbawipawlih sa, micakpawlih sa, rangpawl le an parih topawlih sa, mi hmuahhmuah ih sa, miluat le sál pawlih sa, mithupi le mithupi lo pawlih sa nan ei thei nak dingah ra uh,” tiin a au.

19:17^a Isa 34:6; Jer 12:9; 46:10; Eze 39:17

19:18^b Eze 39:18-20

19 Cule sahrang, leitlun siangpahrangpawl le an ralkappawl cu rang parih to Pa le a ralkappawl do dingah an fĭnkhawmawk ka hmu. 20 ^aCun sahrang le sahrang mithmuh ih hminsinnak tuah ṭheu tu profet deu cu kaih an si. Cuih hminsinnakpawl hmang cun sahrang hminsinnak neitupawl le a milem betupawl cu a bum ṭheu hai. An pahnih in kât meisa thawi a alh mi mei lipi sungah nung cingin a paih hai. 21 Cule a tāng mipawl cu rang parih to Pa in a kâ ihsi a suak mi ralnâm in a that ṭheh. Cule vate hmuahhmuah cun cupawlih sa cu khawp zetin an ei.

19:20^a Dan 7:11; Mat 24:24

20

Kum 1000

1 ^aCun vancungmi pakhat taw net nei lo khur awnnak tawhfung nei le a kut ih cikcin tûm zet pakhat keng van ihsin a rung ṭum kha ka hmu. 2 ^bAnih cun khaih rul tar, rulhreng cu a kai. Cumi cu Diabol le Setan a si. Anih cu kum 1000 sung vancungmi cun a ṭawnhrem ih, 3 ^ckum 1000 a kim hlanlo miphunpawl bum nawn lo dingin taw net nei lo khur sungah a vun hlăwn, a kharkhum ih a erhpit. Asinan cuih thilpawl hnuah cān málte sung thlahsal a si ding.

20:1^a Luk 8:31

20:2^b Isa 24:22; Mat 4:10; 2Pe 2:4

20:3^c Dan 6:17; Mat 27:66

4 ^aCule laltokhampawl ka hmu ih, cupawl parah mi an to, cule an hnenah thuṭhennak pek an si. Cun Jesu-ih thutheihpitu an si ruangah le Pathian kamsuakthu ruangah lu tan a tuartupawlih thlaraupawl ka hmu. Hipawl cun sahrang an be lo, a milem khal an be lo ih, a hminsinnak khal an cal ah siseh, an kut ah siseh, an nei ve lo. Cupawl cu an nungsal ih, Khrih thawn kum 1000 sung an uk. 5 ^bSikhalsehla a dang mithipawl cu kum 1000 a cem hlanlo an nungsal hrih lo. Himi cu thawhsalnak hmaisa a si. 6 ^cThawhsalnak hmaisa ih a teltupawl cu mithlawsuak le mithianghlim an si. An parah thih hnihnak in thuneihnak zianghman a nei lo, annih cu Pathian le Khrih-ih puithiam an si sawn ding ih, amah thawn kum 1000 an uk ding.

20:4^a Dan 7:9; Mat 19:28; Heb 4:12

20:5^b Luk 14:14; Fil 3:11; 1Th 4:16

20:6^c 1Pe 2:5

Setan Nehnak

7 Cun kum 1000 a cem tikah, Setan cu a thawngtlaknak ihsin suah a si ding. 8 ^aCule leilung kil li ih um miphunpawl bum dingin a fehsuak ding, cuih miphunpawl cu Gog le Magog an si. Annihpawl cu ral do dingah a fĭnkhawm hai ding, an mipum cu tifinriat ih vunnel zat an si. 9 ^bLeilung tlun hmun zakip ah an fehdarh ih, mithiangpawl umnak hmun le duhdawt zet mi khawpi cu an kulh. Cule van ihsin Pathian hnenin meisa a rung tla ih, anmahpawl cu a kangrál thluh. 10 Anmah bumtu Diabol cu sahrang le profet deu an hlăwnnak mei lipi le kât meisa sungah an hlăwn. Cule annihpawl cu a sun a zanin kumkhuaih kumkhua tiang hrem an si ding.

20:8^a Isa 11:12; Eze 7:2; 38:2, 9; Heb 11:12

20:9^b Eze 38:9, 22

Laltokham Var Thuṭhennak

11 Cun laltokham var ropi le a parih to Pa cu ka hmu, a hmai ihsin leilung le van cu an tlanhlo ih an um nawn lo. 12 ^aCule mithipawl, mithupipawl le mithupi lo pawl khal Pathian hmaika ih dîng ka hmu. Cule cazualpawl pharh an si ih, cazual dang pakhat khal pharh a si, cucu Nunnak Cazual a si. Cule mithipawl cu cuih cazualpawl sungih an ngan mi thilpawl, an thil tuah mipawl vekin thuṭhen an si. 13 ^bTifinriat cun a sungih um mithipawl kha a hun suah ih, Thihnak le mithi khua khal in an sungih um mithipawl kha an hun suah ve. Cule mi tin an thil ti mi bangtukin thuṭhen an si. 14 ^cCun Thihnak le mithi khua cu mei lipi sungih hlăwn an si. Himi cu vei hnih thihnak a si. 15 Cule zokhal Nunnak Cazual sungih an hmin ngan hmuh a si lo mi cu mei lipi sungah hlăwn an si.

20:12^a Suah 32:32; Dnp 29:20; Jer 17:10; Dan 7:10; 12:1; Mal 3:16; Mat 16:27; Luk 10:20

20:13^b Isa 26:19; Mat 16:27

20:14^c 1Ko 15:26

21

Van Thar le Lei Thar

1 ^aCun van thar le lei thar ka hmu, ziangahtile van hmaisa le lei hmaisa cu an hloral ih, tifinriat khal a um nawn lo. 2 ^bCun khawpi thianghlim, Jerusalem Thar cu, a pasal hrangih mawi zetih a ceiaw mi mo vekin timtuahawin van Pathian hnen ihsin a rung ṭum kha keimah, John in ka hmu. 3 ^cCule van ihsin a ring zet mi aw pakhat in, “Ngai hnik, Pathian biakbûk cu minungpawl hnenah a um, amah cu an hnenah a cêng ding ih, annih cu amai minung an si ding. Pathian amah rori cu an hnenah a um ding ih, an Pathian a si ding. 4 ^dCule Pathian in mitthli hmuahhmuah kha an mit ihsin a hnulhlo thluh ding. Thihnak a um nawn lo ding, riahsiatnak a um nawn lo ding ih, ṭahnak khal a um nawn lo ding. Nat tuar khal a um nawn lo ding, ziangahtile thil hmaisa pawl cu an hloral thluh zo,” a ti ka thei.

21:1^a 2Pe 3:13

21:2^b Neh 11:18; Heb 11:10

21:3^c Suah 25:8; 2San 6:18; Eze 48:35; Zek 2:10; 2Ko 6:16

21:4^d Isa 25:8; 35:10; 1Ko 15:26; 2Ko 5:17

5 Cun laltokham parih to Pa in, “Ngai hnik, thil hmuahhmuah cu ka tharter thluh zo,” tiah a ti. Cule ka hnenah, “Ngan aw, ziangahtile hi ṭawngkampawl hi an dik ih, rin tlak an si,” tiah i ti.

6 ^aCule ka hnenah, “Ṭheh a si zo. Kei cu Alfa le Omega, Thawknak le Cemnak ka si. Tihâl mi hnenah nunnak tihna a lakin ka pe ding. 7 ^bA nehtu cun thil hmuahhmuah ro ah a co ding, keimah cu a Pathian ka si ding ih, anih cu ka fapa a si ding. 8 ^cAsinan miṭihhrutpawl, zumlotupawl, Pathian huat mi tuahtupawl, laithatpawl, nunau-mipa sualnak tuahtupawl, dawithiampawl, milem biapawl le thuphan perpawl hmuahhmuah ih an co ding hmun cu mei le kât thawi a kāng mi mei lipi a si ding, himi cu vei hnih thihnak a si,” tiah a ti.

21:6^a Isa 55:1; Joh 4:10

21:7^b 2Sam 7:14; Joh 16:33; Rom 8:14; 2Ko 6:16

21:8^c Sam 5:6; 1Ko 6:9; Heb 12:14

Jerusalem Thar

9 Cun vancungmi pasarih, hremnak netabik pasarih thawi a khat mi kheng kûm pasarih kengtu lakih pakhat kha ka hnenah rain i sim ih, “Hi tawkah ra aw, Tuufano nupi, mo cu ka lo hmuh ding,” tiah i ti. 10 ^aCule cuih vancungmi cun Thlarau in tlang tûm zet le sâng zet parah in thiarhlo ih, khawpi ropi Jerusalem khaw thianghlim Pathian hnenin van ihsi a rung ṭum mi cu i hmuh. 11 ^bCuih khawpi cun Pathian ropitnak a nei. A tleuzia cu lung mankhungbik jasper lung vek le khrisṭal lung vekih fai a si. 12 ^cCuihtlunah kulh ropi zet le sâng zet a nei ih, kăwtka hleihnih a nei. Cuih kăwtkapawl ah cun vancungmi hleihnih an um ih, cuih kăwtkapawl parah Israel tefa hnám hleihnih hminpawl ngan a si. 13 Nisuahnak lamah kăwtka pathum, sak lamah kăwtka pathum, thlang lamah kăwtka pathum, nitlaknak lamah kăwtka pathum a um. 14 ^dCun cuih khawpi kulh cun lungphum hleihnih a nei ih, an parah Tuufano-ih apostol hleihnih pawlih hmin ngan a si.

21:10^a Eze 40:2

21:11^b Isa 60:1-2; Eze 43:2

21:12^c Eze 48:30-34

21:14^d Apo 1:26; Efe 2:20

15 ^aCule i simtu vancungmi cun cuih khawpi le a kăwtkapawl le a kulh tah dingah sui phai kung fung a keng. 16 Cuih khawpi cu kil li neiin a um; a kauh lam le a sau lam a bangaw. Cule cuih vancungmi in khawpi kha cuih tahnak fung in a tah: a sau lamah peng 1500 a si ih, a kauh lam khalah peng 1500, a san lam khalah peng 1500 thotho a sâng. 17 Cun vancungmi cun khaw kulh cu minung tahnak hmangin, cumi cu vancungmi tahnak a si, a tah ih dawng 144 a si. 18 Cun a kulh cu jasper lung mankhung ih tuah a si ih, cuih khawpi cu thlalang vekih a fim mi sui hlir ih tuah a si. 19 ^bCuih khawpi kulh ṭohrampawl cu lung mankhung a phunphun ih ceimawi an si.

21:15^a Eze 40:3

21:19^b Suah 28:17-20; Isa 54:11-12

Ṭohram hmaisabik cu jasper lung a si ih, a pahnihnak cu safaira lung a si, a pathumnak cu kalkidon lung a si ih, a palitnak cu emerald lung a si. 20 A pangatnak cu sardonuk lung a si ih, a paruknak cu sardias lung a si. A pasarihnak cu krisolait lung a si ih, a pariatnak cu birul lung a si. A pakuatnak cu ṭopaz lung a si ih, a pahratnak cu krusopra lung a si. A hleikhatnak cu jacinth lung a si ih, a hleihnihnak cu amethist lung a si.

21 ^aKăwtka hleihnih pawl cu keplung hleihnih an si. Kăwtka pakhat ciar cu keplung pakhat fingfing an si. Cule cuih khawpi lamzin cu sui hlir, hmuhtlăng thei mi thlalang vek a si.

21:21^a Isa 54:12

22 ^aCule cuih khawpi sungah cun temple ka hmu lo, ziangahtile Ziangkimtithei Bawipa Pathian le Tuufano cu cuih khawpiih temple an si. 23 ^bCuih khawpi cu Pathian ropitnak in a tlêt ruangah a tleu hrangah ni khal a ṭul lo, thlapi khal a ṭul lo. Tuufano cu cuih khawpiih tleu a si. 24 ^cCule rundam a si mi miphunpawl cu cuih khawpiih tleu ah an feh ding ih, leitlun siangpahrangpawl cun an ropitnak le an zahumnak cu cuih khawpi sungah an kenglut ding. 25 ^dCuih khawpi kăwtkapawl cu sunnivuin khar an si lo ding, ziangahtile cu tawkah zan a um hrimhrim lo ding. 26 Cule miphunpawl in an ropitnak le an zahumnak kha cuih khawpi sungah an kenglut ding. 27 ^eCun cuih khawpi sungah cun ziangti lam hmanin thil thiang lo zianghman a lut lo ding, thil fihnungza tuahtu le thuphan perhmang pawl khal an lut lo ding. Tuufano Nunnak Cazual sungih an hmin ngan a si mipawl lawng an lut ding a si.

21:22^a Joh 4:21

21:23^b Isa 24:23

21:24^c Isa 60:3, 5

21:25^d Isa 60:11; Zek 14:7

21:27^e Isa 52:1; Joe 3:17

22

Nunnak Tiva

1 ^aCule vancungmi cun nunnak ti, tiva fim, khrisṭal lung vekih fim Pathian le Tuufano laltokham ihsi a luangsuak mi cu i hmuh. 2 ^bCuih khawpi lamzin laifangah le cuih tiva tlang kap hnih ah phun hleihnih a rah mi nunnak thingkung a um ih, thla tinten rah a rah. Cuih thingkung hnahpawl cu miphunpawl hrangah damnak a si. 3 ^cCule cu tawkah camsiatnak hrimhrim a um nawn lo ding ih, Pathian le Tuufano laltokham cu cuih khawpi ah a um ding, cule a siahhlawhpawl in amah an rian ding. 4 ^dA hmel an hmu ding ih, a hmin cu an cal ah a um ding. 5 ^eCu tawkah zan a um nawn lo ding: meito an ṭul nawn lo ding ih, ni tleu khal an ṭul nawn lo ding, ziangahtile Bawipa Pathian in tleu a pe hai ding ih, kumkhuaih kumkhuain an uk ding.

22:1^a Sam 36:8; Eze 47:1; Zek 14:8; Joh 4:10

22:2^b Eze 47:12

22:3^c Zek 14:11

22:4^d Mat 5:8

22:5^e Isa 60:19-20; Dan 7:27; Zek 14:7

6 ^aCun anih in ka hnenah, “Hi kamsuakthupawl hi zum tlak le a dik mi an si,” tiah i ti. A thianghlim mi profetpawlih Bawipa Pathian cun thil rung thleng tengteng cing ding mipawl cu a siahhlawhpawl hmuh dingin a vancungmi a thlah a si.

22:6^a 1Ko 14:32

7 ^a“Ngai hnik, ka ra cing ding! Hi cazual sungih simsungnak kamsuakthupawl a thluntu cu mithlawsuak an si,” tiah Jesu in a ti.

22:7^a Mat 16:27

8 Cun kei, John hi cuih thilpawl hmutu le hna ih theitu ka si. Cule ka thei ih, ka hmuh tikah, cuih thilpawl i hmuhtu vancungmi cu be dingin a ke hramah ka băwkkhup. 9 Cun anih in ka hnenah, “Hitin tuah hlah. Ziangahtile kei cu nangmah le na unau profetpawl le hi cazual sungih kamsuakthupawl thluntupawlih siahhlawhpi ka si. Pathian be aw,” tiah i ti.

Jesu a Ra cing Ding

10 ^aCule anih in ka hnenah, “Hi cazual simsungnak kamsuakthupawl hi erhpit hlah, ziangahtile cān a nai zo. 11 ^bMidik lo cu dik loin um hrih ko seh, mibawrhhlawh cu bawrhhlawh in um hrih ko seh, midingfel cu felin um hrih ko seh, mithianghlim cu thianghlim in um hrih ko seh,” tiah i ti.

22:10^a Dan 8:26; Rom 13:11

22:11^b Eze 3:27; Dan 12:10

12 ^a“Cule ngai hnik, zamrang zetin ka ra ding, mi kip an tuah mi bangtukih pe dingin ka lawmman cu ka hnenah a um. 13 Kei cu Alfa le Omega, Thawknak le Cemnak, Hmaisabik le Netabik ka si.”

22:12^a Isa 40:10; Mat 16:27

14 A thupekpawl a thluntu cu mithlawsuak an si, nunnak thingkung ei thei nak le kăwtkapawl ihsin khawpi sungih luh thei nak an nei ding. 15 ^aZiangahtile lengih umpawl cu uicopawl, dawithiampawl, nunau-mipa sualnak tuahtupawl, laithatpawl, milem bepawl, thuphan per duhtu pauhpauh le thuphan perhmang pawl an si.

22:15^a Dnp 23:18; 1Ko 6:9-10; Gal 5:19-21; Fil 3:2; Kol 3:5-6

16 ^a“Kei, Jesu in hi thilpawl hi kawhhranpawl lakih nan hnenah theihter dingin ka vancungmi ka run thlah a si. Keimah cu David-ih Hram le Tesinfa, A Tleu Zet Mi le Deirel Arsi ka si,” tiah a ti.

22:16^a Mat 1:1; 2Pe 1:19

17 ^aCule Thlarau le mo cun, “Ra aw!” an ti. A theitu in, “Ra aw!” ti seh. Tihâl mi cu ra seh. Zokhal a duhtu cun nunnak ti a lakin la seh.

22:17^a Joh 4:10

18 ^aHi cazual sungih simsungnak kamsuakthupawl a theitu hmuahhmuah hnenah ka lo theihter a si: zokhal in hi thilpawl tlunih a bêt asile, hi cazual sungih ngan mi hremnakpawl hi Pathian in a parah a thlengter ve ding. 19 ^bCule zokhal in hi simsungnak cazual sungih kamsuakthupawl a lâkhlo asile, nunnak cazual ih a co ding mi a covo siseh, khawpi thianghlim ih a co ding mi a covo siseh, hi cazual sungih ngan mi thilpawl a co ding mi a covo siseh, Pathian in a lahlo ve ding.

22:18^a Dnp 4:2; Thf 30:6

22:19^b Dnp 4:2; Thf 30:6

20 ^aHi thilpawl a theihtertu in, “A si, zamrang zetin ka ra ding,” tiah a ti. Amen. A si, Bawipa Jesu, ra aw!

22:20^a Mat 16:27; 1Ko 16:22

21 ^aKan Bawipa Jesu Khrih-ih zangfahnak cu nan zate hnenah um hram seh. Amen.

22:21^a Rom 16:20