About Bible Thianghlim | ©

BibleThianghlim – Luke

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

Luke

12345678910
11121314151617181920
21222324

• A ngantu: Luke
• A siartu: Zentel zumtupawl
• Ngan kum: A.D. 57-59

Jesu in a dungthluntupawl hnenah miphun hmuahhmuah hnenih thuthangṭha phursuak dingah thu a rak pe. Cuih thupek cu kawhhran hmaisa pawl in an rak thlun. Zentel mi tampi khal Khrih thluntu ah an rak cang ve. Thusimtupawl in Pathian thu a si tiih zumtu thar pawl hnenih an rak sim mi thupawl cu ngan cia ih neih an ṭul ruangah, Luke in himi thuthangṭha hi a ngan a si. Thuthangṭha Luke hi a hleicein Theofilas hnenih a ngan mi a si. Sikhalsehla Theofilas hi Zentel zumtupawl hmuahhmuah aiawhtu ih ruah theih a si. Luke in hi thuthangṭha a ngan hnuah, Apostolpawlih Cangvaihnak cabu a ngan (Apo 1:1). Apostolpawlih Cangvaihnak cabu hi A.D. 61 hrawngih ngan mi a si bangin, hi thuthangṭha hi A.D. 57-59 karlakih a ngan mi a si men thei.

Luke hi thuthangṭha ngan dingah Pathian in phun dang zetin a rak timtuah mi a si. Amah hi Thukham Thar cabu ngantu lakih Zentel umsŭn a si. Amah hi sibawi a si (Kol 4:14) ih, Apostolpawlih cangvaihnak cabu sungih missionary khualtlawnnak hrekkhat ah Paul a rak thlun ve, asinan mit roriih Jesu-ih rawngbawlnak hmutu cu a si lo. A thu ngan mi hi nasa zetih a zingzawi hnuih a ngan mi an si (1:1-4). A zingzawinak ruangah a dang thuthangṭha pathum sungih a tel lo mi thu tampi tla an tel. A thu um zat lamah cun Luke hi Thukham Thar sungih a saubik mi a si.

Thuthangṭha Luke in Jesu cu minung famkim le Rundamtu a sinak a langter. Minung a sinak dinhmun in thlacam le Thlarau parih ṭhumawk Jesu in a thupitter. Rundamtu a sinak dinhmun in Jesu in misual cu pumpak lungthlĕngnak ih hruai a tum. Misual cu mipa simaw, nunau simaw, milian simaw, mifarah simaw, nauhak simaw, upa simaw, Jew-mi simaw, Zentel simaw, Samaria-mi simaw a si khalle, Jesu cu mihlo hnenih ngaidamnak pe dingah le aipuannak pe dingah a ra.

Luke in, “Minung Fapa cu a hlo mipawl hawl ding le rundam dingah a ra a si,” (19:10) ti mi a lăngfiangter.

1

Theofilas hnenih Hlănnak

1–4 ^aMit roriih a thawk ihsi hmutu le thu rawngbawltupawl in kan hnenih in rak pek sâwng vek cekci khan, kan lakih thil cang mipawl thuhla mi tampi in a sangsángten ngan dingin ṭan an rak lâk zo vekin, thil hmuahhmuah a thawk ihsin ngunngaih zetih ka zingzawi hnuah na hnenih an lo zirh mi thilpawl kha an dik rori a si ti fiangfel zetih na theih thei nak dingah, na hrangah a sangsângteih ngan hi a ṭha ding tiah ka ruat, maw zahum zet Theofilas.

1:1-4^a Mar 1:1; Joh 15:27; 20:31; Heb 2:3; 1Pe 5:1; Apo 1:1; 2:42; 11:4

Temple sungih Zakariah Rawngbawlnak

5 ^aJudia Siangpahrang Herod san laiah, Abijah-ih ho a si mi puithiam Zakariah a rak um. A nupi cu Aaron tesinfa a si ih, a hmin cu Elizabeth a si. 6 ^bAn pahnih in Pathian hmaiah midingfel an si, sawihnăwm kai loin, Bawipaih thupekpawl le zīn le dān pawl hmuahhmuah an thlun. 7 Elizabeth cu micing a si ruangah fa an nei lo, cule an pahnih in kum upa zet an si.

1:5^a 1San 24:10; Mat 2:1

1:6^b Sem 6:9; Dnp 5:33; 1Sp 9:4

8 ^aCule hitin a si, Zakariah cu amai cān a thlen tikah, puithiam a si vekin, Pathian hmaiih a hopawl thawn puithiam hna a ṭuan laiah, 9 ^bpuithiampawlih tidān kel bangin, camcawhfung an zûk ih, Zakariah-ih ṭuanvo cu Bawipaih temple hmun thianghlim sungih rimhmui ur ding a si. 10 ^cCutiih rimhmui a ur laiah, mipi zaten temple lengah thla an rak cam rero.

1:8^a 1San 24:19

1:9^b Suah 30:7; Sam 141:2

1:10^c Pui 16:17

Vancungmi in John Suahnak Thu a Phuang

11 ^aCun Bawipaih vancungmi pakhat cu a hnenah a rung lang ih, rimhmui urnak biakṭheng vawrh lamah a ding. 12 ^bCule Zakariah in cuih vancungmi a hmuh tikah, nasa zetin a thinlung a buai ih, ṭihnak in a khat. 13 ^cAsinan cuih vancungmi cun a hnenah, “Ṭih hlah, Zakariah, ziangahtile na thlacamnak cu theih a si zo, na nupi Elizabeth in fapa a lo hrinsak ding, cule a hmin ah John na sak pei. 14 Cule aipuannak le lungawinak na nei ding. Cuih na fapa a suah tikah, mi tampi lungawi aipuangin an um ding. 15 ^dZiangahtile anih cu Bawipaih mithmuh ah a ropi ding. Sabit zu siseh, zu siseh a in hrimhrim lo pei. A nuih pum sungih a um lai ihsin Thlarau Thianghlim in a khat ding. 16 Cule anih in Israel-mi mi tampi Bawipa an Pathian lamah a hawikirtersal ding. 17 ^ePalepawlih thinlung cu fāte lamah le thulung lo pawl cu midingfelpawlih fimnak lamah an hawi thei nak dingah, anih cu Bawipaih hmaiah Elijah-ih thlarau le huham in a feh fawn ding. Cucu Bawipa hrangih timtuahaw cia mi milai a tiarter cia thei nak dingah a si,” tiah a ti.

1:11^a Suah 30:1-10; Apo 5:19

1:12^b Lai 6:22-23

1:13^c Mat 14:27

1:15^d Pui 10:9; Mip 6:3; Jer 1:5; Apo 10:44; Gal 1:15; Efe 5:18

1:17^e Mal 4:5-6; Mat 3:3; 11:14

Zakariah a Ṭawng Thei Lo

18 ^aCule Zakariah in vancungmi hnenah, “Na sim vekin a cang ngaingai ding ti cu ziangtin ka thei thei ding? Ziangahtile kei cu patar ka si zo, cule ka nupi khal a kum a upa tuk zo,” tiah a ti.

1:18^a Sem 15:8; 17:17

19 ^aCule vancungmi in a sawn ih a hnenah, “Keimah cu Pathian hmaiih ding Gabriel ka si, nangmah thu lo sim ding le cuih lungawiumza thuthang na hnenih phuang dingah thlah mi ka si. 20 ^bNgai hnik, a tikcucān teih a tlamtling ding mi ka kamsuakthupawl na zum lo ruangah hi thilpawl tlamtlinter a si ni hlanlo na ngui men ding ih, na ṭawng thei lo ding,” tiah a ti.

1:19^a Dan 8:16

1:20^b Suah 4:11; Eze 3:26

21 Mipi in Zakariah cu an rak hngak, cule temple hmun thianghlim sungih rei tuk a um ruangah an mang a bang. 22 A ra suah tikah, a be thei hai lo. Cule annih in temple hmun thianghlim sungah larnak a hmu ti an rak theithiam. Ziangahtile anih in an hnenah theihthiamnak a pe hai ih, ṭawng thei loin a um ringring.

23 Cule hitin a si, Zakariah cu a rawngbawl cān a cem tikah, amai inn ah a tĭn. 24 Cuih hnuah a nupi Elizabeth cu fa a vun ih, thla nga sung inn sungah a khumaw. 25 ^aCule Elizabeth in, “Mi senpi lakih hmuhsuam ka sinak cu i lâksak dingin duhsaknak thawi in zoh tikah, hihi ka hrangih Bawipa in in tisak mi cu a si,” tiah a ti.

1:25^a Sem 30:23; Isa 4:1

Vancungmi in Khrih Suah ding Thu Mary hnenah a Phuang

26 ^aA thla ruknak ah Pathian in vancungmi Gabriel cu Galili peng, Nazareth an ti mi khua ih um, 27 ^bDavid-ih sungza a si mi, Joseph thawn ṭhiaw dingih ham cia mi fala him hnenah a run thlah. Cuih fala him ih hmin cu Mary a si. 28 A hnenah vancungmi a ra ih, “Cibai! Nang cu duhsaknak sâng zet cotu na si, Bawipa na hnenah a um a si; nang cu nunau lakah thlawsuah co mi na si,” tiah a ti.

1:26^a Mat 2:23

1:27^b Mat 1:16; Luk 2:4

29 Asinan Mary in vancungmi a hmuh tikah, a ṭawng mi in nasa zetin a thinlung a buaiter. Cule a thinlung in, “Hi cibaibûknakih sullam cu ziang a si pei?” tiah a ruat.

30 ^aCun vancungmi in a hnenah, “Mary, ṭih hlah, ziangahtile nang cun Pathian duhsaknak na co zo a si. 31 ^bNgai hnik, na pum sungah fa na vun ding ih, Fapa na hring ding. Cule a hmin ah Jesu na sak pei. 32 ^cAnih cu miropi a si ding ih, Cungnungbikih Fapa tiah kawh a si ding. Cule Bawipa Pathian in a hnenah a pupá David-ih laltokham a pe ding. 33 ^dCule Jakob sungza tlunah kumkhuain a uk ding ih, a uknak cu cem ni a nei lo ding,” tiah a sim.

1:30^a Sem 6:8; Mat 14:27

1:31^b Isa 7:14; Mat 1:21, 25

1:32^c Mat 1:1; Mar 5:7

1:33^d 2Sam 7:16; Sam 89:3-4; Isa 9:7; Jer 33:17; Dan 2:44; Mik 4:7; Mat 28:18; Heb 1:8

Mangbangza in Mary Fa a Vun

34 Mary in vancungmi hnenah, “Mipa ka thei si lo ih, hi thu cu ziangtin a cang thei ding?” tiah a ti.

35 ^aCule vancungmi in a sawn ih a hnenah, “Na parah Thlarau Thianghlim a rung thleng ding ih, cungnungbik ih huham in a lo tuam ding. Curuangah na hrin ding mi, Mi Thianghlim khal Pathian Fapa tiah kawh a si ding. 36 Ngai hnik, na sungkhat nu Elizabeth khal in a tar zet hnuah fa a vun, fa a nei thei nawn lo tiah an ti mi cu, atu-ah fa a vunnak thla ruk a si zo. 37 ^bZiangahtile Pathian hrangah thil cang thei lo a um lo,” tiah a ti.

1:35^a Mat 1:18; 4:3

1:37^b Mat 19:26

38 Cun Mary in, “Ngai hnik, kei cu Bawipaih sál nu ka si! Na kamsuakthu vekin ka hnenah thleng ko seh,” tiah a ti. Cule vancungmi cun Mary cu a fehsan.

Elizabeth hnenah Mary a Tlâwng

39 Cuih cān ah Mary cu a tho ih, Judia peng tlang par khaw pakhat ah, zamrangten a hung feh. 40 Cule Zakariah teih inn sungah a lut ih, Elizabeth cu cibai a bûk. 41 Cule hitin a si, Elizabeth in Mary-ih cibaibûknak a theih tikah, a pum sungih nau cu a khir. Cule Elizabeth cu Thlarau Thianghlim in a khat. 42 ^aCun Elizabeth cu aw ring zetin a ṭawngsuak ih, “Nang cu nunau lakah mithlawsuak na si. Na pum sungih naute khal mithlawsuak a si! 43 ^bZiangah ka Bawipaih nu ka hnenih ra tlawn ding duhsaknak cu kei in ka co? 44 Ngai hnik, cibai i bûknak aw ka hnenih a thlen veten, ka pum sungih nau cu aipuangin a khir a si. 45 A zumtu nu cu mithlawsuak a si, ziangahtile Bawipa in a hnenih a sim mi thilpawl cu a cangsuak ding a si,” tiah a ti.

1:42^a Lai 5:24

1:43^b Joh 13:13

Mary-ih Hla

46 ^aCule Mary in,

1:46^a Sam 34:2-3

“Ka nunnak in nasa zetin
Bawipa a thangṭhat.
47 ^aKa thlarau cu i rundamtu
Pathian ah a ai a puang zet.
48 ^bZiangahtile kei a sál nu dinhmun niam zet cu i ngaihsak.
Ngai hnik, atu thawk ihsin ṭhangthar hmuahhmuah in mithlawsuak tiah in ti ding.
49 ^cZiangahtile huham ih a khat mi pa in ka hrangah thil ropi a tuah zo.
A hmin cu a thianghlim a si.
50 ^dCule a zahngainak cu san khat hnu san khat amah ṭihzahtupawl parah a um vivo.
51 ^eA bān in cahnak a langter zo.
An thinlung khawruahnak ih mipuarthaupawl cu a ṭekdarhter zo.
52 ^fMithiltitheipawl cu an laltokham ihsin a dirtla ih,
Mihnuaitapawl cu a khaisâng zo.
53 ^gRilrawng mipawl cu thil ṭha thawn a tlaiter hai ih,
Milianpawl cu kutlawng in a fehhloter hai.
54 ^hKan pupápawl hnenih a rak sim zo bangin,
55 ⁱAbraham le a cithlahpawl cu kumkhuaih zah a ngai hai ding zia hngilhlonak dingah,
A siahhlawh Israel cu a rak bawm,”

1:47^a Sam 18:46; Isa 17:10; Hab 3:18; 1Ti 1:1

1:48^b Sam 138:6

1:49^c Sam 71:19; 111:9

1:50^d Suah 20:6; Sam 103:17

1:51^e Sem 11:8; Suah 18:11; 2Sam 22:28; Sam 98:1; Isa 40:10; Jer 13:9

1:52^f Mat 23:12

1:53^g Sam 107:9

1:54^h Sam 98:3

1:55ⁱ Gal 3:16

tiah a ti.

56 Cule Mary cu Elizabeth hnenih thla thum hrawng a um hnuah, amai inn ah a tlung.

Baptisma Petu John Hrinnak

57 Elizabeth cu fa a hrinnak ding nithla a kim ih, fapa a hring. 58 Cule a innhnenpawl le a sungkhatpawl in Bawipa in zahngainak nasa zet Elizabeth parih a neihzia an thei. Cu tikah amah thawn lungawi aipuangin an um.

Baptisma Petu John Serh Zim Tānnak

59 ^aCule hitin a si, a ni riatnak ah naute serh tán dingin an ra pan ih, a hmin ah a paih hmin Zakariah thotho an sak. 60 ^bAsinan a nu in a sawn hai ih, “Cutin si hlah seh, John ti si sawn seh,” tiah a ti.

1:59^a Sem 17:12; Pui 12:3; Fil 3:5

1:60^b Mat 3:1

61 Asinan annih in a hnenah, “Nan sungkhat lakah cuvek hmin nei zohman an um lo,” tiah an ti. 62 Naute cu a pa Zakariah in ziang vek hmin sak a duh ti theih an duh ih, theihthiamnak an hmuh.

63 ^aCule anih in cangannak calung a dil hai ih, “A hmin cu John a si,” tiah a ngan. Cule an zaten an mang a bang. 64 ^bCuveten Zakariah-ih kâ cu ăwnsak a si ih, a lei cu a phawihaw, a ṭawng ih, Pathian a thangṭhat. 65 Cun an kiangkapih um hmuahhmuah in an ṭih ih, cuih thu hmuahhmuah cu Judia peng, tlang par ram pumpi ah a thang ṭheh. 66 ^cCuih thu a theitu hmuahhmuah in an thinlung ah cuih thu cu an ret cio. Cule, “Hi naute cu ziang vek mi ah hung cang leh tak pei maw?” tiah an ti. Bawipaih kut cu cuih naute parah a um.

1:63^a Mat 3:1

1:64^b Eze 24:27

1:66^c Sem 39:2; Apo 11:21

Zakariah in John-ih Rawngbawl ding Thu a Phuang Cia

67 ^aA pa Zakariah cu Thlarau Thianghlim in a khat ih, profet thuphuan in thu a phuang. Anih cun,

1:67^a Joe 2:28

68 ^a“A mipawl a rak vehvai ih, a tlen hai zo ruangah,
Israel-ih Pathian Bawipa cu thangṭhatin um seh.
69 ^bA siahhlawh David-ih sungza ihsin kan hrangah
Rundamnak ki a suakter zo.
70 ^cLeilung thawhtirte ihsin a profet thianghlim pawlih kâ ihsin
A tiamkam cia vekin a cangsuak a si.
71 Kan ralpawl hnen ihsin le in huatupawl hmuahhmuah ih kut ihsin
Rundam kan si ding in rak tiamkam.
72 ^dCumi cu, kan pupápawl parih zahngainak neih ding le
A thukham thianghlim máng dingin thu a rak tiamkam.
73 ^eKan pa Abraham hnenah sesămin thu a rak tiamkam.
74 Kan ralpawl kut sung ihsin in runsuah hnuah,
Ṭihnak um loin amah kan rian ding tiah sia a săm.
75 ^fKan nun sung hmuahhmuah thianhlimnak le dingfelnak in a hmaika ah kan rian ding.
76 ^gCule nang, ka fa, Cungnungbik ih profet tiah kawh na si ding.
Ziangahtile nang cu a hrangah a lamzin rak sialtu dingah le,
77 ^hA mipawl in an sualpawl ngaidam an sinak thawngin rundam an si ti an theihnak dingah,
Bawipaih hmaiah na feh ding.
78 ⁱKan Pathian zahngainak maksak ruangin tlun lam ihsin kan hnenah ni a rung tlang zo.
79 ^jThim lakih to mi le thihnak thlahlim hnuaiih to mipawl parih tleu pe dingah le
Hnangamdaihnak lamzin sungih kan ke hruai dingah in rak vehvai zo,”

1:68^a Sem 24:27; 1Sp 8:15; Sam 72:18; 111:9; Luk 7:16

1:69^b 1Sam 2:1; 2Sam 22:3; Eze 29:21; Mat 1:1

1:70^c Jer 23:5; Apo 3:21; Rom 1:2

1:72^d Sam 105:8-9; Eze 16:60; Mik 7:20

1:73^e Heb 9:14; 1Joh 4:18

1:75^f Efe 4:24

1:76^g Mat 11:9; Mar 5:7

1:77^h Jer 31:34; Mat 1:21; Mar 1:4

1:78ⁱ Mal 4:2

1:79^j Sam 107:14; Isa 9:2; Mat 4:16; Apo 26:18

tiah a ti.

80 ^aNau cu a ṭhang ih, thlarau lamah a cak, cule langhnganin Israel-mipawl hnenih a lăng hlan sung hmuah cu ramṭhing ah a um.

1:80^a Luk 2:40, 52

2

Mary in Jesu a Hring

1 ^aCu laiah hitin a rak si, Kaisar Augasṭas in leitlun mi hmuahhmuah hmin khum thluh dingin thu a pe. 2 ^bCucu Siria ram ah Kurinia ram uktu a si laiih hmin khum hmaisabik a si. 3 Mi kip hmin khum dingin, anmai khua cio ah an feh.

2:1^a Mat 22:17; 24:14

2:2^b Mat 4:24; Apo 15:23, 41; Gal 1:21

4 ^aJoseph khal Galili peng, Nazareth khua ihsin Judia peng, David-ih khua, Bethlehem ah a feh. Ziangahtile amah cu David sungkua le tesinfa a si. 5 Joseph cu a nupi si dingih hamnak an rak tuah zo mi fa hring zikte Mary thawn cuih hmun ah cun an feh. 6 Cule hitin a si, cu tawkih an um laiah, Mary nau hrin tikcu a kim. 7 A fatir fapa a hring ih, puan in a tuam. Riahbûk ah an hrang hmun a um lo ruangah, naute cu ran khēng ah a hlum.

2:4^a Joh 7:42

Vancungmipawl in Tuu khāltupawl hnenah Jesu-ih Thu an Phuang

8 Cuih ram ah tuu khāltupawl cu zan ah an tuupawl kilin, ramlak ah an um. 9 ^aCule ngai hnik, Bawipaih vancungmi pakhat an hnenah a rung lang ih, Bawipaih ropitnak in an kimvel cu a run tlêt. Cule annih cun an ṭih ngaingai. 10 ^bCun vancungmi cun an hnenah, “Ṭih hlah uh, ziangahtile ngai hnik uh, mi hmuahhmuah hrang ding aipuannak maksak thuthangṭha ka run phuang a si. 11 ^cZiangahtile tuihni ah David khua ah nan hrangah Rundamtu a suak. Amah cu Bawi Khrih a si. 12 ^dHihi nan hrangah theihthiamnak a si ding: puan ih tuam mi nausen cu ran khēng sungah an hlŭm kha nan hmu ding,” tiah a ti.

2:9^a Apo 5:19

2:10^b Mat 14:27

2:11^c Mat 1:16, 21; Joh 3:17; 13:13; Apo 5:31; Rom 11:14; 1Ti 4:10; 1Joh 4:14

2:12^d 1Sam 2:34; 2Sp 19:29; Sam 86:17; Isa 7:14

13 Cule hmakhatteah cuih vancungmi thawn vancungmi burpi an rung lang ih, hitin Pathian an thangṭhat:

14 ^a“Cungnungbik hmun ah Pathian cu thangṭhat si seh,
Leitlun ah daihnak um seh,
Minung hnenah a duhsaknak um seh,”

2:14^a Isa 9:6; Mik 5:5; Luk 1:79; Joh 14:27; Rom 5:1; Efe 2:14, 17

tiah an ti.

15 Cule hitin a si, vancungmipawl cu an hnen ihsin van ih an feh thluh tikah, tuu khāltupawl cun, “Atu-ah Bethlehem khua tiang va feh uhsi la, Bawipa ih in rak sim mi thil cang mi cu va zoh hnik uhsi,” tiah pakhat le pakhat an tiaw.

16 Cule zamrang zetin an feh ih, Mary, Joseph le ran khēng ih hlŭm mi nausen cu an va hmu. 17 Naute an hmuh hnuah, cuih naute thuhla vancungmi ih an rak sim mi cu an thăn. 18 Cule tuu khāltupawl ih sim mi thilpawl a theitu zaten an theih mi parah an mang a bang. 19 Asinan Mary in cuih thil hmuahhmuah cu ruat phah reroin a thinlung ah a ret. 20 ^aTuu khāltupawl cu an theih mi le an hmuh mi thil hmuahhmuah ruangah, Pathian sunlawih le thangṭhatin an kirsal. Vancungmi ih a rak sim cia vekin, cuih thil hmuahhmuah cu a kim a si.

2:20^a Mat 9:8

Khrih Serh Zim Tānnak

21 ^aNaute serh zim tan nak ding ni ni riat a kim tikah, JESU tiah hmin an sak. Mary in a pum sungih a vun hlanih vancungmi in a rak sak cia mi hmin a si.

2:21^a Luk 1:31, 59

Temple ah Jesu Hlăn a Si

22 ^aCule Mosi Dān vekin Mary-ih thianfaiawk ni a kim tikah, Joseph le Mary in naute cu Bawipa hnenih hlan dingin Jerusalem ah an fehpi. 23 ^bCumi cu Bawipaih Dān sungah, “Sūl awngtu fatir mipa zaten Bawipa hrangih thianghlim an si an ti ding,” tiih ngan mi vek khan a si.

2:22^a Pui 12:2-8

2:23^b Suah 13:2, 12, 15; Mip 3:13

24 ^aBawipaih Dān sungih a sim mi vekin, “Thuro khuah khat simaw, laileng no pahnih simaw,” thawinak hlăn ding a si.

2:24^a Pui 12:8

Simeon in Pathian Rundamnak a Hmu

25 ^aCule ngai hnik, Simeon an ti mi pa pakhat cu Jerusalem ah a rak um. Amah cu midingfel le Pathian ngaihsak mi, Israel hnemtu ding a rak hngak ringring tu pa a si, a parah Thlarau Thianghlim a um. 26 Thlarau Thianghlim in a hnenah Bawipaih Khrih a hmuh hlanah cun anih cu a thi lo ding tiah a rak phuangsuak cia. 27 Amah cu Thlarau hruainak in temple kulh sungah a lut. Cule a nu le a pa in Dān ih a tidān kel bangtukin a hrangih tuah dingah naute Jesu an rak hruai tikah, 28 Simeon in naute cu a kut in a cawi ih, Pathian a thangṭhat, cule,

2:25^a Isa 52:9; Luk 1:6; 23:51

29 ^a“Bawipa, atu-ah na kamsuakthu vekin,
Na siahhlawh kei cu hnangamten i fehter thlang aw.
30 ^bZiangahtile na rundamnak cu ka mit rori in ka hmu zo;
31 Cumi cu mi hmuahhmuah mithmuh ah na timtuah.
32 ^cAnih cu Zentelpawl tlêttu ding tleu le na mi Israel-ih ropitnak a si ding,”

2:29^a Apo 2:24

2:30^b Isa 40:5; Luk 3:6

2:32^c Isa 42:6; Apo 13:47

tiah a ti.

33 Simeon in naute thuhla a sim mi thilpawl ah, Joseph le naute nu cu an mang a bang. 34 ^aCun Simeon in thlawsuah a pe hai ih, naute nu Mary hnenah, “Ngai hnik, hih naute cu Israel-mipawl lakah mi tampi tlutertu ding le tungdingtu dingih ruat a si. Cule anih cu an simsiat ding mi hminsinnak a si ding. 35 Cutin mi tampi thinlung ih khawruah mipawl cu lăngter a si thei nak dingah, ralnâm in na thinlung khal a suntlăng ding,” tiah a ti.

2:34^a Isa 8:14; Mat 12:46; 1Ko 1:23; 2Ko 2:16; Gal 5:11; 1Pe 2:7-8

Anna in Tlentu a Theihpi

36 ^aCu tawkah Asher hnám, Fanuel-ih fanu, Anna an ti mi profet nunau pakhat a rak um. Cu nu cu a tar zet, pasal a neih hnuah a pasal thawn kum sarih an umtlang. 37 ^bAmah cu nuhmei a si ih, kum 84 hrawng a si. Cu nu cu temple kulh sung ihsin suak loin, sun le zan, rawl ul le thlacamin Pathian a bia. 38 ^cCuih cān laifangah cu nu cu a ra lut ve ih, Pathian hnenah thangṭhatnak a hlan. Jerusalem ih tlennak a rak thlirtupawl hmuahhmuah hnenah cuih naute thuhla cu a sim hai.

2:36^a Apo 21:9

2:37^b Apo 13:3; 1Ti 5:5, 9

2:38^c Isa 40:2; Luk 1:68

Nazareth ah Jesu a Kir

39 ^aCule Joseph le Mary in Bawipaih Dān bangtukin thil hmuahhmuah an tuah ṭheh hnuah, Galili peng, anmai khua, Nazareth ah an tlungsal. 40 ^bNau cu a ṭhang ih, thlarau lamah a cak, fimnak in a khat ih, Pathian zangfahnak a parah a um.

2:39^a Mat 2:23

2:40^b Luk 1:80

Nauhak Jesu in Dānthiampawl an Khawruah a Harter

41 ^aKum tinten a nu le a pa cu Jerusalem ah Lanta Puai ah an feh ṭheu. 42 Cule kum hleihnih a kim tikah, an nunphung vekin, Jerusalem ih Lanta Puai ah an feh. 43 Lanta Puai nipawl a cem tikah, an tlungsal. Nauhak Jesu cu Jerusalem ah a tāng ta. Cucu Joseph le Jesu-ih nu in an rak thei lo. 44 An tlunpi mipawl lakih tel ve ah an rak ruat ih, ni khat sung an feh. Cule an sungkhatpawl le an rualpipawl lakah Jesu cu an hawl. 45 An hmuh lo tikah, Jerusalem ah an kirsal ih, Jesu cu an hawl. 46 Cule hitin a si, ni thum hnuah, Jesu cu temple kulh sungah zirhtupawl lakah toin, an thu ngaithla le anmah thusut ih a um lai kha an va hmu. 47 ^bA ṭawng mi a rak theitu hmuahhmuah cun a thu theihzia le a thu lehdān pawl ah an khawruah a har zet. 48 ^cA nu le pa in amah an hmuh tikah, an khawruah a har zet. Cule a nu in a hnenah, “Fapa, ziangah so kan hnenah hihi na tuah? Zoh hnik, na pa le kei cun thinharin kan lo hawl rero,” tiah a ti.

2:41^a Suah 23:15; Dnp 16:1-6; Luk 22:8

2:47^b Mat 7:28

2:48^c Mat 12:46; Luk 3:23

49 ^aCule anih in an hnenah, “Ziangah so in hawl? Ka Paih hna ka buaipi a ṭul a si ti nan thei lo maw si?” tiah a ti. 50 ^bAsinan annih in an hnenah ziang thu a sim ti an rak theithiam lo.

2:49^a Joh 2:16

2:50^b Mar 9:32

Fimnak ah Jesu a Ṭhang

51 ^aCun Jesu cu a nu le a paih zawngah Nazareth khua ah a feh ih, an thu lungin a um. Asinan a nu cun cuih thil hmuahhmuah cu a thinlung sungah a ret ringring. 52 ^bCule Jesu cu fimnak ah le pumrua ah le Pathian le minung duhsaknak ah a ṭhang.

2:51^a Mat 2:23

2:52^b 1Sam 2:26; Thf 3:4

3

Baptisma Petu John in Lamzin a Sial

1 ^aKaisar Tiberius ih a uk a kum hleingatnak ah, Ponṭias Pilat cu Judia peng uktu a si. ^bHerod in ramṭhen pali lakih pakhat Galili peng a uk. A unaupa ^cFilip in ramṭhen pali lakih pakhat Ituria le Trakoniṭis peng a uk. Cule Lisanias in ramṭhen pali lakih pakhat Abilin peng a uk. 2 ^dAnnas le Kaiafas cu puithiam lu bik an si. Cuih cān ah ramṭhing ah Zakariah-ih fapa John hnenah Pathian kamsuakthu a rak thleng. 3 ^eJohn cu Jordan tiva kiangkap ram hmuahhmuah ah a feh ih, sualpawl ngaidamnak ding hrangah lungthlĕngnak baptisma thu a sim. 4 Cumi cun profet Isaiah cazual sungih,

3:1^a Mat 14:1; 27:2

3:1^b Herod: Nauhakpawl thattu Herod-ih fapa Herod Anṭipas a si.

3:1^c Filip: Nauhakpawl thattu Herod-ih fapa Herod Filip II a si.

3:2^d Mat 26:3

3:3^e Mar 1:4

“Ramṭhing ih mi pakhat auaw cun,
‘Bawipaih lamzin sial uh,
A zintepawl kha dĭngter uh.
5 A kuarnak kip kha silhkhat uhla,
Tlang le mual kip in rāwnter uh.
Lamzin kâwi cu dĭngter uhla, lamzin bingbo pawl tla rualter uh.
6 ^aCule milai hmuahhmuah in Pathian rundamnak an hmu ding,’ tiih,”

3:6^a Sam 98:2; Isa 40:3-5

ngan mi ṭawngkampawl a tlamtlingter.

7 ^aJohn cun amai baptisma co dingih a ra suak mi mipi hnenah, “Rulngân cithlahpawl! A ra thleng lai ding mi thinlingnak ihsin tlânsuak dingah zo in so ralrinnak a rak lo pe? 8 ^bCuruangah lungthlĕngnak thawi milaw mi rah suah uh. ‘Abraham cu kan pa a si,’ tiin nan thinlung sungin ruat thawk hlah uh. Ziangahtile Pathian cun hi lungtopawl ihsin Abraham hrangah tesinfa a tuah thei a si, tiah nan hnenah ka lo sim. 9 ^cThingkungpawl hramah hreitlung ret a si zo. Curuangah rah ṭha a rah lo mi thingkung kip in hauthluk an si ding ih, meisa sungah paih an si ding,” tiah a ti.

3:7^a Mat 12:34; Rom 1:18

3:8^b Isa 51:2; Joh 8:33; Apo 13:26; Rom 4:1, 11-12, 16; Gal 3:7

3:9^c Mat 3:10

10 ^aCule mipi in, “Cuti asile ziang kan tuah ding?” tiah an sut.

3:10^a Apo 2:37

11 ^aJohn in a sawn hai ih an hnenah, “Kâwrfualpi zun hnih neitu cun a nei lo tu kha ṭhen seh. Rawl neitu khal in cuti vek thothoin tuah seh,” tiah a ti.

3:11^a Isa 58:7; Eze 18:7

12 Siah khawngtupawl khal John-ih baptisma co dingin a hnenah an ra ih, “Zirhtu pa, ziang kan tuah ding?” tiah an ti.

13 Cule anih in an hnenah, “An lo fial mi hnakih tam in va khawng hlah uh,” tiah a ti hai.

14 ^aRalkappawl khal in, “Ziang kan tuah ding?” tiah an sut. Cule anih in an hnenah, “Zo hnen hmanin hramhramin paisa la hlah uhla, dik lo zetin sual mi puh hlah uh, cule nan hlawh tawkah nan lungkim tawk uh,” tiah a ti.

3:14^a Suah 23:1; Pui 19:11

15 ^aMipi cun beiseinak thawn, John hi Khrih a simaw si lo tiah an zaten an thinlung khawruahharin an um. 16 ^bJohn in an zate hnenah a let hai ih, “Kei cun ti ah baptisma ka lo pe taktak, asinan kei hnakih a nasasawn Mi a ra lai ding; kei cu a kedam hri phawihsaktu ding hmanah ka tlak lo. Anih cun Thlarau Thianghlim ah le meisa ah baptisma a lo pe ding. 17 ^cdSangvut thehnak hmanrua a kut ah a um ih, sangvut cīlnak hruih cu a thianfai ṭheh ding. Sangvut cu amai cuam sungah a thun ding. Asinan a hi cu hmih theih lo mi meisa in a urkāng thluh ding,” tiah a ti.

3:15^a Mat 3:1; Joh 1:19-20; Apo 13:25

3:16^b Mar 1:4; Joh 1:26, 33; Apo 1:5

3:17^c Isa 30:24; Mat 13:30

3:17^d Sangvut thehnak hmanrua: Sangvut tifainak hrangih thirkut vekih thing ih tuah mi a si, cumi in sangvut thli ih semfaiternak dingah an theh ṭheu.

18 Cule John cun a dang thazang peknak thu tampi thawn mipi hnenah thu a sim.

19 ^aAsinan John in Herod Tetrak kha a unaupa Filip-ih nupi Herodias a ṭhit ruangah le thil ṭha lo dangdang a tuah mipawl hmuahhmuah ruangah a kawk. 20 ^bHerod cun hi thil ṭha lo a tuah mi hmuahhmuah hleiah, John cu thawng a thlakbêt.

3:19^a Mat 14:1

3:20^b Mat 14:3

John in Jesu Baptisma a Pe

21 ^aMi hmuahhmuah baptisma an co tikah, hitin a si, Jesu khal baptisma a co ve. Thla a cam laiah van a rak áwngaw. 22 ^bCule Thlarau Thianghlim cu Jesu parah thuro taksa pianhmang in a rung ṭum. Cule van ihsin aw pakhat in, “Nang cu ka duhdawt zet mi ka Fapa na si, na parah ka lung a hmui zet,” tiah a ti.

3:21^a Mat 14:23

3:22^b Isa 42:1; Mat 3:17; Joh 1:32-33; Apo 10:38

Jesu Khrih Cithlah Sâwng

23 ^aJesu rawngbawl a thawh tikah, kum 30 hrawng a si. Mi in Jesu cu Joseph-ih fapa ah an ruat. Joseph cu Heli-ih fapa a si. 24 Heli cu Matthat-ih fapa a si, Matthat cu Levi-ih fapa a si, Levi cu Melki-ih fapa a si, Melki cu Janna-ih fapa a si, Janna cu Joseph-ih fapa a si. 25 Joseph cu Mattathias-ih fapa a si, Mattathias cu Amos-ih fapa a si, Amos cu Nahum-ih fapa a si, Nahum cu Esli-ih fapa a si, Esli cu Naggai-ih fapa a si. 26 Naggai cu Maath-ih fapa a si, Maath cu Mattathias-ih fapa a si, Mattathias cu Semei-ih fapa a si, Semei cu Joseph-ih fapa a si, Joseph cu Judah-ih fapa a si. 27 ^bJudah cu Joanan-ih fapa a si, Joanan cu Rhesa-ih fapa a si, Rhesa cu Zerubbabel-ih fapa a si, Zerubbabel cu Shealtiel-ih fapa a si. Shealtiel cu Neri-ih fapa a si. 28 Neri cu Melki-ih fapa a si, Melki cu Addi-ih fapa a si, Addi cu Kosam-ih fapa a si, Kosam cu Elmodam-ih fapa a si, Elmodam cu Er-ih fapa a si. 29 Er cu Joshua-ih fapa a si, Joshua cu Eliezer-ih fapa a si, Eliezer cu Jorim-ih fapa a si, Jorim cu Matthat-ih fapa a si, Matthat cu Levi-ih fapa a si. 30 Levi cu Simeon-ih fapa a si, Simeon cu Judah-ih fapa a si, Judah cu Joseph-ih fapa a si, Joseph cu Jonan-ih fapa a si, Jonan cu Eliakim-ih fapa a si. 31 ^cEliakim cu Melea-ih fapa a si, Melea cu Menan-ih fapa a si, Menan cu Mattatha-ih fapa a si, Mattatha cu Nathan-ih fapa a si, Nathan cu David-ih fapa a si. 32 David cu Jesse-ih fapa a si, Jessi cu Obed-ih fapa a si, Obed cu Boaz-ih fapa a si, Boaz cu Salmon-ih fapa a si, Salmon cu Nahshon-ih fapa a si. 33 ^dNahshon cu Amminadab-ih fapa a si, Amminadab cu Ram-ih fapa a si, Ram cu Hezron-ih fapa a si, Hezron cu Perez-ih fapa a si, Perez cu Judah-ih fapa a si. 34 ^eJudah cu Jakob-ih fapa a si, Jakob cu Isak-ih fapa a si, Isak cu Abraham-ih fapa a si, Abraham cu Terah-ih fapa a si, Terah cu Nahor-ih fapa a si, 35 Nahor cu Seruk-ih fapa a si, Seruk cu Reu-ih fapa a si, Reu cu Pelek-ih fapa a si, Pelek cu Eber-ih fapa a si, Eber cu Shelah-ih fapa a si. 36 ^fShelah cu Kainan-ih fapa a si, Kainan cu Arfasad-ih fapa a si, Arfasad cu Shem-ih fapa a si, Shem cu Noah-ih fapa a si, Noah cu Lamek-ih fapa a si. 37 ^gLamek cu Methuselah-ih fapa a si, Methuselah cu Enok-ih fapa a si, Enok cu Jared-ih fapa a si, Jared cu Mahalalel-ih fapa a si, Mahalalel cu Kenan-ih fapa a si. 38 ^hKenan cu Enosh-ih fapa a si, Enosh cu Seth-ih fapa a si, Seth cu Adam-ih fapa a si ih, Adam cu Pathian fapa a si.

3:23^a Mat 4:17; Apo 1:1

3:27^b Mat 1:12

3:31^c 2Sam 5:14; 1San 3:5

3:33^d Rut 4:18-22; 1San 2:10-12

3:34^e Sem 11:24, 26

3:36^f Sem 5:28-32; 11:12

3:37^g Sem 5:12-25

3:38^h Sem 5:1-2, 6-9

4

Setan in Jesu Sual a Fawrh

1 ^aJesu cu Thlarau Thianghlim ih khatin, Jordan tiva ihsin a kir ih, Thlarau in ramṭhing ah a hruai. 2 ^bCu tawkah Diabol in ni 40 sung sual a fawrh. Cuih sung hmuahhmuah cu zianghman a ei lo. Cuih cān a cem tikah, Jesu cu a ril a râwng.

4:1^a Eze 37:1

4:2^b Suah 34:28; 1Sp 19:8; Heb 4:15

3 ^aCule Diabol cun a hnenah, “Nangmah cu Pathian Fapa na si le, hi lungto hi sang ih cang dingin thu pe aw,” tiah a ti.

4:3^a Mat 4:3

4 ^aCule Jesu in a sawn ih, “‘Milai cu sang lawngin a nung lo ding, cuhnakin Pathian kamsuakthu tin in a nung sawn ding,’ tiih ngan a si,” tiah a ti.

4:4^a Dnp 8:3

5 ^aCun Diabol in Jesu cu tlang sangpi parah a hruaiso ih, leitlun lalrampawl hmuahhmuah tla cān málte sungah Jesu a hmuh. 6 ^bCule Diabol cun a hnenah, “Hi thuneihnak hmuahhmuah le an ropitnak hmuahhmuah tla hi ka lo pe ding, ziangahtile hipawl cu ka hnenih pek ṭheh zo an si ih, ka duhduh hnenah ka pe ṭheu. 7 Curuangah keimah i biak asile, hipawl hmuahhmuah hi na ta an si thluh ding,” tiah a ti.

4:5^a Mat 24:14

4:6^b Joh 12:31; 1Joh 5:19

8 ^aCule Jesu in a sawn ih a hnenah, “Setan ka dungah feh aw. Ziangahtile, ‘Bawipa na Pathian na be pei ih, amah lawng na rian pei,’ tiih ngan a si,” tiah a ti.

4:8^a Dnp 6:13

9 Cun Diabol cun Jesu cu Jerusalem ah a hruai ih, temple kulh a sannak bik ah a ret. Cule “Pathian Fapa na si le, hi tawk ihsin dawpthla hnik aw. 10 ^aZiangahtile,

4:10^a Sam 91:11

‘Nangmah lo kilkhawi dingin,
Na cungcangthu ah a vancungmipawl thu a pe ding.
11 ^aCule an kut in an lo dăwm ding,
Culole na ke in lungto a khawngngah pang ding,’

4:11^a Sam 91:12

tiih ngan a si,” tiah a ti.

12 ^aCule Jesu in a let ih a hnenah, “‘Bawipa na Pathian na hniksak lo pei,’ ti a si,” tiah a sawn.

4:12^a Dnp 6:16

13 ^aDiabol cun sual a fawrhnak zaten a ṭheh tikah, Jesu cu cān tawkfang sung a fehsan ta.

4:13^a Joh 14:30; Heb 4:15

Jesu Rawngbawl a Thawk

14 ^aCun Jesu cu Thlarau huham thawn Galili peng ah a tlung ih, cuih ram kiangkap hmuahhmuah ah Jesu hmin cu a thang ṭheh. 15 ^bCule an sinakokpawl ah thu a zirh ih, mi hmuahhmuah in Jesu cu an thangṭhat.

4:14^a Mat 4:12; 9:26

4:15^b Mat 4:23

Nazareth Khua ah Jesu an Hnáwng

16 ^aJesu cu a ṭhanlennak Nazareth khua ah a thleng, a ti ṭheu dān vekin, Sabbath ni ah sinakok sungah a lut ih, casiar dingin a ding. 17 Cu tawkah profet Isaiah-ih cazual an pe. Cuih cazualpi cu a pharh ih,

4:16^a Mat 2:23; 13:54; 1Ti 4:13

18 ^a“Bawipaih Thlarau cu ka parah a um,
Ziangahtile mifarahpawl hnenih thuthangṭha phuang dingah hriak i thih zo.
Thinlung kekkuaipawl damter dingah,
Sál tang pawl hnenih zalĕnnak thu phuang dingah le mitcawpawl in khua an hmuh thei sal nak dingah,
Palbĕt mipawl zalenter dingah le
19 ^bBawipaih duhsak kum thu phuang dingah i rak thlah a si,”

4:18^a Mar 16:15; Joh 3:34

4:19^b Pui 25:10; Sam 102:20; Isa 42:7; 61:1-2

tiih ngan mi kha a hmu.

20 ^aCun cuih cazual cu a zualsal ih, sinakok kilkhawitu pa hnenah a pesal. Cule Jesu cu a to. Sinakok sungih a um mi hmuahhmuah ih mit cun ṭha zetin Jesu cu an zoh. 21 ^bCule Jesu in an hnenah, “Tuihsun ah hi Cathiang sungih ngan mi cu nan hnatheih ah a tlamtling a si,” tiah sim a thawk.

4:20^a Mat 26:55

4:21^b Mat 1:22

22 ^aCule mi hmuahhmuah in Jesu cu an theihpi ih, a kâ sung ihsin a suak mi zangfahnak kamsuakthupawl ah an mang a bang. Annih in, “Hi pa hi Joseph-ih fapa kha a si lo maw?” tiah an ti.

4:22^a Mat 13:54; Joh 6:42

23 ^aJesu in an hnenah, “Hi thufim hi ka hnenah nannih in nan rel tengteng ding, ‘Sibawi pa, nangmah le nangmah damawter aw. Kapernaum khua ah na tuah ti kan theih mipawl kha hi na khua ah hin tuah aw,’ tiah in ti ding,” tiah a ti hai.

4:23^a Mat 2:23; Mar 1:21-28

24 ^aCun anih in, “Thungaiin ka lo sim, Profet zohman amai khua ah cohlan a hlawh lo. 25 ^bAsinan thungaiin ka lo sim, Elijah san laiah kum thum le thla ruk sung van kharpit a si ih, ram pumpi ih mangṭam a tlun laiah, Israel ram ah nuhmei tampi an rak um. 26 ^cSihmansehla an lakih pakhat hnen hmanah Elijah cu thlah a si lo. Sidon ram Zarefath khua ih nuhmeinu hnen lawngah thlah a si. 27 ^dCule profet Elisha san laiah Israel ram ah miphar tampi an rak um. Siria-mi Naaman siarlo zohman thianter mi an rak um lo,” tiah a ti.

4:24^a Mat 13:57; Joh 4:44

4:25^b 1Sp 17:1; Jam 5:17-18; Thu 11:6

4:26^c 1Sp 17:8-16; Mat 11:21

4:27^d 2Sp 5:1-14

28 Cuih thu an theih tikah, sinakok sungih a um mi hmuahhmuah cu an thin a ling. 29 ^aAn dīng ih Jesu cu khaw lengah an tûlsuak, cule an khaw umnak khām ihsin hlăwnthla dingin an hruai. 30 Asinan Jesu cu an lakin a pahtlăng ih a fehhlo.

4:29^a Mip 15:35; Apo 7:58; Heb 13:12

Khawse Bawrhhlawh Dawisuaknak

31 ^aJesu cu Galili peng, Kapernaum khua ah a vung feh ih, Sabbath ni ah thu a zirh hai. 32 ^bA kamsuakthu cu thuneihnak thawn a si ruangah, a thuzirh mi ah an khawruah a har zet.

4:31^a Mat 4:13

4:32^b Mat 7:28-29

33 Cuih sinakok sungah khawse bawrhhlawh thlarau nei pa pakhat a rak um. Cule ring zetin a au ih, 34 ^a“Hâ! Nazareth Jesu, kanmah ten um nung, nang le kannih ziang so pehtlaihawknak kan neih? Kanmah siatsuah dingah maw na rat? Zo na si ti ka lo thei, nang cu Pathian-ih Mi Thianghlim na si,” tiah a ti.

4:34^a Mat 8:29; Mar 1:24; Jam 2:19

35 ^aCule Jesu in amah cu a kawk ih, “Daiten um, a sung ihsin suak aw!” tiah a ti. Khawsia in cu pa cu mipi hmaiih a hlăwnthluk hnuah, a parah zianghman tuahmawh loin a suahsan.

4:35^a Mat 8:26; Luk 8:24

36 ^aCun an zaten an mang a bang ih, “Ziang ṭawngkam so a si? Anih cun thlarau bawrhhlawh pawl cu thuneihnak le huham thawn thu a pe ih, an suak,” tiah pakhat le pakhat an tiaw rero. 37 ^bCule Jesu hmin cu cuih ram kiangkap hmun zakip ah a thang ṭheh.

4:36^a Mat 7:28-29; 10:1

4:37^b Mat 9:26

Jesu in Mi Tampi a Damter

38 Jesu cu sinakok sung ihsin a suak ih, Simon-ih inn sungah a lut. Culaifangah Simon nupi-ih nu cu bese zetin khawsik nat tuarin a um. Cule Jesu hnenah amah nu bawm dingin an dil. 39 Cu nuih kiangah Jesu a dīng ih, a khawsik nat cu a kawk. Cule a khawsik nat cu a reh. A tho lohli ih, anmah a rian hai.

40 ^aNi a tlak zawngah nathri phunphun thawi nat tuartu zaten a hnenah an rak hruai. An par fingfing ah a kut a rak suang ih a damter hai. 41 ^bKhawsiapawl khal, “Nang cu Pathian Fapa Khrih na si!” tiih au phahin mi tampi sung ihsin an suak.

4:40^a Mat 4:23; Mar 5:23

4:41^b Mat 4:3; 8:4

Cule Jesu in a rak kawk hai. Khawsiapawl in amah cu Khrih a si ti an theih ruangah, an ṭawng ding a siang hai lo.

Galili ah Jesu Thu a Sim

42 Khua a hung van tikah, Jesu cu a păwksuak ih, ramṭhing ah a va feh. Mipi in amah cu an hawl ih, a umnak hmun an va thlen tikah, anmah fehsan lo dingin an kai. 43 ^aAsinan Jesu in an hnenah, “Khaw dang khalah Pathian uknak thuthangṭha cu ka phuang ding a si. Ziangruangahtile cumi hrangih thlah mi ka si,” tiah a ti. 44 ^bCule Galili peng ih sinakokpawl ah thu a sim.

4:43^a Mat 3:2

4:44^b Mat 4:23

5

Dungthluntu Hmaisa Pawl Kawhnak

1 ^aCule hitin a si, ni khat cu Genesareth tili kapih Jesu a dīn laiah, Pathian kamsuakthu ngai dingin mipi cun an ra pan luihlo. 2 Cule Jesu in tili kapih lăwng cawl pahnih a hei hmu. Nga kaitupawl cu lăwng sung ihsin an suak ih, an sûrpawl an khawlh rero. 3 ^bJesu cu lăwng pakhat deuh sungah a lut. Cuih lăwng cu Simon-ih ta a si. Cule tili kap ihsin lăwng cu málte hladeuh ih ṭhawn dingin Jesu in Simon a dil. Cule a to ih lăwng sung ihsin mipi cu thu a zirh hai.

5:1^a Mar 4:14; Heb 4:12

5:3^b Mat 13:2

4 Thusim a ṭheh tikah, Simon hnenah, “Ti thûknak lamah lăwng kha ṭhawn awla, nga kai dingin nan sûrpawl cu thlak uh,” tiah a ti.

5 ^aCule Simon in a sawn ih a hnenah, “Hotu pa, zanvar taima zetin kan zuam mengmang nân, zianghman kan kai lo. Sikhalsehla na kamsuakthu vekin sur cu ka thlak hnik ding,” tiah a ti.

5:5^a Luk 8:24, 45; Joh 21:3, 6

6 ^aCutiih an tuah tikah, nga tampi an awk ih an sur tlêk a thawk. 7 Cule lăwng dangih um, an ngakaihpipawl kha anmah bawm dingin an kut an hei zâp. Cule an ra ih an lăwng pahnih pil zik tiangin nga an sănkhat.

5:6^a Joh 21:11

8 ^aSimon Peter in cumi a hmuh tikah, Jesu-ih khuk hramah a băwk ih, “Maw Bawipa, i fehsan aw, ziangahtile kei cu misual ka si!” tiah a ti.

5:8^a Sem 18:27; Job 42:6; Isa 6:5

9 Ziangahtile amah le a ngakaihpipawl hmuahhmuah cu an awh mi ngapawl kha an la ih, cupawl ruangah an khawruah a har zet. 10 ^aAn awh mi cun Simon-ih ngakaihpi Zebedi-ih fapa, James le John khal an mang a bangter.

5:10^a Mat 14:27

Cule Jesu in Simon hnenah, “Ṭih hlah, tuihni thawkin milai na kai thlang ding,” tiah a ti. 11 ^aAn lăwngpawl tili kapih an dīnter hnuah, cutepawl cun ziang hmuahhmuah an tlansan ih, Jesu cu an thlun.

5:11^a Mat 4:19

Miphar Thianternak

12 ^aCule hitin a rak si, khaw pakhat ih Jesu a um laiah, ngai hnik, a taksa pumpuluk ih a phār mi pa pakhat in Jesu a hmuh tikah, a hmaiah a băwk ih, “Bawipa na duh ahcun i thiangter thei a si,” tiah a dil.

5:12^a Mat 8:2

13 Jesu cun a kut a suah ih a hei thâm, “Ka duh a si, thiang aw,” tiah a ti. Hmakhatteah a phār nat cu a hlo. 14 ^aCule Jesu in cu pa hnenah, “Zohman sim hlah, cuhnakin va feh awla, puithiam hnenah na taksa va hmuh sawn aw. Na thian zo ruangah mi in an lo theihpinak dingah, Mosi ih thu a pek vekin thawinak va pe aw,” tiah a fial.

5:14^a Pui 14:2-32; Mat 8:4

15 ^aSikhalsehla Jesu-ih hmin cu a thang sinsin. Cun a thu ngaithla dingin le an natnak damter dingah, mipi tampi cun amah an ra pankhawm. 16 Jesu cu ramṭhing ah fehin thla a cam ṭheu.

5:15^a Mat 9:26

Jesu in Mizéng pa a Damter

17 ^aCun ni khat cu thu a zirh rero laiah hitin a si, Farasipawl le Dān zirhtupawl cu cu tawkah an to. Cupawl cu Galili peng khaw tin kip in le Judia peng le Jerusalem ihsin a ra mi an si. Anmah damter dingah Bawipaih huham cu, cu tawkah a um. 18 Cun ngai hnik, mi hrekkhat in a zéng mi pa pakhat cu a ihphah thawn an run zâwn. Jesu hmaiih hlum dingin luhpidān ding lamzin an hawl. 19 Mipi ruangah luhpi thei nak ding lamzin an hmu lo. Cule inn tlunah an kai ih mizéng pa cu a ihphah thawn inn tlun ihsin mipi lak, Jesu hmaiah an run ṭhum.

5:17^a Mat 15:1; Mar 5:30

20 Jesu in an zumnak a hmuh tikah, mizéng pa hnenah, “Milai pa, na sualpawl ngaidam ṭheh a si zo,” tiah a ti.

21 ^aCule Dān zirhtupawl le Farasipawl in an thinlung in, “Pathian thangsiattu hi pa hi zo a si? Pathian siarlo mi dang zo in so sualpawl ngaidam thei?” tiah ruah an thawk.

5:21^a Isa 43:25

22 Jesu in an ruahnakpawl a theih tikah, a sawn hai ih an hnenah, “Nan thinlung sungin ziang nan ruat? 23 ‘Na sualpawl ngaidam ṭheh a si zo,’ ti maw, ‘Tho awla, feh aw,’ ti so áwlsawn? 24 ^aSikhalsehla Minung Fapa in leitlun ah sualpawl ngaidam thei nak thuneihnak a nei a si ti nan theihnak dingah hihi tuah a si,” tiah a ti.

5:24^a Mat 8:20

Cule Jesu in mizéng pa hnenah, “Na hnenah ka lo sim, tho aw, na ihphah la awla, na inn ah tlung aw,” tiah a ti.

25 Hmakhatteah mizéng pa cu mipi hmaiah a tho, a ihnak cu a la ih Pathian thangṭhat phahin a inn ah a tlung. 26 ^aCule an zaten an mang a bang ih, Pathian an thangṭhat. Ṭihnak in an khat ih, “Tuihsun ah hminsin tlak thilpawl kan hmu a si hi!” tiah an ti.

5:26^a Mat 9:8

Levi Kawhnak

27 ^aHi thilpawl hnuah Jesu cu a feh ih, Levi an ti mi siah khawngtu cu siahkhawnnak bûk ih a to lai kha a hei hmu. Cule Jesu in a hnenah, “I thlun aw,” tiah a ti.

5:27^a Mat 4:19

28 ^aCule Levi cu a tho ih, ziang hmuahhmuah tân tain Jesu a thlun. 29 Cule Levi in Jesu hrangah amai inn ah puai ropi a tuah. Cu tawkah siah khawngtu burpi le mi dang pawl tla Jesu le a thluntupawl hnenah rawl an ei ve. 30 ^bCule Farasipawl le Dān zirhtupawl cu a dungthluntupawl dokalhin an phunzai. “Ziangah so siah khawngtupawl le misualpawl thawi ei le in ih nan um?” tiah an ti.

5:28^a Mat 4:19

5:30^b Mat 9:11; Apo 23:9

31 Jesu cun a sawn hai ih an hnenah, “Miharhdampawl in sibawi an ṭul lo, minapawl lawngin an ṭul a si. 32 ^aMidingfelpawl ko dingah ka ra lo, misualpawl lungthlĕng dingih ko dingah ka ra sawn a si,” tiah a ti.

5:32^a Joh 3:17

Rawl Ulh Thu Jesu an Sut

33 ^aCule annih in a hnenah, “John-ih dungthluntupawl cu rawl an ul ṭheu ih, thla an cam ṭheu. Farasipawlih dungthluntupawl khal cuti vekin an tuah. Asinan ziangruangah nangih dungthluntupawl hmuah an ei ih an in?” tiah an ti.

5:33^a Joh 1:35

34 ^aCule anih in an hnenah, “Mo neitu pa an hnenih a um laiah, mo lawmtupawl cu rawl nan ulter thei ding maw? 35 ^bAsinan an hnen ihsin mo neitu pa lâkhloh ni a thleng leh ding. Cu tikah rawl an ul leh ding,” tiah a ti.

5:34^a Joh 3:29

5:35^b Joh 16:5-7

36 Cun an hnenah hi tahṭhimnak hi a sim, “Zohman in sinfen hlun cu puanthan thar belcâwng in an belh kel lo. An belh asile, sinfen thar in a dirtlek ding, a thar le a hlun cu an milaw lo a si. 37 Cule zohman in sabit zu thar kha savun thâwl hlun sungah an thun kel lo, an thun asile, sabit zu thar in savun thâwl hlun cu a kekter ding. Cule sabit zu cu a dăwk ding ih, savun thâwl hlun khal cu a siat ding. 38 Sabit zu thar cu savun thâwl thar sungih thun tengteng sawn ding a si, cule an pahnih in an siat lo ding. 39 Zohman sabit zu hlun in zo tu in a thar a hiar lohli lo, ziangahtile anih in, ‘Sabit zu hlun cu a ṭhasawn a si,’ a ti,” tiah a sim.

6

Jesu cu Sabbath Lal a Si

1 ^aCule hitin a si, Sabbath ni hmaisa a cem hnu, a neta Sabbath ni ah, Jesu cu sangvut ló lakin a feh. A dungthluntupawl in sangvut vuipawl an sik, an kut in an nuai ih a fáng cu an ei. 2 ^bCule Farasi mi hrekkhat in an hnenah, “Ziangah so Dān in Sabbath ni ih tuah a sian lo mi nan tuah?” tiah an ti.

6:1^a Dnp 23:25

6:2^b Mat 12:2

3 ^aJesu in a let hai ih, “David le a zawngih umpawl an ril a rawn tikah, David in ziang a tuah ti le, 4 ^bPathian-ih inn sungah David cu a lut ih, Dān in puithiampawl siarlo, zohman ei a sian lo mi Sangserh cu a la ih a ei, cule a zawngih umpawl khal ziangmaw zat a pe ve hai ti nan siar lo maw?” tiah a ti.

6:3^a 1Sam 21:6

6:4^b Pui 24:5, 9

5 ^aCule Jesu in an hnenah, “Minung Fapa cu Sabbath tlun khalah Lal a si,” tiah a ti.

6:5^a Mat 8:20

Sabbath Ni ih Mi Damternak

6 Cun hitin a si, a dang Sabbath ni ah, Jesu cu sinakok sungah a lut ih thu a zirh. Cu tawkah a vawrh lam kut a ro mi pa pakhat a rak um. 7 ^aDān zirhtupawl le Farasipawl in Jesu kha sual an puh thei nak dingah, Sabbath ni ah cu pa cu a damter pei maw, damter lo tiah ṭhaten an thlingthla. 8 ^bAsinan Jesu in an thinlung ih an ruah mi a thei ih, a kut a ro mi pa hnenah, “Tho awla, a laiah hin ra dīng aw,” tiah a ti.

6:7^a Mat 12:10

6:8^b Mat 9:4

Cule cu pa cu a tho ih cu tawkah cun a ra ding. 9 Cun Jesu in an hnenah, “Dān in Sabbath ni ah thil ṭha tuah maw, thil ṭha lo tuah a siang, mi nunnak run ding maw, thah ding a siang? tiah ka lo sut,” tiah a ti hai.

10 Cule a kiangkapih mi hmuahhmuah cu a zohkûal ih, cu pa hnenah cun, “Na kut hawi hnik,” tiah a ti.

Anih cun a sim vek cun a tuah ih, a khat lam vekin a dam. 11 ^aAsinan Dān zirhtupawl le Farasipawl cu an thin a heng tuk lawmmam ih, Jesu parah ziang an tuah ding ti pakhat le pakhat an rawnaw.

6:11^a Joh 5:18

Apostol Hleihnih

12 Cun hitin a si, cu laiah Jesu cu thlacam dingin tlang parah a feh ih, Pathian hnenah zanvar thla a cam. 13 ^aKhua a van tikah, a hnenah a dungthluntupawl a ko hai ih, mi hleihnih a hril. Cupawl cu apostolpawl ti khalin a ko hai. 14 Peter ti khalih hmin a pek mi, Simon le a naupa Andru, James le John, Filip le Bartholomeo, 15 ^bMathai le Thomas, Alfias-ih fapa James, ^cZilot an ti mi pa Simon, 16 James-ih fapa Judas le Jesu phiarsawmtu ih cang Judas Iskariot tla an si.

6:13^a Mar 6:30

6:15^b Mat 9:9

6:15^c Zilot: Phunhnám ṭăn zet tu poliṭik mi tinak a si. Khrih dungthluntu a si hlanah Simon hi phunhnám ṭăn zet tu poliṭik mi a rak si dah.

Jesu in Mipi Tam Zet a Damter

17 ^aJesu cu anmah zawngah a rung suk ih, a dungthluntu mipi le a thusim mi ngai dingah le an nathripawl damter dingih Judia peng hmuahhmuah le Jerusalem ihsi rapawl le tipi kapih um Ṭaiar khawpi le Sidon khawpi ihsi ra, mipi tampi pawl zawngah hmun rawn ah a ding. 18 Thlarau bawrhhlawh pawl ih zăwnzaihter mipawl tla damter an si. 19 ^bJesu sung ihsin huham a suak ih an zaten a damter hai ruangah, mipi in amah thâm dingin an hawl.

6:17^a Mat 4:25; 11:4; Mar 3:7-8

6:19^b Mat 9:20; Mar 5:30

Mithlawsuak

20 ^aCun anih cun a dungthluntupawl a zoh hai ih,

6:20^a Mat 25:34

“Nannih mităngdawrpawl, mithlawsuak nan si,
Ziangahtile Pathian uknak cu nanmai ta a si.
21 ^aNannih atu-ih rilrawngpawl, mithlawsuak nan si,
Ziangahtile nan tlâi leh ding.
Nannih atu-ih a ṭap mipawl, mithlawsuak nan si,
Ziangahtile nan hni leh ding.
22 ^bMinung Fapa ruangah mi in an lo hua ih,
An pawlkăwmnak sung ihsin an lo suah, an lo zăwkzet ih, nan hmin an simsiat tikah,
Mithlawsuak nan si.
23 ^cCuih ni ah cun lungawi aipuangin um uh, aipuan ruangah khir uh!
Ziangahtile ngai hnik uh, vanram ih nan lawmman cu a ropi a si.
Ziangahtile cuti vekin an pupápawl in profetpawl an rak tuah a si.

6:21^a Isa 55:1-2; 61:2-3; Mat 5:4, 6; Thu 7:17

6:22^b Isa 51:7; Joh 9:22; 15:21

6:23^c Mat 5:12

Jesu in Hmakhaw Pihnakpawl a Phuang

24 ^a“Asinan nannih milianpawl, nan hmakhua a pit a si,
Ziangahtile nannih cun nunnăwmnak nan rak ngah zo.
25 ^bNannih atu-ih mikhawpkhampawl, nan hmakhua a pit a si,
Ziangahtile nan ril a râwng leh ding.
Nannih atu-ih hni rero pawl, nan hmakhua a pit a si,
Ziangahtile ṭapin nan aihram leh ding.
26 ^cMi hmuahhmuah in an lo lăwm tikah, nan hmakhua a pit a si,
Ziangahtile an pupápawl in cuti vekin profet deu pawl parah an rak tuah a si.

6:24^a Jam 5:1

6:25^b Thf 14:13; Isa 65:13

6:26^c Mat 7:15

Phulei Samnak

27 ^a“Asinan nannih ka thu ngaithlatupawl ka lo sim a si, nan ralpawl duhdaw uhla, a lo huatupawl parah thil ṭha tuah uh. 28 ^bA lo camsetupawl thlawsuah pe uhla, a lo tuah se tupawl hrangah thlacam uh. 29 Na biang khat lam a lo bengtu hnenah, na biang khat lam khal tŭn aw. Na kâwrfual latu hnenah, na angki sung hruh khal a lâk ding êl hlah. 30 ^cA lo diltu pauhpauh cu pe aw. Mi in na thil neih mi a lo lâksak asile, dilsâl nawn hlah. 31 ^dMi in nan parah tuah hai seh ti nan duh vekin, nanmah khal in an parah tuah ve uh.

6:27^a Mat 5:44; Rom 12:20

6:28^b Mat 5:44

6:30^c Dnp 15:7-8, 10; Thf 21:26

6:31^d Mat 7:12

32 ^a“Nanmah a lo duhdawtupawl lawng nan duhdawt asile, ziang lăwmnak so na ruahsan thei ding? Ziangahtile misualpawl hmanin anmah duhdawtupawl cu an duhdaw ve a si. 33 Nan parih thil ṭha a tuahtu par lawngih thil ṭha nan tuah asile, ziang lăwmnak so nan ruahsan thei ding? Ziangahtile misualpawl khal in cu vekin an tuah ve a si. 34 ^bCule ka ngahsal leh ding tiah nan beisei mi hnen lawngih nan cawih asile, ziang lăwmnak so nan beisei thei ding? Ziangahtile misualpawl khal in ngahkim leh sal dingin, cu vekin an tuah ve a si. 35 ^cAsinan nan ralpawl duhdaw uhla an hrangah thil ṭha tuah uh. Ngah leh sal ding beisei loin cawih uh. Cule nan lawmman cu a ropi ding ih, Cungnung Bik ih fāte nan si ding. Ziangahtile Pathian amah rori cu lungawi hna a thiam lo mi le miṭha lo pawl par khalah a ṭha a si. 36 ^dCuruangah nan Pa zah a ngai vekin, zahngai ve uh.

6:32^a Mat 5:46

6:34^b Mat 5:42

6:35^c Mar 5:7; Rom 8:14

6:36^d Mat 5:48; Rom 8:15; Efe 4:6; Jam 2:13; 1Pe 1:17; 1Joh 1:3

Thuṭhen Hlah

37 ^a“Thu va ṭhen hlah uh, cule thuṭhensak nan si lo ding. Thiam lo mi coh hlah uhla, thiam lo coter nan si lo ding. Mi ngaidam uhla, ngaidam nan si ve ding. 38 ^bPe uhla, pek nan si ve ding. Tahnak dik, nĕm le sâwi hngetin, liam thluahthloin nan ṭāng sungah mi in an lo pe ding. Ziangahtile mi nan tahnak khan tah nan si ve ding,” tiah Jesu in a ti.

6:37^a Mat 6:14; 7:1

6:38^b Sam 79:12; Isa 65:6-7; Mat 7:2

39 ^aCule an hnenah hi tahṭhimnak khal a sim, “Mitcaw in mitcaw a hruai thei ding maw? An pahnih in khur sungah an tla lo ding maw? 40 ^bDungthluntu cu a zirhtu pa hnakin a cungnungsawn lo. Asinan famkim ko zirhngah mi kip cu a zirhtu pa tluk a si ding. 41 Nangmai mit sungih thing tluan hman ruat loin, ziangah so na unaupaih mit sungih mit hnawm fate cu na zoh? 42 Asilole nangmai mit sungih thing tluan hmu si loin, ‘Unaupa, na mit sung ihsin na mit hnawm fate kha lo cawihsak ning,’ tiah, ziangtin so na unaupa hnenah na ti thei? Midepde pa! Na mit sungih thing tluan kha hlăwn hmaisa ta awla, na unaupaih mit sungih mit hnawm fate cawih ding mi cu fiangten na hmu thei ding.

6:39^a Mat 15:14

6:40^b Joh 13:16

A Rah in Nan Thei Ding

43 “Ziangahtile thingkung ṭha in rah sia a rah dah lo ih, thingkung sia khal in rah ṭha a rah dah ve lo. 44 ^aZiangahtile thingkung zaten a rah in theih a si. Ziangahtile hling kung ihsin thei rah an lo dah lo, hling bur ihsi khalin sabit rah an lo dah lo. 45 ^bMiṭha cun a thinlung sungih hlawnthil ṭha a khawl mi a suah ih, miṭha lo cun a thinlung sungih hlawnthil ṭha lo a khawl mi a suah. Ziangahtile thinlung sungih a khatliam mi cu a kâ in a ṭawngsuak a si.

6:44^a Mat 12:33

6:45^b Thf 4:23; Mat 12:34-35; Mar 7:20

Lungpi parih Inn Sak

46 ^a“Ka lo sim mi thilpawl tuah si loin, ziangah so, ‘Bawipa, Bawipa,’ tiah in kawh? 47 ^bZokhal ka hnenah ra in, ka sim mi thupawl hna ih thei ih, cupawl a tuahtu cu, ziang thawn an bangaw ti ka lo hmuh ding. 48 Cu pa cu thûk zet lai tahratin lungpi parih ṭohram buntu inn saktu pa thawn an bangaw. Tilik a tlun tikah, cuih inn cu tilian in nasa zetin a sawh ih, cumi cu a hnînter thei lo, ziangahtile a ṭohram cu lungpi parih bun a si. 49 Asinan ka sim mi thu hna ih thei ih a tuah lo tu cu mi pakhat ṭohram bun mi um loih, leilung parih inn a saktu thawn an bangaw. Cuih inn cu tilian in a sawh tikah, hmakhatteah a tlu. Cuih inn siatbăldān cu nasa tak a si,” tiah a ti.

6:46^a Mal 1:6; Mat 7:21; Joh 13:13

6:47^b Jam 1:22-25

7

Ralkap Zakhat Hotu Paih Zumnak

1 ^aJesu cu a thu ngaitu mipi hnenih a thusim zaten a ṭheh tikah, Kapernaum khua ah a lut. 2 Cu tawkah ralkap 100 hotu ih a duh zet mi, siahhlawh pa cu a na ih, a thi zikte. 3 Cuih ralbawi pa in Jesu-ih thuhla a theih tikah, a siahhlawh ra damter dingin va dil dingah, Jew-pawlih miupapawl a hnenah a hei thlah. 4 Cule Jesu hnen an thlen tikah, nasa zetin an dil ih, “Na tuahsak dingah hi pa cu a tlak a si. 5 Ziangahtile anih cun kan miphun a duhdaw ih, kan hrangah sinakok a sak,” tiah an ti.

7:1^a Mat 7:28

6 Cun Jesu cu an zawngah a feh. Cule ralbawi paih inn ihsin a hlat nawn lo nak hmun an thlen tikah, ralkap 100 hotu pa cun a rualpipawl a thlah ih, “Bawipa, nangmah le nangmah buaiawter hlah, ziangahtile ka luangpi hnuaiih nang ra lut dingah kei ka tlak lo. 7 ^aCuruangah keimah khal na hnenih ra ding tlakah ka ruataw lo. Kam khatte ṭawng men awla, ka hnenum pa cu a dam mai ding. 8 Ziangahtile keimah khal mi thuneihnak hnuaiih um ka si, ka kut hnuaiah ralkappawl an um ve. Pakhat hnenah, ‘Feh aw,’ ka ti le a feh; a dang pakhat hnenah, ‘Ra aw,’ ka ti le a ra; ka siahhlawh hnenah, ‘Hihi tuah aw,’ ka ti le a tuah,” tiah a ti.

7:7^a Sam 107:20

9 Jesu in hi thilpawl a theih tikah, cu pa cu mak a ti, cule a herkûal ih a dungih a thluntu mipi hnenah, “Ka lo sim a si, Israel-mipawl lak hmanah hivek zumnak nasa ka hmu hrih lo!” tiah a ti. 10 Cule ralbawi pa ih thlah mipawl inn ih an kirsal tikah, a rak na mi siahhlawh pa cu harhdamin an va hmu.

Jesu in Nain Khua ih Nuhmeinuih Fapa a Thoter

11 Cule a thaisun ah hitin a si, Jesu cu Nain an ti mi khua ah a feh. A dungthluntu mi tampi le mipi cu a zawngah an feh ve. 12 Khaw sung luhnak kăwtka kiang a thlen tikah, ngai hnik, mithi pakhat an rak zâwn; mithi pa cu nuhmeinuih fapa neihsŭn a si. Nuhmeinuih zawngah cun khaw sung mi, mi tam zet an tel. 13 ^aBawipa in cu nu a hmuh tikah, a parah lainatnak a nei ih, a hnenah, “Ṭap hlah,” tiah a ti.

7:13^a Joh 11:2

14 ^aCun Jesu cun a va naih ih, ruak kuang cu a thâm. Cule a ruak kuang zâwntupawl cu an ding. Jesu in, “Tlangval, tho aw ka lo ti,” tiah a ti. 15 Cule mithi pa cu a hung to ih, ṭawng a thawk. Cule Jesu in cu pa cu a nu hnenah a pe.

7:14^a Mat 9:25; Mar 1:31; Joh 11:43; Apo 9:40

16 ^aCun mi hmuahhmuah in an ṭih ih, Pathian an thangṭhat. Mi hrekkhat in, “Kan lakah profet ropi a suak zo, an ti.” A dangpawl in, “Pathian in a mipawl a rung vehvai zo a si,” tiah an ti. 17 ^bCule himi Jesu-ih thuhla cu Judia peng pumpi le a kiangkap ram pumpi ah a thang thluh.

7:16^a Mat 9:8; 21:11

7:17^b Mat 9:26

Baptisma Petu John le Jesu

18 ^aJohn-ih dungthluntupawl in hi thil hmuahhmuah thuhla cu John an sim. 19 Cule John in a dungthluntupawl lak ihsin mi pahnih a hnenah a ko hai ih, Jesu hnenah, “Nangmah hi a ra ding mi pa cu na simaw, asilole a dang kan rak thlir hrih ding saw?” tiih va sut dingah a hei thlah hai.

7:18^a Mat 3:1

20 Cutepawl Jesu hnen an thlen tikah, “Annih in, ‘Nangmah hi a ra ding mi pa cu na simaw, asilole a dang kan rak thlir hrih ding saw?’ tiih ra lo sut dingin baptisma petu John in na hnenah in rak thlah a si hi!” tiah an ti.

21 ^aCule cuih cān fangah Jesu in mi tampi ih nathri siseh, nat sia siseh, khawse ṭha lo neipawl siseh a rak damter; mitcaw tampi khua a hmuter hai. 22 ^bJesu in a sawn hai ih an hnenah, “Va feh uhla nan hmuh mi le nan theih mi thilpawl hi John hnenah va sim uh. Mitcawpawl in khua an hmu ih, kebáipawl an feh; mipharpawl an thiang ih, hnasetpawl in an thei thei; mithipawl an tho ih, mifarahpawl hnenah thuthangṭha phuan a si. 23 Keimah ruangih a tlubah lo tu cu, mithlawsuak a si,” tiah a ti.

7:21^a Mat 4:23

7:22^b Isa 29:18-19

24 John-ih palaipawl an tlun hnuah, Jesu in John-ih thuhla mipi hnenih sim a thawk. “Ziang zoh dingah so ramṭhing ah nan va feh? Thli ih a sĕmhnin rero mi câlte kung zoh dingah maw? 25 Ziang zoh dingah so nan va feh? Sinfen nêm hruhtu pa zoh dingah maw nan feh? Ngai hnik uh, sinfen mawi hruhtupawl le nunnuam zetih nungpawl cu siangpahrang innpawl ah an um. 26 ^aZiang zoh dingah so nan feh? Profet zoh dingah maw? Nan hnenah ka lo sim, a dik a si, John cu profet hnakin a ropisawn.

7:26^a Mat 11:9

27 ^a‘Ngai hnik, na hmaiah ka palai ka thlah ding,
Anih in na lamzin cu na hmaiah a timlam ding,’

7:27^a Mal 3:1; Mat 11:10; Mar 1:2

tiih a thuhla ngan mi pa cu hi pa hi a si.

28 ^a“Ziangahtile nan hnenah ka lo sim, nunau hrin mi lakah baptisma petu John hnakih profet ropi an um lo. Asinan Pathian uknak ih mitenaubik cu, John hnakin a ropisawn a si,” tiah a ti.

7:28^a Mat 3:2

29 ^aCule mipi hmuahhmuah le siah khawngtupawl in cumi cu an thei ih, Pathian cu a dik a si tiah an rak phuang. Annihpawl cu John-ih baptisma cotu an si. 30 ^bAsinan Farasi pawl le Dānthiampawl in anmah hrangih Pathian thil tum cu an rak hnáwng. Annihpawl cu John-ih baptisma pek mi an si lo.

7:29^a Mat 21:32; Mar 1:5

7:30^b Mat 22:35

31 Cule Bawipa in, “Tuih san minungpawl hi ziang thawn ka khaikhin hai pei? Ziang thawn an bangaw? 32 Annih cu dawr hmun ih to ih, pakhat le pakhat auhawin,

‘Phirivau kan rak lo tumsak ih, nan lâm lo;
Mithi ṭahnak hlapawl kan lo saksak ih, nan ṭap lo,’

tiih tiawtu nauhakpawl an bang.

33 “Ziangahtile baptisma petu John cu rawl ei lo le sabit zu in loin a ra ih, ‘Khawsia a nei a si,’ tiah nan ti. 34 Minung Fapa cu ei le in in a ra, cule nannih in, ‘Zoh hnik uh, hi pa cu rawl pham le sabit zu pham, siah khawngtupawl le misualpawlih rualpi khi!’ tiah nan ti. 35 Asinan ^afimnak cu a fale hmuahhmuah in thiam an coter a si,” tiah a ti.

7:35^a fimnak cu a fale hmuahhmuah in thiam an coter a si: Mifimpawlih ṭawngkam cu mifim hmuahhmuah in an theithiam tinak a si.

Sual Tuahtu nu Jesu in a Ngaidam

36 Cun Farasipawl lakih pakhat in Jesu kha a hnenih rawl ei dingin a sawm. Cule Jesu cu cuih Farasi-ih inn ah a feh ih, rawl ei dingin a hil. 37 Cule ngai hnik, khaw sungih misual nunau pakhat in Farasi paih inn ah Jesu cabuai a hil ti a theih tikah, alabasṭa lung ih tuah mi thâwl in hriak rimhmui a rak keng. 38 Jesu-ih dung lam, a ke hramah dīngin a ṭap ih, a mitthli thawn Jesu-ih ke cu khawlh a thawk. Cule a lu-ih sam in a hnûl, a ke a hnam ih hriak rimhmui a culh.

39 ^aCumi cu rawl ei sawmtu Farasi pa in a hmuh tikah, a thinlung sungten, “Hi pa hi profet a si ngai ahcun, a ra thâmtu nunaunu hi zo a si ti le ziang vek nunau a si ti thei ding a si, ziangahtile hi nu cu misual a si,” tiah a ruat.

7:39^a Mat 21:11

40 Cule Jesu in a sawn ih a hnenah, “Simon, na hnenah thu lo sim ding ka nei,” tiah a ti.

Cu tikah anih in, “Zirhtu pa, i sim aw,” tiah a ti.

41 Jesu in, “Paisa cawihtu pakhat hnenah mi pahnih in leiba an nei. Pakhat in dinari paisa 500 a bâk ih, a dang pakhat in dinari paisa 50 a bâk. 42 Cule a rulhsalnak ding zianghman an neih lo tikah, an pahnih in a ngaidam hai. Cuti asile, i sim hnik, zo sawnin cu pa cu a duhdaw deuh ding?” tiah a ti.

43 Simon in a sawn ih, “A ngaidam tamdeuh mi a si ding tiah ka ruat,” tiah a ti.

Cu tikah Jesu in a hnenah, “Na thuṭhen mi cu a dik a si,” tiah a ti.

44 ^aCun Jesu cu nunaunu lamah a her ih, Simon hnenah cun, “Hi nu hi na hmu maw? Na inn sungah ka rung lut ih, nang in ka ke khawlhnak ding hrang tidai i rak pe lo, asinan hi nu cun a mitthli thawn ka ke a khawlh ih a lusam in a hnûl. 45 ^bNang cun hnămnak thawn cibai i bûk lo, asinan hi nu cun ka rung luh ihsin ka ke hnăm a cawl hrih lo. 46 ^cNang cun ka lu hriak i thih lo, asinan anih cun ka ke ah hriak rimhmui i culh. 47 Hipawl hmuahhmuah ruangah, na hnenah ka lo sim, a tam zet mi a sualpawl ngaidam a si ruangah, anih cun nasa zetin a duhdaw a si. Málte lawng ngaihdam mi cun a duhdaw dêm ve,” tiah a ti.

7:44^a Sem 18:4; Lai 19:21; Joh 13:4-14; 1Ti 5:10

7:45^b Rom 16:16

7:46^c Sam 23:5; Ths 9:8

48 ^aCule Jesu in cu nu hnenah, “Na sualpawl cu ngaidam a si zo,” tiah a ti.

7:48^a Mat 9:2

49 Amah cabuai hilpitupawl in, “Sualpawl khal ngaidamtu hi pa hi zo a si?” tiah an thinlung sungten ti an thawk.

50 ^aCun Jesu in nunaunu hnenah, “Na zumnak in a lo rundam zo. Hnangamten va feh aw,” tiah a ti.

7:50^a Mat 9:22; Apo 15:33

8

Nunau Tampi in Jesu an Rian

1 ^aCuih hnuah hitin a si, Jesu cu lungawiumza Pathian uknak thuthang sim le phuangin khawpi kip le khawte kip a tlâwng vivo. Cule a dungthluntu hleihnih pawl le, 2 ^bthlarau sual ih luhhnawh damter mi nunau hrekkhat le an natnak damter mipawl le a sung ihsin khawsia pasarih a dawisuahsak mi Magdalin tiih kawh mi Mary, 3 ^cHerod-ih thilri kilkhawitu Kuza-ih nupi Joana, Susanna le an neih mi thilri hmangih Jesu rak riantu mi dang tampi tla a zawngah an tel.

8:1^a Mat 4:23

8:2^b Mat 27:55-56

8:3^c Mat 14:1

Thlaici Vawrh Tahṭhimnak

4 Khaw tin ihsin mipi tam zet an pungkhawm ih, Jesu hnenah an ra, anih in an hnenah hi tahṭhimnak hi a sim: 5 “Thlaici vawrhtu cu a thlaici vawrh dingin a fehsuak. Thlaici a vawrh tikah, a hrekkhat cu lamzin kap tluanah an tla, mi in an pál ih tlun zuang vatepawl in an cuk thluh. 6 A hrekkhat cu lung parah an tla. A hnawng mi a tlaksam ruangah a keuh veten a ro. 7 Cule thlaici hrekkhat cu hling rûl lakah an tla, hling rûl thawn an ṭhangtlang ih hling kungpawl in an zâp ṭheh. 8 ^aCun thlaici dang cu leiram ṭha ah an tla, cule an ṭhang. Cun a let 100 in rah a rah,” tiah a ti.

8:8^a Mat 11:15

Cuih thilpawl a sim ṭheh hnuah, “Theihnak hna a neitu cun thei seh!” tiah a ti.

9 Cun, “Cuih tahṭhimnakih tican cu ziang a si?” tiah a dungthluntupawl in Jesu an sut.

10 ^aCule Jesu in, “Pathian uknak thu thawn pehparin thuthuppawl theih thei nak pek nan si zo. Asinan,

8:10^a Isa 6:9-10; Mat 13:11

‘Hmu na cingih hmu lo dingin le,
Ngaithla na cingin an theithiam lo ding,’

mi dang hnenah cun tahṭhimnakpawl in sim a si.

11 ^a“Hi tahṭhimnakih tican cu hitin a si: thlaici cu Pathian kamsuakthu a si. 12 Lamzin kap tluanih a tla mi cu kamsuakthu a ngaithlatu an si; an zum ih rundam an silonak dingah, Diabol a ra ih an thinlung sung ihsin kamsuakthu cu a lâkhlohsak hai. 13 ^bLung parih a tla mipawl cu, an ngaithlak tikah lungawi zetih kamsuakthu cohlangtu an si. Asinan an thinlung sungah hrám a neih lo ruangah, cān tawite sung lawng an zum ih, sualfawrhnak an tawn tikah an tluhlo. 14 ^cCun hling rûl lakih a tla mi cu hipawl hi an si: an rak ngaithlak tikah anmai duhdān in an feh, hi leitlun nun dawnharnak, lennak le năwmnak pawl in a zâp ih, rah pitling an suah lo. 15 Asinan leiram ṭha parih a tla mi cu hipawl hi an si: thinlung ṭha le dik an nei ih, kamsuakthu an theih tikah an kai hnget ih, tuarfainak thawn rah an suah.

8:11^a Heb 4:12

8:13^b Mat 11:6

8:14^c Mat 19:23; 1Ti 6:9-10, 17

Meito

16 ^a“Mi zohman in meito vâng tahratin, bel in an khuh dah lo, asilole ihkhun hnuaiah an ret dah lo, cuhnakin a luttu zaten tleu an hmuh thei nak dingah, meito ṭhuam parah an ret sawn a si. 17 ^bZiangahtile phuanlăng leh lo ding mi thuthup zianghman a um lo ih, theih leh lo ding mi le tleu ih langsuak leh lo ding mi thuthup zianghman a um lo. 18 ^cCuruangah thu nan ngaithlakdān ah fimkhur uh. Ziangahtile zokhal a neitu cu tam sinsinin pek a si ding, cule zokhal a nei lo tu cu a neih vekih lang mi hman a hnen ihsin lâksak a si ding,” tiah a ti.

8:16^a Mat 5:15

8:17^b Mat 10:26; Mar 4:22

8:18^c Mat 25:29

Jesu Nu le a Naupalepawl

19 Cuih cān ah, a nu le a naupalepawl a hnenah an ra. Asinan mipi an tet tuk ruangah a hnen an thleng thei lo. 20 ^aCule mi hrekkhat in Jesu hnenah, “Na nu le na naupalepawl cu nangmah lo hmuh duhin lengah an ding,” tiah an sim.

8:20^a Joh 7:5

21 ^aCule anih in a sawn hai ih an hnenah, “Pathian kamsuakthu a ngaithla ih a tuahsuaktu cu, ka nu le ka naupalepawl an si,” tiah a ti.

8:21^a Joh 14:21

Thli sia le Tisuar in Jesu-ih Thu an Ngai

22 Cule ni khat cu hitin a si, Jesu cu a dungthluntupawl thawn lăwng sungah a lut ih an hnenah, “Tili khat lam ralah feh uhsi,” tiah a ti hai. Cule lăwng in an feh. 23 Cutiih lăwng ih an feh rero laiah Jesu cu a rak itthat. Tili parah thlipi a rung hrang ih an lăwng cu tidai in a khah ruangah an dinhmun cu ṭihnungza a si.

24 ^aDungthluntupawl cu Jesu hnenah an va feh ih, an va ṭhang. Cule, “Hotu pa, Hotu pa, kan pil cuahco a si!” tiah an ti.

8:24^a Sam 107:9; Jon 1:15

Cule Jesu cu a hung tho ih thli le tisuar cu a kawk. Cun thli cu a cawl ih, tili cu a dai. 25 Cule anih in an hnenah, “Khuiah so nan zumnak cu?” tiah a ti.

Annih in an ṭih ih an mang a bang. Cule pakhat le pakhat, “Hi pa hi ziang vek minung so a si, thli le tidai pawl hman thu a pek ih a thu an lun hi!” tiah an tiaw.

Khawse Pawlh Mi Damternak

26 Jesu le a dungthluntupawl cu Galili ralkhat ih um, Gadara ram an thleng. 27 Khawmual parih Jesu a suah tikah, khawsiapawl ih reipi an pawlh mi pa pakhat in a rak táwng. Cu pa cu hnipuan zianghman a hruh lo, inn khalah um loin, thlānmual ah a cêng sawn. 28 ^aJesu a hmuh tikah a au ih, a hmaiah a tlu, cule aw ring zetin, “Cungnung Bik Pathian Fapa, Jesu, nang le kei hi ziang pehtlaihawknak so kan neih? I hrem hlah aw, ka lo dil a si,” tiah a ti.

8:28^a Mat 8:29; Mar 5:7

29 Ziangahtile Jesu in thlarau bawrhhlawh kha cu paih sung ihsin suak dingin thu a rak pek zo. Vei tampi khawsia in cu pa cu a kaihrem ih, ke hrennak le thir cikcinpawl in an ṭemṭawn ih an kil. Asinan cikcinpawl cu a catter ih, khawsia in cu pa cu ramṭhing ah a dawisuak ṭheu.

30 Jesu in, “Na hmin zo a si?” tiah a sut.

Cule anih in, “Lizon,” tiah a ti, ziangruangahtile khawsia tampi a sungah an lut. 31 ^aKhur thûk zet sungih feh dingin thu pe lo dingin Jesu hnenah an dil.

8:31^a Thu 9:1-2, 11

32 Culaifangah tlang parah văwk rual tampi rawl an ei rero. Khawsiapawl cun Jesu hnenah văwk rual sungih luh siang dingin an dil. Cule a siang hai. 33 Cu paih sung ihsin khawsiapawl cu an suak ih, văwk rual sungah an lut. Cule cuih văwk rual cu kham hrâp ihsin tili sungah an tlânthla ih an pil ṭheh.

34 Văwk kiltupawl in thil cang mi an hmuh tikah an tlân ih, cuih thuhla cu khaw sungah le khawte ah an thăn ciamco. 35 Cun thil cang mi zoh dingah mipi an va feh. Jesu hnen an va thlen tikah, a sung ihsin khawsiapawl a dawisuahsak mi pa cu lungfim le hnipuan hruhin Jesu-ih ke hramih toin an va hmu. Cule an ṭih. 36 ^aA rak hmutupawl in ziangtin khawse pawlh mi pa a dam ti kha cupawl hnenah an rak sim. 37 ^bCule Gadara ram mipi hmuahhmuah in an ṭih tuk ruangah, Jesu kha anmah suahsan dingin an dil. Cule Jesu cu lăwng sungah a lut ih, a umnak hmun kel ah a kirsal.

8:36^a Mat 4:24

8:37^b Apo 16:39

38 Khawsiapawl ih an suahsan mi pa in, Jesu hnenih um dingin a dil. Asinan Jesu in a tlunter ih, 39 “Na sungte hnenah va tlung awla, na parah Pathian in ziang thil ropi pawl a tuah ti kha va phuang aw,” tiah a ti. Cule cu pa cu a feh ih, Jesu in a parih thil ropi pawl a rak tuah mipawl cu cuih khaw pumpuluk ah a phuang.

Mina Nu le Mithi Nute

40 Cule hitin a si, an zaten amah an rak beisei ruangah Jesu a ra kirsal tikah, mipi in lungawi zetin an rak cohlang. 41 ^aCule ngai hnik, sinakok uktu Jairas an ti mi pa cu, cu tawkah a ra thleng ih, Jesu-ih ke hramah a băwkkhup. Cun a inn ih ra dingin Jesu cu a dil. 42 Ziangahtile a fanu neihsŭn kum hleihnih mite cu a thi zikte.

8:41^a Mar 5:22

Jesu cu a va feh ih, mipi in amah cu an năwr luihlo. 43 ^aCu laiah, cu tawkah kum hleihnih sung thi put nat tuar nunau pakhat a rak um. A nunkhawsaknak ding zate sibawipawl hnenah a hmang thluh nân, zohman in an damter thei lo. 44 ^bJesu dung ihsin a ra ih a sinfen zim a thâm. Cule hmakhatteah a thi put cu a reh.

8:43^a Pui 15:25-30

8:44^b Mat 9:20

45 Cule Jesu in, “Zo in so i thâm?” tiah a ti.

An zaten an phat cio tikah, Peter le a zawngih umpawl in, “Hotu pa, mipi in an lo tûl ih an lo năwr luihlo si khawh, ziangtin, ‘Zo in so i thâm?’ na ti,” tiah an ti.

46 ^aCule Jesu in, “Mi pakhat khat in in thâm a si, ziangahtile ka sung ihsin huham a suak ti ka thei,” tiah a ti. 47 Nunaunu in a thupaw thei lo ti a hmuh tikah, khūr phah reroin a ra ih, Jesu hmaiah a băwkkhup. Cu nu cun mi zate hmaiah ziangruangah Jesu a thâm ti le hmakhatteah ziangti vekin a dam ti cu Jesu hnenah a phuang.

8:46^a Mat 14:36; Mar 3:10

48 ^aJesu in cu nu hnenah, “Ka fanu, ṭih hlah, na zumnak in a lo damter zo, hnangamten va feh aw,” tiah a ti.

8:48^a Mat 9:22; Apo 15:33

49 Cutiih Jesu a ṭawng rero laiah sinakok uktu paih inn ihsin mi pakhat a ra thleng ih, “Na fanu a thi zo; Zirhtu pa cu tibuai rero nawn hlah,” tiah a ti.

50 Jesu in cuih thu a theih tikah, Jairas hnenah a sawn ih, “Phâng hrimhrim hlah, a zum lawng zum men aw, cule na fanute cu a dam ding,” tiah a ti.

51 Cule Jairas-ih inn a va thlen tikah, Jesu in Peter, James, John le cuih nunaunuteih nu le pa siarlo zohman luhter a siang lo. 52 ^aCule inn sungih a um mi an zaten nunaunute cu an ṭah ih an râk rero. Cu tikah Jesu in, “Ṭap hlah uh, anih hi a thi lo pi, a itthat sawn a si,” tiah a ti. 53 Nunaunute a thi zo ti an theih ruangah, annih in Jesu cu an hnihsan.

8:52^a Mat 9:24

54 Cule an zaten lengih a suahter hai hnuah, cu nu cu a kut in a vun kai ih, a ko, “Nute, tho aw,” tiah a ti. 55 Cun a thlarau a ra kirsal ih, nunaunu cu a tho lohli. A ei ding rawl pe dingin thu a pe hai. 56 ^aCule a nu le a pa cu an khawruah a har zet. Asinan Jesu in a nu le a pa hnenah a thil tuah mi cu zohman sim lo dingin a cah hai.

8:56^a Mat 8:4

9

Jesu in Mi Hleihnih a Thlah

1 ^aJesu in a dungthluntu hleihnih pawl cu hmunkhat ah a kokhawm ih, khawsia hmuahhmuah parah le nathripawl damter thei nak huham le thuneihnak a pek hai. 2 ^bPathian uknak thu phuang dingah le mina damter dingah anmah cu a thlah. 3 Cule anih in an hnenah, “Nan khualtlawnnak hrangah zianghman keng hlah uh, kianghrăwl siseh, zâl siseh, rawl siseh, paisa siseh, kâwrfual zun hnih siseh keng hlah uh. 4 Nan luhnak inn pauhpauh ah cām uhla, cu tawk ihsin păwksuak uh. 5 ^cCule zokhal nanmah a lo cohlang lo tu cu, cuih khua nan suahsan tikah, anmah dokalhnak theihpinak ah nan ke ih leivut cu thingtla ta uh,” tiah a ti.

9:1^a Mat 4:23; 10:1

9:2^b Mat 3:2

9:5^c Mat 10:14

6 Cule dungthluntupawl cu an păwksuak ih, khaw khat hnu khaw khat an feh, thuthangṭha an phuang ih, hmun kip ah mi an damter.

Herod a Khawruah a Har

7 ^aCuih cān ah Herod Tetrak in, Jesu ih thil tuah mi hmuahhmuah hna ih a theih tikah, a khawruah a har zet, ziangahtile mi hrekkhat in, “John cu mithi lak ihsin a thosal a si,” tiah an ti. 8 ^bMi hrekkhat in, “Elijah a rung langsal a si hi!” an ti. Cun mi dang pawl in, “Khuahlan profet pakhat khat a thosal a si,” an ti. 9 Herod in, “John-ih lu cu ka tán zo, asinan a thu ka theih rero mi pa cu zo a si pei?” tiah a ti.

9:7^a Mat 3:1; 14:1

9:8^b Mat 11:14; Joh 1:21

Cule Jesu hmuh ding a hiar zet.

Mi 5000 Rawl Donak

10 ^aApostolpawl an ra tlungsal ih, an tuah mi zaten Jesu an ra sim. Cule annih cu a hruai hai ih, Bethsaida khaw kiang ramṭhing ah anmah vial an feh. 11 ^bMipi in cuih thu an theih tikah, Jesu cu an thlun. Anmahpawl cu Jesu in a rak cohlang hai ih, Pathian uknak thu an hnenah a sim. Cule damnak a ṭul mipawl a damter hai.

9:10^a Mat 11:21; Mar 6:30

9:11^b Mat 3:2

12 Ni a tlak zik tikah, dungthluntu hleihnih pawl cu an ra ih a hnenah, “Hi hmun hi ramṭhing a si ruangah mipi hi, hi kiangkap khuapawl le ló lakah rawl le riahnak hawl dingin thlah hai aw,” tiah an ti.

13 Asinan Jesu in an hnenah, “Nanmah in an ei ding rawl pe uh,” tiah a ti.

Cule annih in, “Hi mipi zate hrangah va feh ih, rawl kan va leisak lo ahcun, kanmah cun sang hlăwm nga le nga pahnih lawng kan nei,” tiah an ti.

14 Ziangahtile patling 5000 hrawng an si. Cun Jesu in a dungthluntupawl kha, “Mipi hi 50 bur ciar in toter uh,” tiah a fial hai. 15 A fial mi vekin an tuah ih, mipi zaten an to.

16 ^aCun Jesu in sang hlăwm nga le nga pahnih cu a la ih, van lam hawiin lungawi thu a sim ih a phel. Cule mipi zem dingah a dungthluntupawl a pe. 17 An zaten an ei ih an khawp zet, cule an hlah mi nepnawi cu an sar ih kho hleihnih a khat.

9:16^a Mat 14:19

Jesu, Khrih a Si ti Phuannak

18 Cule hitin a si, Jesu amah te lawng thla a cam laiah, a dungthluntupawl in amah an hei fĭn. Cule anih in an hnenah, “Mipi in keimah hi zo in ti?” tiah a sut hai.

19 ^aAnnih in an let ih, “Baptisma petu John a si an lo ti, asinan mi hrekkhat in Elijah a si an lo ti. Cule mi dang pawl in khuahlan profet pakhat khat a thosal mi a si an lo ti,” tiah an ti.

9:19^a Mat 3:1

20 ^aJesu in an hnenah, “Nannih in teh kei hi zo ka si tiah in ti?” tiah a ti hai.

9:20^a Joh 1:49

Peter in a sawn ih, “Nangmah cu Pathian-ih Khrih na si,” tiah a ti.

21 ^aCule Jesu in cuih thu cu zohman sim lo dingin, hnget zetin a tiam ih thu a pe hai.

9:21^a Mar 8:30

Jesu in a Thih ding le a Thawhsal ding Thu a Phuang

22 ^aCule anih in, “Minung Fapa in thil tampi a tuar ding, miupapawl, puithiam sâng pawl le Dān zirhtupawl in an hnáwng ding ih an that ding, cule a ni thumnak ah thawhtersal a si ding,” tiah a ti.

9:22^a Mat 8:20; 16:21; 27:1-2; Apo 2:23

23 ^aCun an zate hnenah, “Zokhal keimah i thlun duhtu cun amah le amah êl-aw sehla, ni tin amai khraws lain, i thlun seh. 24 ^bZiangahtile zokhal a nunnak humhim a duhtu cun a nunnak a hloh ding, asinan zokhal keimah ruangih a nunnak a hlohtu cun a nunnak a humhimngah ding. 25 Ziangahtile mi pakhat in leitlun pumpi hi neiin, amah siatrálin hloral sehla, a hrangah ziang hlawknak so a um? 26 ^cZiangahtile zokhal keimah le ka kamsuakthupawl a zahpitu cu Minung Fapa in a ropitnak, a Paih ropitnak le a thianghlim mi vancungmipawlih ropitnak thawn a rat tikah, cu pa cu a zahpi ding. 27 Thungaiin ka lo sim, hi tawkih a dīng mi, mi hrekkhat cu Pathian uknak an hmuh lai hlanlo, thihnak tep hrimhrim lo ding mi an um,” tiah a ti.

9:23^a Mat 10:38

9:24^b Joh 12:25

9:26^c Mat 10:33; 16:27; 2Ti 2:12

Jesu a Hmuihmel a Thlĕng

28 ^aCule hitin a si, hi thu a sim hnu ni riat hrawngah, Jesu in Peter, John le James tla a hruai hai ih, thlacam dingin tlang parah a kaisohpi. 29 Thla a cam rero laiah, a hmel lăngdan a hung thlĕngaw, cule a kâwrfual cu a var tuk ih, a tlêtin a tle. 30 Cule ngai hnik, mi pahnih cu amah thawn an beaw rero, cute pahnih cu Mosi le Elijah an si. 31 ^bCute pahnih cu ropitnak thawn an rung lang ih, Jesu in Jerusalem ih a ṭhehfel ding mi a ^cfehsuah ding thuhla an rel. 32 ^dAsinan Peter le a rualpipawl cu an sĭng ngutngo. An hung ṭhang tikah, a ropitnak le a hnenih mi pahnih dīng an hmu. 33 Cule hitin a si, cute pahnih in Jesu an fehsan zawngah, Peter in Jesu hnenah, “Hotu pa, hi tawkih um hi kan hrangah a ṭha; thlam pathum in kan sak pei: na hrangah pakhat, Mosi hrangah pakhat, Elijah hrangah pakhat,” tiah a ti. Peter in ziang ka ṭawng ti khal a rak thei lo.

9:28^a Mat 4:21

9:31^b 2Pe 1:15

9:31^c fehsuah: A thihnak ding thu a si.

9:32^d Mat 26:43

34 Cutiih a ṭawng rero laiah, mero a rung zām ih a run hliap hai. Mero sungih an luh lai cu an ṭih. 35 ^aCule mero sung ihsin aw pakhat in, “Hihi ka duhdawt zet mi ka Fapa a si, a thu ngaithla uh!” tiah a run ti. 36 ^bCuih aw a reh tikah, Jesu lawng an hmu. Cuih cān ah cun, an hmuh mi thilpawl zianghman zohman sim loin, daiten an um.

9:35^a Isa 42:1; Mat 3:17

9:36^b Mat 17:9

Nauhak pa Damternak

37 Cule hitin a si, a thaisun tlang par ihsin an rung ṭum tikah, mipi tam zetin Jesu an rak hmuak. 38 Cule zoh hnik, mipi lak ihsin mi pakhat a au ih, “Zirhtu pa, ka fapa i ra zohsak hram dingin ka lo dil a si, ziangahtile amah cu ka neihsŭn fapa a si. 39 Ngai hnik, thlarau in a kaihrem ih, a ausuak hruak ṭheu. A caihter ih a kâ ihsin cilbuanra a suak; cule harsa zetin a tuahmawh hnuah, nuamnaiten a suahsan ṭheu. 40 Cuih thlarau cu dawisuak dingin na dungthluntupawl ka dil hai nân, an dawisuak thei lo,” tiah a ti.

41 ^aCun Jesu in a sawn ih, “Maw zumnak nei lo le zin pêng zawh san minungpawl, ziangtik tiang so nan hnenah ka um ding ih, ziangtik tiang so ka lo zāwi ding? Na fapa cu hi tawkah rak hruai hnik,” tiah a ti.

9:41^a Dnp 32:5

42 Nauhak pate cu a rat laiah, khawsia in a thlûk ih a caihter ciamco. Cule Jesu in thlarau bawrhhlawh cu a kawk ih, nauhak pate cu a damter. Cule nauhak pate cu a pa hnenah a pesal.

Jesu in a Thih ding Thu a Simsal

43 Cule Pathian-ih maksaknak ah cun an zaten an mang a bang zet.

Asinan an zaten a thil tuah mipawl ih an mang a bang laiah, Jesu in a dungthluntupawl hnenah, 44 “Hi kamsuakthupawl hi ṭhaten ngai hnik uh, ziangahtile Minung Fapa hi mi kut ah phiarsawm a si zikte thlang,” tiah a ti.

45 ^aAsinan a sim mi cu an rak theithiam lo; an theihthiam thei lo nak dingin, cumi cu an hnen ihsin thuh a si, a sim mi thuhla ah amah suh an ngam lo.

9:45^a Mar 9:32

Zo so Mithupibik?

46 Cun an lakah zo a thupibik ding tiin dungthluntupawl cu an rak êlaw rero. 47 ^aJesu in an thinlung ih khawruah mi a thei ih, nauhakte pakhat a cawi ih a kiangah a dīngter. 48 ^bCule an hnenah, “Zokhal ka hmin ih hi nauhakte a cohhlangtu cun keimah i cohlang a si. Cule zokhal keimah i cohlangtu cun i thlahtu a cohlang a si. Ziangahtile nan zate lakih a thupi lo bik cu mithupi a si ding,” tiah a ti.

9:47^a Mat 9:4

9:48^b Mat 10:40; Mar 9:35

Jesu in Ṭhenaw ih a Dangtei Um a Kham

49 John in a sawn ih, “Hotu pa, kanmah in thlun lo tu mi pakhat na hmin ih khawse dawisuaktu kan hmu ih, kanmah in thlun lo ruangah kan kham ta,” tiah a ti.

50 ^aCule Jesu in a hnenah, “Kham hlah uh, ziangahtile in do lo tu cu kan lam ṭang a si,” tiah a ti.

9:50^a Mat 12:30

Samaria Khawmipawl in Jesu an Hnáwng

51 ^aCule hitin a si, van ih lâksoh a si ding cān a nai thlang tikah, Jerusalem ih feh ding a tum hnget. 52 ^bCule a hmaiah palaipawl a thlah sung. Annihpawl cu a hrangih timtuah cia dingin an va feh ih, Samaria peng khawte pakhat ah an lut. 53 A mithmai cu Jerusalem lam pan dingih a lăng ruangah, cuih khawmipawl in an rak cohlang lo. 54 ^cCumi cu a dungthluntu James le John in an hmuh tikah, annih in, “Bawipa, Elijah ih a rak tuah dah vekin, hipawl kangrál thluh tu dingah van ihsin meisa rung tla dingin ko nungla na duh maw?” tiah an ti.

9:51^a Mat 4:21; Mar 16:19

9:52^b Mat 10:5

9:54^c 2Sp 1:10, 12; Mat 4:21

55 Asinan Jesu cu a her ih anmah cu a kawk hai, “Ziang vek thlarau nan nei ti nan thei lo. 56 Ziangahtile Minung Fapa cu minung nunnak siatsuah dingah a ra lo, rundam dingah a ra sawn a si,” tiah a ti. Cule khaw dangah an feh.

Dungthluntu Si Man

57 Cun hitin a si, lamzin ih an feh rero laiah, mi pakhat in a hnenah, “Bawipa, na fehnak kip ah ka lo thlun ding,” tiah a ti.

58 ^aCule Jesu in a hnenah, “Sihál in kua an nei ih, tlun zuang vate in bu an nei, asinan Minung Fapa cun lu retnak ding hmun a nei lo,” tiah a ti.

9:58^a Mat 8:20

59 ^aCun mi pakhat hnenah Jesu in, “I thlun aw,” tiah a ti.

9:59^a Mat 4:19

Asinan cu pa in, “Bawipa, va feh ih ka pa va phum hmaisak ta i siang hram aw,” tiah a ti.

60 ^aJesu in a hnenah, “Mithipawl in anmai mithipawl cu phum hai seh, nang cu va feh awla, Pathian uknak thu va phuang sawn aw,” tiah a ti.

9:60^a Mat 3:2

61 ^aCule a dang pakhat khal in, “Bawipa, ka lo thlun ding, asinan ka inn ih umpawl damten maw, tiin ka va thlah hmaisa ta ding,” tiah a ti.

9:61^a 1Sp 19:20

62 Jesu in cu pa hnenah, “Zohman leilehnak hâl kai tahratih, dung lam a zohtu cu, Pathian uknak hrangah a tlak lo,” tiah a ti.

10

Jesu in Mi 70 a Thlah

1 ^aHih thilpawl hnuah, Bawipa in a dang mi 70 pawl khal a ruat hai ih, amah a fehnak ding khaw kip le hmun kip ah pahnih pahnih in a hmaiah a thlah hai. 2 ^bCun an hnenah, “Thlairawl khawm ding a tam tuk, asinan hnaṭuantu an mál. Curuangah thlairawl khawm ding neitu Bawipa hnenah a thlairawl khawmnak hmun ih hnaṭuantupawl thlah dingin thlacam uh. 3 ^cVa feh uh, ngai hnik uh, cinghnia rual lakih tuu fa no rual vekin ka lo thlah a si. 4 Paisa bawm siseh, zâl siseh, kedam siseh keng hlah uh. Cule lamzin ah zohman cibai va bûk hlah uh.

10:1^a Mat 10:1; Mar 6:7

10:2^b Mat 9:37; Joh 4:35

10:3^c Mat 10:16

5 “Nan luhnak inn kip ah a hmaisabikah, ‘Hi inn ah daihnak um hram seh,’ tiah ti uh. 6 Cule cu tawkah daihnak fapa a um asile, nan daihnak cu a parah a um ding. A um lo asile, nan daihnak cu nan hnenah a kirsal ding. 7 ^aCuih inn ah cun cām uh, an lo pek mi thilpawl kha ei uhla, in uh. Ziangahtile hnaṭuantu cu a ṭuan man hmu tlak a si. Inn khat hnu inn khat ṭhawn dualdo hlah uh.

10:7^a 1Ti 5:18

8 ^a“Nan luhnak khua pauhpauh ah a lo cohlangtu in nan hmaiih an lo hŭn mi thilpawl kha ei uh. 9 ^bCule cuih khaw sungih minapawl cu damter uhla, an hnenah, ‘Pathian uknak cu nan kiang naite ah a thleng zo a si,’ tiah sim uh. 10 Asinan a lo cohlang lo tu nan luhnak khua pauhpauh ah, an khaw sung kăwtthler ah fehsuak uhla, 11 ^c‘Kan parih a kăwp mi nan khaw leivut cu nanmah lo dokalhnak hminsinnak ah kan thingtla a si. Asinan hihi thei uh, Pathian uknak cu nan kiang naite ah a thleng zo,’ tiah va ti uh. 12 ^dAsinan nan hnenah ka lo sim, cuih Ni ah cuih khua hnakin Sodom ih tuar mi cu a dêmsawn ding.

10:8^a 1Ko 10:27

10:9^b Mat 3:2

10:11^c Mat 10:14

10:12^d Mat 10:15; 11:24

Lungthlĕng lo Khuapawl

13 ^a“Maw Korazin, na hmakhua a pit a si! Maw Bethsaida, na hmakhua a pit a si! Ziangahtile nan sungih tuah mi thilmak tampi pawl hi Ṭaiar khua le Sidon khua ah tuah rak si ta sehla, buri sĭnin vutcâm lakah toin an lung an thlĕngnak a rei zo ding. 14 Asinan thuṭhennak ah cun nan tuar mi hnakin, Ṭaiar khua le Sidon khua ih tuar mi cu a dêmdeuh sawn ding. 15 ^bCule van tiang khaisan mi, nang, Kapernaum, mithi khua ah dirhtlak na si ding.

10:13^a Thu 11:3

10:15^b Mat 4:13

16 ^a“Nan thu a lo ngaithlatu cu ka thu ngaithlatu a si. Nanmah a lo hnáwngtu cu, keimah i hnáwngtu a si. Cule keimah i hnáwngtu cu, i thlahtu a hnáwng a si,” tiah a ti.

10:16^a Mat 10:40

Aipuang zetin Mi 70 pawl an Kirsal

17 ^aCun mi 70 pawl cu lungawiten an ra tlungsal ih, “Bawipa, na hmin in khawsiapawl khal kan thuthu in an um,” tiah an ti.

10:17^a Mar 16:17

18 ^aCule anih in an hnenah, “Nimthlakau vekin van ihsin Setan a tlak ka hmu. 19 ^bNgai hnik uh, rulpawl le tlangkaikuangpawl pal thei nak le nan ralpawlih huham hmuahhmuah neh thei nak thuneihnak nan hnenah ka lo pe a si. Zianghman in an lo tuahmawh hrimhrim lo ding. 20 ^cSikhalsehla nan thuthu ih thlarau sualpawl an um ruangah lungawi aipuangin um hlah uh, cuhnakin nan hmin van ih ngan a si zo ruangah lungawi aipuangin um sawn uh,” tiah a ti.

10:18^a Isa 14:12; Mat 4:10; Thu 9:1

10:19^b Mar 16:18; Apo 28:3-5

10:20^c Thu 20:12

21 ^aCuih cān fang teah Jesu cu Thlarau ah lungawi aipuangin a um ih, “Maw ka Pa, lei le van ih Lal, ka lo thangṭhat, ziangahtile nang cun hih thilpawl hi mifim le mithiam pawl hnenah na thup ih, mi menmen pawl hnenah na phuanglang. A si, ka Pa, cuti vekih na tuah mi cun na lung a lo hmuiter zet.

10:21^a 1Ko 1:26-29

22 ^a“Ka Pa in thil hmuahhmuah ka hnenah i pe zo. Pa siarlo zohman in Fapa hi zo a si ti an thei lo. Fapa le Fapa in a hnenih Pa phuanlăng a duh mi siarlo zohman in Pa hi zo a si ti an thei lo,” tiah a ti.

10:22^a Mat 28:18; Joh 1:28

23 Cun Jesu cu a dungthluntupawl lamah a her ih, a hranten thu a sim hai, “Nan hmuh mi thilpawl a hmutu mit cu mit hualvanṭha a si. 24 ^aZiangahtile ka lo sim a si, profet tampi le siangpahrang tampi in nan hmuh mipawl hi hmuh an rak hiar zet nân, an rak hmu lo. Nan hna ih nan theih mipawl hi theih an rak hiar zet nân, an rak thei lo,” tiah a ti.

10:24^a 1Pe 1:10-12

Samaria Miṭha Pa Tahṭhimnak

25 ^aCule ngai hnik, Dānthiam pakhat cu Jesu hniksak dingin a dīng ih, “Zirhtu pa, kumkhaw nunnak ro ih ka co thei nak dingah ziang ka tuah pei?” tiah a ti.

10:25^a Mat 19:16

26 Jesu in a hnenah, “Dān ah ziang so ngan a si? Cumi cu ziangtin na ruat?” tiah a ti.

27 ^aCule Dānthiam pa cun a sawn ih, “Bawipa na Pathian cu na thinlung zaten, na nunnak zaten, na cahnak zaten le na ruahnak zaten na duhdaw pei. Cule nangmah le nangmah na duhdawtawk vekin na innhnen na duhdaw pei,” tiah a ti.

10:27^a Pui 19:18; Dnp 6:5; Mat 5:43

28 ^aCule Jesu in a hnenah, “Na let dik a si. Cuti vekin tuah awla, na nung ding,” tiah a ti.

10:28^a Rom 7:10

29 Asinan Dānthiam pa cun midingfel a si ti lăngawkter a duh ruangah, “Ka innhnen cu zo a si?” tiah a ti.

30 Cun Jesu in a sawn ih, “Mi pakhat cu Jerusalem ihsin Jeriko khua ah a vung feh ih, suamhmangpawl a táwng dukdi hai, cule suamhmangpawl cun a hnipuan an hlihsak ṭheh, bese zetin an vuak, thi ziktein an tân ta ih an fehsan. 31 ^aCule puithiam pakhat cu cuih lamzin zawhin a vung feh ngelcel. Cu pa a hmuh tikah, khat lam kapin a hrial. 32 Cuvek ṭhiamṭhiamin cu tawk hmun ah Levi-mi pakhat a va thleng ve. Cu pa cu a va zoh ta ih, khat lam kapin a hrial ve. 33 ^bAsinan Samaria-mi pakhat cu khualtlawngin cu paih umnak hmun a va thleng. Cule cu pa a hmuh tikah, a parah lainatnak a nei. 34 A va pan ih a hriamhmapawl ah hriak le sabit zu a tawih hnuah, a tuamsak; amai ṭilva parah a toter ih, khualbûk ah a hruai. Cule a tuamhlawm. 35 A thaisun a fehsuah zawngah, dinari paisa pahnih a suah ih, khualbûk kiltu hnenah a pe. Cule a hnenah, ‘Hi pa hi run tuamhlawm awla, na cembêt mi zaten ka ra kirsal tikah ka lo rūlsal ding,’ tiah a ti. 36 Hite pathum lakah suamhmangpawl kut sungih a thlengtu paih innhnen cu zo bik hi a si ding tiah na ruat?” tiah a ti.

10:31^a Pui 21:1-3

10:33^b Mat 10:5

37 Cule Dānthiam pa cun, “A parih zahngainak neitu pa hi a si,” tiah a ti.

Cun Jesu in a hnenah, “Feh awla, cuti vekin va tuah ve aw,” tiah a ti.

Mary le Martha in Jesu an Bia ih an Rian

38 ^aCule hitin a si, Jesu cu a dungthluntupawl thawn khual an tlâwng vivo ih, khaw pakhat ah a lut. Martha ti mi nunaunu pakhat in Jesu cu a inn ah a cohlang. 39 ^bCu nu in Jesu-ih ke hramih to ve ih a kamsuakthu ngaithlatu, Mary ti mi naunu a nei. 40 ^cAsinan Martha cu ei le in tawlrelin a buai zet. Cule Jesu hnenah a feh ih, “Bawipa, ka naunu in keimah lawng ei le in tawlrel dingih i tŭn hi pawi na ti lo maw si? Curuangah i bawm dingin sim aw,” tiah a ti.

10:38^a Joh 11:1

10:39^b Joh 11:1

10:40^c Mar 4:38

41 ^aCule Jesu in a sawn ih a hnenah, “Martha, Martha, thil tampi thuhla ah dawnhar le thinbuaiin na um a si hi! 42 ^bA ṭul mi cu thil pakhat lawng a si, cuih thil ṭha cu Mary in a hril zo. Cumi cu a hnen ihsin lawnsak a si lo ding,” tiah a ti.

10:41^a Mat 6:25-34

10:42^b Sam 27:4; Joh 13:13

11

Zohṭhim ding Thlacam

1 Cule hitin a rak si, Jesu cu hmun pakhat ah thla a cam rero ih, a ṭheh tikah, a dungthluntupawl lakih pakhat in, “Bawipa, John in a dungthluntupawl a zirh vekin thlacamdān in zirh ve aw,” tiah a ti. 2 ^aCule Jesu in an hnenah, “Thla nan cam tikah, hitin cam uh:

11:2^a Mat 3:2

‘Vancung ih a um mi kan Pa,
Na hmin thianghlim seh.
Na uknak thleng hram seh.
Vancung ih na duhnak tuah a si bangin,
Leitlun khalah na duhnak tuah si hram seh.
3 Kan ni tin rawl ni tin in pe aw.
4 ^aKan parih leibatu kip kan ngaidam ruangah,
Kan sualpawl in ngaidam ve aw.
Cule sualfawrhnak ah in hruai loin,
Miṭha lo pa hnen ihsin in run sawn aw,’

11:4^a Mat 18:35; 26:41; Mar 11:25; Jam 1:13

tiah nan ti pei,” tiah a ti.

5 Cule Jesu in a dungthluntupawl hnenah, “Nan lakih mi pakhat in rualpi nei ta hnik sehla, cu pa cu zanṭim ah a rual pa hnenah feh tahratin, ‘Ka rual, sang hlăwm thum in i cawih hram aw; 6 ziangahtile ka rualpi pakhat a khualtlawnnak ihsin ka hnenah a ra thleng ih, zianghman pek ding ka nei lo,’ tiah a va ti.

7 “Cule anih in inn sung ihsin a sawn ih, ‘I tibuai hlah, sângka ka hrĕn zo ih, ka falepawl thawn kan it zo, thil lo pe dingin ka tho thei nawn lo,’ tiah a ti. 8 Nan hnenah ka lo sim, a rualpi a si ruangah thoin a pe lo ding. Asinan ningzak loih a dil hrat ruangah a tho ding ih, a ṭul zat in a pe ding.

Dil, Hawl, King

9 ^a“Cun nan hnenah ka lo sim, dil uhla, pek nan si ding; hawl uhla, nan hmu ding; king uhla, ăwnsak nan si ding. 10 ^bZiangahtile a diltu kip in an ngah, a hawltu cun a hmu ih, a kingtu cu sângka ăwnsak a si ding. 11 ^cNanmah lakah pa pakhat khat hnenah fapa in sang dil bang hnik sehla, lungto a pe pei maw? Asilole nga dil sehla, nga aiah rul a pe pei maw? 12 Asilole arti dil sehla, tlangkaikuang a pe pei maw? 13 ^dMiṭha lo si na cingin nannih in nan falepawl hnenah thilpek ṭha pawl pek nan thiam a si ahcun, van ih a um mi Pa cun amah diltupawl hnenah Thlarau Thianghlim cu ziang tlukin so a pek sinsin ding?” tiah a ti.

11:9^a Mat 7:7

11:10^b Mat 7:8

11:11^c Mat 7:9

11:13^d Mat 7:11

Jesu le Beelzabub

14 ^aCule Jesu in ṭawng thei lo mi khawsia pakhat a dawisuak. Cun hitin a rak si, khawsia a suah tikah, ṭawng thei lo pa cu a rak ṭawngsuak, cule mipi cu an mang a bang. 15 ^bAsinan mi hrekkhat in, “Khawsiapawlih lal Beelzabub thawngin khawsiapawl a dawisuak a si,” tiah an ti.

11:14^a Mat 9:32-33

11:15^b Mat 9:34; Mar 3:22

16 ^aMi dang pawl in hniksaknak ah, a hnen ihsin van in hminsinnak an duh. 17 ^bAsinan anih in an ruahnakpawl cu a thei ih, an hnenah, “Ziang ram khal ṭhenawih amah le amah a doawtu cu a siatrál ding. Cun innsang khal amah le amah a doawtu cu a tlu ding. 18 ^cSetan khal in amah le amah doawin a ṭhenaw asile, ziangtin so a uknak cu a dingsuak thei ding? Ziangruangahtile nannih in Beelzabub thawngin khawsiapawl a dawisuak in ti. 19 Beelzabub thawngin khawsiapawl ka dawisuak asile, nan fapalepawl in teh zo thawngin so an dawisuak? Curuangah anmah cu nan thuṭhentu an si ding. 20 ^dAsinan kei in Pathian kut zung hmangin khawsiapawl ka dawisuak asile, Pathian uknak cu nan hnenah a rung thleng zo taktak a si.

11:16^a Mat 12:38

11:17^b Mat 9:4

11:18^c Mat 4:10

11:20^d Suah 8:19; Mat 3:2

21 “Micak pa pakhat in hriamnâm thawi a inn a kilven laiah cun, a thilripawl cu an him a si. 22 Asinan amah hnakih caksawn mi pakhat in a ra do tikah, a ra neh ih a rinsan mi a ralthuam zaten a lawnsak. Cule a ralthillâkpawl cu a zemdarh ṭheh.

23 ^a“Ka lamih a ṭang lo tu cu i dotu a si ih, i fĭnkhawmpi lo tu cun a ṭhekdarh a si.

11:23^a Mat 12:30; Mar 9:40

24 “Mi pakhat sung ihsin thlarau bawrhhlawh a suah tikah, cuih khawsia cu cawlhnak hawlin ram car hmunpawl ah a vâk rero ih, a hmu lo. Cun anih in, ‘Ka suahsan mi inn ah ka kirsal ding,’ tiah a ti. 25 Cule a va feh ih, cuih inn cu phiahfai le ceimawiin a hmu. 26 ^aCun a feh ih, amah hnakih sualrálsawn a dang khawsia pasarih a va hruai, cule cuih hmun ah cun an lut ih an cêng. Cu paih dinhmun neta cu a hmaisa hnakin a siasawn,” tiah a ti.

11:26^a 2Pe 2:20

27 Cule hitin a si, cuih thilpawl Jesu in a sim rero laiah mipi lakin nunaunu pakhat a au ih, Jesu hnenah, “Nangmah vunnak pum le na fawh mi hnawi cu hualvanṭha a si,” tiah a ti.

28 ^aAsinan Jesu in, “A si lo, Pathian kamsuakthu a ngaithla ih a thluntupawl sawn hi mihualvanṭha an si,” tiah a ti.

11:28^a Thf 8:32; Joh 14:21; Heb 4:12

Hminsinnak an Hawl

29 ^aCule mipi pungkhawm an tam tuk tikah, Jesu in hitin thusim a thawk, “Tuih san minungpawl hi misualrál an si. Hminsinnak an duh. Sikhalsehla profet Jonah-ih hminsinnak siarlo hminsinnak dang pek an si lo ding. 30 Ziangahtile Jonah cu Nineveh khawmipawl hnenih hminsinnak a si vekin, Minung Fapa khal tuih san minungpawl hnenah hminsinnak a si ve ding. 31 ^bThlang lam siangpahrang bawinu khal thuṭhen ni ah tuih san minungpawl zawngah a tho ding ih, thiam lo a coh hai ding. Ziangahtile anih cu Solomon-ih fimnak ngai dingah leilung dĕng ihsin a ra. Ngai hnik uh, Solomon hnakih ropisawn hi tawkah hin a um a si. 32 ^cNineveh khawmipawl cu thuṭhen ni ah tuih san minungpawl zawngah an dīng ding ih, thiam lo an coh ding. Ziangahtile Jonah in thu a sim tikah an lung an thlĕng. Cule ngai hnik uh, Jonah hnakih ropisawn hi tawkah hin a um.

11:29^a Jon 1:17; Mat 12:38; 16:4

11:31^b 1Sp 10:1; 2San 9:1

11:32^c Jon 3:5

Taksaruangpumih Meito

33 ^a“Mi zohman in meito vâng tahratin a thupnak hmun ah le kho hnuaiah an ret dah lo. Cuhnakin a ra luttupawl in tleu an hmuh thei nak dingah, meito ṭhuam parah an ret sawn ṭheu a si. 34 Mit cu taksaruangpumih meito a si. Curuangah na mit a harhdam tikah, tleu in na taksaruangpum pumhlum a luahkhat ding. Asinan na mit in nat ṭha lo a neih tikah, thim in na taksaruangpum pumhlum a luahkhat ding. 35 Curuangah na sungih um tleu cu thim a silonak dingah fimkhur aw. 36 Na taksaruangpum pumhlum cu khui tawk hman thim loin, tleu in a luahkhat thluh asile, ziang hmuahhmuah cu a tleu a si. Cumi cu tleu a lo petu meito êng zet vek a si,” tiah a ti.

11:33^a Mat 5:15

Farasipawl le Dān Zirhtupawl Hmakhaw Pihnak

37 Thusim a ṭheh tikah, Farasi mi pakhat in Jesu cu rawl ei a sawm. Cule Jesu cu a feh ih rawl a hil. 38 ^aJesu cu zanriah a ei hlanih a hnimpilawk hmaisak ta lo kha, Farasi pa in a hmuh tikah a mang a bang.

11:38^a Mar 7:3-4

39 ^aCun Bawipa in a hnenah, “Atu-ah nannih Farasipawl cun no le khēng leng lam lawng nan khawlhfai ṭheu. Asinan nan sung lam cu mi thil lawn duhnak le sualralnak in a khat. 40 ^bNannih mi-âpawl! Leng lam a tuahtu in sung lam khal a tuah a si lo maw? 41 ^cAsinan nan neih mi thilpawl ihsin băwmnak thilpek pe uh. Cun ngai hnik uh, thil hmuahhmuah cu nan hrangah a fai a si.

11:39^a Mat 23:25-26; Mar 7:20-23

11:40^b 1Ko 15:36

11:41^c Apo 10:15

42 ^a“Asinan nannih Farasipawl nan hmakhua a pit a si! Ziangahtile ^bkuṭinan, remhmui le thlai phun zakip ah ṭhen hra ṭhen khat nan pe ko. Asinan diknak le Pathian duhdawtnak lăngter ding cu nan ngaihthah. Cupawl cu rak tuah zo ding nan mawi a si, a dangpawl khal kha tuah ṭhulh cuang loin.

11:42^a Dnp 6:5; Mik 6:8; Mat 23:23

11:42^b kuṭinan: Hmuan ih cīn mi a si ih a hnah cu rawl le in ding mi rimhmuiternak ih hman a si.

43 ^a“Nannih Farasipawl nan hmakhua a pit a si! Ziangahtile sinakok sungah tonak pawimawhbik bik le dawr hmunpawl ah upatnak pek nan duh. 44 ^bNannih midepde Dān zirhtupawl le Farasipawl, nan hmakhua a pit a si! Ziangahtile nannih cu a lang lo mi thlān vek nan si. A parih a fehtupawl in thlān a um le um lo an thei lo,” tiah a ti.

11:43^a Mat 23:6-7

11:44^b Mat 23:27

45 ^aCun Dānthiampawl lakih pakhat in Jesu cu a sawn ih, “Zirhtu pa, hi thilpawl na sim mi hin kannih khal in mawhthluk ve a si,” tiah a ti.

11:45^a Mat 22:35

46 ^aCule Jesu in, “Nannih Dānthiampawl, nan hmakhua a pit a si! Ziangahtile nannih cun phurh har zet mi, phurrit zetzet kha mi parah nan suang. Asinan nanmah cun nan kut zung pakhat te hmanin cuih phur cu nan thâm lo.

11:46^a Mat 23:4

47 “Nan hmakhua a pit a si! Ziangahtile nan pupápawl ih an rak thah mi profetpawl hrangah thlānpawl nan tuah. 48 ^aNan pupápawl ih tuah mi cu nan theihpi ih nan lungkimpi taktak. Ziangahtile annih in an rak that ih, nannih in an thlānpawl nan tuah. 49 ^bCuruangah Pathian fimnak khal in, ‘An hnenah profetpawl le apostolpawl ka run thlah ding. A hrekkhat cu an that ding ih, a hrekkhat cu an hrem ding,’ tiah a ti. 50 Curuangah leilung hramthăwk ihsin profetpawl hmuahhmuah ih thisen an suah mi, Abel thisen ihsin temple le biakṭheng karlakih an rak thah mi Zekariah thisen tiang, tuih san minungpawl hnenah hlam a si ding. 51 ^cThungaiin ka lo sim, cumi cu tuih san minungpawl hnenah hlam a si ding.

11:48^a Mat 23:29-32; Apo 7:51-53

11:49^b Mat 23:34; 1Ko 1:24, 30; Kol 2:3

11:51^c Sem 4:8; 2San 24:20-21; Mat 23:35-36

52 ^a“Nannih Dānthiampawl, nan hmakhua a pit a si! Ziangahtile theihnak tawhfung nan lahlo ih, nanmah ngai le nan lut fawn lo. A lut rero tupawl cu nan kham fawn si,” tiah a ti.

11:52^a Mat 23:13

53 Cuih thilpawl a sim hnuah, Dān zirhtupawl le Farasipawl in thinhengin Jesu thu-el an thawk. Thu tampi rel dingin nasa zetih fawrh an tum. 54 ^aJesu cu sual an puh thei nak dingah, a kâ ihsin a suak mi ṭawngkam ih awhdān ding an hawl ih, ṭha zetin an bawh ringring.

11:54^a Mat 12:10

12

Pathian Ṭih Aw, Minung Ṭih Hlah

1 ^aCuih cān ah, mipi thawng tampi an pungkhawm ih pakhat le pakhat an palaw cupco. Cule Jesu in a hmaisabikah a dungthluntupawl hnenah hitin thusim a thawk, “Farasipawlih thilnu hi va ralring uh, cumi cu depdetnak a si. 2 ^bZiangahtile phuanlăng leh lo dingih khuh mi zianghman a um lo ih, theih leh lo dingih thuh mi khal zianghman a um lo. 3 Curuangah thim lakih nan ṭawng mi pauhpauh kha tleu ah theih a si leh ding ih, pindan sungtabik ih hna kiang teih nan rak ṭawng thektho mi khal inn par ihsin phuan a si leh ding.

12:1^a Mat 16:6

12:2^b Mar 4:22

4 ^a“Cule ka lo sim a si, ruallenuh, taksaruangpum an thah hnuah, tuah thei mi dang a nei nawn lo tupawl kha va ṭih hlah uh. 5 ^bNan ṭih ding mi sawn cu zo a si ti ka lo hmuh ding: taksaruangpum a thah hnuah hell sungih mi hlăwn thei nak thuneihnak neitu kha ṭih uh. A si, ka lo sim a si, cu pa cu va ṭih uh! 6 Sunṭam panga kha ^cassarion pahnih ah an zuar a si lo maw? An lakih pakhat hman Pathian in a hngilh lo. 7 ^dCuhnakin nan lu parih sám phang hman a zaten siar thluh a si. Curuangah ṭih hlah uh, nannih cu sunṭam tampi hnakin nan man a khungsawn a si.

12:4^a Joh 15:14-15

12:5^b Heb 10:31

12:6^c assarion pahnih: Rom dar paisa a si ih, assarion pakhat dinari ṭhen 16 ih ṭhen khat tluk a si. Dinari khat cu ni khat hlawh a si.

12:7^d Mat 10:30; 12:12

8 “Ka lo sim a si, zokhal milai hmaiih i ṭantu cu Minung Fapa khal in Pathian-ih vancungmipawl hmaiah a ṭan ve ding. 9 ^aAsinan zokhal milai hmaiih i hnáwngtu cu, Pathian-ih vancungmipawl hmaiah hnawn a si ve ding. 10 ^bCule zokhal Minung Fapa dokalhih ṭawngkam khat a ṭawngtu cu ngaidam a si ding, asinan Thlarau Thianghlim a thangsiattu cu ngaidam a si lo ding.

12:9^a Mar 8:38; 2Ti 2:12

12:10^b Mat 8:20; 12:31-32; 1Joh 5:16

11 ^a“Cun sinakokpawl ah le uktupawl le thuneitupawl hmaiih an lo hruai tikah, mah le mah humawknak dingah ziangtin tiin le ziang ka ṭawng ding tiin le ziang ka rel ding tiin nan dawnhar hlah uh. 12 ^bZiangahtile Thlarau Thianghlim in nan ṭawng ding mi cu, cuih tikcu teah a lo zirh ding a si,” tiah a ti.

12:11^a Mat 10:17, 19

12:12^b Suah 4:12; Mat 10:20; Mar 13:11

Milian Mi-â Tahṭhimnak

13 Cun mipi lakih mi pakhat in Jesu hnenah, “Zirhtu pa, ro i zem ve dingin ka upa hi sim aw,” tiah a ti.

14 Cule Jesu in cu pa hnenah, “Milai pa, zo in nanmai karlakih thuṭhentu le ro ṭhentu dingah i ruat?” tiah a ti.

15 ^aCule Jesu in an hnenah, “Fimkhur uhla, duhhamnak ihsin nanmah le nanmah kilvengaw uh. Ziangahtile mi pakhat ih nunnak cu a thil tampi neih mi ah a telcih lo,” tiah a ti.

12:15^a Job 20:20; Sam 62:10

16 Cun Jesu in an hnenah hih tahṭhimnak hi a sim: “Milian pakhat paih ló in thlairah tampi a suah. 17 Cule cuih milian pa cun amah ten khua a ruat ih, ‘Ka thlairah retnak ding hmun ka neih lo ruangah, ziang ka tuah pei?’ tiah a ti. 18 Cule anih in, ‘Hitin ka tuah ding, ka thlairah khawlnak innpawl ka băl pei ih, tumdeuhin ka sak pei. Cu tawkah cun ka thlairah le ka thilri zaten ka ret ding. 19 Cule ka thlarau hnenah, “Maw ka thlarau, nang cun kum tampi hrang daih thilri tampi na khawl zo, cawl huahhi men awla, in le ei in nuam zetin nung aw,” ka ti ding,’ tiah a ti.

20 ^a“Asinan Pathian in a hnenah, ‘Mi-â pa! Tuihzan roriah na thlarau cu lâksak na si ding. Cule nangmah hrangih na rak khawl mi thilpawl hi zo in a co ding?’ tiah a ti.

12:20^a Job 27:8; Sam 39:6; Jer 17:11

21 “Cuti vekin mai hrang lawngah hlawnthil khawl ih, Pathian lamih lian lo tu cu, cu pa vek an si,” tiah a ti.

Nan Dawnhar Hlah Uh

22 Cun Jesu in a dungthluntupawl hnenah, “Curuangah nan hnenah ka lo sim, nan nunnak thu ah, ‘Ziang kan ei ding,’ tiah dawnhar hlah uh. Nan taksaruangpum thu ah, ‘Ziang kan hruh ding,’ ti khal dawnhar hlah uh. 23 Rawl hnakin nunnak a thupisawn ih, hnipuan hnakin taksaruangpum a thupisawn. 24 ^aTlangâkpawl khi ruat hnik uh, ziangahtile thlaici an tuh lo ih an at fawn lo, thilri retnak inn le thlairawl retnak inn khal an nei lo. Asinan Pathian in a câwm hai. Nannih cu cuih vatepawl hnakin a let tampi in nan man a khungsawn a si lo maw? 25 Nanmah lakah dawnharnak ruangin zo in so amai dam sung ni dawng khat a bêt thei? 26 Cuti vek thil fate men hman nan tuah thei lo asile, ziangah so thil dangdang hrangah nan dăwn a har?

12:24^a Job 38:41; Sam 147:9

27 ^a“Lily parpawl tla khi ziangtin an ṭhang ti ruat hnik uh: hna an ṭuan lo, pat khal an hnûk lo. Sikhalsehla ka lo sim a si, Solomon rori hman a ropitnak hmuahhmuah ih a thăwmawk lai hmanah hi lily parpawl lakih pakhat te hman a tluk lo. 28 ^bMaw nannih zumnak mál pawl, tuihsun ah ramlak ah a um ih, thaisun ah thŭk sungih an paih mi hrampi hman Pathian in cu tlukih a thăwm asile, nannih cu nasa sinsinin a lo thuam lo ding maw? 29 Ziang nan ei ding ih ziang nan in ding ti hawl hlah uh, cuih thu ah dawnharin um fawn hlah uh. 30 ^cZiangahtile leitlun miphunpawl in cuih thil hmuahhmuah cu an hawl ih, nan Pa in cuih thilpawl nan ṭul ti a thei. 31 ^dPathian uknak hawl sawn uhla, cuih thil hmuahhmuah cu pekbêt nan si ding.

12:27^a 1Sp 10:4-7

12:28^b Mat 6:30

12:30^c Mat 6:8

12:31^d Mat 3:2; 19:29

32 ^a“Tuu run fate tla, ṭih hlah uh, ziangahtile nan hnenih lalram lo pek cu nan Paih lunghmui zawng a si.

12:32^a Mat 14:27; 25:34

Van ih Hlawnthil Khawl

33 ^a“Nan neih mipawl zuar uhla, miretheipawl hnenah băwmnak thilpek pe uh, a hlun thei lo mi paisa bawm nanmah hrangah tuah uh. Nan hlawnthil cu cemrál thei lo nak hmun, fifirpawl thlen thei lo nak hmun le tlap ih a siatsuah thei lo nak hmun van ah ret uh. 34 ^bZiangahtile nan hlawnthil umnak hmun ah nan thinlung khal a um ve ding.

12:33^a Mat 6:20; Apo 2:45; Jam 5:2

12:34^b Mat 6:21

35 “Hnaṭuan dingih tiar cia bangin nan tai khap uhla, nan meitopawl alhter ringring uh. 36 An pu cu nupi ṭhitnak puai ihsin a ra tlung ih, sângka a king tikah áwng lohli dingih a hngaktupawl vekin um uh. 37 ^aAn pu a rat tikah rak hngak ringring ih a hmuh mi siahhlawhpawl cu mithlawsuak an si. Thungaiin ka lo sim, anih cu a tai a khap ding ih, rawl ei dingin a toter hai hnuah amah rori a ra ding ih, rawl a pe hai ding. 38 Zan sentari kil ṭum hnihnak ah simaw, ^bṭum thumnak ah simaw, an pu rat hngak ringring ih a hmuaktu siahhlawhpawl cu mithlawsuak an si. 39 ^cAsinan hihi thei uh, intêk pa in fifir rat ding cān kha rak thei sehla cu, a ralring ding ih fifir cu a inn sungah a lutter lo ding. 40 ^dCuruangah nannih khal tiar ringring uh, ziangahtile nan rin lo cān ah Minung Fapa cu a ra ding a si,” tiah a ti.

12:37^a Mat 20:28; 24:42, 46

12:38^b ṭum thumnak: Cucu zanṭim ihsin zing lam nazi 3 tiang a si.

12:39^c Mat 6:19; 1Th 5:2; 2Pe 3:10; Thu 3:3

12:40^d Mar 13:33

Siahhlawh Rinum le Siahhlawh Ṭha Lo

41 Cun Peter in a hnenah, “Bawipa, hi tahṭhimnak hi kanmah vial lawng maw in sim, asilole mi hmuahhmuah so?” tiah a sut.

42 Cule Bawipa in, “A tikcu teih an co ding mi rawl petu ding, a sungkaw siahhlawhpawl hotu dingih a pu ih a ret ding mi thilri kilkhawitu rinum le fim cu zo so a si? 43 A pu a rat tikih a ṭuan ding mi hnaṭuan rero ih a hmuh mi siahhlawh cu, mithlawsuak a si. 44 Thungaiin ka lo sim, cuih siahhlawh pa cu a pu in a thilri neih mi hmuahhmuah tlunih hotu ah a ret ding. 45 Asinan cuih siahhlawh cun a thinlung tein, ‘Ka pu cu a ra cing lo ding,’ tiah a ti. Cule hnenum dang pawl mipa siseh, nunau siseh vuak a thawk ih, in le ei le ri-in a um. 46 Cuih siahhlawh paih pu cu a rin lo ni le a theih lo cān ah a ra ding ih, a siahhlawh pa cu tan hnih ah a sattán ding, cule zumlotupawl ih co vek a coter ding.

47 ^a“Cule a pu-ih duh zawng a thei ko naih, rak timlamaw lo le a pu-ih duh zawng a tuah lo tu siahhlawh cu vei tampi vuak a si ding. 48 ^bAsinan thei lo piin vuak tlak mi thilpawl a tuahtu cu málte lawng vuak a si ding. Ziangahtile zokhal tampi pek a si mi pa cu tampi dil a si ding ih, tampi kilter mi pa cu tampi an dil ding.

12:47^a Dnp 25:2

12:48^b Pui 5:17; Mip 15:27-30

Khrih in Ṭhenṭhêkawknak a Run Keng

49 “Leitlun ah meisa thla dingin ka ra, rak alh thawk zo sehla ka va duh tak ve! 50 ^aBaptisma co ding mi pakhat ka nei, cumi tifel a si hlan sung cu ka van a sâng tuk! 51 Leitlun ah remnak thlen dingih ra ah in ruat maw? Ka lo sim a si, a si lamlam lo, ṭhenawknak thlen dingah a si sawn. 52 Ziangahtile tuihsi thawkin inn pakhat ih um minung panga cu an ṭhenaw ding: pathum in pahnih an dokalh ding ih, pahnih in pathum an dokalh ding.

12:50^a Mar 10:38; Joh 19:30

53 ^a“Pa in a fapa a do ding ih, fapa in a pa a do ding.
Nu in a fanu a do ding ih, fanu in a nu a do ding.
Ni in a mo a do ding ih, mo in a ni a do ding,” tiah a ti.

12:53^a Mik 7:6; Mat 10:21

Tikcucān Theihthiam

54 ^aCun Jesu in mipi hnenah, “Nitlaknak lam ihsin khawdur a rat nan hmuh tikah, ‘Ruah a sur ding,’ tiah nan ti lohli. Cule a sur ngaingai. 55 Cule thlang lam ihsin thli a hung hran nan hmuh tikah, ‘Ni a sa ding,’ nan ti ih a sa ngaingai. 56 ^bNannih midepdepawl! Nannih in lei le van lăngdan cu nan theithiam, asinan ziangtin so tuih cān hi nan theihthiam lo?

12:54^a Mat 16:2

12:56^b Mat 16:3

Na Ral thawn Remnak Tuah Aw

57 “A si, ziangah so nanmah rori in a dik mi cu thu nan ṭhen mai lo? 58 ^aNa ral pa thawn thuṭhentu hnenih na feh laiah, na ti theipatawp suahin lamlak ah amah thawi remawk zuam aw. Cu lo asile na ral pa in thuṭhentu hmaiah a lo dir ding ih, thuṭhentu in a kut hnuai bawi hnenah a lo thlen pang ding. Cule anih in thawnginn sungah a lo khum ding. 59 ^bKa lo sim a si, ^clepton tiang na pek ṭheh thluh lai hlanlo, cu tawk ihsin ziangti lam khalin na suak lo ding,” tiah a ti.

12:58^a Mat 5:25

12:59^b Mat 5:26; Mar 12:42

12:59^c lepton: Grik ṭawng a si ih paisa man malbik a si.

13

Khrih in Lungthlĕng Thu a Zirh

1 ^aCu laiah Galili-mipawl in raithawinak an hlăn laiah, Pilat in a that hai tiih Jesu hnenih simtu mi hrekkhat an rak um. 2 ^bCule Jesu in a sawn hai ih an hnenah, “Cuih Galili-mipawl in cuvek thilpawl an tuar ruangah, a dang Galili-mi hmuahhmuah hnakin an sual sawn tiah nan ruat maw? 3 Ka lo sim a si, an sual sawn cuang lamlam lo; cuhnakin nannih khal nan lung nan thlĕng lo asile, cuti vekin nan zaten nan hloral thluh ding. 4 ^cAsilole Siloam ih dawlsâng in minung hleiriat a nĕn ih an thi, cupawl cu Jerusalem ih a um mi hmuahhmuah hnakin an sual sawn a si tiah nan ruat maw? 5 ^dKa lo sim a si, an sual sawn cuang lamlam lo; cuhnakin nannih khal nan lung nan thlĕng lo asile, cuti vekin nan zaten nan hloral thluh ding,” tiah a ti.

13:1^a Mat 27:2

13:2^b Joh 9:2-3

13:4^c Joh 9:7, 11

13:5^d Mat 3:2; Apo 2:38

A Rah lo Mi Theipi Kung

6 ^aJesu in an hnenah hi tahṭhimnak khal a sim, “Mi pakhat in a sabit hmuan sungah theipi kung pakhat a phun. Cuih theipi kung lamah cun a va feh ih a parah a rah a hawl. Cule a rah zianghman a hmu lo. 7 ^bCu tikah anih in a hmuan kiltu pa hnenah, ‘Zoh hnik, kum thum sung rori hih theipi kung ah a rah ka hawl ih, zianghman ka hmu lo. Hau men aw, ziangah so anih cun leiram a luah lak men?’ tiah a ti.

13:6^a Isa 5:2; Jer 8:13; Mat 21:19

13:7^b Mat 3:10

8 “Cule hmuan kiltu pa in a sawn ih a hnenah, ‘Bawipa, tuih kum te cu zuah hrih ko aw. A kimvelin ka lai ding ih, êk dâwm ka burh hrih ding. 9 Rah a rah khal a si men thei sokhaw. Asinan rah a rah lo thotho asile, nehhnuah na hau leh ding,’ tiin,” a ti.

Jesu in Kebái Nu a Damter

10 ^aSabbath ni ah sinakok pakhat ah Jesu cu thu a zirh rero. 11 Cule ngai hnik, nunau pakhat kum hleiriat sung ṭawnṭaihnak thlarau in a ngawrter mi a um. Cu nu cu a êl a kûn ih, dĭngten a um thei hrimhrim lo. 12 Jesu in cu nu a hmuh tikah, a hnenah a ko ih, “Nunau, na natnak ihsin thlah na si,” tiah a ti. 13 ^bCule cu nu parah a kut a suang ih hmakhatteah cu nu cu dĭngten a um thei ih, Pathian a thangṭhat.

13:10^a Mat 4:23

13:13^b Mar 5:23

14 ^aJesu in Sabbath ni ah mi a damter ruangah sinakok uktu pa cu a ai a thawk ih, mipi hnenah, “Minung hrangah hnaṭuannak ding ni ruk a um; curuangah cumi sungah ra uhla, damawter uh, Sabbath ni ah cun si hlah seh,” tiah a sawn.

13:14^a Suah 20:9; Mat 12:2; Mar 5:22

15 Cu tikah Bawipa in a sawn ih a hnenah, “Nang, midepde! Nan zate in Sabbath ni ah nan caw cang le nan lāk pawl an rawl einak hmun ihsin phawih in, tidai pe dingin nan hruai ciar a si lo maw? 16 ^aCule ngai hnik uh, Abraham-ih tesinfa hih nunaunu cu Setan in kum hleiriat sung a ṭawnhrem a si. Sabbath ni ah cu nu cu cuih ṭemṭawnnak ihsin phawihsak a si lo ding maw?” tiah a ti.

13:16^a Mat 4:10

17 ^aCule hi thilpawl a sim ṭheh tikah, amah dotu hmuahhmuah cu an ning a zak. Cule mipi zaten thil ropi a tuah mi hmuahhmuah ruangah lungawi aipuangin an um.

13:17^a Isa 66:5

Anṭam Ci Tahṭhimnak

18 ^aCun Jesu in, “Pathian uknak cu ziang thawn a bangaw? Ziang thawn ka khaikhin ding? 19 ^bMi pakhat in la tahratin a hmuan ih a vawrh mi anṭam ci pakhat thawn a bangaw a si. Cuih ci cu a ṭhang ih, kung tumpi ah a cang, cule a hngeṭêkpawl ah tlun zuang vatepawl an riak,” tiah a ti.

13:18^a Mat 3:2; 13:24

13:19^b Mat 13:32

Thilnu Tahṭhimnak

20 Cule Jesu in a simsal ih, “Pathian uknak cu ziang thawn ka khaikhin pei? 21 ^aPathian uknak cu nunau pakhat in thilnu la tahratin sangphŭt ^bsaton thum sungah phum ih, sangphŭt hmuahhmuah thotertu thilnu vek a si,” tiah a ti.

13:21^a 1Ko 5:6

13:21^b saton: Grik ṭawng a si ih, saton pakhat cu no 28 hrawng a si.

A Fiak Mi Kăwtka

22 Cule Jesu cu Jerusalem lam panih a feh phahah khawpipawl le khawtepawl a pál ih thu a zirh vivo. 23 Cun mi pakhat in a hnenah, “Bawipa, mi málte lawng maw rundam an si ding?” tiah a sut.

24 ^aCu tikah Jesu in an hnenah, “A fiak mi kăwtka ihsin luh ding zuam uh, ziangahtile ka lo sim a si, mi tampi in lut dingin an hawl ding nân, an lut thei lo ding. 25 ^bIntêk pa cu vei khat a tho ih, sângka a khar hnuah, nannih cun leng lamih dīn le kĭng nan thawk ding ih, ‘Bawipa, Bawipa, sângka in rak ăwn aw,’ tiah nan ti ding.

13:24^a Mat 7:13

13:25^b Mat 7:23

Cule anih in nan hnenah, ‘Khui lam ihsi ra so nan si ti ka lo thei lo,’ tiah a lo let ding.

26 “Cu tikah nannih in, ‘Na hnenah kan ei ih, kan in zo, nang in kan kăwtthler ah in rak zirh,’ tiah ti nan thawk ding.

27 ^a“Asinan anih in, ‘Ka lo sim a si, khui lam mi nan si ti ka lo thei hai lo. Nannih ṭhatlonak a tuahtupawl hmuahhmuah ka hnen ihsin tlân uh,’ tiah a lo ti ding.

13:27^a Mat 7:23

28 ^a“Nannih cu a lengah hlăwnhlo nan si ding ih, Abraham, Isak, Jakob le profetpawl hmuahhmuah Pathian uknak sungih an um kha nan hmuh tikah, ṭah le hacâng rialnak a um ding. 29 ^bCule nisuahnak lam le nitlaknak lam, sak lam le thlang lam ihsin mi an ra ding ih, Pathian uknak ah an to ding. 30 ^cCule ngai hnik uh, mi hrekkhat a netabik pawl kha a hmaisabikih cang ding le a hmaisabik pawl kha a netabikih cang ding an um,” tiah a ti.

13:28^a Mat 8:12

13:29^b Mat 8:11

13:30^c Mat 19:30

Jesu in Jerusalem a Ṭah

31 ^aCuih ni ah Farasi hrekkhat Jesu hnenah an ra ih, “Hi tawk ihsin fehhlo aw, ziangahtile ^bHerod in lo thah a duh, hi tawk hmun hi suahsan aw,” tiah an ti.

13:31^a Mat 14:1

13:31^b Herod: Nauhakpawl thattu Herod-ih fapa Herod Anṭipas a si.

32 ^aCule Jesu in an hnenah, “Va feh uhla, khaih sihál kha va sim uh, ‘Ngai hnik, tuihsun le thaisun cu khawsiapawl ka dawisuak ding ih, minapawl ka damter lai ding, cule a ni thumnak ah ka hnaṭuan cu ka ṭhehfel ding a ti,’ tiah va sim uh. 33 ^bSikhalsehla tuihsun, thaisun le tipsun cu ka feh vivo lai ding; ziangahtile Jerusalem khaw lengih profet thih ding cu thil cang thei a si lo.

13:32^a Heb 2:10

13:33^b Mat 21:11

34 ^a“Maw Jerusalem, Jerusalem, profetpawl na that ih, na hnenih Pathian in a thlah mipawl cu lungto in na dengthat! Arpi in a fātepawl a thla hnuaiih a ăwp vekin, na falepawl cu vei ziang zat meng so lo khawmsak ka rak tum, asinan nan rak duh lo! 35 ^bNgai hnik uh! Nan inn cu ṭhing reprepin tansăn a si. Thungaiin ka lo sim,

13:34^a Mat 23:37

13:35^b Sam 118:26; Jer 12:17

‘Bawipaih hmin ih ra cu thangṭhatin um seh,’

tiih nan ti lai hlanlo in hmu nawn hrimhrim lo ding,” tiah a ti.

14

Jesu in Mithling pa a Damter

1 ^aCun hitin a si, Sabbath ni ah Jesu cu Farasipawl lakih mipawimawh pakhat ih inn ah rawl ei dingin a feh. Cule Dānthiampawl le Farasipawl cun Jesu cu an thlingthla. 2 Cule ngai hnik, mithling pa pakhat cu Jesu hmaiah a rak um. 3 ^bCule Jesu in Dānthiampawl le Farasipawl hnenah, “Sabbath ni ih mi tidam ding Dān in a siang maw?” tiah a sut hai.

14:1^a Mat 12:10

14:3^b Mat 22:35

4 Asinan cupawl cu daiten an rak um. Cule cu pa cu a vun kai ih a damter hnuah a fehter. 5 Cun Jesu in an hnenah, “Nanmai lakah nan lāk simaw, nan caw cang simaw Sabbath ni ah khur sungah tla sehla, a suah lohli lo tu ding nan um maw?” tiah a let hai. 6 Cule cuih thu ah zianghman an sawn thei lo.

Hmun Niambik La Uh

7 Sawm mipawl in tonak ṭhabik bik an hril ti Jesu in a hmuh tikah, an hnenah hi tahṭhimnak hi a sim: 8 “Mi pakhat khat in mo lăwmnak puai ih a lo sawm tikah, tonak ṭhabik ah va to hlah uh, culole nangmah hnakih mithupisawn a rak sawm pang ding. 9 Nan pahnih a lo sawmtu intêk pa khan na hnenah ra tahratin, ‘Hi pa hi na tonak rak kian aw,’ a lo ti asile, a niambik tonak ah ningzak zetin na ṭhawn leh ding. 10 Asinan an lo sawm tikah, feh awla, tonak niambik ah to aw. Cutiih na um asile, nangmah a lo sawmtu pa a rat tikah, ‘Ka rual, tonak ṭhadeuh ah hung to aw,’ tiah a lo ti ding. Cun nangmah cabuai a lo hilpitupawl hmaiah upatnak na co ding. 11 ^aZiangahtile zokhal amah le amah a khaisângawtu cu niamter a si ding ih, amah le amah hnuai a dawrtu cu khaisan a si ding,” tiah a ti.

14:11^a Mat 23:12

12 Cun Jesu in amah sawmtu pa hnen khalah cun, “Thaithawh siseh, zanriah siseh na do tikah, na rualpipawl, na unaupawl, na sungkhatpawl, na innhnen milianpawl kha va sawm hlah. Cu lo asile annih khal in an lo sawm leh sal ve ding ih, an lo rul leh ding. 13 Asinan rawl ei puai na tuah tikah, mifarahpawl, taksa kim lo pawl, kebáipawl le mitcawpawl kha va sawm hai aw. 14 ^aAnnih cun an lo rulhsal thei lo ding ruangah, nang cu mithlawsuak na si, ziangahtile midingfelpawl an thawhsal tikah nang cu rulhsal na si leh ding,” tiah a ti.

14:14^a Apo 24:15

Mo Puai Tahṭhimnak

15 ^aCuih thu cu amah cabuai hilpitupawl lakih mi pakhat in a theih tikah, Jesu hnenah, “Pathian uknak sungih rawl eitu ding cu mithlawsuak a si,” tiah a ti.

14:15^a Isa 25:6; Mat 3:2; 26:29; Thu 19:9

16 Cun Jesu in cu pa hnenah, “Mi pakhat in zanriah ropi a timtuah ih, mi tampi a rak sawm. 17 Zanriah ei a cût tikah a sawm cia mipawl hnenah, ‘Ra thlang uh, thil ziangkim tiar cia thluh a si zo,’ tiih sim dingin a siahhlawh a hei thlah.

18 “Asinan an zaten lungkhat pu-in puhmawh ding tuah an thawk. A pakhatnak in a hnenah, ‘Ló ka rak lei ih, va feh ih ka va zoh a ṭul, i ngaithiam dingin ka lo dil a si,’ tiah a ti. 19 Cule a dang pakhat in, ‘Caw cang hâl nga ka rak lei ih, cupawl hniksak dingah ka feh ta ding, i ngaithiam dingin ka lo dil a si,’ tiah a ti. 20 A dang pakhat in, ‘Nupi ka rak ṭhi ih, curuangah ka ra thei lo ding,’ tiah a ti.

21 “Cuih siahhlawh cu a kir ih, cuih thilpawl cu a bawipa hnenah a sim. Cu tikah intêk pa cu a thin a heng ih a siahhlawh hnenah, ‘Zamrang zetin khaw sungih kăwtthler ah le innlak zinpawl ah va feh awla, mifarahpawl, taksa kim lo pawl, kebáipawl le mitcawpawl cu hi tawkah rak hruai hai aw,’ tiah a fial.

22 “Cule cuih siahhlawh cun, ‘Bawipa na thupek vekin ka tuah ṭheh zo, asinan hmun lawng a um hrih lai,’ tiah a ti.

23 “Cun a bawipa in a siahhlawh hnenah, ‘Khaw leng zinpi le ló zinpawl ah va feh awla, ka inn a khah thei nak dingah hramhramin mi ratter aw. 24 ^aZiangahtile ka lo sim a si, ka rak sawm cia mipawl pakhat hmanin ka zanriah an tep lo ding,’ a ti,” tiah a sim.

14:24^a Mat 21:43; Apo 13:46

Khrih Thlun dingih Ziangkim Tān

25 Mipi tampi in Jesu an thlun rero laiah, an lamah Jesu cu a her ih an hnenah, 26 ^a“Zokhal ka hnenih ra cun a nu le a pa, a nupi le a fātepawl, a unaupawl le a farnulepawl, a si, amai nunnak khal a huat lo a si ahcun, ka dungthluntu a si thei lo ding. 27 ^bCule zokhal amai khraws pu lo ih, i thluntu cu ka dungthluntu a si thei lo ding.

14:26^a Mat 10:37; Joh 12:25

14:27^b Mat 10:38

28 “Ziangahtile nanmah lakah pakhat khat in dawlsâng sak a duh asile, a hmaisabikah to tain, cumi sak ṭheh nak dingah a daih a nei maw nei lo, tiin a man a tuak ta a si lo maw? 29 Cutiih a tuah lo asile, lungphum a phum hnuah, a sak ṭheh thei lo ding. Cule a hmutu zate in cu pa cu hmuhsuam an thawk ding ih, 30 ‘Hi pa hin dawlsâng dawl a thawk ve nân, a ṭheh thei lo a si hi!’ tiah an ti ding.

31 “Asilole siangpahrang pakhat cu a dang siangpahrang do a tum asile, minung 20000 thawn amah do dingih ra, siangpahrang cu minung 10000 thawn a rak do thei ding le thei lo ding to hmaisa ih ruat ta loin a um ding maw? 32 A do thei lo asile, cuih siangpahrang cu hlapi ih a um laiah remawknak dil dingah palai a thlah ding a si. 33 ^aCuti vek thothoin, zokhal nan lakah a neih mi zate a tān ta lo tu cu ka dungthluntu a si thei lo ding.

14:33^a Fil 3:7-8

Cite

34 ^a“Cite cu a ṭha, asinan cite in a alnak hloh ta hnik sehla, ziangtin so a alsal thei ding? 35 ^bLeiram hrangah siseh, êk dâwm hrangah siseh a ṭha lo, mi in an hlăwn men a si. Theihnak hna a neitu cun thei seh!” tiah Jesu in a ti.

14:34^a Mar 9:50

14:35^b Mat 5:13; 11:15

15

A Hlo Mi Tuu Tahṭhimnak

1 Siah khawngtupawl hmuahhmuah le misualpawl cu a thu ngaithla dingin Jesu kiangah an ra. 2 ^aCule Farasipawl le Dān zirhtupawl cu an phunzai ruri ih, “Hi pa hin misualpawl a cohlang ih an hnenah rawl a ei a si,” tiah an ti.

15:2^a Mat 9:11

3 ^aCule Jesu in an hnenah hi tahṭhimnak thu hi a sim: 4 ^b“Nanmah lakah mi pakhat in tuu 100 a nei ih, cumi lakih pakhat cu hlo bang sehla, tuu 99 pawl cu ramṭhing ah tân tain a feh ding ih, a hlo mi tuu pakhat cu a hmuh lai hlanlo a hawl lo ding maw? 5 A hmuh tikah, lungawi aipuang zetin a liang parah a suang. 6 Cule a inn a va thlen tikah, a rualpipawl le a innhnenpawl kokhawm tahratin an hnenah, ‘I aipuanpi uh, ziangahtile a hlo mi ka tuu ka hmu zo,’ tiah a ti. 7 ^cNan hnenah ka lo sim, cuti vekin lungthlĕng a ṭul lo mi, midingfel 99 hnakin, lung a thlĕng mi misual pakhat parah van ah aipuannak a tamsawn ding a si.

15:3^a Mat 13:3

15:4^b Sam 23:1; Jer 31:10; Eze 34:11-16

15:7^c Mat 21:29

A Hlo Mi Darakma Tahṭhimnak

8 “Cun nunau pakhat in ^adarakma pahra neiin pakhat hloter sehla, meito vâng tahratin a inn a phiat ding ih, a hmuhsal hlanlo ngunngaih zetin a hawl lo ding maw? 9 Cule a hmuh tikah, a rualpipawl le a innhnenpawl a kokhawm ih, ‘I aipuanpi uh, ziangahtile ka hlohter mi darakma kha ka hmusal zo a si,’ tiah a ti. 10 Nan hnenah ka lo sim, cuti vek thothoin, lung a thlĕngtu misual pakhat ruangah Pathian-ih vancungmipawl umnak ah aipuannak a um a si,” tiah a ti.

15:8^a darakma: Grik paisa a si ih, dinari pakhat thawn a tlukaw. Cucu ni khat hlawh tluk a si.

Fapa Tlanhlo Tahṭhimnak

11 ^aCun Jesu in hitin a sim, “Mi pakhat in fapa pahnih a nei. 12 ^bA nautadeuh in a pa hnenah, ‘Ka pa ka co ding mi rothilpawl kha i pe aw,’ tiah a ti. Cule a pa cun a rothil hmuahhmuah cu a ṭhen ih a fapa pahnih te cu a zem hai.

15:11^a Mat 21:28

15:12^b Dnp 21:17

13 “Cule ni rei lo teah, a fapa nautasawn cun a thilri neih mi zaten a khawm ih, ram hlapi ah a feh. A lennak cu cu tawk ram ah a duh duhin a hmangrál ṭheh. 14 A neih mi zate a hman ṭheh hnuah, cuih ram ah mangṭam nasa zet a tlung ih tlaksam a thawk. 15 ^aCun cui ram mi, mi pakhat hnenah a hnaṭuansak dingah a feh ih, cu pa cun a ló ah văwk rawl petu dingah a hei kuat. 16 Cule văwk ih an ei mi rawl thawi a pum puarter a câk, asinan zohman in amah cu zianghman an pe lo.

15:15^a Pui 11:7

17 “A hun theihfiangawk tikah, ‘Ka pa ih sān mi hlawhfa tampi cun ei cawk loin rawl an nei, hi tawkah kei cu rilrawngin ka thi ding! 18 ^aKa tho pei ih ka pa hnenah ka feh ding. Cule a hnenah, “Ka pa, kei cu van lakah le na hmaiah ka sual zo. 19 Na fapa tiih kawh ding khalah ka tlak nawn lo. Na sān mi hlawhfapawl lakih pakhat vekin i tuah aw,” tiah ka va ti pei,’ tin a ruat.

15:18^a Pui 26:40; Mat 3:2

20 ^a“Cule a tho ih a pa hnenah cun a feh. Asinan lam hlapi ih a rat rero lai kha a pa in a hei hmuh tikah, a lainat tuk ih a va tlân. A fapaih hngawng in a pawm ih a hnam. 21 ^bCule a fapa in a hnenah, ‘Ka pa, van lakah le na mithmuh ah ka sual zo, na fapa tiih kawh ding ka tlak nawn lo,’ tiah a ti.

15:20^a Sem 45:14-15; Apo 20:37

15:21^b Sam 51:4

22 ^a“Asinan a pa in a siahhlawhpawl hnenah, ‘Kâwrfual ṭhabik rak keng uhla, hrukter uh. Zunghruk hrukter uhla, kedam bunter uh. 23 Cule cawm thau mi caw no kha rak hruai uhla, that uh. Cule kan ei ding ih, kan nuamaw ding. 24 ^bZiangahtile hi ka fapa cu a thi zo nân, a nungsal. A hlo zo nân, atu ka hmusal zo,’ tiah a ti. Cule năwmawknak tuah an thawk.

15:22^a Sem 41:42; Zek 3:4; Thu 6:11

15:24^b Efe 2:1, 5; 1Ti 5:6

25 ^a“A fapa upasawn cu ló ah a rak um. Ló ihsin a ra tlung ih, inn kiang a thlen tikah, awnmawi thawmvâng le lam thawmvâng a thei. 26 Cu tikah hnenumpawl lakih pakhat a ko ih, ‘Ziang thil so thleng?’ tiah a sut. 27 Cule cuih siahhlawh cun a hnenah, ‘Na naupa a ra tlungsal zo, damte le himtei a ra thlensal thei ruangah, na pa in cawm thau mi caw pa no a thah,’ tiah a sim.

15:25^a Sam 69:4

28 ^a“Fapa upasawn cu a thin a heng tuk ih, inn sungah a lut duh lo. Curuangah a pa cu lengah a va suak ih, amah cu a va lēm. 29 Cule anih in a sawn ih a pa hnenah, ‘Ngai hnik, kum hiti zat ka lo rian ih, na thupek mi vei khat hman ka pahbăl dah lo. Asinan ka rualpipawl thawi kan năwmawk ve nak dingah me pa note pakhat khal i rak pe dah lo. 30 ^bAsinan hlawhhlangpawl thawn kawmawin, na rothilpawl thehral thluh tu hi na fapa a ra tlunkir veten, cawm thau mi caw no na thahsak hi!’ tiah a ti.

15:28^a Jon 4:1

15:30^b Thf 29:3

31 “Cule a pa in a hnenah, ‘Ka fapa, nang cu ka hnenah na um ringring ih ka neih mi hmuahhmuah hi nangmai ta a si. 32 ^aNa naupa cu a thi ih a nungsal; a hlo ih, hmuhsal a si. Curuangah lungawiih năwmawknak tuah hi a dik hrimhrim a si,’ a ti,” tiah a ti.

15:32^a Mal 3:17

16

Thilri Kilkhawitu dik lo Tahṭhimnak

1 Jesu thotho in a dungthluntupawl hnenah, “Milian pakhat in thilri kilkhawitu pakhat a nei ih, cuih thilri kilkhawitu cun na thilri a thehral men a si tiah cuih milian pa hnenah an hêk. 2 Cule a thilri kilkhawitu cu a ko ih a hnenah, ‘Na thuhla ka theih mi hi ziangtin a si? Thilri kilkhawitu na si thei nawn lo ding ruangah, na thilri kilkhawinak cazin i pe aw,’ tiah a ti.

3 “Cun thilri kilkhawitu cun a thinlung sungin, ‘Ka bawipa in ka hnaṭuan ihsin i bānter ding ruangah, ziang ka tuah pei? Leilung ka lai thei si lo, kutdawh ding le ka ning a zak fawn. 4 Thilri kilkhawitu sinak ihsin bānter ka si tikah, an innpawl ih in cohlan thei nak dingah ziang ka tuah pei ti ka thei,’ tiah a ti.

5 “Cule a bawipa hnenih leiba neitu zaten a hnenah a kokhawm hai ih, a pakhatnak pa hnenah, ‘Ka bawipa hnenah ziang zat leiba na nei?’ tiah a sut. 6 Cule cu pa in, ‘Hriak ^abath 100,’ tiah a ti. Thilri kilkhawitu pa in, ‘Na leiba cazin cu rak kengin rung to awla, 50 tiin ngan zâng aw,’ tiah a ti.

16:6^a bath: Grik ṭawng a si ih bath khat ah kalān 8 hrawng a si.

7 “Cun thilri kilkhawitu pa cun a dang pakhat hnenah, ‘Nang teh ziang zat na bâk?’ tiah a sut.

“Cule anih in, ‘Sangvut ^akor 100,’ tiah a ti.

16:7^a kor: Grik ṭawng a si ih kor khat ah pung hleinga hrawng a si.

“Cule thilri kilkhawitu pa cun a hnenah, ‘Na leiba cazin cu rak keng awla, 80 tiin ngan aw,’ tiah a ti.

8 ^a“Cuih thilri kilkhawitu dik lo pa cu fim zetih thil a ti ruangah a bawipa in a fak. Ziangahtile hi leitlun mipawl cu anmai san ah cun tleu fātepawl hnakin an fimsawn a si.

16:8^a Sam 17:14; 18:26; Joh 12:36; Efe 5:8; 1Th 5:5

9 ^a“Nan hnenah ka lo sim a si, nan sumpai a cem tikah, kumkhaw cēnnak hmun sungih lo cohlangtu ding rualpi nan neih thei nak dingah, leitlun sumsaw in rualpi tuah uh. 10 ^bThil fatebik parih rinumtu cu thil tampi par khalah a rinum a si. Cule thil fatebik parih a dik lo tu cu thil tampi par khalah a dik lo. 11 Curuangah leitlun sumsaw par hmanah nan rinum lo asile, lennak taktak cu zo in so nan hnenah a lo ap ding? 12 Cule mi dang thilri parih nan rinum lo asile, nanmai ta cu zo in so a lo pe ding?

16:9^a Mat 19:21

16:10^b Mat 25:21, 23

13 ^a“Siahhlawh zohman in bawi pahnih a riankăwp thei lo; ziangahtile pakhat a hua ding ih, pakhat a duhdaw ding, asilole pakhat parah rinum tahratin pakhat deuh cu a nautat ding. Pathian le sumpai nan riankăwp thei lo,” tiah a ti.

16:13^a Mat 6:24

Mosi Dān, Profetpawl le Pathian Uknak

14 ^aPaisa duhtu Farasipawl khal in cuih thilpawl hmuahhmuah hna in an thei ih, Jesu cu an hnihsan. 15 ^bCule Jesu in an hnenah, “Nannih cu minung hmaiih mah le mah thiamcoawter nan si. Asinan Pathian in nan thinlung a thei. Ziangahtile minung in thupi ih an ruah mi cu Pathian mithmuh ah cun fihnungza a si.

16:14^a 1Ti 3:3

16:15^b Thu 2:23

16 ^a“Dān thupawl le Profetpawlih thu cu John a ra thlen hlan sung ta an si. John san thawk ihsin Pathian uknak thu cu phuan a si ih, mi kip in cuih Pathian uknak sungah cun hramhramin an lut. 17 ^bCule Dān sungih ngan mi thai khatte hlohral hnakin, lei le van hlohral a áwlsawn.

16:16^a Mat 4:23; 5:17

16:17^b Mat 5:18

18 ^a“Zokhal nupi ma ih mi dang ṭhitu cu uire a si. Cule zokhal a pasal ih mâk mi nu a ṭhitu a uire ve a si.

16:18^a Mat 5:31-32; Mar 10:11; Rom 7:2-3

Milian Pa le Lazaras

19 ^a“Milian pakhat cu puan sendup le puan nem páte sĭnin ni tin nuam zetin a nung. 20 ^bA taksa pumpuluk hmasia thawi a khat mi kutdawh pakhat, Lazaras an ti mi pa cu a kăwtka ah an ret. 21 ^cCuih milian paih rawl einak cabuai par ihsi a tla mi rawl ṭilfuanpawl cu ei a hiar zet. Cuihtlunah uico an ra ih a hmasiapawl cu an liahsak.

16:19^a Eze 16:49

16:20^b Apo 3:2

16:21^c Mat 15:27

22 “Cule hitin a rak si, cuih kutdawh pa cu a thi ih, vancungmipawl in Abraham ṭāng sungah an hruai. Milian pa khal cu a thi ve ih an phum. 23 Mithi khua ah cun tuarnak rapthlak zet tuar phahin van lam a hun zoh ih, hla zetah Abraham le a ṭāng sungih Lazaras kha a hun hmu. 24 ^aCun a au ih, ‘Ka pa Abraham, ka parah zahngai hram awla, Lazaras kha a mehtawk zim tidai ah hnīm ih ka lei daihter thei nak dingah thlah aw. Ziangahtile hi meialh sungah hin ka tuar a nâ tuk a si,’ tiah a ti.

16:24^a Mat 5:22

25 ^a“Asinan Abraham in, ‘Ka fapa, nang cu na nun laiah na thil ṭha pawl na rak co zo zia le cuti vek thothoin Lazaras in thil ṭha lo pawl a rak cozia kha máng aw. Cule atu-ah anih cu a nuam ih, nang cu hrem na si. 26 Cupawl hmuahhmuah hleiah, kannih le nanmai karlakah a kau zet mi hawrkuam a um. Curuangah hi tawk hmun ihsin nan hnenih rat an duh khalle an ra thei lo ih, kha tawk lam ihsin kan hnen lamih rat an duh a si khalle an ra thei lo,’ tiah a ti.

16:25^a Sam 17:14

27 “Cu tikah, milian pa cun, ‘Cuti asile ka pa, ka lo dil a si, ka paih inn ah Lazaras kha hei thlah hram aw. 28 ^aZiangahtile an hnenih thu a sim ding mi unau panga ka nei, cu lo ahcun annih khal hi hremnak hmun ah an ra ve pang ding,’ tiah a ti. 29 ^bAbraham in a hnenah, ‘Na unaupawl in Mosi cazualpawl le Profetpawlih cazualpawl an nei ko. An sim mi kha rak ngaithla hai seh,’ tiah a ti. 30 Cule milian pa cun, ‘A si lo, ka pa Abraham, mithi hnen ihsin an hnenah mi pakhat a va feh asile, an lung an thlĕng ding,’ tiah a ti.

16:28^a Apo 2:40; 1Th 4:6

16:29^b Joh 1:45; Apo 15:21

31 “Asinan Abraham in a hnenah, ‘Mosi le Profetpawlih thu an rak ngaithlak lo ahcun, mithi lak ihsin mi pakhat thosal khal sehla an lung duh cuang lo ding,’ a ti,” tiah a sim.

17

Jesu in Mi Tlukter Thu Ralrinnak a Pe

1 ^aJesu in a dungthluntupawl hnenah, “Tlûkbahnak thil cu ra thleng lo thei a si lo, asinan tlûkbahnak thil thlengtertu cu a hmakhua a pit a si! 2 ^bHi nauhakte te pawl lakih pakhat a tlukter asile, a hngawng ah rial lung thlaih tahratin tifinriat sungah hlăwn sehla, a hrangah a ṭhasawn. 3 ^cNanmah hrangah fimkhur uh. Na unaupa in na parah sual a tuah asile, kawk aw; a lung a thlĕng asile, amah cu ngaidam aw. 4 ^dCule na parah ni khat ah vei sarih sual a tuah ih, vei sarih rori na hnenah ra kirsalin, ‘Ka lung ka thlĕng,’ a ti a si ahcun, amah cu na ngaidam ding a si,” tiah a ti.

17:1^a Mat 5:29; 18:7

17:2^b Mat 5:29; Mar 10:24

17:3^c Mat 18:15; Efe 4:32; Kol 3:13

17:4^d Mat 18:21-22

Zumnak le Ṭuanvo

5 ^aApostolpawl in Bawipa hnenah, “Kan zumnak pungter aw,” tiah an ti.

17:5^a Mar 6:30

6 ^aCule Bawipa in, “Anṭam ci vek zumnak nan neih asile, hi thingtheihmu kung hnenah, ‘Na hram thawn phawng awla, tifinriat sungah va phunaw aw,’ nan ti ding ih nan thu a lo lung ding.

17:6^a Mat 13:31; 21:21; Mar 9:23

7 “Nanmah lakih pakhat khat in siahhlawh pakhat neiin, cuih siahhlawh cun lei a let, asilole tuu khāl bang sehla, ló ihsin a ra tlun tikah, ‘Ra awla, rawl eicih aw,’ tiah zo in so a ti ding. 8 Cuhnakin, ‘Ka zanriah timtuah aw, tiar cia in um awla, ka ei ih ka in laiah i rian aw. Cumi hnu lawngah na ei in na in leh ding,’ a ti sawn lo ding maw? 9 Cuih siahhlawh in thu a pek mi thilpawl a tuah ruangah a siahhlawh pa hnenah cun lungawi thu a sim pei maw? A sim ding ka zum lo. 10 ^aCuti vek thothoin nannih khal in thu ka lo pek mi cuih thil hmuahhmuah nan tuah ṭheh tikah, ‘Kannih cu santlailo siahhlawh kan si. Kan ṭuanvo lawng kan ṭuan a si,’ tiah ti uh,” tiah a sim.

17:10^a 1Ko 9:16

Jesu in Phâr Pahra a Damter

11 ^aCule hitin a rak si, Jesu cu Jerusalem lamih a feh phahah Samaria peng le Galili peng karlak a paltlăng. 12 ^bKhaw pakhat ih a luh tikah, miphar pahra in Jesu cu an rak hmuak ih, hla nawnah an ding. 13 Cule an aw an suah ih, “Jesu, Hotu pa, in zangfah aw!” tiah an ti.

17:11^a Joh 4:3-4

17:12^b Pui 13:45-46; Mat 8:2

14 ^aJesu in a hmuh hai tikah, an hnenah, “Va feh uhla, puithiampawl hnenah nanmah le nanmah va hmuhaw aw uh,” tiah a ti. Cule hitin a rak si, an feh laiah an phār nat cu a thiang.

17:14^a Pui 14:2; Mat 8:4

15 ^aAnmah lakih pakhat in a dam ti a hmuhawk tikah, a kirsal ih aw ring zetin Pathian a thangṭhat. 16 ^bCu pa cu Jesu-ih ke hramah a băwk ih, Jesu hnenah lungawi thu a sim. Cu pa cu Samaria-mi a si.

17:15^a Mat 9:8

17:16^b Mat 10:5

17 Cule Jesu in a sawn ih, “Mi pahra thianter an si lo maw? A dang pakua teh khuiah so an si? 18 Hih ram dang mi siarlo zohman Pathian thangṭhat dingah an ra kir lo,” tiah a ti. 19 ^aCule Jesu in a hnenah, “Tho awla, feh aw. Na zumnak in a lo damter zo,” tiah a ti.

17:19^a Mat 9:22

Pathian Uknak a Thleng

20 ^aPathian uknak cu ziang tikah a ra thleng ding tiah Farasipawl in Jesu an sut. Cule anih in a sawn hai ih an hnenah, “Pathian uknak cu hmuh theihin a ra lo. 21 ‘Ngai hnik, hi tawkah a um,’ asilole, ‘Ngai hnik, khi tawkah a um khi,’ an ti lo ding. Ziangahtile ngai hnik uh, Pathian uknak cu nan lakah a um a si,” tiah a ti.

17:20^a Mat 3:2

22 ^aCun a dungthluntupawl hnenah, “Minung Fapaih ni, ni khat tal nan hmuh duh zet cān a ra thleng leh ding. Asinan cumi cu nan hmu lo ding. 23 ^bCule annih in nan hnenah, ‘Hi tawkah zoh hnik!’ asilole, ‘Khi tawkah zoh hnik!’ tiah an lo ti ding. Annihpawl cu an dung ihsin zul hlah uhla, thlun fawn hlah uh. 24 ^cZiangahtile nimthlakau cu van khat lam kap ihsin khat lam dĕng tiang a tlĕtsuak vekin, Minung Fapaih ni ah cun a si ve ding. 25 ^dAsinan anih cu thil tampi a tuar hmaisa ta ding ih, tuih san minungpawl in an hnáwng ding.

17:22^a Mat 8:20

17:23^b Mat 24:23

17:24^c Mat 24:27

17:25^d Mat 16:21; Mar 13:30

26 ^a“Cule Noah san laiih a rak si vek khan, Minung Fapa san khalah a si ve ding. 27 Noah lăwng sungah a lut ih, tilik a tlung ih, mi hmuahhmuah an hlohral lai hlanlo minungpawl cu an ei, an in, an ṭhiaw ih an hamaw.

17:26^a Sem 6:5-8

28 ^a“Lot san lai khalah cuti vek thothoin a rak si. An ei an in, an lei, an zuar, an phun, inn an sak. 29 Asinan Sodom khua ihsin Lot a suah ni ah van ihsin meisa le kât a sur ih, cumi cun an zaten a run that ṭheh.

17:28^a Sem 19:1-28

30 ^a“Minung Fapa a rung lăng ni ah cun cuti vek thothoin a si ding. 31 ^bCuih ni ah, inn parih um cun inn sungih a thilri la dingin rung ṭum hlah seh. Ló ih um khal cuti vekin tlungkir hlah seh. 32 ^cLot-ih nupi kha cîng ringring uh. 33 ^dZokhal a nunnak hum a duhtu cun a hloh ding ih, zokhal a nunnak a hlohtu cun a nunnak a humngah ding. 34 Ka lo sim a si, cuih zan ah ihkhun pakhat ah mi pahnih an ittlang ding: pakhat cu lâk a si ding ih, pakhat cu tān ta a si ding. 35 ^eNunau pahnih rial lung an rialtlang ding: pakhat cu lâk a si ding ih, a dang pakhat cu tān ta a si ding. 36 Mi pahnih ló ah an um ding: pakhat lâk a si ding ih, a dang pakhat cu tan ta a si ding,” tiah a ti.

17:30^a Mat 10:23; 1Ko 1:7; 1Th 2:19; 2Th 1:7; 2Pe 3:4; Thu 1:7

17:31^b Mat 24:17-18

17:32^c Sem 19:26

17:33^d Joh 12:25

17:35^e Mat 24:41

37 ^aDungthluntupawl cun an sawn ih a hnenah, “Bawipa, cumi cu khui tawkah a si ding?” tiah an ti.

17:37^a Mat 24:28

Cu tikah Jesu in, “Mithi ruak umnak kip ah mulukawlh an fĭnkhawmaw ding,” tiah a ti hai.

18

Nuhmeinu le Thuṭhentu Tahṭhimnak

1 ^aThlacam ringringin le beidawng loih an umnak dingah an hnenah tahṭhimnak pakhat Jesu in a sim. 2 “Khaw pakhat ah Pathian ṭihzah lo le milai khal hmaizahnak nei lo thuṭhentu pakhat a rak um. 3 ^bCuih khua ah cun nuhmei pakhat a um. Cule cu nu cu a hnenah a ra ih, ‘I dodaltu kha phulei i samsak aw,’ tiah a ti. 4 Thuṭhentu cun cān reipi sung cuih thu cu a relsak duh lo. Asinan cuih hnuah thuṭhentu cun a thinlung sungin, ‘Pathian ṭihzahnak ka nei lo ih minung hmaizahnak khal ka nei lo. 5 Asinan hi nuhmeinu hin i ra tibuai ringring ruangah phulei ka samsak ding. Cu lo asile a ra ringring ding ih i cauter pang ding,’ tiah a ruat,” tiah a sim.

18:1^a Isa 40:31; Apo 1:14; Rom 1:10; Efe 6:18; Kol 4:2; 1Th 5:17

18:3^b Isa 1:17

6 Cun Bawipa in, “Thuṭhentu dik lo pa ih sim mi hi ngai hnik uh. 7 ^aA sun a zan ih amah hnenih au, amai hril mipawl hrangah Pathian in phuba a lâksak lo ding maw? An hrangah reipi a muansan hai ding maw? 8 ^bKa lo sim a si, zamrang zetin phulei a samsak ding. Sikhalsehla Minung Fapa a rat tikah, leitlun ah zumnak a hmu pei maw?” tiah a ti.

18:7^a Suah 22:23; Sam 88:1; Thu 6:10

18:8^b Mat 8:20; 16:27

Farasipawl le Siah khawngtupawl Tahṭhimnak

9 ^aJesu in hi tahṭhimnak khal hi mah le mah dingfel ih zum hngehawknak neitupawl le mi dang nautattupawl hnenah a sim. 10 ^b“Mi pahnih cu thlacam dingin temple kulh sungah an feh. Pakhat cu Farasi a si ih, a dang pakhat cu siah khawngtu a si. 11 ^cFarasi pa cu amah tein a dīng ih hitin thla a cam, ‘Maw Pathian, kei cu mi dang pawl vekin, mi thil lawnhmang, midik lo le uire mi ka si lo ruangah le hi siah khawngtu vek ka si lo ruangah na hnenah lungawi thu ka lo sim. 12 ^dZarh khat ah vei hnih rawl ka ul ih, ka ngah mi hmuahhmuah sung ihsin ṭhen hra ṭhen khat ka pe,’ tiah a ti.

18:9^a Isa 65:5

18:10^b Apo 3:1

18:11^c Mat 6:5; Mar 11:25

18:12^d Isa 58:3; Mal 3:8; Mat 9:14

13 ^a“Asinan siah khawngtu pa cu hlat nawnah a dīng ih, van lam hman hawi ngam loin, a ṭâng a cumaw ih, ‘Maw Pathian, kei misual hi in zangfah aw!’ tiah a ti.

18:13^a Isa 66:2; Jer 31:19; 1Ti 1:15

14 ^a“Ka lo sim a si, hi pa cu Farasi pa hnakin thiamcoter siin a inn ah a tlung. Ziangahtile zokhal amah le amah a khaisângawtu cu niamter a si ding ih, zokhal amah le amah hnuai a dawrtu cu khaisan a si ding,” tiah a ti.

18:14^a Mat 23:12

Jesu le Nauhakpawl

15 Cun Jesu ih tham dingah nausentepawl Jesu hnenah an rak hruai kha a dungthluntupawl in an hmuh tikah, an rak kawk. 16 Asinan Jesu in nauhakte te pawl a hnenah a ko hai ih, “Nauhakte te pawl kha ka hnenah ra hai seh, kham hlah uh. Ziangahtile Pathian uknak cu hivek mipawlih ta a si. 17 ^aThungaiin ka lo sim, zokhal nauhakte vekin Pathian uknak a cohlang lo tu cu, cuih uknak sungah a lut hrimhrim lo ding,” tiah a ti.

18:17^a Mat 11:25

Milian Tlangval

18 Uktu pakhat in Jesu kha, “Zirhtu ṭha, kumkhaw nunnak ro ih ka co thei nak dingah ziang ka tuah pei?” tiah a sut.

19 Cule Jesu in a hnenah, “Ziangah so kei cu miṭha i ti? Pathian siarlo zohman miṭha an um lo. 20 ^aThupekpawl na thei ko a si lo maw: ‘Uire hlah, laithat hlah, rûk ru hlah, theihpinak dik lo rel hlah, na nu le na pa upat aw,’ tipawl tla an si kha,” tiah a ti.

18:20^a Suah 20:12-16; Dnp 5:16-20; Rom 13:9

21 Cule cu pa in, “Ka no lai ihsin hi thil hmuahhmuah cu ka rak thlun zo,” tiah a ti.

22 ^aJesu in cuih thilpawl a theih tikah, a hnenah, “Thil pakhat te na sam hrih lai. Na neih mi zaten zuar awla, mifarahpawl va zem aw, cule vanram ah hlawnthil na nei ding. Cule ra awla, i thlun aw,” tiah a ti.

18:22^a Mat 6:20; Apo 2:45

23 Asinan cuih thu a theih tikah, a riah a sia zet, ziangahtile cu pa cu milian zet a si.

24 ^aJesu in a riah a sia zet ti a hmuh tikah, “Milianpawl Pathian uknak sungih luh ding cu ziang tlukin so a har! 25 Pathian uknak sungih milian luh hnakin, ṭhim hna kua sungih kalauk luh a áwlsawn,” tiah a ti.

18:24^a Thf 11:28

26 Cuih thu a theitupawl in, “Cuti asile zo so rundam si thei ding?” tiah an ti.

27 ^aCule Jesu in, “Minung hrangih thil cang thei lo mipawl cu, Pathian hrangah cun a cang thei a si,” tiah a ti.

18:27^a Mat 19:26

28 ^aCun Peter in, “Ngai hnik, ziang hmuahhmuah tân tain nangmah kan lo thlun si khawh,” tiah a ti.

18:28^a Mat 4:19

29 Cu tikah Jesu in an hnenah, “Thungaiin ka lo sim, zohman a inn siseh, a nu le a pa siseh, a unaupawl siseh, a nupi siseh, a falepawl siseh Pathian uknak ruangih a tlansantu cun, 30 ^atuih cān ah a let tampi hlawknak a ngah ding ih, a ra lai ding mi san ah kumkhaw nunnak a ngah ding,” tiah a ti.

18:30^a Mat 12:32; 25:46

Jesu in a Thih ding le a Thawhsal ding Thu a Vei Thumnak a Sim

31 ^aCun Jesu in a dungthluntu hleihnih pawl kha a hnenah a hruai hai ih an hnenah, “Ngai hnik uh, Jerusalem ah kan hung so ding, cule profetpawl in Minung Fapaih thuhla an rak ngan mi thilpawl zaten a kim ṭheh ding. 32 ^bZiangahtile Minung Fapa cu Zentelpawlih kut ah thlen a si ding ih, annih in an hmuhsuam ding, an zuamtai ding ih, cil an phui ding. 33 ^cAn vaw ding ih an that ding. Cule a ni thumnak ah a thosal ding,” tiah a ti.

18:31^a Sam 22:1; Isa 53:1; Mat 8:20

18:32^b Mat 16:21; Apo 2:23

18:33^c Mat 16:21

34 ^aCuih thilpawl cu a dungthluntu hleihnih pawl in pakhat hman an theithiam lo. Cuih thu cu an hnen ihsin thuh a si ih, a ṭawng mi thilpawl ziang a si ti khal an thei lo.

18:34^a Mar 9:32

Mitcaw Pa in Khua a Hmu

35 Cun hitin a rak si, Jesu cu Jeriko khua a thlen zik zawngah, mitcaw pakhat cu kutdawh in lamzin kapah a to. 36 Cuih mitcaw pa in mi tampi feh thâwm a theih tikah, “Cucu ziang a si?” tiah a sut. 37 Cule annih in, “Nazareth Jesu a ra a si,” tiah an sim.

38 ^aCule cu pa cun, “David-ih Fapa, Jesu, ka parah zahngai hram aw!” tiah a au.

18:38^a Mat 9:27; 17:15

39 Cu tikah hmaiih a fehtupawl in cu pa cu daiten um dingin an rak kawk. Asinan anih cun, “David-ih Fapa, ka parah zahngai hram aw!” tiah nasa sinsinin a au.

40 Cule Jesu cu a dīng ih, cu pa cu a hnenih rak hruai dingin thu a pe. A kiang a ra thlen tikah, Jesu in thu a sut, 41 “Ziang lo tuahsak so na duh?” tiah a ti.

Cule anih in, “Bawipa, khawhmuh thei ka duh,” tiah a ti.

42 ^aCun Jesu in a hnenah, “Khua hmu aw, na zumnak in a lo damter zo,” tiah a ti.

18:42^a Mat 9:22

43 ^aCule cu pa cu hmakhatteah khua a hmu ih, Pathian thangṭhat phahin Jesu cu a thlun. Cumi cu mi hmuahhmuah in an hmuh tikah, Pathian an thangṭhat.

18:43^a Mat 9:8

19

Zakia Inn ah Jesu a Thleng

1 Jesu cu Jeriko khaw sungah a lut ih, a fehlan vivo. 2 Cule ngai hnik, cu tawkah a hmin Zakia an ti mi pa a rak um. Amah cu siah khawngtu lu bik a si ih, milian zet a si. 3 Jesu cu zo a si ti hmuh a duh nân, mi an tam tuk ruangah a hmu thei lo. Ziangahtile Zakia cu pa niamte a si. 4 ^aCule Jesu ih a zawh ding mi lamzin ah hmai lamah a rak tlân cia ih, Jesu hmu dingin sikamor kung parah a rak kai. 5 Cu tawk hmun ih Jesu a thlen tikah, tlun lam a hun zoh ih, Zakia cu a hmu. Cule a hnenah, “Zakia, zamrangin rung ṭum aw, ziangahtile tuihsun na inn ah ka thleng ding,” tiah a ti.

19:4^a 1Sp 10:27; 1San 27:28; Isa 9:10

6 Cule Zakia cu zamrang zetin a rung ṭum ih, aipuang zetin Jesu cu a cohlang. 7 ^aAsinan mipi in cumi an hmuh tikah, an zaten an phunzai ih, “Misual pa hnenih thleng dingin a feh zo khi!” tiah an ti.

19:7^a Mat 9:11

8 ^aCun Zakia cu a dīng ih, Bawipa hnenah, “Zoh hnik, Bawipa, ka neih mi thilri ih a hrek cu mifarahpawl ka pe ding, cule zo hnen ihsi khalin ziangkhal dik loih ka rak lâk asile, a let li in ka rūlsal ding,” tiah a ti.

19:8^a Suah 22:1; Pui 6:4-5; Mip 5:7; 2Sam 12:6; Eze 33:14-15

9 Cule Jesu in a hnenah, “Tuihsun ah hi inn ah rundamnak a thleng zo, ziangruangahtile hi pa khal Abraham-ih tesinfa a si ve. 10 ^aZiangahtile Minung Fapa cu a hlo mipawl hawl ding le rundam dingah a ra a si,” tiah a ti.

19:10^a Eze 34:12, 16; Joh 3:17

Mina Tahṭhimnak

11 ^aCuih thilpawl an rak ngaithlak laiah, Jesu in a dang tahṭhimnak pakhat a simbêt, ziangruangahtile amah cu Jerusalem a naih thlang ih, mipi in Pathian uknak lang lohli dingah an ruat. 12 Curuangah anih in, “Bawi pakhat cu ram hlapi ah amai hrangah lalram va cohlang tahratih, ra tlungkirsal dingin a feh. 13 ^bCule a siahhlawh pahra pawl kha a ko hai ih, ^cmina khat hrawng fingfing a pe hai. Cule an hnenah, ‘Ka ra kirsal hlanlo, hi tangka thawn sum rak dawng uh,’ tiah a ti.

19:11^a Mat 3:2; Apo 1:6

19:13^b Mar 13:34

19:13^c mina: Grik ṭawng a si ih mina khat cu mi pakhat ni 100 hlawh tluk a si.

14 “Asinan cuih bawi cu amai ram sung mipawl in an hua ih, ‘Hi pa ih in uk ding cu kan duh lo,’ tiah a simtu ding palai a dang in an hei thlah.

15 “Cule hitin a rak si, cuih bawi cun lalram cohlangngahin a ra tlunkirsal tikah, paisa a rak pek mi a siahhlawhpawl khan an sumdawnnak in ziang zat ciar an rak ngah ti theih duhah a hnenih ko dingin thu a pe. 16 Cun a pakhatnak pa cu a hnenah a ra ih, ‘Bawipa, mina khat i pek mi in a dang mina hra a hlêp ka ngah,’ tiah a ti. 17 ^aCuih bawi cun a hnenah, ‘Na ti ṭha riai, siahhlawh ṭha, thil fate zet parih na rinum ruangah khaw hra tlunah thuneihnak na nei ding,’ tiah a ti.

19:17^a Thf 27:18

18 “Cule a pahnihnak pa a ra ih, ‘Bawipa, mina khat i pek mi in a dang mina nga a hlêp ka ngah,’ tiah a ti. 19 Cu pa hnen khalah cuih bawi cun, ‘Nang khal khaw nga na uk ding,’ tiah a ti.

20 “Cun a dang pakhat a ra ih, ‘Bawipa, ngai hnik, hi tawkah na mina a um, pavua in ka tuam ih ka retṭha. 21 ^aNang cu mitikherkher na si ruangah ka lo ṭih. Na rak ret lo mi na lasuak ih, na tuh lo mi na at,’ tiah a ti. 22 ^bCule cuih bawi cun a hnenah, ‘Siahhlawh sualrál, nangmai ṭawng mi in thu ka lo ṭhen ding. Mitikherkher ka si ih ka rak ret lo mi ka lasuak, ka tuh lo mi ka at ti na thei. 23 Cuti asile ziangah ka paisa cu paisa retnak bān ih na rak ret lo? Rak ret ta cila cu ka ra tlunkirsal tikah, ka tangka cu a ṭhang thawn ka rak la ding nân,’ tiah a ti.

19:21^a Mat 25:24

19:22^b 2Sam 1:16; Job 15:6; Mat 25:26

24 “Cule cuih bawi cun a kiangih a dīng mipawl hnenah, ‘A hnen ihsin mina khat cu la uhla, mina hra neitu pa hnenah pe uh,’ tiah a ti. 25 Annih in a hnenah, ‘Bawipa, anih cun mina hra a nei zo si!’ tiah an ti.

26 ^a“Cuih bawi cun, ‘Ziangahtile nan hnenah ka lo sim, a neitu kip hnenah pek an si ding. A nei lo tu cu a neih cia mi hman a hnen ihsin lâksak a si ding. 27 Asinan ka uk ding a duh lo tu ka doralpawl cu hi tawkah rak hruai uhla, ka hmaiah hin that uh,’ a ti,” tiah Jesu in a sim.

19:26^a Mat 25:29

Jerusalem ah Jesu Ropi Zetin a Lut

28 ^aJesu in hi thu a sim hnuah, a dungthluntupawl hmaiah Jerusalem lam panin a feh. 29 ^bCule hitin a rak si, Jesu cu Olif Tlang kiang, Betfat khaw kiang le Bethany khaw kiang a thlen tikah, Jesu in a dungthluntu pahnih a hei thlah ih, 30 an hnenah, “Nan hmaiih khua ah khin va feh uh. Cu tawkih nan va luh tikah, zohman ih to dah lo mi lāk fa no an hren mi nan hmu ding. Cumi cu phawih uhla, rak hruai uh. 31 Mi pakhat khat in, ‘Ziangah so nan phawih?’ tiah a lo suh asile, ‘Bawipa in a ṭul a si,’ tiah va ti uh,” tiah a ti.

19:28^a Mar 10:32

19:29^b Mat 21:17

32 Cule a thlah mi mi pahnih te cu an feh ih, Jesu ih a rak sim hai vek cekciin ziangkim an va hmu. 33 Lāk fa no cu an phawih rero laiah a neitupawl in, “Ziangah so lāk fa no cu nan phawih?” tiah an ti.

34 Cule annih in, “Bawipa in a ṭul,” tiah an ti.

35 ^aCun lāk fa no cu Jesu hnenah an hei hruai ih, a parah an hnipuanpawl an rak phah. Cule a parah Jesu cu an toter. 36 ^bCutiih a feh laiah, a fehnak lamzin ah mipi in an hnipuanpawl an rak phah.

19:35^a Zek 9:9

19:36^b 2Sp 9:13

37 ^aOlif Tlang ihsin a suknak zawn an thlen tikah, a dungthluntu mipi zaten lungawi aipuangih um an thawk. Cule an rak hmuh zo mi thilmakpawl hmuahhmuah ruangah aw ring zetin Pathian an thangṭhat.

19:37^a Mat 21:1

38 ^a“Bawipaih hmin ih ra Siangpahrang cu thangṭhatin um seh!
Vancung ah daihnak um sehla, cungnungbik hmun ah thangṭhatnak um seh!”

19:38^a Dnp 5:16-20; Sam 118:26

tiah an ti.

39 ^aCule mipi lakih Farasi hrekkhat in Jesu hnenah, “Zirhtu pa, na dungthluntupawl hi kawk hai aw,” tiah an ti.

19:39^a Mat 21:15-16

40 ^aCule Jesu in a sawn hai ih, an hnenah, “Ka lo sim a si, hipawl daiteih an um asile, hmakhatteah lungtopawl an ausuak ding,” tiah a ti.

19:40^a Hab 2:11

Jesu in Jerusalem a Ṭah

41 ^aJerusalem khawpi kiang a thlen tikah, khua cu a hei zoh ih a ṭah, 42 “Tuihni nangmai ni talah hin na hrangih daihnak a lo tuahsaktu thilpawl hi thei awla maw! Asinan cupawl cu na mithmuh ihsin thuh an rak si zo. 43 ^bZiangahtile na ralpawl in na kimvelah ral kulh tuahin an lo kulh ding ih, hmun kip ihsin an lo kharkhum cān a ra thleng ding. 44 ^cNangmah le na phar kulh sungih a um mi na falepawl leilung ah an lo thlu ding. Cule na hnenah lungto pakhat parah a dang pakhat suangawin an tân lo ding, ziangruangahtile Pathian in a lo vehvaih cān na rak thei lo a si,” tiah a ti.

19:41^a Isa 22:4

19:43^b Isa 29:3; Jer 6:6; Eze 4:2

19:44^c Sam 137:9; 1Pe 2:12

Jesu in Temple a Thianfai

45 Cun Jesu cu temple kulh sungah a lut ih, temple kulh sungih thil zuartupawl le leitupawl dawisuah a thawk. 46 ^aAn hnenah,

19:46^a Sam 118:26; Isa 56:7; Jer 7:11

“ ‘Ka inn cu thlacamnak inn a si,’

tiih ngan a si. Asinan suamhmangpawl pûk ah nan canter a si,” tiah a ti.

47 ^aNi tinten Jesu cun temple kulh sungah thu a zirh. Asinan puithiam sâng pawl, Dān zirhtupawl le mipi hruaitupawl in Jesu thahdān ding an hawl. 48 Cule mi hmuahhmuah in a thusim mi ṭha tukih an ngaithlak ruangah a tidān ding zianghman an hmu thei lo.

19:47^a Mat 12:14; 26:55; Mar 11:18

20

Jesu-ih Thuneihnak Thu an Sut

1 ^aCule hitin a si, ni khat cu Jesu in temple kulh sungah mipi thu a zirh ih, thuthangṭha a sim rero laiah puithiam sâng pawl le Dān zirhtupawl cu miupapawl thawn a hnenah an ra. 2 ^bCule a hnenah, “In sim hnik, ziang thuneihnak in so hih thilpawl hi na tuah? Hih thuneihnak na hnenih lo petu cu zo a si?” tiah an ti.

20:1^a Mat 26:55

20:2^b Joh 2:18; Apo 4:7

3 Cu tikah anih in a sawn hai ih an hnenah, “Kei khal in thu pakhat ka lo sut ve ding ih, in let uh: 4 ^aJohn-ih baptisma kha van ihsin maw, milai hnen ihsin so a si?” tiah a ti hai.

20:4^a Mar 1:4

5 Cule anmah ten an relkhawm ih, “ ‘Van ihsin a si,’ kan ti asile, ‘Cuti asile ziangah so amah cu nan zum lo?’ in ti ding. 6 ^a‘Milai hnen ihsin a si,’ kan ti asile, mi hmuahhmuah in lungto in in deng ding, ziangahtile John cu profet a si tiah an zum hngeh mi a si fawn,” tiah an tiaw.

20:6^a Mat 11:9

7 Cule annih in, “Khui ihsin a si ti kan thei lo,” tiah an sawn.

8 Jesu in an hnenah, “Kei khal in ziang thuneihnak in hih thilpawl hi ka tuah ti ka lo sim ve lo ding,” tiah a ti hai.

Sabit Hmuan Ṭuanhlawhtupawl

9 ^aCun Jesu in hi tahṭhimnak hi mipi hnenah sim a thawk, “Mi pakhat in sabit hmuan a tuah, cuih a sabit hmuan cu hmuan ṭuanhlawhtupawl hnenah a pek ta ih, reipi khualtlawngin a feh. 10 Cule sabit rah lawh a cût tikah, hmuan ṭuanhlawhtupawl in sabit rah hrekkhat amah an rak pek thei nak dingah anih in a siahhlawh pakhat cu an hnenah a hei thlah. Asinan hmuan ṭuanhlawhtupawl in cu pa cu an vuak ih, a kutlawng in an thlah. 11 Cun siahhlawh dang pakhat a thlahsal, asinan cu pa khal cu an vuak ih, ningzakzaih an tuah hnuah, kutlawng in an thlah lala. 12 A pathumnak a thlahsal. Cu pa khal cu an rak tuahmawh ih an rak dawisuak thotho.

20:9^a Isa 5:1-7; Mat 25:14

13 ^a“Cu tikah sabit hmuan neitu pa cun, ‘Ziangtin ka tuah pei? Ka duhdawt mi ka fapa hi ka hei thlah ding ih, amah an hmuh tikah an rak ṭihzah nahman maw!’ tiah a ti. 14 Asinan hmuan ṭuanhlawhtupawl in a fapa an rak hmuh tikah, pakhat le pakhat an relkhawm ih, ‘Hi pa hi ro cotu pa a si, ra uh, that uhsi, cutin a co ding mi ro cu kan ta a si ding,’ tiah an tiaw. 15 Cule anih cu sabit hmuan sung ihsin an hlăwnsuak ih an that. Cuti asile sabit hmuan neitu pa in hmuan ṭuanhlawhtupawl parah ziang a tuah pei? 16 A ra ding ih hmuan ṭuanhlawhtupawl cu a that ding, cule a sabit hmuan cu a dang hmuan ṭuanhlawhtu pawl hnenah a pe ding a si,” tiah a ti.

20:13^a Mat 3:17

Cumi cu mipi in an theih tikah, “Cuvek cu thleng hrimhrim hlah seh!” tiah an ti.

17 ^aCun Jesu in anmah cu a zoh hai ih,

20:17^a Sam 118:22; Isa 56:7; Apo 4:11

“‘Inn saktupawl ih an hnawn mi lungto kha,
A kilih lungto pawimawhbik ah a cang,’

tiih ngan mi kha a sullam ziang a si?

18 ^a“Zokhal cuih lung parih tlatu cu a kekkuai ding, cuih lung ih a tlakngah mi cu leivut vekin a cip nêknêk ding,” tiah a ti.

20:18^a Isa 8:14-15

19 ^aCulaifangah puithiam sâng pawl le Dān zirhtupawl in Jesu kaihdān ding lamzin an hawl, ziangruangahtile hi tahṭhimnak cu anmah a ṭawng săn a si ti an thei, asinan mipi an ṭih.

20:19^a Mar 11:18

Kaisar Hnenih Ngunkhuai Pek Thu

20 ^aHruaitupawl in Jesu cu an thlingthla ih, amai kamsuakthupawl ih awk dingin le amah cu ram uktuih uknak le thuneihnak ih an thlen thei nak dingah midik vekih umawter thlingthlatupawl an hei thlah. 21 ^bCun thlingthlatupawl in Jesu cu, “Zirhtu pa, nang cun minung mithmai zoh loin, dik zetin thu na sim ih na zirh ṭheu ti kan thei. Pathian lamzin cu dik zetin na zirh ti kan thei. 22 Kaisar hnenih ngunkhuai pek hi Dān in in siang maw, siang lo?” tiah an sut.

20:20^a Mat 12:10; 27:2

20:21^b Joh 3:2

23 Asinan Jesu in an hrăwkhrawlnak cu a thei ih an hnenah, “Ziangah so in hniksak rero? 24 Dinari paisa cu i rak hmuh hnik uh. Hihi zo-ih zuk a si ih ziang a ngan aw?” tiah a sut hai.

Cule annih in, “Kaisar-ih zuk le hmin,” tiah an sawn.

25 ^aCule Jesu in an hnenah, “Curuangah Kaisar-ih thilpawl cu Kaisar hnenah pe uhla, Pathian-ih thilpawl cu Pathian hnenah pe uh,” tiah a ti.

20:25^a Rom 13:7

26 Mipi hmaiah amai kamsuakthupawl in Jesu cu an awk thei hrimhrim lo. A thulehnak ah an mang a bang ih daiten an um.

Thawhsalnak Thusuhnak

27 ^aCun thawhsalnak a um lo titu Sadusi hrekkhat, a hnenah an ra ih thu an sut, 28 ^b“Zirhtu pa, Mosi in hitin in ngansak, ‘Mi pakhat cu nupi a nei ih, fāte nei loin a thih asile, a nupi cu a naupa in a ṭhi pei ih a u hrangah ci a thlahsak pei,’ tiah a ti. 29 Cule unau pasarih an um. Upabik in nupi a ṭhi ih, fāte nei loin a thi. 30 Cule a pahnihnak pa in cu nu cu a ṭhi ih, fa nei loin a thi ve. 31 A pathumnak ihsin a pasarihnak tiang cuti vek thothoin cu nu cu an run ṭhi vivo nân, fāte nei loin an thi ṭheh. 32 Netabikah cu nu khal cu a thi ve. 33 Curuangah, thawhsalnak ah cu nu cu zo bik ih nupi a si ding? Ziangahtile an pasarih ten cu nu cu nupi ah an nei,” tiah an ti.

20:27^a Apo 4:1; 23:8; 1Ko 15:12

20:28^b Dnp 25:5; Jer 7:11

34 Cule Jesu in a sawn hai ih an hnenah, “Tuih san minungpawl cu an ṭhiaw ih, ṭhitumnak khal an tuah. 35 ^aAsinan a ra thleng lai ding mi san le mithi lak ihsin thawhsalnak co tlakih ruah mipawl cu an ṭhiaw lo ding ih, ṭhitawknak khal a um nawn lo ding. 36 ^bAn thi thei nawn lo ding, ziangahtile vancungmipawl thawn an bangaw ding. Annih cu thawhsalnak fāte an si ruangah Pathian fāte an si. 37 ^cMithi an thosal ti cu Mosi khal in Bawipa kha ‘Abraham-ih Pathian, Isak-ih Pathian le Jakob-ih Pathian,’ tiin thing bŭk ih a kawhnak khan a langter zo. 38 Ziangahtile anih cu mithipawlih Pathian si loin, a nung mipawlih Pathian a si sawn, ziangahtile amah ah mi hmuahhmuah cu an nung thluh a si,” tiah a ti.

20:35^a Mat 12:32

20:36^b Joh 1:12

20:37^c Suah 3:6, 15; Sam 118:22

39 Dān zirhtu hrekkhat in an sawn ih, “Zirhtu pa, na sim ṭha zet a si,” tiah an ti. 40 ^aCuih hnu cun thu an sut ngam nawn lo.

20:40^a Mat 22:46; Mar 12:34

Khrih cu Zo-ih Fapa a Si

41 ^aCule Jesu in an hnenah, “Ziangtin so Khrih cu David-ih Fapa a si tiah mi in an ti thei? 42 David amah rori in Sam cazual sungah,

20:41^a Mat 1:1

‘Bawipa in ka Bawipa hnenah,
“Na ralpawl na ke retnak ih ka tuah hlanlo,
43 ^aKa vawrh lamah to aw,” a ti,’

20:43^a Dnp 25:5; Sam 110:1; Mat 22:44

tiah a ti.

44 “Curuangah David in ‘Bawipa,’ tiih a kawh asile, ziangtin so a Fapa a si thei ding?” tiah a ti.

Dān Zirhtupawl kha va Ralring Uh

45 Cun mi hmuahhmuah in a thu an ngaithlak laiah, Jesu in a dungthluntupawl hnenah, 46 “Dān zirhtupawl kha va ralring uh, annih cu an kâwrfual thawi tawihvah le dawr hmunpawl ah mi ih upatnak pek an duh. Sinakok sungah tonak pawimawhbik bik an duh ih, puai hmunpawl ah a sangbik hmunpawl an duh. 47 Nuhmeipawlih inn an láwng ih, mi bumnak ah rei zetzet thla an camawter. Hipawl hin thuṭhennak nasasin an tuar ding,” tiah a ti.

21

Nuhmeinuih Thawhhlawm

1 ^aCule Jesu in a hun zoh ih milianpawl in thawhhlawm bawm sungih an thawhhlawm an thlak lai kha a hmu. 2 Nuhmei farah pakhat in ^blepton pahnih a thlak mi cu a hei hmu. 3 Cule Jesu in, “Thungaiin ka lo sim, hi nuhmei farah nu hin mi dang hmuahhmuah hnakin a thla tamsawn a si. 4 ^cZiangahtile hipawl hmuahhmuah cun an neih hleifuan mi sung ihsin Pathian thawhhlawm ah an thla. Asinan anih cun rethei zet cingin a nunnak dingih a neih mi zaten a thla a si,” tiah a ti.

21:1^a Mat 27:6; Joh 8:20

21:2^b lepton: Grik ṭawng a si ih paisa man malbik a si.

21:4^c 2Ko 8:12

Jesu in Temple Siat ding Thu a Sim

5 Cun mi hrekkhat in temple thuhla ah lungto mawi zetzet le thawhhlawm thawi ceimawi a sizia thupawl an rel. 6 Cule Jesu in, “Nan hmuh mi thilpawl hi lungto pakhat parih lungto suangaw mi pakhat hman tâng loin hlăwn ṭheh an si leh ding,” tiah a ti.

San Cemnak ding Hminsinnak

7 Cule annih in Jesu cu an sut ih, “Zirhtu pa, cuih thilpawl cu ziang tikah a thleng ding? Cuih thilpawl a ra thlen zik tikah ziang hminsinnak so a um ding?” tiah an ti.

8 Cule Jesu in, “Zohman ih an lo bumlonak dingah va fimkhur uh. Ziangahtile ka hmin in mi tampi an ra ding ih, ‘Khrih cu keimah hi ka si,’ tiin le, ‘A cān khal a nai zo,’ tiah an ti ding. Cu tikah an dung va thlun hlah uh. 9 Ral doawknak thupawl le uknak cuhbuaiawknak thupawl nan theih tikah, ṭih hlah uh; ziangahtile cuih thilpawl cu an ra thleng hmaisa tengteng ding, asinan a cemnetnak cu a thleng lohli lo ding,” tiah a ti.

10 ^aCun anih in an hnenah, “Miphun pakhat le pakhat an doaw ding ih, ram khat le ram khat an doaw ding. 11 ^bCule hmun dangdangah ling nasa zetin a hnîn ding ih, hmun dangdangah mangṭam a thleng ding, cule nathri sia a thleng ding. Cun van ihsin thil ṭihnungpawl le hminsinnak rapthlak taktak pawl a lang ding.

21:10^a 2San 15:6; Isa 19:2

21:11^b Isa 29:6; Joe 2:30

12 “Asinan cuih thil hmuahhmuah a thlen hlanah an lo kai ding ih, an lo hrem ding. Sinakok le thawng sungah an lo thlen ding. Ka hmin ruangah siangpahrangpawl le uktupawl hmaiah an lo hruai ding. 13 ^aAsinan cumi cun nan hrangah an hnenih thutheihpitu sinak cān remcâng a lo pe ding. 14 Curuangah ziangtin kan sawn ding tiih ngunngaih zetih ngaihtuah cia lo dingin nan thinlung hngetter uh. 15 Ziangahtile nan ralpawl in an lo elneh ih an lo dokalh thei lo nak dingah, ṭawng thiamnak le fimnak ka lo pe ding. 16 Nan nu le nan pa, nan unaupawl, nan sungkhatpawl le nan rualpipawl in an lo phiarsawm ding ih, mi hrekkhat cu an lo that ding. 17 ^bCule ka hmin ruangah mi hmuahhmuah in an lo hua ding. 18 ^cSikhalsehla nan lu parih sám phang pakhat hman a hloral hrimhrim lo ding. 19 ^dTuarfainak in nan nunnak nan kilhim ding.

21:13^a Fil 1:12

21:17^b Joh 15:21

21:18^c Mat 10:30

21:19^d Mat 10:22

Jerusalem Siatnak ding Thu

20 “Asinan ralkappawl in Jerusalem an kulh nan hmuh tikah, a siatnak a nai a si ti thei uh. 21 Cun Judia peng ih umpawl cu tlangpawl ah tlân hai seh, khaw sungih umpawl khal tlânsuak thluh hai seh, cule khaw lengih umpawl cu khaw sungah lut hlah hai seh. 22 ^aZiangahtile hipawl cu an rak ngan mi thil hmuahhmuah a tlamtlinnak phuba lâk ni an si. 23 Cuih cān ih favun mipawl le nausen hnawi fawp neipawl cu an hmakhua a pit a si! Ziangahtile Judia ram ah vansannak nasa zet a thleng ding ih, cuih minungpawl parah thinlingnak a thleng ding. 24 ^bCule annih cu ralnâm hriam in an tlu ding ih, miphun zakip hnenah ralkaih ih hruaihlo an si ding. Zentelpawl cān a kim hlanlo Jerusalem cu an ke hnuaiah an palbĕt ding.

21:22^a Isa 63:4; Dan 9:24-27; Hos 9:7; Mat 1:22

21:24^b Isa 5:5; Dan 8:13; Thu 11:2

Minung Fapa Ratsalnak

25 ^a“Ni, thlapi le arsipawl parah hminsinnakpawl an lang ding. Cule leilung tlunah miphunpawl cu vansangin an um ding, tifinriat hrûm le tisuarpawl in mipi a buaiter ding. 26 ^bṬihnak le leitlun ih a ra thleng ding mi thilpawl beiseinak in, milai thinlung cu cak loin a um, ziangahtile van-ih huhampawl tla an hnîn ding. 27 ^cCun Minung Fapa cu huham le ropitnak nasa zet thawn mero parih a rat kha an hmu ding. 28 Cuih thilpawl thlen a thawk tikah, tlun lam zoh uhla, nan lu sângter uh, ziangruangahtile nan tlennak cu a nai thlang,” tiah a ti.

21:25^a 2Pe 3:10, 12

21:26^b Isa 34:4; Mat 24:29

21:27^c Suah 3:6, 15; Dan 7:13; Mat 26:44; Thu 1:7

Theipi Kung Thu

29 Cun Jesu in an hnenah tahṭhimnak pakhat a rak sim, “Theipi kung le thingkung hmuahhmuah khi zoh hnik uh. 30 Hnah note an suah nan hmuh tikah, ṭhal cān a nai thlang a si ti nan thei. 31 ^aCuvek thothoin, nannih khal in cuih thilpawl a ra cang ti nan hmuh tikah, Pathian uknak a nai thlang ti thei uh. 32 Thungaiin ka lo sim, cuih thil hmuahhmuah a kim thluh lai hlanlo tuih san minungpawl hi an hloral hrimhrim lo ding. 33 ^bLei le van an hloral ding, asinan ka kamsuakthupawl cu an hloral hrimhrim lo ding.

21:31^a Mat 3:2

21:33^b Mat 5:18

Ralrin a Thupitzia

34 ^a“Nanmah hrangah fimkhur uh, cu lo asile zu hmun năwmcennak, zu rîtnak le himi dam sung nun hrang khawruahharnak in nan thinlung lo phurritter in, nan parah rin lo piin cuih Ni cu a thleng pang ding. 35 Ziangahtile cuih ni cu leilung vangdâp pumpi parih cêng minung hmuahhmuah parah tháng vekin a thleng ding. 36 ^bCuruangah nannih cu a ra thleng ding mi cuih thil zate lak ihsin luat dingih siar tlak nan si thei nak dingah le Minung Fapa hmaiih nan dīn thei nak dingah catbang loin ralring uhla, thlacam ringring uh,” tiah Jesu in a ti.

21:34^a Mar 4:19; 1Th 5:2-7

21:36^b Mat 26:41

37 ^aCuih cān ah, sun ah Jesu in temple kulh sungah thu a zirh, asinan zan ah a suak ih, Olif Tlang tiih an kawh mi ah a va riak. 38 ^bCun mi hmuahhmuah cu zingpit ah a kamsuakthu ngaithla dingin temple kulh sungah an ra.

21:37^a Mat 21:1; 26:55; Mar 11:19

21:38^b Joh 8:2

22

Judas in Jesu Phiarsawm ding a Lung a Kim

1 ^aLanta Puai an ti mi Thilnu telh lo Sang Puai cu a nai thlang. 2 ^bCule puithiam sâng pawl le Dān zirhtupawl in mipi an ṭih ruangah, Jesu thah thei dān ding an hawl.

22:1^a Joh 11:55

22:2^b Mat 12:14

3 ^aCun hleihnih lakih a tel ve mi, Iskariot tiih an kawh mi, Judas sungah Setan a lut. 4 ^bCule Judas cu puithiam sâng pawl le temple kiltupawl hnenah a feh ih, an hnenih Jesu pek thei dān ding thu a va ráwn hai. 5 ^cCule annih cu an lung a awi zet ih, amah cu paisa pe dingin an lung a kim. 6 Judas khal a lung a kim ve. Cule mipi an um lo lai cān teah Jesu phiarsawmdān ding cān remcâng a hawl.

22:3^a Mat 4:10; 10:4

22:4^b Apo 4:1

22:5^c Zek 11:12

Lanta Puai le Bawipaih Zanriah

7 ^aLanta Puai tuu fa no thahnak ding, Thilnu telh lo Sang Puai Ni cu a thleng. 8 ^bCule Jesu in Peter le John kha a thlah ih an hnenah, “Va feh uhla, kan ei ding hrangah Lanta Puai rawl va timtuah uh,” tiah a ti.

22:7^a Suah 12:18-20; Dnp 16:5-8; Mar 14:12

22:8^b Apo 3:1, 11

9 Annih in a hnenah, “Cumi cu khui tawkih lo timtuahsak so na duh?” tiah an sut.

10 Cule anih in an hnenah, “Ngai hnik uh, khawpi sungih nan luh tikah, ti bel cawi pa in a lo táwng ding ih, amah cu a luhnak inn tiang va thlun uh. 11 Cun intêk pa hnenah, ‘Zirhtu pa in na hnenah, “Ka dungthluntupawl thawn Lanta Puai rawl ka einak ding mikhual pindan cu khui tawkah a si?” a lo ti,’ tiah va ti uh. 12 Cun intêk pa in thil ṭul mi timtuah cia mi inn tlunta pindan tumpi cu a lo hmuh ding. Cu tawkah Lanta Puai rawl va timtuah cia uh,” tiah a ti.

13 Cule dungthluntupawl cu an feh ih, Jesu in an hnenih a rak sim cia vek cekciin an va hmu, cule cu tawkah Lanta Puai rawl an timtuah.

14 ^aA tikcu a kim tikah, Jesu cu apostol hleihnih pawl thawn cabuai a hil. 15 ^bCule anih in an hnenah, “Ka tuar hlanah himi Lanta Puai rawl hi nanmah thawn eitlang ding ka duh zet. 16 Ziangahtile nan hnenah ka lo sim a si, Pathian uknak sungah Lanta Puai a tlamtlin lai hlanlo, hih rawl hi ka eisâl nawn lo ding,” tiah a ti.

22:14^a Mat 26:20; Mar 6:30; 14:17-18

22:15^b Mat 16:21

17 Jesu in no cu a la ih, lungawi thu a sim ih, “Hihi la uhla, zemaw uh. 18 Ziangahtile ka lo sim a si, Pathian uknak a ra thlen hlanlo, sabit ti cu ka in nawn lo ding,” tiah a ti.

19 ^aCule sang a la ih, lungawi thu a sim hnuah, a phel ih a pe hai ih, “Hihi nan hrangih ka pek mi ka taksa a si, keimah in cīn ringring nak dingah himi hi run tuah uh,” tiah a ti.

22:19^a Mat 14:19

20 ^aCuvek thothoin zanriah an ei hnuah, no cu a la ih, “Hih no hi ka thisen ih thukham thar, nan hrangih thlet mi a si. 21 ^bAsinan ngai hnik uh, keimah i phiarsawmtu paih kut cu ka zawngah hi cabuai parah a um a si. 22 ^cPathian khawkhan cia mi vekin, Minung Fapa cu a feh taktak ding, asinan Minung Fapa a phiarsawmtu pa cu a hmakhua a pit a si!” tiah a ti. 23 Cun a dungthluntupawl cu an lakih zo bik in cumi cu a tuah ding tiah anmah le anmah lakah suhawk an thawk.

22:20^a Suah 24:8; Isa 42:6; Zek 9:11; 2Ko 3:6; Heb 8:6

22:21^b Sam 41:9

22:22^c Mat 8:20; Apo 2:23

Dungthluntupawl Mithupibik Si Thu an Êlaw

24 ^aCun dungthluntupawl lakah zo so mithupibik ih ruah ding a si, tiin anmai lakah an êlaw rero. 25 Cule Jesu in an hnenah, “Zentelpawlih siangpahrangpawl cu an uk mipawl parah an lal zet. Cutiih mipi parih thuneihnak neitupawl cu mi bawmtupawl tiah an ko. 26 ^bAsinan nannih lakah cun cu vekin si hlah seh, cuhnakin nan lakih mithupibik cu nautasawn vekin um sehla, hruaitu a si mi cu riantu vekin um sawn seh. 27 ^cZiangahtile cabuai hiltu pa maw, rawl zemtu pa so a thupisawn? Cabuai hiltu a thupisawn a si lo maw? Asinan kei cu nan lakah riantu vekin ka um a si. 28 Nannih cu hniksaknakpawl ka tawn cān ah ka hnenih a umtu nan si. 29 ^dCun ka Pa in ka hnenih i rak pek bangtukin, kei khal in nan hnenah lalram ka lo pe ve a si. 30 ^eKa lalram sungih ka cabuai ah nan ei ih nan in thei nak dingah le laltokhampawl parah toin Israel hnám hleihnih pawl thu nan ṭhensak thei nak dingah, cuih thuneihnak cu nan hnenah ka lo pe a si,” tiah a ti.

22:24^a Mar 9:34

22:26^b Mar 9:35; 1Pe 5:5

22:27^c Mat 20:28

22:29^d Mat 25:34; 2Ti 2:12

22:30^e Mat 19:28

Jesu in Peter ih a Phat ding Thu a Phuang

31 ^aCule Bawipa in, “Simon, Simon! Ngai hnik, Setan in sangvut khei vekih lo khei dingin nanmah lo neih a duh a si. 32 ^bAsinan na zumnak cak loih a umlonak dingah na hrangah thla ka cam. Cule keimah lamih na hawikirsal leh tikah, na unaupawl hngetter aw,” tiah a ti.

22:31^a Job 1:6-12; Amo 9:9

22:32^b Joh 17:9, 15; 21:15-17; Rom 8:34

33 ^aSimon in a hnenah, “Bawipa, na zawngah thawnginn sungah le thihnak khalah siseh feh dingin ka tiar a si,” tiah a ti.

22:33^a Joh 11:16

34 Cu tikah Jesu in, “Peter, ka lo sim a si, anih cu ka thei lo, tiah vei thum i phatsan hlanlo, tuihni ah ar a khuang hrimhrim lo ding,” tiah a ti.

A Ra Thleng Lai ding Mi Buainak

35 ^aCule Jesu in a dungthluntupawl hnenah, “Paisa bawm, zâl le kedam keng loih ka lo thlah laiah khan ziang tal tlaksam mi nan nei maw?” tiah a sut hai.

22:35^a Mat 10:9-10

Cule annih in, “Tlaksam mi zianghman kan nei lo,” tiah an ti.

36 Cun Jesu in an hnenah, “Atu cu paisa bawm neitu cun keng seh, cuvek thothoin zâl neitu khal in keng seh, ralnâm nei lo tu cun a sinfen zuar sehla pakhat lei seh. 37 ^aZiangahtile nan hnenah ka lo sim a si,

22:37^a Sam 110:1; Isa 53:12

‘Amah cu dān pahbăltupawl lakih siartel a si,’

tiih ngan mi cu keimah ah a tlamtling tengteng ding. Ziangahtile keimah thawi pehparaw mi thilpawl cu a cemnetnak an thleng zikte thlang,” tiah a ti.

38 Cule annih in, “Bawipa, zoh hnik, hi tawkah ralnâm pahnih a um,” tiah an ti.

Cule anih in an hnenah, “Cucu a tawk a si,” tiah a ti.

Gesmani Hmuan ah Jesu

39 ^aJesu cu a fehsuak ih, a ti ṭheu dān kel vekin, Olif Tlang ah a feh, cule a dungthluntupawl khal in amah cu an rak thlun ve. 40 ^bCu tawk hmun a thlen tikah, an hnenah, “Sualfawrhnak ih nan luhlonak dingah thlacam uh,” tiah a ti.

22:39^a Mat 21:1

22:40^b Mat 6:13

41 Cule an hnen ihsin lung den băn tluk a hlatnak hmun ah a va feh ih, a khuk bil tahratin thla a cam. 42 ^a“Ka Pa, na duh asile, hi no hi ka hnen ihsin lahlo hram aw. Sikhalsehla keimai duhnak vekin si loin, nangmai duhnak vekin si sawn seh,” tiah a ti.

22:42^a Mat 20:22; 26:39

43 ^aCun van ihsin vancungmi pakhat a hnenah a rung lang ih, Jesu cu tha a rung pe. 44 A thin a har tuk ruangah nasa sinsinin thla a cam. Cun a thlan cu nasa zetih thisen leilung parih fawr mi vekin a fawr.

22:43^a Mat 4:11; Mar 1:13

45 A thlacamnak ihsin a tho ih a dungthluntupawl hnenah a va feh, an riahsiat ruangih an ihthah ṭheh kha a va hmu. 46 Cun an hnenah, “Ziangah so nan itthat? Tho uhla thlacam uh, cu lo asile sualfawrhnak ah nan lut pang ding,” tiah a ti.

Jesu an Kai

47 Cutiih Jesu a ṭawng rero laiah, ngai hnik, an kiang naite ah mipi an ra thleng. Hleihnih lakih pakhat Judas an ti mi pa in mipi cu a hruai hai ih, Jesu hnam dingin a hei pan. 48 Cule Jesu in a hnenah, “Judas, Minung Fapa hi hnămnak in maw na phiarsawm?” tiah a ti.

49 Jesu kimvelih um dungthluntupawl in ziang a cang ding ti an hmuh tikah a hnenah, “Bawipa, ralnâm in kan do pei maw?” tiah an ti. 50 Cule anmah lakih pakhat in puithiam lu bik ih siahhlawh pa cu a sat ih, a vawrh lam hna a sahthlak.

51 Cu tikah Jesu in a sawn ih, “Tawk seh,” tiah a ti. Cule a hna cu a thâm ih a damter.

52 Cun Jesu in a hnenih ra puithiam sâng pawl, temple kiltu bawipawl le miupapawl hnenah cun, “Suamhmang kai ding bangin ralnâm le talhtum thawn maw nan rat? 53 ^aTemple kulh sungah ni tin nan hnenah ka um ko nân, in kai fawn lo. Asinan atu hi nanmai cān le thim thuneihnak cān a si,” tiah a ti.

22:53^a Mat 8:12; 26:55; Joh 1:5; 12:27

Peter in Jesu a Phat

54 ^aCule Jesu cu an kai ih, puithiam lu bik inn sungah an hruai. Peter cun hlat nawnin a rak thlun. 55 Tual laiah meisa an tik ih, hmunkhat ah an tokhawm, Peter khal an lakah a rak to ve. 56 Cutiih meisa kiangih Peter a to lai cu hnenum nu pakhat in a hmuh tikah, ṭhaten a zohhliah ih, “Hi pa khal hi Jesu hnenih tel ve mi a si,” tiah a ti.

22:54^a Mat 26:57-58; Joh 18:15

57 Asinan Peter in, “Nunau, cu pa cu ka thei lo,” tiah a phat.

58 Cuih hnu málte reiah a dang pakhat in Peter cu a hmu ih, “Nang khal an lakih mi pakhat na si ve,” tiah a ti. Cu tikah Peter cun, “Milai pa, ka si lo sokhaw!” tiah a ti.

59 Cun nazi pakhat hrawng a rei hnuah, a dang mi pakhat in, “Hi pa hi Jesu hnenih rak um ve mi rori a si, ziangahtile anih khal hi Galili-mi a si,” tiah hngetkhoh zetin a ti.

60 Cu tikah Peter in, “Milai pa, ziang na ṭawng ti ka thei lo!” tiah a ti. Cutiih a ṭawng rero laiah hmakhatteah ar a khuang. 61 Cule Bawipa cu a her ih, Peter a zoh. Cule Peter cun a hnenih, “Ar khuan hlanah vei thum i phatsan ding,” a ti mi Bawipaih ṭawngkam kha a vun máng. 62 Cule Peter cu lengah a suak ih, nasa zetin a ṭap.

Jesu an Hmuhsuam

63 Cun a kiltupawl in Jesu cu an hmuhsuam ih an thăwng. 64 A hmai an tuam hnuah, a hmaiah an beng ih, “Profet thuphuan in thuphuang aw! A lo veltu hi zo a si?” tiah an ti.

65 ^aCule amah dokalhin thangsiatnak a dang thil tampi khal an ṭawng.

22:65^a Mat 16:21

Sanhedrin hmaiah Jesu

66 ^aKhua a van veten, mipipawlih miupapawl, puithiam sâng pawl le Dān zirhtupawl cu an táwngkhawmaw ih, Jesu cu Sanhedrinpawl hnenah an hruai, 67 cule, “Khrih na si le, in sim aw,” tiah an ti.

22:66^a Mat 5:22; Mar 15:1

Cu tikah Jesu in an hnenah, “Ka lo sim asile, nan zum hrimhrim lo ding. 68 Kei khal in thu ka lo suh asile, ziangti lam khalin in sawn lo ding ih in thlah cuang fawn lo ding. 69 ^aAtu thawkin Minung Fapa cu Pathian-ih huham vawrh lamah a to thlang ding,” tiah a ti.

22:69^a Sam 110:1; Isa 53:12; Mar 16:19

70 ^aCun an zaten, “Cuti asile Pathian Fapa na simaw?” tiah an ti.

22:70^a Mat 4:3; 27:11

Cule anih in an hnenah, “Nan ti mi cu ka si ko,” tiah a ti.

71 Cule annih in, “Theihpinak dang kan ṭul nawn maw si? Ziangahtile amai ṭawngkam rori kanmah rori in kan thei zo,” tiah an ti.

23

1 ^aCun mipi cu an zaten an tho ih, Jesu cu Pilat hnenah an hruai.

23:1^a Mat 27:2

A Vei Khatnak Pilat hmaiah Jesu

2 ^aCule Jesu cu sual puh an thawk ih, “Hi pa hin ram mipi a hruaipêng ti kan hmu, Kaisar hnenih ngunkhuai pek ding a kham ih, amah le amah Siangpahrang Khrih ka si a tiaw,” tiah an ti.

23:2^a Joh 19:12

3 Cun Pilat in a hnenah, “Jew-pawlih Siangpahrang na simaw?” tiah a sut.

Jesu in a sawn ih a hnenah, “Na sim vekin a si ko,” tiah a ti.

4 ^aCu tikah Pilat in Puithiam sâng pawl le mipi hnenah, “Hi Paih mawhsualnak zianghman ka hmu lo,” tiah a ti.

23:4^a Mat 27:23; Joh 18:38; 2Ko 5:21; 1Ti 6:13

5 ^aSihmansehla annih cun ṭan an la sinsin ih, “Hi pa hin Galili peng ihsin a thawk ih, hi tawk hmun tiang, Judia peng hmuahhmuah ah thu a zirh ih, mipi a căwktho thluh,” tiah an ti.

23:5^a Mar 1:14

Herod hmaiah Jesu

6 Pilat in Galili ti mi hmin a theih tikah, hi pa hi Galili-mi a simaw si lo ti a sut. 7 ^aCule Pilat in Jesu cu ^bHerod-ih thuneihnak sungih mi a si ti a theih tikah, Herod hnenah a hei kuat, culaifangah amah Herod cu Jerusalem ah a rak um.

23:7^a Mat 14:1

23:7^b Herod: Nauhakpawl thattu Herod-ih fapa Herod Anṭipas a si.

8 Herod in Jesu a hmuh tikah, a lung a awi zet; ziangruangahtile a thuhla tampi a rak thei zo ih, amah hmuh a duhnak a rei zo. Jesu ih tuah mi thilmak hrekkhat tal hmuh ding a rak câk. 9 ^aCun Herod in Jesu cu ṭawngkam tam zetin thu tam zet a sut nân, anih in zianghman a rak let lo. 10 Cule Puithiam sâng pawl le Dān zirhtupawl cu an dīng ih, nasa zetin Jesu cu sual an puh. 11 ^bJesu cu Herod le a ralkappawl in hnihsuahsainak ah an hmang ih, an hmuhsuam, kâwrfual mawi zet an hrukter ih, Pilat hnenah an kuatkirsal. 12 ^cCuih ni roriah Herod le Pilat cu rualpi ah an cang, ziangahtile cuih hlanah cun pakhat le pakhat doral an rak si.

23:9^a Mar 14:61

23:11^b Mar 15:17-19; Joh 19:2-3

23:12^c Apo 4:27

A Vei Hnihnak Pilat hmaiah Jesu

13 Cun Pilat in puithiam sâng pawl, mipi hruaitupawl le mipi a kokhawm. 14 Cule an hnenah, “Hi Pa hi mipi hruaipêngtu pakhat vekin sual nan puh ih, ka hnenah nan rak hruai. Ngai hnik uh, nan hmaiah hi pa cu ka zingzăwifel zo, amah dokalhih sual nan puhnak hmuahhmuah ah hi Paih mawhsualnak pakhat hman ka hmu lo. 15 Herod khal in a hmu lo, amah cu kan hnenah a run thlahkirsal. Cule ngai hnik uh, anih khal in thihnak tlak a tuah mi zianghman a hmu riai lo. 16 ^aCuruangah amah cu ka hrem hnuah, ka thlah ding,” tiah a ti. 17 Ziangahtile cuih Lanta Puai ah Pilat in mipi hnenah mi pakhat khat a suah tengteng a ṭul.

23:16^a Mat 27:26; Joh 19:1; Apo 16:37; 2Ko 11:23-24

18 ^aAsinan mipi cu rual zetin an au ih, “Kha pa kha that awla, Barabbas kha in suahsak aw,” tiah an ti. 19 Barabbas cu khawpi sungih helnak ih a tel ve tu le lai a thah ruangih thawngthlak mi a si.

23:18^a Apo 3:13-14

20 Pilat in Jesu suah a duh ruangah mipi hnenah a simsal. 21 Asinan annih in, “Khengbĕt aw, khengbĕt aw!” tiah an au.

22 Cun a vei thumnak Pilat in an hnenah, “Ziangruangah, ziang thil ṭha lo so a tuah? Amah ah thihnak tlak zianghman ka hmu lo. Curuangah amah cu ka hrem ding ih, ka thlah ding,” tiah a ti.

23 Asinan mipi in aw ring zetin, Jesu cu khengbĕt dingin nasa zetin an dil. Mipi auaw le puithiam sâng pawlih auaw cun a neh. 24 Cule Pilat in an dil vekih tuah dingin thu a ṭhen. 25 Helnak le laithah ruangih thawng an thlak mi pa cu an hnenih suah an duh vekin, Pilat cun a suah. Cule an duhdān vekin Jesu cu an hnenah a pe.

Khraws parah Siangpahrang

26 ^aCule Jesu an hruai laiah, khawte ihsin a ra mi Sairin rammi Simon an ti mi mi pakhat an kai ih, Jesu thlun ih pu dingin a parah khraws cu an ṭhum. 27 Cule mipi in Jesu cu an thlun, cupawl lakah âwm cūm tahratih, Jesu a ṭah rero tu nunau hrekkhat an tel. 28 Jesu cu an lamah a her ih, “Jerusalem fanupawl, ka hrangah ṭap hlah uh, nanmah hrang le nan fāte hrangah ṭap sawn uh. 29 ^bZiangahtile ngai hnik uh, ‘Micingpawl cu mithlawsuak an si, favun dah lo mi pum le naute ih fawh dah lo mi hnawipawl cu hualvanṭha an si,’ tiih an ti cān a thleng leh ding.

23:26^a Mat 27:32; Mar 15:21; Joh 19:17

23:29^b Mat 24:19

30 ^aCun mi in tlangpawl hnenah,
‘In nĕn uh!’ tiin le tlangmûalpawl hnenah,
‘In khuh uh!’ ti an thawk ding.

23:30^a Isa 2:19; Hos 10:8; Thu 6:16

31 ^aZiangahtile a hring mi thingkung parah hivek thilpawl an tuah asile, a ro mi thingkung parah teh ziang tuah hai pei maw?” tiah a ti.

23:31^a Eze 20:47

32 ^aA dang misualrál pahnih khal that dingin, Jesu zawngah an hruai ve. 33 Kalvary an ti mi hmun an va thlen tikah, Jesu zawngah cuih misualrál pahnih cu a vawrh lamah pakhat, a keh lamah pakhat an khengbĕt. 34 ^bCun Jesu in, “Ka Pa, annihpawl hi ngaidam aw, ziangahtile ziang an tuah ti an thei lo,” tiah a ti. Cule a sinfen cu an thlek ih, camcawhfung zûkin an zemaw.

23:32^a Isa 53:12; Mat 27:38; Mar 15:27; Joh 19:18

23:34^b Sam 22:18; Mat 5:44; 11:25

35 ^aMipi cun dīngin an thlir cuahco. Cule hruaitupawl hmanin cupawl zawngah Jesu cu an nautat ve ih, “Mi dang cu a run hai, anih cu Pathian hril mi Khrih asile amah le amah runaw hen seh,” tiah an ti.

23:35^a Sam 22:17; Isa 42:1

36 ^aRalkappawl khal in ra ih sabit zu thûr pein, Jesu cu an hmuhsuam ve. 37 Cule, “Nangmah cu Jew-pawlih Siangpahrang na si le, nangmah le nangmah runaw hmen!” tiah an ti.

23:36^a Sam 22:7; 69:21; Mat 27:48

38 ^aA lu tlunah,

23:38^a Mat 2:2

“HI PA HI JEW-PAWLIH SIANGPAHRANG A SI,”

tiah Grik ṭawng, Laṭin ṭawng le ^aHebru ṭawng pawl ih ngan mi ca an tar.

23:38^a Hebru ṭawng: Hebrumipawl ih hman mi ṭawng a si ih, a taktakah cun Aramik ṭawng a si.

39 Cun cu tawkih an thlai mi misualrál pahnih lakih pakhat in, “Nangmah cu Khrih na si le, nangmah le nangmah runaw awla, kannih khal in run hmen!” tiah Jesu cu a thangsiat.

40 Asinan a dang pakhat in cu pa cu a let ih kawk phahin, “Pathian na ṭih lo maw si, hi pa thawi thiam lo coternak bangrep na co hi? 41 Kannih cun kan thil tuah mi thawn phuawin kan tuar ih, dik zetin kan tuar taktak, asinan hi pa cun thil sual zianghman a tuah lo,” tiah a ti.

42 ^aCule anih cun Jesu hnenah, “Bawipa na lalram ih na rat tikah, i máng hram aw!” tiah a ti.

23:42^a Mat 16:27

43 ^aCule Jesu in a hnenah, “Thungaiin ka lo sim, tuihni ah Paradise ah ka hnenah na um ding,” tiah a ti.

23:43^a 2Ko 12:3-4; Thu 2:7

Khraws parah Jesu a Thi

44 ^aCuih cān cu sun nazi hleihnih hrawng a si ih, sîm lam nazi pathum tiang, ram pumpi ah thimkhawzing a tlung. 45 ^b Cun ni a thim ih, temple hmun thianghlim sungih puanzar cu ṭhen hnih ah a tlêk. 46 ^cCule Jesu cu ring zetin a au ih, “Ka Pa, na kut ah ka thlarau ka lo ap,” tiah a ti. Cutiih a ti hnuah, a hnuk a cat.

23:44^a Amo 8:9

23:45^b Suah 26:31-33; Heb 9:3, 8; 10:19-20

23:46^c Sam 31:5; Mat 27:50; Joh 19:30; 1Pe 2:23

47 ^aCuih cān ah, ralkap 100 hotu in thil cang mi a hmuh tikah, Pathian a thangṭhat ih, “Hi pa cu midingfel rori a si!” tiah a ti.

23:47^a Mat 9:8

48 Cule hi thil zoh dingih a ratlangkhawmtu mipi zate in, thil cang mipawl an hmuh tikah, an âwm an cūm ih an tlungkir. 49 ^aAmah Jesu theitu zate le Galili peng ihsin a thluntu nunaupawl cu hla nawnah an dīng ih, cuih thilpawl cu an thlir.

23:49^a Sam 38:11

Joseph Thlān ah Jesu Phum a Si

50 Cule zoh hnik, cu tawkah Jew-pawlih khua pakhat, Arimathia khawmi Joseph an ti mi pa a rak um, amah cu khawnsil sung tel a si ih, miṭha le midingfel a si. 51 Anih cun khawnsil thu relcat mi le an thil ti mi cu a lung a kim lo. Amah cu Pathian uknak rak hngaktu khal a si. 52 Cu pa cu Pilat hnenah a feh ih, Jesu-ih ruak cu a va dil. 53 Cun Joseph in Jesu-ih ruak cu a lathla ih, puan nem páte in a tuam. Cule zohman an phum dah lo nak lungpi a virh mi thlān sungah a ruak cu a phum. 54 ^aCuih ni cu timlamawk ni a si ih, Sabbath ni a thawk zikte.

23:54^a Mat 27:62

55 Galili peng ihsi Jesu thawi ratlang nunaupawl khal in an thlun ih, thlān le Jesu-ih ruak hlŭmdān cu an hmu. 56 ^aCun an tlungkir ih, rimhmui le hriak rimhmuipawl an timtuah. Cule thupek vekin Sabbath ni cu an cawl.

23:56^a Suah 12:16; Mar 16:1

24

Jesu a Thosal

1 Zarh khat ih a ni khatnak zingthlapit khawfingcah zawngah, cuih nunaupawl cu a dang nunaupawl thawn an rak timtuah cia mi hriak rimhmuipawl tla kengin, thlān ah an va feh. 2 Lung cu thlān ihsin hrilh a si zo ti kha an hmu. 3 Cun a sungah an vung lut ih, Bawipa Jesu-ih ruak cu an hmu lo. 4 ^aCule hitin a si, cuih thuhla ih khawruahhar zetih an um laiah, ngai hnik, mi pahnih cu sinfen tle hruhin an kiangah an rung ding. 5 Cun nunaupawl cun an ṭih tuk ih, lei ah an băwk, cuih mi pahnih cun, “Ziangah so a nung mi cu mithi lakih nan hawl? 6 ^bAnih cu hi tawkah a um lo, a tho zo! Galili peng ih a um laiah nan hnenih a lo sim mi thu kha cing uh. 7 ^c‘Minung Fapa hi misualpawl kut ah pek a si ding ih, an khengbĕt ding. Cule a ni thumnak ah a thosal ding,’ a ti kha,” tiah an ti. 8 ^dCule nunaupawl cun a kamsuakthupawl kha an vun máng.

24:4^a Joh 20:12

24:6^b Mat 17:22

24:7^c Mat 8:20; 16:21

24:8^d Joh 2:22

9 Cun thlān ihsin an kirsal ih, cuih thil hmuahhmuah cu apostol hleikhat hnenah le mi dang hmuahhmuah hnenah an sim. 10 ^aApostolpawl hnenih cuih thilpawl va simtu cu: Mary Magdalin le Joana, James-ih nu Mary le an hnenih rak um ve a dang nunaupawl tla an si. 11 ^bAn ṭawngkampawl cu apostolpawl in thulolak menah an ruat ih, anmah cu an rak zum lo. 12 ^cAsinan Peter cu a tho ih, thlān ah a va tlân. Cule a vung kûn ih puan nem páte tān mi lawng a hmu. Cule thil cang mi thu ah mangbang zetin inn ah a tlung.

24:10^a Mar 6:30

24:11^b Mar 16:11

24:12^c Joh 20:3-7, 10

Emmaus Lamzin ah Jesu a Lang

13 ^aCun ngai hnik, cuih ni thothoah Jerusalem ihsin peng sarih hrawng hla, Emmaus ti mi khaw lamah an lakih mi pahnih cu an rak feh. 14 Cule cuih thil cang mi hmuahhmuah cu an reltlang vivo. 15 Cule hitin a si, cuih thu cu an ṭawng ih an ruahtlang rero laiah, Jesu amah rori in a hei naih hai ih an zawngah a feh ve. 16 ^bAsinan amah an theihthiamlonak dingah an mit cu huhsak an si.

24:13^a Mar 16:12

24:16^b Joh 20:14; 21:4

17 Cule Jesu in an hnenah, “Thinnuam loin feh phahih nan reltlang rero mi kha ziang thu so a si?” tiah a sut hai.

18 ^aCun an lakih mi pakhat Kleopas an ti mi pa in a sawn ih a hnenah, “Nangmah lawng hi maw tu hrawngih thil cang mi thei lo mikhual Jerusalem ih um?” tiah a ti.

24:18^a Joh 19:25

19 ^aCule Jesu in an hnenah, “Ziang thilpawl saw?” tiah a ti.

24:19^a Mat 21:11; Mar 1:24

Cu tikah annih in a hnenah, “Nazareth Jesu-ih thuhla, amah cu Pathian le minung zate hmaiah thil ti ah le ṭawngkam ah a nasa zet mi profet a si. 20 Puithiam sâng pawl le kan hruaitupawl in amah cu thi ko thiam lo coter dingin an ap ih amah cu an rak khengbĕt. 21 ^aAsinan kannih cun amah cu Israel tlentu ding a si tiah kan rak ruahsan. Cuih thil zate tlunah, tuihsun cu cuih thilpawl a cannak ih a ni thumnak a si. 22 A si, kan lakih nunau hrekkhat, zingthlapitih thlān va thlengtupawl in khawruahhar ko in tuah. 23 A ruak an hmuh lo tikah anih cu a nung zo titu vancungmi laraw pawl an hmuh thu relin an ra tlung. 24 Cule kan lakih mi hrekkhat cu thlān ah an va feh ih, nunaupawl ih an sim mi vekin an va hmu, asinan amah Jesu taktak cu an va hmu lo,” tiah an ti.

24:21^a Mat 16:2

25 Cun Jesu in an hnenah, “Mi-âpawl, profetpawl ih an rak sim mi hmuahhmuah hi nan va zum har lawmmam ve! 26 ^aKhrih cun cuih thilpawl cu a tuar tengteng ding ih, a ropitnak sungah a lut ding a si lo maw?” tiah a ti. 27 ^bCule Mosi cazualpawl ihsin a thawk ih, profet cazualpawl hmuahhmuah sungih amai thuhla an ngan mi, Cathiangpawl hmuahhmuah kha an hnenah a simfiang.

24:26^a Heb 2:10; 1Pe 1:11

24:27^b Sem 3:15; Mip 21:9; Dnp 18:15; Isa 7:14; Eze 34:23; Dan 9:24; Mik 7:20; Mal 3:1; Joh 1:45

Dungthluntupawlih Mit Vanter a Si

28 Cun an feh tumnak khua an thlen zik zawngah, Jesu cu hladeuh feh hrih ding vekin a umawter. 29 Asinan annih in, “Kan hnenah riak aw, khua a sim ih a thim thlang fawn,” tiah an kai. Cule an hnenah riak dingin a lut.

30 ^aCule hitin a si, an hnenih cabuai a hil laiah, sang cu a la ih lungawi thu a sim, cule a phel ih an hnenah a pe hai. 31 Cun an mit a hung vâng ih amah Jesu a si kha an theithiam, cule an mithmuh ihsin a hlo. 32 ^bCule anmah le anmah, “Lamzin ih kan hnenih a ṭawng le Cathiangpawl in rak simfiang laiah khan, meisa kāng vekin kan sungah kan thinlung a um tho a si lo maw?” tiah an tiaw.

24:30^a Mat 14:19

24:32^b Sam 39:3

33 Annih cu cuih cān roriah an tho ih, Jerusalem ah an kirsal. Cule cu tawkah mi hleikhat pawl le an hnenih um mipawl an rak umkhawm kha an va hmu. 34 ^aCupawl cun, “Bawipa cu a thosal taktak, Simon hnenah a lang zo,” tiah an rak ti. 35 Cule annih in lamzin ih thil cang mipawl le sang a phel tikih amah an rak theihthiam thu an sim ve.

24:34^a 1Ko 15:5

Dungthluntupawl hnenah Jesu a Lang

36 ^aCuih thilpawl an rel rero laiah, Jesu amah rori cu an lakah a rung dīng ih an hnenah, “Nan hnenah hnangamdaihnak um seh,” tiah a ti.

24:36^a Joh 20:19, 21, 26

37 ^aAsinan annih cu an lâu tuk ih ṭihnak in an khat, thlarau hmu-ah an ruataw. 38 Cule anih in an hnenah, “Ziangah so nan thin a phan? Ziangah so nan thinlung ah rinhlelhnak a suah? 39 ^bKa kut le ka ke pawl hi zoh hnik uh, keimah rori kha ka si ko. I thâm hnik uhla, i zoh hnik uh, ziangahtile thlarau cun titsa le ruh a nei lo, kei cun in hmuh vekin titsa le ruh ka nei a si,” tiah a ti.

24:37^a Mar 6:49

24:39^b Joh 20:27; 1Joh 1:1

40 Cutiih a ṭawng ṭheh hnuah, a kut le a ke pawl a hmuh hai. 41 Cule annih cun an aipuan tuk nak ah an zum thotho lo, cule mangbangih an um laiah, anih in an hnenah, “Hi tawkah rawl ziang tal nan nei maw?” tiah a ti. 42 Cule annih in amah cu ngasa em hmin cia le khuai thlar thlar khat an pe. 43 ^aCule cumi cu a la ih, an hmaiah a ei.

24:43^a Apo 10:41

Thupek Ropi

44 ^aCule anih in an hnenah, “Nan hnenih ka um laiah Mosi Dān bu sungah siseh, Profetpawlih cazual sungah siseh, Sam bu sungah siseh keimai thuhla an rak ngan mi hmuahhmuah cu a tlamtling thluh ding tiih ka lo sim mi kamsuakthupawl cu hipawl hi an si,” tiah a ti. 45 Cule Cathiangpawl an theihthiam thei nak dingah, an theihthiamnak a ăwnsak hai.

24:44^a Sam 2:6-7; 110:1, 4; Mat 1:22

46 ^aCun anih in an hnenah, “Khrih in a tuar tengteng ding ih, a ni thumnak ah mithi lak ihsin a thosal ding tiih ngan a si. 47 ^bLungthlĕngnak le sualpawl ngaidamnak thu cu Jerusalem ihsi thawkin, miphun hmuahhmuah hnenah amai hmin in sim a si ding. 48 ^cCule nannih cu hi thupawl theihpitu nan si. 49 ^dNgai hnik uh, ka Paih thutiam cu nan parah ka run thlah; asinan tlun lam ihsin huham thawi thăwm nan si lai hlanlo, Jerusalem ah rak um uh,” tiah a ti.

24:46^a Mat 16:21

24:47^b Isa 2:3; Mat 28:19; Apo 5:31

24:48^c Joh 15:27; Apo 1:8; 1Pe 5:1

24:49^d Joh 14:16; Apo 1:4

Van ah Jesu a Kai

50 ^aCule Jesu in Bethany khua tiang a hruaisuak hai, cule a kut a thlir ih anmah cu thlawsuah a pe. 51 ^bCule hitin a si, mal a sawm hai laiah, an hnen ihsin anih cu ṭhen a si ih, van ah lâksohin a um. 52 Cule amah an biak hnuah, Jerusalem ah aipuang zetin an tlungkir. 53 ^cCule an tikcu zaten temple kulh sungah Pathian thangṭhatnak le Pathian hnenih lungawi thu simnak ah an hmang. Amen.

24:50^a Mat 21:17

24:51^b 2Sp 2:11

24:53^c Apo 2:46