About Bible Thianghlim | ©

BibleThianghlim – APOSTOL

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

APOSTOL

  • A ngantu: Luke
  • A siartu: Zentel zumtupawl
  • Ngan kum: A.D. 61

Thukham Hlun in Messiah-ih rawngbawlnak ding a rak simsung cia. Isaiah in Messiah-ih rawngbawlnak cu Jew-pawl le Zentelpawl hnen tiang a si ding thu a sim (Isa 42:1-7; 49:1-7). Jesu in leitlun ih rawngbawlnak a rak neih laiah a tambik cu Jew-pawl hnenah a si. Apostolpawlih Cangvaihnak cabu in Zentelpawl hnen tiang thuthangṭha a darhnak thu in sim. Pentikos ni ah Khrih in zumtupawl hnenah a Thlarau a burh ih, leitlun ram kip ah anmah cu a thlah hai. Himi cabu câng hmaisabik in Apostolpawlih Cangvaihnak cabu hi Luke in Theofilas hnenih a vei hnihnak ca a kuat mi a si ti in sim (Luke Thuhmaihruai zoh aw). Curuangah Zentel zumtupawl pitlinternak dingah hi cabu sungah kawhhran thuanthu ngan a si. Hi cabu sungih thil cang mipawl hi A.D. 30 ihsin 60 karlakih thil cang mipawl an si. Luke in A.D. 61 hrawngah hi cabu hi a ngan a si men thei.

Kawhhran thawhkehdan Zentel zumtupawl in hna ih an theih tikah thusuhnak le theih duhnak tampi an rak nei men thei ih, cubang thusuhnakpawl sannak cu hi cabu ah kan hmu. Hi cabu in Khrih thihnak, phum a sinak le a thawhsalnak cu tuihni hrangih a thupitzia a tarlang. Khristian biaknaksakhua le Jew biaknaksakhua pehtlaihawkdān a tarlang ih, Khristian biaknaksakhua in Jew le Zentel a huapdan a langter. Khristian biaknaksakhua hi Rom uknak hnaihnawktu a si lozia a langter. Huham thawn leitlun pumpi ih Khristian biaknaksakhua a rak karhdan thuanthu hi cabu sungah Luke in a ngan.

Khristian biaknaksakhua ram khat hnu ram khat a darhdan zulhin Apostolpawlih Cangvaihnak cabu sungah Luke in a remkhawm. A tlangpithuin hi cabu in Apo 1:8 ih zumtu hmaisapawl hnenih Bawipa in rawngbawlhna a rak pek mi zulhin a ngan. Cipciar sinsin ih kan sim asile, Luke in hi cabu hi ṭhen tampi ah a ṭhen ih, ṭhen tin ih cemnetnakah thukharnak a ret (6:7; 9:31; 12:24; 16:5; 19:20; 28:30-31 zoh aw). Thuṭhenpawl cu hitivekin a si: Jerusalem (1:1-6:7), Judia, Galili le Samaria (6:8-9:31), Antiok (9:32-12:24), Asia Minor (12:25-16:5), Aegean Tifinriat kiangkap (16:6-19:20) le Rome (19:21-28:30-31) tiin.

Hi cabu sungih Luke in thunetnak a tuah mi ah Khrih-ih rawngbawlhna a cem hrih lozia a tarlang. Khrih cun a kamsuakthu hmangin le a dungthluntupawl hmangin a Thlarau in a kawhhran dĭn a peh vivo (13:47; Isai 49:6 thawn zohkăwp aw).

Thuhlawm Ṭhen

  • I. Jerusalem ih Bawipa thluntupawl (1:1-6:7)
  • II. Judia, Galili le Samaria ah Bawipa thluntu an karh (6:8-9:31)
  • III. Antiok ah Bawipa thluntu an karh (9:32-12:24)
  • IV. Asia Minor ah Bawipa thluntu an karh (12:25-16:5)
  • V. Aegean Tipi lamah Bawipa thluntu an karh (16:6-19:20)
  • VI. Rom ah Bawipa thluntu (Paul) an karh (19:21-28:31)

1

Thlarau Thianghlim Tiamkămnak

1 Maw Theofilas, Jesu in tuah ding le zirh dingih a rak thăwk zo mi hmuahhmuah, 2 tlun lamih laksoh a si ni tiangih, Jesu ih tuah mi kha na hrangah ka ca hmaisa sungah khan ka rak ngan. A hril cia zo mi apostolpawl cu Thlarau Thianghlim hmangin thu a pe hai. 3 A tuar hnuah cuih a hril mipawl hnenah amah rori a phuanglangaw ih, a nung rori a si ti nĕmhngehnak tampi pein ni 40 sung an hnenah a lang. Pathian uknak thu thawi pehparaw mi thilpawl a sim. 4 Cule hmunkhatih an tawnkhawmawk laiah, an hnenah, Jerusalem suahsan loin, paih thutiam mi rak hngak sawn dingin thu a pe hai. Anih in, «Himi cu ka hnen ihsi nan rak theih mi thutiam a si, 5 ziangahtile John cun tidai ah baptisma a pe taktak ko, asinan atu ihsin ni rei lo teah Thlarau Thianghlim ah baptisma pek nan si ding,» tiah a ti.

Jesu Van ih Laksohnak

6 Curuangah hmunkhatih an tawnkhawmawk ṭum ah, dungthluntupawl in, «Bawipa, tuih cān ah hin Israel-mi hnenah lalram cu na dĭntharsal ding maw?» tiah an sut.

7 Cule an hnenah, «Cuih tikcucān le ni cu Pa in amai thuneihnak in a khiah mi a si ih, nannih ih theih ding a si lo. 8 Asinan Thlarau Thianghlim nan parih a rung thlen tikah, huham nan ngah ding; cule Jerusalem ah, Judia peng pumpi ah, Samaria peng pumpi ah le leilung tlun dĕng tiangin ka thutheitu nan si ding a si,» tiah a ti.

9 Cun hi thilpawl a sim hnuah, an zoh keukeu laiah anih cu laksoh a si ih, mero in a tuam ih an hmu thei nawn lo. 10 Cule a kaisoh laiah le van lam zoh cuahco ih an um laiah, ngai hnik, mi pahnih puan var sĭnin an kiangah an rung ding. 11 Annih in, «Nannih Galili-mipawl, ziangahso hi tawkah van lam zoh cuahco ih nan um? Nan hnen ihsin van ih laksoh mi, hih Jesu rori hi atu van ih a kaisoh lai nan hmuh vekin, a ra kirsal ding a si,» tiah an ti.

Mathias Hrilnak

12 Cun annih cu Sabbath ni afeh sian zât fáng a si mi, Jerusalem kiangih um, Olif Tlang an ti mi ihsin Jerusalem ah an kir. 13 Cule inn ah an va lut ih, Peter, James, John, Andru, Filip, Thomas, Bartholomeo, Mathai, Alfia fapa James, bZilot an ti mi pa Simon, James-ih fapa Judas tepawl cu an umnak hmun pindan tlunta ah an hung kai. 14 Cuih mipapawl hmuahhmuah cu nunau hrekkhat le Jesu-ih nu Mary le Jesu-ih naupalepawl thawn lungrualten catbang loih thlacam le dil in an um.

1:12a feh sian zât: Farlung 6 (Jerusalem in Olif Tlang tiang).

1:13b Zilot: Phunhnam ṭăn zettu poliṭik mi tinak a si. Khrih dungthluntu a si hlanah, Simon hi phunhnam ṭăn zettu poliṭik mi a rak si dah.

15 Cule cuih cān ah Peter cu mipum 120 hrawng umnak dungthluntupawl lakah a hung ding ih, 16 «Pulepawl le unaupawl, Thlarau Thianghlim in David kâ ihsin hlanih a rak sim cia mi Jesu kaitupawl hruaitu Judas-ih thuhla Cathianghlim ih a sim cia mi cu a kim tengteng a ṭul a si. 17 Ziangahtile anih cu kan lakih tel ve mi pakhat a si ih, himi rawngbawlnak ah covo a nei ve.

18 «Hi pa hin a thilsual tuah mi man ih a ngah mi in ló a lei; cule cu tawkah a linglet in a tla, a laifangin a kuai ih, a sungrilpawl hmuahhmuah an pawt thluh. 19 Cule Jerusalem ih cêng mi hmuahhmuah in hi thu cu an thei ṭheh. Cun anmai ṭawng in cuih ló cu Akeldama tiah an ti. A sullam cu, ‹Thisen ló,› tinak a si.

20 «Ziangahtile Sam Cazual sungah,

‹A cēnnak hmun cu lawnglakin um sehla,
A sungah zohman um hlah hai seh,› tiin le,
‹A dinhmun cu mi dang in luah seh,›

tiih ngan a si.

21 «Curuangah kan hnenih um mi lak ihsin mi pakhat kan hril a ṭul. Cu pa cu Bawi Jesu kan lakah suak le lut ih a um sung hmuahhmuah ih kan hnenih um ringring vetu a si pei. 22 John in Jesu baptisma a pek ihsin Jesu kan hnen ihsin laksoh a si ni tiang kan hnenih umtu a si pei, an lakih pakhat cu kan zawngih Jesu-ih thawhsalnak theihpitu pakhat a si pei,» tiah a ti.

23 Cule mi pahnih: Jusṭas tiih an kawh mi Barsabas an ti mi Joseph le Mathias an hril. 24–25 Cule annih in, «Mi hmuahhmuah thinlung theitu Bawipa, amai hmun ih a feh theinak dingah Judas in a tluksăn mi hi rawngbawlnak le Apostol hna luah dingin hi mi pahnih lakah zo deuh na hril ti in hmuh aw,» tiah thla an cam. 26 Cule an pahnih hrangah camcawhfung an zûk ih, cuih fung cu Mathias parah a tla. Cule amah cu apostol hleikhat lakih siartel a si.

2

Thlarau Thianghlim a Rung Thleng

1 Pentikos ni a thlen tikah, an zaten hmunkhatah lungrualten an umkhawm. 2 Cule hmakhatteah van ihsin thlipi nasazet hrang vek awnthawm a rung thleng ih, an tokhawmnak inn a khat ṭheh. 3 Cun meisa alh vek a si mi, a ṭhenaw mi leipawl cu an hnenah an lang ih, mi pakhat par cio ah an ṭhumaw. 4 Cule an zaten Thlarau Thianghlim in an khat ih, Thlarau in ṭawng phun dangdangih ṭawng theinak a pek vekin ṭawng an thăwk.

5 Cule van rāng hnuaiih miphun zakip lak ihsin a ra mi, sakhawmi, Jew-pawl Jerusalem ih an cēn laifang a si. 6 Cuih thawmvâng an theih tikah, mipi an rakhawm. A ra mipawl in an ṭawng mi cu anmai ṭawng ciar ih ṭawng in an theih ruangah an thin a buai. 7 Cun cuih thil cang mi ruangah, an zaten khawruahhar le mangbang zetin an um ih, pakhat le pakhat, «Zoh hnik, a ṭawng rero tupawl hi Galili-mi an si thluh ko lo maw? 8 Ziangtin saw kanmai suahkeh ṭawng cio ih kan theih? 9 Kannih cu Parthian ram, Media ram, Elam ram le Mesopotamia ram ih umpawl, Judia ram le Kappadosia ram, Ponṭas ram le Asia ram, 10 Frizia ram le Pamfilia ram, Izip ram le Libia ram sung Sairin khaw kiang ihsin a ra mi, Rom ihsin a ra mi Jew-pawl le an biaknaksakhua ih a lut mipawl, 11 Khirit tikulhmi le Arabia rammi tla kan si. Pathian ih thilmak tuah mipawl an sim tikah, kanmai ṭawng cio in kan rak thei,» tiah an tiaw. 12 An zaten cuih thil cang mi ah cun an mang a bang zet ih, an thin a buai. Pakhat le pakhat, «Hihi a sullam ziang a si pei?» tiah an tiaw.

13 Asinan mi dangpawl cun hmuhsuam phahin, «Hipawl hi sabitzu thar an ri a si hi!» tiah an ti.

Peter-ih Thusimnak

14 Peter cu apostol hleikhat pawl zawngah a hung ding, aw ring zetin thu a sim ih an hnenah hitin a ti, «Judia mipapawl le Jerusalem khaw sungih cêngpawl hmuahhmuah, hihi theihter si uhla, ka ṭawngkampawl ngai hnik uh. 15 Ziangahtile atu hi zing nazi pakua lawng a si lai ih, nan ruah vekin hipawl hi an ri lo. 16 Cuhnakin, hihi profet Joel in:

17 ‹Ni netabik cān ah hih thilpawl hi a cang ding, Pathian in a ti,
Mi hmuahhmuah parah ka Thlarau ka burh ding.
Nan fapapawl le nan fanupawl cun profet thuphuan in thu an phuang ding,
Nan minopawl in larnak an hmu ding,
Nan patarpawl in mang an man ding.
18 Cule ka siahhlawh mipapawl le ka siahhlawh nunaupawl tlun khalah,
Cuih cān ah cun ka Thlarau ka burh ding ih,
Profet vekin thu an phuang ding.
19 Tlun van ah, mangbangzapawl le
Thuai lam lei parah hminsinnakpawl ka langter ding.
Cuih hminsinnakpawl cu thisen, meisa le
Meikhu sah zet an si ding.
20 Bawipaih Ni ropi le maksak a thlen hlanah,
Ni khi thim ah le thla khi thisen ah a cang ding.
21 Cule hitin a si ding,
Zokhal Bawipaih hmin a kotu cu rundam a si ding,›

tiih a rak sim mi kha a si.

22 «Israel-mipawl, hi ṭawngkampawl hi ngai hnik uh, Pathian in Nazareth Jesu cu nan lakah thilmakpawl, mangbangzapawl le hminsinnakpawl amah Jesu hmangih Pathian ih a tuah mipawl in nanmah rori ih nan theih vek khan a nĕmhnget a si. 23 Pathian khawkhan cia vek le ziang a cang ding ti a theih cianak vekin, Pathian in Jesu cu nan hnenah a lo pe a si. Nannih in dān nei lo pawl kut in nan kai, nan khengbĕt ih, nan that. 24 Asinan Pathian in thihnakih tuarharnak cu a cemter ih, a thotersal zo. Ziangruangahtile a parah thihnak in kaihtān theinak huham a nei lo. 25 Ziangahtile amah thawn pehparawin David in,

‹Bawipa cu ka hmaiah ka hmu ringring.
Amah cu ka vawrh lamih a um ruangah ka hnîn lo ding.
26 Curuangah ka thinlung cu lungawiaipuangin a um ih ka lei cu a lung a awi.
Cuihhleiah ka taksa khal ruahsannak ah a cawlhahdam ding.
27 Ziangahtile ka thlarau cu Mithi khua ah na tân ta lo ding ih,
Na Mi Thianghlim cu a ṭawihrál khal na siang lo ding.
28 Nang cun nunnak lamzin i hmuh zo;
Na hmaika-ah aipuannak in i khatter ding,›

tiah a ti a si.

29 «Pulepawl le unaupawl, purêng David a thih thu le an phum thu ngam zetin lo sim ning. Tuihni tiang a thlān cu kan hnenah a um. 30 Profet a si ruangah le taksa dān ih a rilrah lak ihsin amai laltokham parih to dingin Khrih cu a thoter ding ti Pathian in a hnenah thutiamkam thawn sia a săm ti a theih ruangah, 31 anih in hihi hmu cia-in Khrih thawhsalnak thu cu a rak sim cia, Pathian in a thlarau cu Mithi khua ah a tân ta lo. A titsa khal a ṭawihrál lo tiah a ti. 32 Cuih Jesu cu Pathian in a thoter a si ti cu kan zate hin a theihpitu kan si. 33 Curuangah Pathian in Jesu cu a khaisâng ih a vawrh lamah a ret. Cule Pa in a tiamkam mi Thlarau Thianghlim cu a hnenah a pe, atu ih nan hmuh le nan theih mi hi Jesu ih thletbung mi a si.

34 «Ziangahtile David cu van ah a hung kai lo, asinan amah rori in,

‹Bawipa in ka Bawipa hnenah,
«Na ralpawl na keretnak ih ka tuah hlanlo,
35 Ka vawrh lamah to aw,» a ti a si,›

tiah a ti.

36 «Curuangah Israel sungza hmuahhmuah in hihi fiangfaiten thei uh, nan khĕnthat mi Jesu kha Pathian in Lal le Khrih ah a tuah zo a si,» tiah a ti.

37 Mipi in cuih thu an theih tikah, an thin a sunna tuk ih, Peter le apostol dangpawl hnenah, «Pulepawl le unaupawl, ziangso kan tuah ding?» tiah an ti.

38 Cun Peter in an hnenah, «Nan sualpawl ngaidam a si theinak dingah nan lung thleng uh, cule nan zaten Jesu Khrih hmin in baptisma co uh, cule Thlarau Thianghlim thilpek nan co ding. 39 Ziangahtile thutiamkam cu nanmah, nan fāte le hlapi ih a um mipawl hrang khalah a si. Bawipa kan Pathian ih a kawh ding mipawl hmuahhmuah hrang khalah a si,» tiah a ti.

40 Cule Ṭawngkam dang tampi in a theihter hai ih an hnenah, «Tulai misualrálpawl lak ihsin thiarfihlim aw uh,» tiah tha a pe hai. 41 Cun lungawi zetih a ṭawngkam a rak cohlangtupawl in baptisma an co ih, cuih ni ah mi 3000 hrawngin an hnenah an ra bêt.

Pawlkawmawknak

42 Cule apostolpawlih zirhnak ah le pawlkawmawknak ah, sang phel le thlacamin fekten an umpeh vivo. 43 Cun mi hmuahhmuah parah ṭihnak a thleng, cule apostolpawl in mangbangza le hminsinnak tampi an tuah. 44 A zumtu hmuahhmuah cu hmunkhatah an umkhawm ih, thil ziangkim an neih mi an ṭawmaw. 45 Cule an thil neih mipawl le an thilripawl an zuar ih, an ṭuldān cio vekin, an zuar man sum cu an zaten an zemaw.

46 Ni tin lungrualten temple kulh sungah an tawngkhawmaw. Inn khat hnu inn khat ah sang an phel ih, lungawinak le tăngdawrnak thinlung thawn rawl an eikhawm. 47 Pathian an thangṭhat ih, mi hmuahhmuah hnenin duhsaknak an ngah. Cule ni tin Bawipa in rundam mipawl cu kawhhran ah a bêt vivo.

3

Kebái Kutdawh Damternak

1 Ni khat cu Peter le John kha thlacam tikcu sîm lam nazi pathum ah temple kulh sungah an feh. 2 Cule a suahkeh ihsin a ke a bái mi pa pakhat cu Mawi tiih an kawh mi, temple kulh kăwtka ah băwmnak thilpek dil dingah ni tin an ret. Temple kulh sungih lutpawl hnenah băwmnak thilpek a dil. 3 Anih in temple kulh sungih Peter le John an luh zik kha a hmuh tikah, băwmnak thilpek a dil hai. 4 Cule Peter cun John thawn cu pa cu mit ṭhep loin ṭhaten a zoh ih, «In zoh hnik,» tiah a ti. 5 Anih cun an hnen ihsin thil pakhat khat ngah ding beiseiin, ṭha zetin a zoh hai.

6 Cun Peter in, «Sui le ngun ka nei lo, asinan ka neih mi ka lo pe, Nazareth Jesu Khrih hmin in ding awla, feh aw,» tiah a ti. 7 Cule Peter cun cu paih vawrh lam kut in a kai ih, a dinter. Hmakhatteah cu paih ke le a kemit ruhpawl cu an cak. 8 A hung tho ih a ke in a ding, cule a feh. Cutin feh phah, khir phahin Pathian a thangṭhat ih, anmai zawngah temple kulh sungah a lut. 9 Cutiih feh phahih Pathian a thangṭhat cu mi hmuahhmuah in an hmu. 10 Cun Mawi tiih an kawh mi temple kulh kăwtka ih to i băwmnak thilpek diltu a si ti kha an theih tikah, a parih thil cang mi ruangah an mang a bang ih an khawruah a har ngaingai.

Peter-ih Thusim

11 An damter mi kebáipa cu Peter le John hnenih a um ringring kha an hmuh tikah, mi hmuahhmuah cu an mang a bang zet ih, Solomon hulhliap an ti mi ah, an hnenah an ra tlânkhawm. 12 Cumi cu Peter in a hmuh tikah, an hnenah, «Israel-mipawl, ziangahso himi ah nan mang a bang ih, kanmah riangri mit ṭhep loih in zoh? Kanmai huham le kanmai Pathian ngaihsaknak in hi pa kan fehter ah maw nan ruah? 13 Abraham, Isak le Jakob ih Pathian, kan pupápawlih Pathian cun a Siahhlawh Jesu cu a sunlawih zo. Anih cu Pilat in suah dingih thu a relcatsak cia zo mi, mipi hnenih nan pek mi pa, Pilat hmai rori ah nan rak phatsan mi pa kha a si. 14 Mi Thianghlim le Mi Dingfel cu nan rak hnáwng ih, laithatpa nan hnenih suah dingin nan dil riangri. 15 Cule nunnak Búlhrampi cu nan that. Asinan Pathian in anih cu mithi lak ihsin a thoter zo ih, cuih thu a theihpitu cu kanmah hi kan si. 16 Nan hmuh le nan theih mi, hi kebáipa hi Jesu hmin zumnak in cahter a si. Jesu thawngih a ra mi zumnak in nan zate hmaiah hih damngah ververnak hi amah cu pek a si.

17 «Sikhalsehla ka u le ka nau tla, nan hruaitupawl khal in thutak thei lo piin cuih thilpawl cu an rak tuah vekin nannih khal in nan tuah a si ti ka thei. 18 Asinan cuih thilpawl cu Pathian in a profetpawl hmuahhmuah ih kâ in Khrih in a tuar ding tiih thăn cia zo mi cu, Jesu in a tlamtlingter thluh zo. 19 Curuangah Bawipa hnen ihsin thawsuah cān a thlennak dingah le nan sualpawl thaihloh a sinak dingah, nan lung thleng uhla, Pathian lamah hawikir uh, 20 cule a hlanih nan hnenih an rak sim zo mi, Khrih Jesu cu nan hnenih a run thlahnak dingah a si. 21 Pathian ih thil ziangkim a rĕmthar cān a thlen hlanlo, Jesu cu van ah a um ding ti mi cu Pathian in a thianghlim mi profetpawl hmuahhmuah ih kâ in leilung um thăwk ihsin a rak tiamkam cia zo. 22 Ziangahtile Mosi in pupápawl hnenah a rak sim ngai a si, ‹Bawipa nan Pathian in keimah vek Profet pakhat nan unaupawl lak ihsin nan hrangah a suakter ding. Nan hnenih a sim mi pauhpauh, ziangkim in amah cu ngaithla uh. 23 Cule hitin a si ding, cuih Profet thu a ngaithla lo tu cu mipi lak ihsin sahthlak lellel a si ding,› tiah a ti. 24 A si, profet Samuel ihsin cumi hnuih a ra mi profetpawl hmuahhmuah in tuih san thupawl hi an rak sim cia a si. 25 Nannih cu profetpawlih tefa le Pathian in kan pupápawl hnenih a tuah mi thukham ro cotu nan si. Abraham hnenah, ‹Na cithlah ah leilung tlunih hrin hmuahhmuah thlawsuah an si ding,› tiah a sim. 26 Nan ṭhatlonak ihsin hawikirsalnak thlawsuah a lo pek cio nak dingah, Pathian in a Siahhlawh Jesu a thawhter hnuah, a hmaisabikah nan hnenah a thlah a si,» tiah a let hai.

4

Sanhedrin hmaiah Peter le John

1 Mipi hnenih thu an sim rero laiah, an hnenah puithiampawl, temple kiltu bawi le Sadusipawl an ra thleng. 2 Apostolpawl in Jesu thawngin mithi thawhsalnak a um ding ti an zirh le an thăn ruangah hruaitupawl cu an thin a buai. 3 Cule Peter le John cu an kai ih, khua a tlai zo ruangah thawnginn ah a thaisun tiang an khum. 4 Sikhalsehla kamsuakthu a theitu mi tampi in an zum ih, patling hlir 5000 hrawng an si.

5 Cule hitin a si, a thaisun ah hruaitupawl, miupapawl le Dānzirhtupawl Jerusalem ah an tawngkhawmaw. 6 Cu tawkah puithiam lubik Annas, Kaiafas, John, Alexander le puithiam lubikih sungkhat dangpawl khal an um. 7 Peter le John cu an hruai ih an laiah an ret, «Ziang huham in asilole ziang hmin in hihi nan tuah?» tiah an sut.

8 Cun Peter cu Thlarau Thianghlim in a khat ih an hnenah, «Mipi hruaitupawl le Israel upapawl, 9 midamlopa parih thil ṭha tuah mi thu ah tuihsun ah ziangtin damter a si ti in sut asile, 10 nan zaten hihi thei uh, Israel mipi hmuahhmuah khal in thei uh. Nan khĕnbet mi, Pathian in mithi lak ihsin a kaihthawh mi, Nazareth Jesu Khrih hmin in hi pa cu damngah verver in, nan hmaiah a ding a si. 11 Cuih Jesu cu, nannih inn saktupawl ih nan hnawn mi lungto, a kilih lungto pawimawhbik ih ra cang mi a si. 12 Rundamnak cu zo dang hnen hmanah a um lo, ziangahtile van rāng hnuaiih minung lakah rundam kan si theinak dingah pek mi hmin dang a um lo,» tiah a ti.

13 Peter le John ih ralṭhatzia an hmu ih, tlawngkai lo le zirnak nei lo an si ti an theih tikah, an mang a bang zet. Annih cu Jesu hnenih rak um dah rero mi an si ti an thei. 14 Cule damter mi pa cu an hnenih a din kha an hmu ih, dodalnak zianghman an ṭawng thei lo. 15 Cule Sanhedrin thuṭhennak ihsin suak dingin thu an pe ih, anmah te lawng thu an rel, 16 «Hipawl hi ziangtin kan tuah pei? Anmah hmangih hminsintlak thilmak tuah mi cu Jerusalem khaw sungih a cêng mi hmuahhmuah hnenah a fĕng tuk zo ruangah, kan êl thei lo. 17 Asinan hih thu mipi hnenih a karhzailonak dingah, Jesu hmin in zo hnen hmanah thusim nawn lo dingin, nasazetin kan hro pei,» tiah an ti.

18 Cule an ko hai ih, Jesu hmin ih thusimsal le thuzirhsal nawn hrimhrim lo dingin thu an pe. 19 Asinan Peter le John cun an sâng ih an hnenah, «Nanmai thulun maw, Pathian thulun so, Pathian mithmuhah dik sawn ti hi nanmah in ṭhencat hnik uh. 20 Ziangahtile kan hmuh mi le kan theih mi thilpawl hi sim loin kan um thei lo a si,» tiah an ti. 21 Cule anmah cu an hrobêt ih an thlah, mi hmuahhmuah in Pathian ih thil tuah mi ruangah Pathian an thangṭhat. Curuangah anmah cawhkuan pek theinak lamzin an hmu thei lo. 22 Ziangahtile himi damnak hminsinnak tuahsak a si mi pa cu kum 40 tlun mi a si.

Zumtupawlih Thlacamnak

23 Peter le John cu thlah an si tikah, an rualpipawl hnenah an feh ih, puithiam sângpawl le miupapawl ih an sim mi thupawl cu an va sim. 24 Cuih thu cu hna ih an theih tikah, Pathian hnenah aw suahin lungrualten, «Maw Bawipa, nang cu lei le van le tifinriat le a sungih um mi hmuahhmuah a tuahtu Pathian na si. 25 Na siahhlawh David kâ in, nang cun thu na sim,

‹Ziangah so miphunpawl an thin a rak heng ih,
Minungpawl hin thil ṭhahnem lo phiarsawmnak an tuah?
26 Bawipa le Khrih dokalh dingin,
Lei siangpahrangpawl an ding ih,
Hruaitupawl hmunkhatah an pungkhawm a si,›

tiah na rak ti.

27 «Ziangahtile hriak na thih mi na Siahhlawh thianghlim Jesu dokalh dingah aHerod le Ponṭias Pilat cu Zentelpawl le Israel-mipawl thawn an rak pungkhawm ngaingai. 28 Na kut cak le na remruahnak in cangsuak leh dingih na rak khiah cia mi kimter dingah a si. 29 Atu ah, Bawipa, zoh hnik, an mihro rero nak hi hminsin aw, na siahhlawhpawl in ralṭha zetih na kamsuakthu an phuan theinak dingah bawm hai hram aw. 30 Na Siahhlawh thianghlim Jesu hmin in mi damter dingah le hminsinnakpawl le mangbangzapawl tuah dingah na kut pharh hram aw,» tiah thla an cam.

4:27a Herod: Nauhakpawl thattu Herod-ih fapa Herod Antipas a si.

31 Nasa zetih thla an cam ṭheh tikah, an umkhawmnak hmun cu a hnîn. Cule an zaten Thlarau Thianghlim in an khat ih, ralṭha zetin Pathian kamsuakthu an phuang.

Zumtupawl an Thil Neih an Ṭawmaw

32 Zumtu mipi cu an zaten thinlung le ruahnak hmunkhatten an um. Zohman in an neih mi thil kha ka bul ta a si ti loin an neih mi thil hmuahhmuah an ṭawmaw. 33 Huham nasazet thawn apostolpawl cun Bawi Jesu thawhsalnak thu cu an theihter. Cule an zate parah zangfahnak nasazetin a um. 34 An lakah a tlasam zohman an um lo, ziangahtile ló neitu le inn neitu pawl in an ram le an inn pawl an zuar ih, an ngah mi tangka cu an rak keng, 35 cule apostolpawlih ke hramah an ret. Cun cuih tangka cu mi kip an ṭuldān vek cio in, apostolpawl in an zem.

36 Saipras tikulh ih a um mi Levi-mi Joses cu a ra. Apostolpawl in amah cu Barnabas tiah hmin an sak. A tican cu ‹Tha Petu› tinak a si. 37 A neih mi a ló a zuar ih, a paisa cu kengin apostolpawlih ke hramah a ret.

5

Ananias le Safira

1 Mi pakhat Ananias an ti mi pa in a nupi Safira thawn an neih mi thil an zuar. 2 Cule a nupi ih theihpinak in a ló man hrekkhat cu a sūp ih, a hrekkhat lawng kengin apostolpawlih ke hramah a ret.

3 Asinan Peter in, «Ananias, Thlarau Thianghlim hnenah thuphan per ding le na ló man hrekkhat sūp dingin ziangahso Setan in na thinlung a lo luahkhat? 4 Na ló na zuar hlanah, na ló cu na ta a si lo maw? Na zuar hnu khalah, a man cu nangmai thuneihnak hnuaiah a um thotho a si lo maw? Ziangahso hitivekih ti dingin na thinlung sung ihsin na tum? Milai hnenah thuphan na per a si lo ih, Pathian hnenah thuphan na per sawn a si,» tiah a ti.

5 Ananias in cuih ṭawngkampawl a theih tikah, a tlu ih a thi. Cule hih thilpawl a theitu hmuahhmuah parah ṭihnak nasazet a thleng. 6 Cule tlangvalpawl an tho ih Ananias-ih ruang cu an tuam, lengah an zawnsuak ih an phum.

7 Cuih hnu nazi pathum hrawng rei ah ziang thil a cang ti thei loin, a nupi cu tawnkhawmawknak hmun ah a ra lut. 8 Cule Peter in a hnenah, «Hi zât hi nan ló nan zuar man zate a si maw?» tiah a sawn.

Anih in, «A si, kan ló man zate a si,» tiah a ti.

9 Cun Peter in a hnenah, «Bawipaih Thlarau hniksak dingah ziangtin so nan lung a rual? Zoh hnik, na pasal phumtupawlih kepawl cu sângka hramah an um, nang khal an lo zawnsuak ding,» tiah a ti. 10 Hmakhatteah anih khal Peter-ih ke hramah a tlu ih a thi. Cule tlangvalpawl an rung lut ih, a thi zo ti kha an hmu. Cule an zawnsuak ih a pasal kiangah an phum. 11 Cule kawhhran mipi hmuahhmuah le cuih thu a theitu hmuahhmuah tlunah ṭihnak nasazet a thleng.

Mi Tampi Damternak

12 Apostolpawl in mipi lakah hminsinnak tampi le mangbangza tampi an tuah. Zumtupawl hmuahhmuah cu Solomon Hulhliap ah lungrualten an tawngkhawmaw ṭheu. 13 Mipi in an zohsang zet hai nân, zohman an hnenah an tel ngam taktak lo. 14 Cule mipa le nunau zumtu tampi cu Bawipa hnenah bêt deuhdeuh an si. 15 Cumi ruangah, minapawl cu kăwtthler ah an run hruai ih, Peter an kiangih a feh tikah a thlam talin a hliahngah hai theinak dingah tiin ihkhun parah le pher parah an hlum. 16 Jerusalem ah a kiangkapih khuapawl ihsin mipi an ra ih, minapawl le thlarau bawrhhlawhpawl ih zăwnzaihter mipawl an rak hruai. Cule an zaten damnak an ngah.

Apostolpawl Tiduhdahnak

17 Cun Puithiam lubik le a hnenih umtu Sadusipawl hmuahhmuah cu an ding ih, annih cu aithawknak in an khat. 18 Cule Apostolpawl cu an kai ih, mipi thawnginn ah an khum. 19 Asinan Bawipaih vancungmi in cuih zan ah thawnginn sângkapawl cu a áwng ih, lengah a suah hai. 20 Cule an hnenah, «Feh uhla, temple kulh sungah va dingin, hi nunnak kamsuakthu hmuahhmuah hi mipi hnenah va sim uh,» tiah a ti hai.

21 Cule apostolpawl in cuih thu an theih hnuah, zingpit teah temple kulh sungah an lut ih, mipi thuzirh an thăwk. Cu laifangah puithiam lubik le a hnenih um mipawl cu an ra ih, Sanhedrin thuṭhentu le Israel tefapawlih upapawl hmuahhmuah cu thu relkhawm dingin an kokhawm. Thawnginn ihsin Apostolpawl hruai dingah mi an hei thlah.

22 Asinan thawnginn an va thlen tikah, temple kiltupawl cun apostolpawl cu an hmu lo. An kirsal ih, thawng an thăn. 23 «Thawnginn cu ṭhaten a hrenaw ko, sângka hmaiah a kiltupawl an ding. Asinan sângka kan ăwn tikah, a sungah zohman kan hmu lo,» tiah an ti. 24 Cuih thu an theih tikah, puithiam lubik le temple kiltu bawi le puithiam sângpawl cu ziang a cang a si pei tiah khawruahhar zetin an um.

25 Cule mi pakhat a ra thleng ih, «Zoh hnik uh, thawng sungih nan thlak mipawl kha temple kulh sungah dingin, mipi thu an zirh rero,» tiah a ti. 26 Cun temple kiltu bawi cu temple kiltupawl thawn an va feh ih, apostolpawl cu an run hruai. Mipi in lungto in an deng pang ding ti an ṭih ruangah, hranhram cun an hruai lo.

27 Cule apostolpawl cu an run hruai, Sanhedrin hmaiah an dinter ih, puithiam lubik in thu a sut hai. 28 An hnenah, «Hi paih hmin in thuzirh nawn lo dingin khoh zetin thu kan lo pe zo a si lo maw? Zoh hnik uh, Jerusalem cu nan zirhnak in nan khatter ṭheh zo. Hi paih thisen mawh kan parih tlakter nan duh a si!» tiah a ti hai.

29 Cule Peter le apostol dangpawl cun an sâng ih, «Milai thu hnakin Pathian thu kan lung sawn ding. 30 Thing parih nan thlaithat mi Jesu cu kan pupápawlih Pathian in a thoter zo. 31 Pathian in Israel-mipawl lungthlengnak a pe ih, an sualpawl a ngaidamnak dingah, Pathian in anih cu a vawrh lam kapah Lal ah le Rundamtu ah a khaisâng zo. 32 Kannih cu cuih thilpawl a theihpitu kan si ih, Pathian in amai thu lungtupawl hnenih a pek mi, Thlarau Thianghlim khal cuih thilpawl theihpitu a si ve,» tiah an ti.

33 Cuih thu an theih tikah, an thin a so ih, apostolpawl cu that dingin thu an relcat. 34 Asinan Sanhedrin lakih tel Farasi, a hmin Gamaliel, Dān zirhtu le mi hmuahhmuah ih upat mi pa cu a hung ding ih, apostolpawl cu cān málte sung a lengih suakter dingin thu a pe. 35 Cule an hnenah, «Nannih Israel-mipawl, hipawl parih tuah nan tum mi hi fimkhur uh. 36 Ziangahtile hi hlanah Theudas a suak ih, amah le amah mithupi pakhat ka si a tiaw ih, patling 400 hrawngin amah cu an thlun. Asinan amah cu an that ih amah thluntu hmuahhmuah cu an ṭekdarh ṭheh ih an cem. 37 Cu pa hnuah, mipum siar laiah Galili-mi Judas a hung suak ih, mi tampi a hnenah a hip. Cu pa khal cu a hlorál ih, amah rinsantupawl khal an ṭekdarh ṭheh. 38 Atu ah hih thu thawn pehparawin nan hnenah ka lo sim a si, hipawl lak ihsin hnûkdawk aw uh, tibuai duh hlah uh. Ziangahtile hih hnaṭuannak le khawkhannak cu milai hnen ihsi ra asile, zianghmanlo ah a cang ding. 39 Asinan Pathian hnen ihsin a si ahcun, nan siatsuah thei cuang lo ding. Pathian dokalh rero tu ah nan cang riangri sawn thei a si,» tiah a ti.

40 Cule Sanhedrinpawl in an lungkimpi ih, Apostolpawl cu an ko, cule an vuak hnuah Jesu hmin ih thusim nawn lo dingin thu an pe ih an thlah. 41 Jesu hmin ruangih ningzahnak tuartlak ih ruah an si ruangah apostolpawl cu Sanhedrin thuṭhennak ihsin aipuang zetin an fehsuak. 42 Cule ni tinten temple kulh sungah le inn khat hnu inn khat ah, Jesu cu Khrih a si ti zirh le phuan an cawl lo.

6

Mi Pasarih Hrilnak

1 Cu laiah, dungthluntupawl an karhzai vivo tikah, ni tin rawl zĕmnak ah Grik ṭawng hmangpawlih nuhmeipawl cu thlauthlak an si ruangah, Jew-mi aGrik ṭawng hmang zumtupawl cu Hebru ṭawng hmang zumtupawl parah an phunzai. 2 Cun hleihnih pawl in dungthluntu mi tampi an hnenah an kokhawm ih, «Pathian kamsuakthu thlauthlain cabuai hna kan ṭuan ding cu kan hrangah thildik a si lo. 3 Curuangah u le nau pawl, nan lak ihsin mi pasarih mi hminṭha, Thlarau Thianghlim le fimnak ih khat hril uhla, hih ṭuanvo hi kan pe ding; 4 kannih tu cu thlacamnak ah le kamsuakthu rawngbawlnak ah kan peaw lan vivo ding,» tiah an ti.

6:1a Grik ṭawng hmang: Jew si si, Grik ṭawng hmang le nunphung lapawl an si.

5 Cule cuih thu cun mipi hmuahhmuah lung a hmuiter ih, zumnak le Thlarau Thianghlim ih khat Stefen, Filip, Prokoras, Nikanor, Timon, Parmenas le Anṭiok khawmi Jew biaknaksakhua ih a lut mi Nikolas pawl an hril. 6 Cupawl cu apostolpawl hmaiah an run hruai ih, apostolpawl in thla an camsak hnuah, an parah an kut an suang.

7 Cun Pathian kamsuakthu cu a darhzai ih, Jerusalem ah dungthluntu mipum khal nasazetin an karhzai. Cule Puithiam tampi in zumnak thu cu an thlun.

Stefen Kaihnak

8 Cule Stefen cu zumnak le huham in a khat ih, mipi lakah a nasazet mi mangbangzapawl le hminsinnakpawl a tuah. 9 Cun miluatpawlih sinakok an ti mi sung ihsin dodalnak a suak. Cuih dodalnak ah cun Sairin ram, Alexandria khua, Silisia ram le Asia ram ih Jew-mi an tel. Cupawl cun Stefen thu an êl. 10 Cule fimnak le Thlarau ih a ṭawng mi cu an dokalh thei lo.

11 Cun, «Mosi le Pathian dokalhin thangsiatnak ṭawngkampawl a ṭawng kan thei a si,» tiih thuphan per dingin mi hrekkhat athupten nawhthuh an pe.

12 Cule mipi, miupapawl le Dānzirhtupawl kha an căwkphur; cun Stefen hnenah an ra ih amah cu an kai. Cun Sanhedrin thuṭhentu hmaiah an hruai. 13 Theihpitu diklopawl an ret ih, cupawl cun, «Hi pa hin hi hmun thianghlim le Dān dokalhin thangsiatnak ṭawngkampawl ṭawng a bāng dah lo; 14 ziangahtile Nazareth Jesu in hi hmun hi a ṭhiatbăl ding ih, Mosi ih in pek mi nunphungpawl a thleng ṭheh ding tiih a ṭawng lai kan thei,» tiah an ti.

15 Cule Sanhedrin thuṭhentu sungih a totu hmuahhmuah in, Stefen cu ti keukeuin an zoh ih, a hmai cu vancungmi hmai vekin an hmu.

7

Stefen Thusimnak

1 Cun puithiam lubik in, «Hi thilpawl hi cutivekcun an si ngaingai maw?» tiah a ti.

2 Cule Stefen in, «U le nau pawl le palepawl, i ngai hnik uh! Kan pa Abraham cu Mesopotamia ram ih a um lai, Haran khua ih a um hlanah ropitnak Pathian cu a hnenah a rung lang ih, 3 a hnenah, ‹Na ram le na sungkhat hnen ihsin suak awla, ka lo hmuh ding mi ram ah feh aw,› tiah a ti. 4 «Cun Kaldia rammipawl cu a suahsan hai ih, Haran khua ah a cêng. A pa a thih hnuah atu ih nan cēnnak ram ah hin Pathian in a ṭhawnter. 5 Cule cu tawkah ro zianghman a pe lo, a ke palnak ding hrang daihtawk hmun hman a pe lo. Asinan Abraham in fāte a neih lo laiah, Pathian in hi ram hi amah le amai hnuih a cithlahpawlih ta si dingin thu a tiamkam. 6 Pathian in hitin a sim, ‹Na cithlahpawl cu anmai ta a si lo mi ram ah a langte sung an cêng ding. Uktupawl in sál ah an tuah ding ih kum 400 sung nasazetin an palbĕt ding. 7 Cule sál ih a tuahtu miphun cu thu ka ṭhen ding.› ‹Cuihhnu ah cuih ram ihsin an suak ding ih, hi hmun ah keimah in rian ding,› tiah Pathian in a rak ti. 8 Cun Pathian in Abraham hnenah serh zim tannak thukham a pe, cutin Abraham cu Isak a hrin hnu ni riatnak ah Isak-ih serh a tansak. Cule Isak in Jakob a hring ih, Jakob in purêng hleihnih pawl a hring.

9 «Purêngpawl in Joseph an iksik ruangah, Izip ram ah an zuar. Asinan Joseph cu Pathian in a umpi. 10 A buainak hmuahhmuah ihsin Pathian in anih cu a runsuak ih, Izip Siangpahrang Faro-ih mithmuhah duhsaknak le fimnak a pek. Faro in Joseph cu a ram pumpi tlunah le a inn hmuahhmuah tlunih uktu ah a tuah. 11 Izip ram le Kanaan ram pumpi ah mangṭam le buainak nasazet a tlung ih, kan pupápawl cun rawl zianghman an nei lo. 12 Jakob in Izip ah sangvut a um ti hna in a theih tikah, kan pupápawl cu a vei khatnak a hei thlah hai. 13 Cule a vei hnihnak an fehnak ah Joseph in a ulepawl hnenah zo a si ti a phuangaw ih, Joseph sungkuapawl cu Faro ih mi theihah an rung cang. 14 Cun Joseph in a pa Jakob le a sungkuapawl hmuahhmuah a ko ih, an zaten minung 75 an si. 15 Cule Jakob cu Izip ram ah a vung feh ih, cuih ram ah a thi. Kan pupápawl khal cuih ram ah an thi. 16 An ruang cu Shekem khua ah an thiar ih, Shekem-ih pa, Hamor-ih fapapawl hnen ihsin Abraham in paisa ih a rak lei mi thlān ah an phum hai.

17 «Pathian in Abraham hnenih sesămaw ih thu a kam mi a thlenkimnak ding tikcu a nâi vivo tikah, Izip ram ah cuih minungpawl cu an ṭhang ih, an karhzai. 18 Cule Joseph thei lo tu siangpahrang dang a ra suah tiangin an karh sinsin. 19 Cu pa cun kan unaupawl hnen ihsin fim hrăwkhrawl zetin hlawknak a la ih, kan pupápawl cu a palbĕt hai. An fa suak tharpawl cu thi dingin a hlăwnter hai. 20 Cuih cān ah Mosi a suak ih, Pathian mithmuhah Mosi cu naute mawi zet a si. Thla thum sung a paih inn ah an kilkhawi. 21 Mosi an hlăwn tikah, Faro Siangpahrang fanu in a sar ih amai fapa dingah a kilkhawi. 22 Mosi cu Izip fimnak hmuahhmuah zirter a si ih, a ṭawngkampawl le a hnaṭuanpawl ah huham nasazet a nei.

23 «Mosi cu kum 40 a kim tikah a unau, Israel-mipawl va leng dingin thu a ruatcat. 24 An lakih mi pakhat diklo zetih a tuar lai a hmu ih a va hum, cule sawisat tuartupa cu phuba a laksak ih Izippa cu a that. 25 Ziangahtile amai kut hmangin Pathian in anmahpawl runsuak a tum ti a unaupawl in an theithiam si hmang tiah a ruat, asinan an rak theithiam lo. 26 A thaisun ah Mosi cu a sualaw rero mi Israel-mi pahnih hnenah a va ih, remawkter tumin, ‹Milaipawl, nannih cu unau nan si. Ziangahso nannih cu pakhat le pakhat diklo zetih nan tiawk rero?› tiah a ti.

27 Asinan a innhnenpa diklo zetih a titupa cun Mosi cu a tûl ih, ‹Zo in kan tlunih uktu ding le thuṭhentu dingah a lo tuah? 28 Mizansun ih Izippa na thah vekin, thah ve i duh maw si?› tiah a ti. 29 Cun Mosi in cumi a theih tikah, Midian ram ah a tlân. Cu tawkah mikhual in a va cêng ih, fapa pahnih a nei.

30 «Cule kum 40 a kim hnuah, Sinai Tlang kiang ramṭhing ah Bawipaih vancungmi cu thingbŭk meialh in Mosi hnenah a rung lang. 31 Mosi in cumi a hmuh tikah, a hmuh mi ah a mang a bang. Zohhliah dingin a va naih ih, Bawipaih aw cun a hnenah, 32 ‹Kei cu na pupápawlih Pathian, Abraham Pathian, Isak Pathian le Jakob Pathian ka si,› tiah a ti. Cule Mosi cu a khūr ih a zoh ngam lo. 33 Cun Bawipa in a hnenah, ‹Na kedam phawih aw, ziangahtile na dinnak hmun hi lei thianghlim a si. 34 Thungaiin, Izip ram ih um, ka mipawl ih palbĕt an tuarnak cu ka hmu a si. An aihramnak ka thei ih, anmah runsuak dingah ka ra. Atu ra aw, Izip ram ah ka lo thlah ding,› tiah a ti.

35 « ‹Zo in so kan tlunih uktu ding le thuṭhentu dingah a lo tuah?› tiih an hnawn dah mi pa Mosi cu thingbŭk ih a rung langtu vancungmi kut in hruaitu le runsuaktu dingah Pathian in a thlah mi pa kha a si. 36 Anih cun Izip ihsin annih cu a hruaisuak hai ih, Izip ram ah le Tipi Sen sungah mangbangza le hminsinnakpawl tla a tuah. Kum 40 sung ramṭhing ah mangbangzapawl le hminsinnakpawl a tuah.

37 «Israel-mipawl hnenah, ‹Bawipa nan Pathian in nan unaupawl lak ihsin nan hrangah keimah vek Profet a suakter ding. A ṭawngkam nan ngaithla pei,› tiih a titu kha hih Mosi hi a si.

38 «Sinai Tlang parih a hnenih thu a simtu vancungmi thawi ramṭhing ih mipi-umkhawm lakih rak umtu le kan pupápawl thawn kan hnenih pek ding mi a nung mi thusim mipawl dawngtupa cu amah hi a si. 39 Kan pupápawl in a thu lung duh loin, amah cu an hnáwng riangri. Cule an thinlung cu Izip ram ah a kirsal. 40 Aaron hnenah, ‹Kan hmaiih fehtu ding pathianpawl in tuahsak aw, ziangahtile Izip ram ihsin in hruaisuaktu hi Mosi cu ziang a cang ti kan thei lo,› tiah an ti. 41 Cuih cān ah câwno lem an tuah ih, cuih câwno lem hmaiah raithawinak an tuah. An kut ih tuahcawp mi thil ah lungawiaipuangin an um. 42 Cun Pathian in a hawisan hai ih, profetpawlih cazual sungih ngan vekin van ih thilmak rual be dingin a thlahthlam hai. Profetpawlih cazual sungah,

‹Maw nannih Israel sungza,
Kum 40 sung ramṭhing ah ran nan thah mi raithawinakpawl le a dang raithawinakpawl nan pek tikah, ka hnenah in pe a si lo maw?
43 aMolok ih biakbûk le nan bRefan pathian-ih arsi nan keng.
Cuih milempawl cu nan biak dingah nan tuah.
Curuangah nannih cu Babilon pawn lamah ka lo kuathlo ding,›

7:43a Molok: Ammon-mipawlih pathian a si.

7:43b Refan: Izip-mipawlih pathian pakhat a si.

tiih ngan a si.

44 «A pianhmang a rak hmuh mi bangtukih tuah dingah, Mosi hnenih thusimtu Pathian ih thu a pek vekin, kan pupápawl in ramṭhing ah theihpinak biakbûk an nei. 45 Cumi cu annih in an dawngsáwngsin, kan pupápawl hmaika-ah Pathian in miphunpawl a dawisuak, an ram an lâk laiah cumi cu kan pupápawl in Joshua thawn an run kenglut ih, David-ih san tiangin a um. 46 David cun Pathian duhsaknak a co ih, Jakob-ih Pathian cēnnak ding hmun ngah duhin a dil. 47 Asinan Pathian hrangah Solomon in inn a sak.

48 «Sikhalsehla Cungnungbik Pathian cu minung kut ih sak mi temple-pawl ah a cêng lo. Profet in:

49 ‹Bawipa in van hi ka laltokham a si ih,
Leilung cu ka keretnak a si.
Ka hrangah ziang vek inn so in saksak ding?
Asilole ka cawlhnak ding hmun cu khuiah so a um?
50 Hipawl hi ka kut ih tuah mi an si lo maw?›

tiih a ti vek khan a si.

51 «Nannih cu nan pupápawl vek nan si. Nannih lungruhpawl le thinlung le hna serh tan lo pawl, Thlarau Thianghlim nan dokalh ringring a si. 52 Nan pupápawl in profet pakhat tal an tiduhdah lo mi an um maw? Midingfel Pa rat ding phuangtupawl an rak that. Atu ah nannih cu cu Pa zuartu le thattu, 53 vancungmipawl băwmnak in Dān cohlâng ih cuih Dān a thlun lo tu ah nan cang,» tiah a ti.

Lungto in Stefen an Deng

54 Sanhedrin thuṭhentupawl in cuih thilpawl an theih tikah an thin a heng tuk ih, an hacâng an rialhnawh. 55 Asinan Stefen cu Thlarau Thianghlim in a khat ih, van lam a hun zoh ngernger. Cule Pathian ropitnak le Pathian kut vawrh lamah Jesu dingin a hmu. 56 Cule anih in, «Zoh hnik uh, vanpawl áwngaw le Pathian kut vawrh lamah Minung Fapa dingin ka hmu,» tiah a ti.

57 Cun Sanhedrin thuṭhentupawl cu ring zetin an au ih, an hna an phit, cule lungrualten Stefen cu an va zuanhnawh. 58 Cule amah cu khaw lengah an dirsuak ih, lungto in an dêng. Theihpitupawl in an hnipuan cu Saul an ti mi mino pakhat paih ke hramah an ret. 59 Cule Stefen cu lungto in an dēn rero laiah, Bawipa hnenah a au ih, «Bawi Jesu, ka thlarau cohlang aw,» tiah a ti. 60 Cun a khuk a bil ih, «Bawipa, hi sual hi a mawh phurter hai hlah aw,» tiah ring zetin a au. Cutiih a ti ṭhehin a itthat.

8

Kawhhran Tiduhdahnak

1 Stefen an thah cu Saul a lung a kim ve. Cuih ni ihsin Jerusalem kawhhran parah tiduhdahnak nasazet thlen a thăwk. Cule apostolpawl siarlo zumtupawl cu Judia peng le Samaria peng ah an ṭekdarh ṭheh. 2 Cule Pathian ṭihzahtupawl in Stefen cu an phum ih, nasazetin an ṭah.

3 Saul cun nasazetin kawhhran siatsuah a thăwk, inn khat hnu inn khat a lut ih, mipa siseh, nunau siseh a dirsuak, cule thawng ah a thlak hai.

Samaria ah Filip

4 Curuangah a ṭekdarh mipawl cu an fehnak kip ah kamsuakthu an phuang. 5 Cun Filip cu Samaria khua ah a vung feh ih, an hnenah Khrih thu a phuang. 6 Cule Filip ih thilmak tuah mipawl cu mipi in an thei ih an hmu. Lungrualten Filip ih thusim cu ṭha zetin an ngai. 7 Ziangahtile thlarau bawrhhlawhpawl cu ring zetih au phahin mi tampi sung ihsin an suak. Mizéng tampi le kebáipawl an dam. 8 Cule cuih khaw sungah aipuannak nasazet a um.

Dawithiam Simon

9 Cuih cān ah miropi ka si tiaw ih a hlanah cuih khaw sungah dawithiamnak rak hmangin Samaria rammipawl khawruahharter ṭheu tu Simon an ti mi pa a rak um. 10 Mi hmuahhmuah in, mithupibik in misantlailobik tiang, ṭha zetin a thu an ngai, «Hi pa hi Pathian-ih huham ropi a si,» tiah an ti. 11 Cān reipi a dawithiamnak thawn mipi an khawruah a harter ṭheh ruangah, a thu ṭha zetin an ngai. 12 Filip cun Pathian uknak le Jesu Khrih hmin thawi pehparaw mi thuthangṭha a sim. Filip ih thusim mi an zum tikah, mipapawl le nunaupawl in baptisma an co. 13 Cun Simon rori khal in a zum ve; cule baptisma a co ih, amah cu Filip hnenah a umlan vivo. Cule Filip ih a tuah mi thilmakpawl le hminsinnakpawl a hmuh tikah a mang a bang zet.

14 Jerusalem ih a um mi apostolpawl in, Samaria-mipawl in Pathian kamsuakthu an cohlang ti an theih tikah, an hnenah Peter le John an thlah. 15 An va thlen tikah, Thlarau Thianghlim an co theinak dingah thla an camsak hai. 16 Ziangahtile Thlarau Thianghlim cu zo hnen hmanah a thleng hrih lo. Bawi Jesu hmin in baptisma an co lawng hi a rak si. 17 Cun Peter le John in an parah an kut an suang ih, Thlarau Thianghlim an co.

18 Cule apostolpawl ih kut suannak hmangin Thlarau Thianghlim pek a si kha Simon in a hmuh tikah an hnenah paisa a pe, 19 cule, «Ka kut suan mi pauhpauh in Thlarau Thianghlim an co theinak dingah, hih huham hi in pe ve uh,» tiah a ti.

20 Cutikah Peter in a hnenah, «Pathian thilpek cu paisa ih lei thei dingih na ruah ruangah na tangka cu nangmai zawngah riarál seh! 21 Pathian mithmuhih na thinlung a diklo ruangah hi rawngbawlnak ah nang in telnak na nei lo ih, covo khal na nei lo. 22 Curuangah hi na sualralnak ihsin na lung thleng awla, Pathian hnenah dil aw, na thinlung ih na tumtah mi cu a lo ngaidam mahna. 23 Ziangahtile hnit vekih khâtnak in a lo luahkhat ti le dingfellonak in a lo ṭemṭawn ti ka hmu a si,» tiah a ti.

24 Cun Simon in a sawn ih, «Na sim mi thil zianghman ka parih a thlenlonak dingah Bawipa hnenah i dilsak aw,» tiah a ti.

25 Cule annih in Bawipaih kamsuakthu an theihter ih an phuang, cule Samaria khaw tampi ah thuthangṭha sim phah vivo in Jerusalem ah an kirsal.

Filip le Ethiopia-pa

26 Cule Bawipaih vancungmi in Filip hnenah, «Tho awla, Jerusalem ihsin Gaza khua ih a suk mi zin zawhin thlang lamah feh aw,» tiah a ti. Cuih lamzin cu ramṭhing zin a si. 27 Cun Filip cu a tho ih a feh. Cule ngai hnik, Ethiopia-pa pakhat, Ethiopia siangpahrang bawinu Kandake-ih hlawnthil hmuahhmuah kilkhawitu, thuneihnak sâng zet nei mi tilperpa cu Pathian be dingin Jerusalem ah a ra. 28 A kir lamah, a ránglêng ah toin profet Isaiah cazual a siar rero. 29 Cun Thlarau in Filip hnenah, «Hi ránglêng hi va naih awla, a kiangin feh aw,» tiah a ti.

30 Filip cu cu pa hnenah a va tlân ih, profet Isaiah cazual siar rero in a theih tikah, «Na siar rero mi hi a sullam na theithiam maw?» tiah a sut.

31 Cule Ethiopia-pa cun, «Zo talih in simfiang lo ah cun, ziangtin saw ka theihthiam thei ding?» tiah a ti. Cule cu pa in Filip cu a ránglêng parah kaiin a hnenih to dingin a sawm. 32 A siar rero mi Cathianghlim cu:

«Anih cu ranthattu hnenih tuu an hruai bangin an hruai.
Tuu fano a hmul mettu hmaiih daiteih a um bangin a kâ a âng lo.
33 Zahthlak zetin an tuah ih, thuṭhensaknak dik a co lo.
A cithlahpawlih thuhla zo in a thăn nawn ding?
Ziangahtile a nunnak cu leitlun ihsin an laksak,»

ti a si.

34 Tilperpa in Filip cu a sawn ih, «Hi profet ih sim mi hi zo-ih thu a si ti i sim dingin ka lo ngen a si, amai thu maw mi dangih thu so a si?» tiah a ti. 35 Cun Filip cu a kâ a âng ih, cuih Cathianghlim in a thăwk ih, Jesu-ih thuthangṭha cu a hnenah a sim.

36 Cutin lamzin ah an feh vivo ih, tidai umnak hmun an thleng. Cule tilperpa cun, «Ngai hnik, hi tawkah tidai a um! Baptisma co dingah ziang in so i kham?» tiah a ti.

37 Cun Filip in, «Na thinlung zateih na zum ah cun, baptisma na co thei ko,» tiah a ti.

Cule tilperpa cun a sâng ih, «Jesu Khrih cu Pathian Fapa a si ti ka zum,» tiah a ti.

38 Cule anih in ránglêng cu cawl dingin thu a pe. Cun Filip le tilperpa cu an pahnih in ti sungah an vung ṭum ih, Filip in baptisma a pek. 39 Ti sung ihsin an hung suah tikah, Bawipaih Thlarau in Filip cu a lahlo, cutin tilperpa in amah cu a hmu nawn lo. Cule anih cu aipuang zetin lamzin zawhin a feh vivo. 40 Asinan Filip cu Azoṭas khua ah an hmu. Cule Filip cu a lan vivo ih, Sisaria khua a thlen tiang khaw kip ah thuthangṭha a sim vivo.

9

Saul-ih Thlengawknak

<reference type="parallel">Apo 22:4-16; 26:9-18</reference>

1 Cule Saul cun Bawipaih dungthluntupawl kha that dingin a hro rero thotho, puithiam lubik hnenah a va feh ih, 2 aLamzin zawhtupawl mipa siseh, nunau siseh a tawn mi pauhpauh ṭawn ih Jerusalem ih a hruai theinak dingah, Damaskas sinakokpawl ih va pek ding ca a hnenah a dil.

9:2a Lamzin: Khristianpawl cu nunnak lamzin zawhtu tiawpawl relnak ah Bible san laiih an hman ṭheu mi ṭawngkam a si. Khristianpawl ti thawn a bangw.

3 Cutiih khual a tlawn lai, Damaskas khua a hei naih tikah, hmakhatteah van ihsin tleu in a kimvel a run tlet. 4 Cun lei ah a tlu ih, «Saul, Saul, ziangahso i tiduhdah rero?» tiih a hnenih run titu aw a thei.

5 Cule anih in, «Bawipa, zo so na si?» tiah a ti.

Cun Bawipa in, «Na tiduhdah rero mi Jesu ka si. Na hrangah fung zum sit cu a har a si,» tiah a ti.

6 Saul cun khūr le khawruahharin, «Bawipa, ziang tuahter i duh?» tiah a ti.

Cun Bawipa in a hnenah, «Tho awla, khawpi sungah lut aw, cule na tuah ding mi sim na si ding,» tiah a ti.

7 Saul thawi khual a tlawng mipawl cu ṭawng loin, cu tawkah cun an ding, aw cu an thei nân, zohman an hmu lo. 8 Cun Saul cu leilung ihsin a hung tho ih a mit a hun meng, asinan zohman a hmu thei lo. Cule a kut in an hruai ih, Damaskas khaw sungah an fehpi. 9 Ni thum sung khua a hmu lo ih, ziangkhal ei lo le in loin a um.

10 Cuih cān ah Damaskas khaw sungah dungthluntu pakhat Ananias ti mi pa a um. Larnak ah Bawipa in a hnenah, «Ananias,» tiah a ti.

Cule anih in, «Ngai hnik, hinah ka um, Bawipa,» tiah a ti.

11 Cule Bawipa in a hnenah, «Tho awla, ‹Zin Dĭng› an ti mi ah va feh aw. Judas inn ah Tarsas khua ihsin a ra mi Saul kha va hawl aw: ziangahtile ngai hnik, anih cu thla a cam lai rero. 12 Khua a hmuhsal theinak dingah, Larnak ah Ananias an ti mi pa a rung lut ih a parah a kut suangin a hmu,» tiah a ti.

13 Cun Ananias in, «Bawipa, mi tampi hnenin hi paih thuhla hi ka thei zo, Jerusalem ih na mithiangpawl hnenah thil ṭhalo tampi a tuah. 14 Na hmin kotu hmuahhmuah ṭawn dingin, Puithiam lubik hnen ihsin thuneihnak thawn hi tawkah a ra a si,» tiah a sâng.

15 Asinan Bawipa in a hnenah, «Feh aw, ziangahtile anih cu Zentelpawl hmaiah le siangpahrangpawl hmaiah le Israel-mipawl hmaiih ka hmin kengtu ding ka hmanrua ah hril a si zo. 16 Ziangahtile ka hmin ruangih a tuar ding mi thil tam zet amah ka hmuh ding,» tiah a ti.

17 Cule Ananias cu a feh ih, inn sungah a lut; cule Saul parah a kut a suang ih, «Unaupa Saul, na rat laiih lamzin ih na hnenih rung lang Bawi Jesu in khua na hmuhsal ih, Thlarau Thianghlim ih na khahnak dingah i thlah a si,» tiah a ti. 18 Hmakhatteah a mit ihsin phawhir vek a tla ih, khua a hmu theisal lohli, cule a tho ih baptisma a co.

Damaskas le Jerusalem ah Saul

19 Cule rawl a ei hnuah, a tha a caksal. Cun Damaskas khua ah Saul cu dungthluntupawl hnenah ni tampi a câm.

20 Hmakhatteah Saul in sinakokpawl ah Khrih cu Pathian Fapa a si ti thu a sim. 21 Cun a theitu hmuahhmuah an mang a bang zet ih, «Hi pa cu Jerusalem ih hih hmin kotupawl siatrálter ding tumtupa kha a si lo maw? Mi va ṭemṭawnin puithiam sângpawl hnenih thlenpi dingah hi tawkah a ra a si lo maw?» tiah an ti.

22 Asinan Saul cu a cak deuhdeuh. Jesu cu Khrih a si ti a fiangter ih, Damaskas khua ih um Jew-pawl mangbang ko a tuah hai.

23 Ni tampi a liam hnuah, Saul that dingin Jew-pawl in khua an khâng. 24 Asinan Saul in an khawkhan mi cu a thei. Cule amah that dingah kăwtkapawl cu a sun a zanin an kil. 25 Cun dungthluntupawl in Saul cu an hruai ih, zan ah khawpikulh ihsin khopi in an vun ṭhum.

26 Saul cu Jerusalem a va thlen tikah, dungthluntupawl kha va bên a tum; asinan dungthluntu ah a cang zo ti an zum lo ruangah an zaten amah cu an ṭih. 27 Asinan Barnabas in anih cu a hruai ih, apostolpawl hnenah a fehpi. Cule an hnenah lamzin ah Saul in ziangtin Bawipa a hmu ih, Bawipa in Saul hnenah ziangtin thu a sim tipawl le Damaskas khua ah Jesu hmin in ralṭha zetih thu a sim thupawl a simfiang hai. 28 Cule Saul cu apostolpawl hnenah Jerusalem ah lut le suakin a um. 29 Cule Bawi Jesu hmin in ralṭha zetin Paul cu thu a sim ih, Grik ṭawng hmang Jew-pawl thawn thu an êlaw, asinan annih cun amah cu thah an tum. 30 Cumi cu unaupawl in an theihsuah tikah, Sisaria khua ah amah cu an fehpi ih, Tarsas khaw lamah an thlah.

31 Cun Judia peng, Galili peng le Samaria peng ih kawhhranpawl hmuahhmuah cu hnangamten an um ih an tha a cak. Bawipa ṭihzah le Thlarau Thianghlim thlangămnak ih an nun ruangah mipum an karh vivo.

Aenias le Dorkas

32 Cule hitin a si, cuih cān ah Peter cu hmun tin ah a tlawng ih, Lidda khua ih cêng mithiangpawl hnen khal a va thleng. 33 Cu tawkah Aenias an ti mi pa a táwng, cu pa cu zéngnat tuarin kum riat sung ihkhun ah a lum. 34 Peter in a hnenah, «Aenias, Jesu Khrih in a lo damter a si. Tho awla, na ihphah zual aw,» tiah a ti. Cule anih cu a tho lohli. 35 Cule Lidda le Sharon ih a cêng mi hmuahhmuah in amah cu an hmu ih, Bawipa lamah an hawi.

36 Joppa khua ah aTabitha an ti mi dungthluntu pakhat a um, a hmin cu lehlinin ‹bDorkas› a si. Cuih nunaunu cun thil ṭha tuah le băwmnak thilpek a ṭuan ringring. 37 Cule hitin a si, cuih cān ah cu nu cu a na ih a thi. A ruang an khawlh ṭheh hnuah inn tlunta pindan ah an hlum. 38 Lidda khua cu Joppa khua thawn a naiawte. Cule dungthluntupawl in Peter cu Lidda ah a um ti an theih tikah, a hnenah mi pahnih an hei thlah. Annih cun, «Zangfahten, ra vurvo aw,» tiah an ti.

9:36a Tabitha: Aramik ṭawng a si ih, sakhi tinak a si.

9:36b Dorkas: Grik ṭawng a si ih, sakhi tinak a si.

39 Cun Peter cu a tho ih, an zawngah a feh. A va thlen tikah, inn tlunta pindan ah an hruai. Nuhmeipawl hmuahhmuah cu Peter kiangah an ding ih an ṭap. Dorkas an hnenih a um laiih a tuah mi kâwrfualpawl le a dang sinfenpawl kha an hmuh. 40 An zaten Peter in pindan sung ihsin a suahter ṭheh, cule a khuk a bil ih thla a cam. A ruang lam a hawi ih, «Tabitha, tho aw,» tiah a ti. Cule cu nu cu a mit a hun meng ih, Peter a hmuh tikah, a hung to. 41 Cun Peter in Dorkas-ih kut in a kai ih a dinter; cule mithiangpawl le nuhmeipawl a ko ih nungdamin an hnenah a ap hai. 42 Cuih thu cu Joppa khaw sung hmuahhmuah ah a thang thluh ih, mi tampi in Bawipa an zum. 43 Cule hitin a si, Peter cu Joppa khua ah savun ih thil tuahtu Simon inn ah ni tampi a câm.

10

Kornelias in Peter a Ko

1 Cuih cān ah Sisaria khua ah Kornelias an ti mi pa a um, amah cu Italy aralkap bur tiih kawh mi ah ralkap 100 hotu a si. 2 Amah le a sungkua hmuahhmuah cu Pathian ngaihsak le ṭihzahtu an si, băwmnak thilpek hna a ṭuan ih, nasazetin Pathian hnenah thla a cam ringring. 3 Ni khat cu zan lam nazi pathum hrawngah larnak ah Pathian vancungmi a hnenih ra fiang zetin a hmu ih, vancungmi in, «Kornelias,» tiah a ko.

10:1a ralkap bur: Mat 27:27 simfiangnak zoh aw.

4 Cule Kornelias cun vancungmi cu ti keukeuin a zoh, a ṭih tuk ih, «Ziang so, Bawipa?» tiah a ti.

Cule vancungmi in, «Na thlacam le băwmnak thilpek na ṭuan mipawl cu Pathian hmaiah an hung thleng zo ih, cupawl cu Pathian in a hngilh lo a si. 5 Atu ah Joppa khua ah Peter an ti mi Simon ko dingin mi thlah aw. 6 Cu pa cu savun ih thil tuahtu Simon hnenah a câm, a inn cu tifinriat kapah a um. Anih in na tuah ding mi a lo sim ding,» tiah a ti.

7 Cule a hnenih thusimtu vancungmi a fehhlo tikah, Kornelias in a inn ih a um mi hnenum pahnih le amah kil ringring tu lak ihsin Pathian ngaihsak zet ralkap pakhat cu a ko hai. 8 Kornelias in cuih thil hmuahhmuah cu an hnenah a simfiang ih, Joppa khua ah a thlah hai.

Peter in Larnak a Hmu

9 A thaisun ah annih cu an tlawngsuak ih, khua an va thlen zik tikah, sun laifang hrawngah Peter cu thlacam dingin inn parah a hung kai. 10 Cun a ril a râwng tuk ih, ziang simaw ei a câk; asinan rawl an timlam rero laiah Peter cu zelhin a um. 11 Cule van áwngawin, puan hlaipi bangtuk, a kil pali ih khai mi rung ṭum vek, a umnak lam leilung ih rung ṭum thil pakhat a hmu. 12 Cumi ah cun lei ramsa phun zakip, ke li nei ramsapawl, sahrangpawl, băwkvâkpawl le tlun zuang vâtepawl an um. 13 Cule Peter hnenah aw pakhat a thleng ih, «Peter, tho aw, that awla, ei aw,» tiah a ti.

14 Cutikah Peter in, «Si lo e, Bawipa! Ziangahtile a thianglo mi le a bawrhhlawh mi thil ka ei dah lo,» tiah a ti.

15 Cule aw cun a vei hnihnak a hnenah, «Pathian in a thianter zo mi cu, thianglo ah ruat hlah,» tiah a ti. 16 Himi hi vei thum tiang a cang. Cule hmakhatteah cuih puan cu van ah laksohsal a si.

17 Cun Peter in larnak ih a hmuh mipawlih sullam cu ziang a si pei tiih a ruah rero laiah, ngai hnik, Kornelias ih thlah mipawl cun Simon-ih inn umnak an zingzăwi hnuah, kăwtka hmaiah an ding. 18 Cule annih in an vun auh ih, Peter an ti mi Simon, cutawk ih a riah le riah lo an vun sut.

19 Peter cun cuih larnak a ruah rero laiah, Thlarau in a hnenah, «Ngai hnik, mi pathum in an lo hawl. 20 Curuangah tho aw, vung ṭum awla, an hnenah feh aw, rinhlelhnak zianghman nei hlah; ziangahtile annih cu ka thlah mi an si,» tiah a ti.

21 Cun Peter cu Kornelias in a hnenih a thlah mipawl hnenah a vung ṭum ih an hnenah, «Ngai hnik uh, nan hawl mi cu keimah hi ka si. Ziang thu ruangah so nan rat?» tiah a ti hai.

22 Cule annih in, «Midingfel le Pathian ṭihzahtu, Jew-pawl hmuahhmuah ih an upat zet mi ralkap 100 hotu Kornelias cu na ṭawngkampawl ngaithla dingin a inn ih lo ko dingah a thianghlim vancungmi in amah cu a fial a si,» tiah an ti. 23 Cun Peter in annih cu a kolut hai ih, an riahnak ding hmun a pe.

A thaisun ah Peter cu an zawngah a feh ih, Joppa khua ihsin unau hrekkhat in amah cu an thlun.

24 Cule a thaisun ah Sisaria khua an thleng. Kornelias cun anmah a rak hngak ringring ih, a sungkhatpawl le a rualpi ṭhapawl a kokhawm hai. 25 Peter cu inn ih a vung luh zawngah Kornelias in a rak hmuak, cule Peter ke hramah a băwk ih a bia. 26 Asinan Peter in a kaitho ih a hnenah, «Ding aw, kei khal minung ka si ve,» tiah a ti.

27 Peter cu cu pa be rero phahin, pindan sungah a lut ih, mi tampi umkhawm kha Peter in a hmu. 28 Cun an hnenah, «Jew-mi in miphun dang va len le pawlkawm cu sian a si lo ti nan thei. Asinan Pathian in mi zohman mithiang lo le mibawrhhlawh ka tilonak dingah i hmuh zo. 29 Curuangah in ra kawh tikah lo êl riai loin, nan hnenah ka ra. Curuangah ka lo sut hai, ziang thu ruangah so in ra kawh?» tiah a ti.

30 Cule Kornelias in, «A liam zo mi ni li, tuvek cān ah rawl ka ul. Sîm lam nazi pathum ah ka inn ah thla ka cam, cule ngai hnik, mi pakhat cu a tle mi hnipuan hruhin ka hmaiah a ding. 31 Anih cun, ‹Kornelias, na thlacam cu theih a si ih, Pathian mithmuhah băwmnak thilpek na ṭuan mipawl khal cīn an si. 32 Curuangah Joppa khua ah Peter an ti mi Simon va ko dingah mi thlah aw. Anih cu savun ih thil tuahtu Simon-ih inn ah a riak, cucu tifinriat kapah a si. Anih a rat tikah thu a lo sim ding,› tiah i ti. 33 Cun na hnenah mi ka rak thlah vurvo ih, na rat cu na tiṭha zet a si. Curuangah Pathian ih thu a lo pek mi thil hmuahhmuah na sim ding mi ngai dingah kan zaten hi tawkah Pathian hmaiah kan ra a si,» tiah a ti.

Zentelpawl Thuthangṭha an Dawngsáwng

34 Cun Peter cu a kâ a âng ih, «Pathian in mi thleidăn a nei lo ti dik zetin ka hmu. 35 Ziang vek miphun a si khalle Pathian a ṭihzahtu le thildik a tuahtu zokhal Pathian in a cohlang a si. 36 Ziangkim tlunih Lal, Jesu Khrih zarih Pathian in remnak thuthangṭha Israel-mipawl hnenih kamsuakthu a thlah mi cu nan thei ko. 37 Judia peng hmuahhmuah ah ziang a cang ti nan thei. John in baptisma thu a phuan hnuah, cuih kamsuakthu cu Galili peng ihsin a thăwk. 38 Nazareth Jesu cu Pathian in Thlarau Thianghlim le huham in ziangtin a thuam ti nan thei. A hnenih Pathian a um ruangah, anih cu hmun kip ah fehin thil ṭha a tuah ih, Diabol ih palbĕt mipawl hmuahhmuah a damter.

39 «Cule kannih cu Jew-pawlih ram le Jerusalem khaw sungih a tuah mi thil hmuahhmuah a theihpitu kan si, amah cu thing parah an khai ih an that. 40 Anih cu Pathian in a ni thumnak ah a thoter ih, langhnganin a hmuh hai. 41 Mi hmuahhmuah hnenah si loin, Pathian in hlanih a rak hril mi a thutheitu, mithi lak ihsin a thawhsal hnuih amah thawn ei le in tu kanmahpawl hnen lamah a si sawn. 42 Cule anih in hi pa cu Pathian in a nung mi le a thi mi parah thuṭhentu ih a ruat mi pa a si thu kha mipi hnenih sim ding le theihter dingah thu in pe. 43 Profetpawl hmuahhmuah in amai thu an sim ih, zokhal amah a zumtu cu amai hmin in sualpawl ngaidamnak a co ding,» tiah a ti.

44 Peter in cuih kamsuakthupawl a sim rero laiah, cuih kamsuakthu ngaithlatu hmuahhmuah parah Thlarau Thianghlim a rung thleng. 45 Cule Peter thluntu, serh zim tan zumtupawl cu cumi ah an khawruah a har zet. Ziangruangahtile Pathian in Zentelpawl hnen khalah Thlarau Thianghlim thilpek a burh a si. 46 Ziangahtile cupawl in ṭawng phun dangdangih Pathian an thangṭhat kha an thei.

Cun Peter in a sâng ih, 47 «Kanmah vekih Thlarau Thianghlim co zotupawl hi, baptisma an colonak dingah zo in so tidai a kham thei?» tiah a ti. 48 Cule Bawipaih hmin in baptisma co dingin thu a pe hai. Cun ni tawkfang an hnenih cām hrih dingin Peter cu an ngen.

11

Peter in a Căngvaihnakpawl a Simfiang

1 Cuih cān ah Judia peng ih um apostolpawl le unaupawl in Zentelpawl khal in Pathian kamsuakthu an cohlang ve ti hna in an rak thei. 2 Cule Jerusalem ih Peter a hung soh tikah, serh zim tan zumtupawl in Peter cu an do. 3 «Serh zim tan lo mipawl hnenah na feh ih, an zawngah na ei,» tiah an ti.

4 Asinan Peter in a thăwk ih an hnenih thil cang mi cu a sangsángten a thăwk ihsin a simfiang hai ih, 5 «Joppa khua ih thla ka cam laiah, zelhin ka um ih larnak ka hmu, puan hlāipi bangtuk, a kil pali ih khai ih run ṭhum mi vek thil pakhat ka hnenah a rung ṭum. 6 Cumi cu ka zohhliah ih leitlun um rannung ke li neipawl, sahrangpawl, băwkvâkpawl le tlun zuang vâtepawl tla ka hmu. 7 Cule aw pakhat in, ‹Peter, tho aw, that awla, ei aw,› tiih i ti ka thei. 8 Asinan kei in, ‹Si lo e, Bawipa! Ziangahtile a thianglo mi le a bawrhhlawh mi zianghman ka kâ sungah a lut dah kêl lo,› tiah ka ti. 9 Asinan van ihsin aw cun, ‹Pathian in a thianter zo mi cu thianglo ah ruat hlah,› tiah i sawnsal. 10 Cule cumi cu vei thum tiang a cang, cule a zaten van ah dirhsohsal thluh an si. 11 Cule ngai hnik, cumi laifangah Sisaria khua ihsin ka hnenih an rak thlah mi, mi pathum kha ka riahnak inn hmaiah an rak ding. 12 Cun rinhlelhnak zianghman um loin, anmah hnenih feh dingin Thlarau in i fial. Cuihtlunah hi unau paruk pawl khal ka zawngah an ra ve ih, Kornelias inn ah kan lut. 13 Cule Kornelias in a inn ih vancungmi ding a hmuhdān in sim, vancungmi cun a hnenah, ‹Joppa khua ah mi thlah awla, Peter tiih an kawh mi Simon va ko aw. 14 Anih in kamsuakthupawl a lo sim ding ih, cumi cun nangmah le na sungkua hmuahhmuah a lo rundam ding a si,› tiah a ti. 15 Cule thusim ka thawh tikah, Thlarau Thianghlim cu a tirih kan parih a ra thlen vek khan an parah a thleng ve. 16 Cun Bawipaih kamsuakthu, ‹John cun tidai ah baptisma a pe taktak, asinan nannih cu Thlarau Thianghlim ah baptisma nan si ding,› tiih a ti mi ka vun máng. 17 Curuangah Bawi Jesu Khrih a zumtu kanmah hnenih Pathian in thilpek in pek mi vek an hnen khalih a pek a si ahcun, Pathian dawn dingah kei cu zo so ka si?» tiah a ti.

18 Cuih thilpawl an theih tikah daiten an um; cule, «Pathian in nunnak an co theinak dingah lungthlengnak cu Zentelpawl hnen khalah a pe ve a si hi!» tiin Pathian an thangṭhat.

Anṭiok Kawhhran

19 Stefen parih a suak mi tiduhdahnak hnuih a ṭekdarh mipawl cu Fonisia peng, Saipras tikulh le Anṭiok khua tiang an thleng ih, Jew-pawl hnen siarlo mi dang zo hnen hmanah kamsuakthu an phuang lo. 20 Cule mi hrek cu Saipras tikulhmi le Sairinmi an si ih, Anṭiok an thlen tikah aGrik ṭawng hmang Jew-pawl hnen khalah Bawi Jesu-ih thuthangṭha an phuang. 21 Cule Bawipaih kut cu an hnenah a um, cule mi tampi in an zum ih, Bawipa lam an hawi.

11:20a Grik ṭawng hmang: Jew si si, Grik ṭawng hmang le nunphung lapawl an si.

22 Cuih thilpawlih thuthang cu Jerusalem ih um kawhhran hnen a thleng, cule annih in Barnabas cu Anṭiok tiangih feh dingin an thlah. 23 Barnabas cu a va feh ih, Pathian zangfahnak a va hmuh tikah a lung a awi, cule an zaten Bawipa hnenih kăwp ringring dingin an thinlung in thuṭhencatnak nei dingin tha a pe hai. 24 Ziangahtile anih cu miṭha, zumnak le Thlarau Thianghlim ih khat a si. Cule mi tampi cu Bawipa hnenih bêt an si.

25 Cun Barnabas cu Saul hawl dingin Tarsas ah a feh. 26 A va hmuh tikah, Anṭiok ah a hruai. Cun hitin a si, kum khat sung annih cu cuih kawhhran thawn an tawngkhawmaw ih, mi tampi an zirh. Cule Anṭiok khua ah dungthluntupawl kha Khristian tiah kawh hmaisabik an si.

27 Cuih cān ah Jerusalem ihsin Anṭiok ah profetpawl an feh. 28 An lakih mi pakhat Agabas an ti mi pa cu a ding ih, leitlun pumpi ah mangṭam maksak a tlung cing ding tiah Thlarau theihternak in a phuang. Cuih pampi cu Kaisar Klaudias san ah a thleng. 29 Dungthluntupawl cun mah le tithei tawk cio in, Judia peng ih cêng unaupawl băwmnak pe dingin an relcat. 30 Cule cumi cu an tuah ih, an thilpek cu Barnabas le Saul kut in elder-pawl hnenah an kuat.

12

James Thahnak le Peter Thawngthlaknak

1 Cuih cān hrawngah aHerod Siangpahrang in kawhhranmi mi hrekkhat se zetih tiduhdah dingah a kai hai. 2 Cun John-ih upa James cu ralnâm in a that. 3 Cumi cun Jew-pawl a lunghmuiter ti a hmuh ruangah, Peter khal a kaiter hai lala. Cucu Thilnu telh lo Sang Puai Nipawl laiah a si. 4 Peter a kaih hnuah, thawng sungah a khum. An kil dingah, bur khat ah ralkap pali a um mi ralkap bur li pawl hnenah a pek. Lanta Puai ṭheh hnuah Peter cu mipi hmaiah suahih a thu rel dingin Herod in khua a khâng.

12:1a Herod: Nauhakpawl thattu Herod-ih tupa Herod Agrippa I a si.

5 Curuangah Peter cu thawngthlak a si, asinan kawhhran in a hrangah Pathian hnenah cat loin thla an cam.

Peter Runsuahnak

6 Herod in a thu rel dingih a hruaisuah zik, a mizan ah Peter cu thawnginn ralkap pahnih lakah a it. Thir cikcin pahnih in an khit ih, kiltupawl in thawnginn sângka in an kil. 7 Cule ngai hnik, Bawipaih vancungmi a ra ih, tleu in thawnginn sung cu a tlet. Cule vancungmi cun Peter-ih hnak a vun bēng ih, a kaitho, «Zamrangten tho aw!» tiah a ti. Cule Peter-ih kut ihsin thir cikcinpawl cu an tla.

8 Cun vancungmi in a hnenah, «Na tai khap awla, na kedam khal bŭn aw,» tiah a ti. A ti vekin Peter cun a tuah. Cule vancungmi cun, «Na sinfen hruh awla, i thlun aw,» tiah a ti. 9 Peter cu a fehsuak ih vancungmi cu a hei thlun, cule vancungmi ih a tuah mi cu thungai a si ti a thei lo, larawknak ka hmu a si ding tiah a ruat sawn. 10 A pakhatnak le a pahnihnak sentari kilnak an hei lan ih, khaw sung fehnak thir kăwtka an thleng. Cuih kăwtka cu amah tein an hrangah a áwngaw ih, cumi cun an suak. Lamzin thler pakhat an zawh ṭhehin hmakhatteah vancungmi cun a tlansan.

11 Cule Peter cu a lung a hung fim ih, «Bawipa in a vancungmi a thlah ih, Herod-ih kut sung ihsin le Jew-pawl in ka parih tuah an beisei mi hmuahhmuah lak ihsin i runsuak a si ti atu ah cun ka thei taktak thlang a si,» tiah a ti.

12 Cule thil cang mi a theihngah hnuah, Mark an ti mi John-ih nu Mary-ih inn ah a feh. Cu tawkah cun mi tampi umkhawmin thla an rak cam rero. 13 Cule Peter in kăwtka sângka a vun king ih, va dawngsâwng dingin siahhlawhnu Rhoda ti mi cu a feh. 14 Cu nu in Peter-ih aw a si ti a theih tikah, a lungawi tuk ruangah sângka áwng loin, inn sungah a tlân sawn ih, kăwtka hmaiah Peter a ding tiah a sim hai. 15 Asinan annih in a hnenah, «Na â a si hi!» tiah an ti. Sikhalsehla anih in a si rori tiin a ṭangbet feufeu. Cule annih in, «Cucu a vancungmi a si ding,» tiah an ti.

16 Asinan Peter cun cat loin a king rero; cule sângka an ăwn tikah, Peter an hmu ih an khawruah a har. 17 Daiten um dingin Peter cun a kut a hei zâp hai, cule thawnginn sung ihsin Bawipa ih a hruaisuahdān kha an hnenah a sim. Cule anih in, «Va feh uh, hi thilpawl hi James le unaupawl hnenah sim uh,» tiah a ti. Cule a suak ih, hmun dang ah a feh.

18 Zing khua a van tikah, Peter parih thil cang mi thuhla ah ralkappawl lakah buainak namen lo a um. 19 Herod in amah cu ṭha zetin a hawl nân, a hmuh lo tikah, kiltupawl cu ṭha zetin a zawihnit hai ih, annih cu that dingin thu a pe. Cule Herod cu Judia peng ihsin a suk ih Sisaria khua ah cān tawkfang a va um.

Herod Thihnak

20 Cule Herod cu Ṭaiar-mipawl le Sidon-mipawl parah a thin a heng zet. Asinan cuih khawmipawl cu lungrualten a hnenah an ra ih, siangpahrang ihnak pindan kilkhawitu Blasṭas kha anmah ṭanpitu dingih an lēmneh ruangah le an ram cu siangpahrang uk mi ram in a cawm ruangah remnak an dil.

21 A ni khiah ni ah Herod cu a siangpahrang thuam a hruk ih a thuṭhennak laltokham parah toin, mipi hnenah thu a sim. 22 Cule mipi in, «Cucu pathian aw a si, milai aw a si lo!» tiah cat loin an au. 23 Cule Pathian sunlawihnak a pek lo ruangah, hmakhatteah Bawipaih vancungmi in a vuak. Cule anih cu khukrul in an ei ih a thi.

24 Asinan Pathian kamsuakthu cu a ṭhang ih a karhzai.

25 Cule Barnabas le Saul cu an rawngbawlnak an ṭheh tikah Jerusalem ihsin an kirsal ih, Mark an ti mi John cu an hnenah an hruai.

13

Barnabas le Saul Thlahnak

1 Anṭiok kawhhran ah profetpawl le zirhtupawl hrekhat an um. Cupawl cu Barnabas, Niker an ti mi Simeon le Sairin peng-mi Lusias, aHerod tetrak thawi a ṭhangliantlang mi Manaen le Saul tla an si. 2 Anmahpawl cu Bawipa lamih rawngbawlnak tuahin le rawlulih an um laiah, Thlarau Thianghlim in, «Anmah ka kawhnak săn hna hrangah Barnabas le Saul kha ka hrangah serhhran uh,» tiah a ti. 3 Cun rawlulin thla an cam hnuah, an lu parah kut an suang ih an thlahsuak.

13:1a Herod: Nauhakpawl thattu Herod-ih fapa Herod Antipas a si.

Saipras Ah

4 Cule Thlarau Thianghlim ih thlahsuaknak in, Seleusia khua ah an vung feh, cule cutawk ihsin Saipras tikulh ah lăwng in an feh. 5 Salamis khua an um laiah, Jew-pawlih sinakokpawl ah Pathian kamsuakthu an sim. Anmah bawmtu dingah John khal an hruai.

6 Cule tikulh pumpi an fang thluh ih, Pafos khua tiang an thleng, cu tawkah dawithiam le profet deu a si mi Jew-mi mi pakhat an táwng. A hmin cu Bar Jesu a si. 7 Cu pa cu mifim zet, ramṭhen uktu, Serzias Paulas hnenih um a si. Serzias Paulas cun Pathian kamsuakthu ngai a duh ruangah Barnabas le Saul cu a ko hai. 8 Asinan dawithiampa tiih anmai ṭawng ih kawh mi Elimas cun anmah a do ih, ramṭhen uktupa kha zumnak ihsin pialter a tum. 9 Cun Paul ti khalih an kawh mi Saul cu, Thlarau Thianghlim in a khat ih Elimas cu mit ṭhep loin a zoh. 10 Cule, «Nang Diabol fapa, dingfelnak hmuahhmuah ih doral, hrăwkhrawlnak phun zakip le mi bumnak phun zakip ih khat, Bawipaih lamzin dĭngpawl merhkawi hi na bansan lo ding maw? 11 Atu ah ngai hnik, na parah Bawipaih kut a um, na mit a caw ding ih, tawkfang sung cu ni hmu loin na um ding,» tiah a ti. Cule hmakhatteah mero le thim in a tlakhnawh ih a kut ih hruaitu ding hawlin a dap dundo. 12 Cun ramṭhen uktu cun cuih thil cang mi a hmuh tikah a zum, ziangahtile Bawipaih thuhla an zirh mi in a khawruah a harter zet.

Pisidia Ram Anṭiok Ah

13 Pafos khua ihsin Paul le a hawipipawl cu lăwng in an feh ih, Pamfilia ram Perga khua an thleng. Cutawk ihsin John in a tân ta hai ih, Jerusalem ah a kir. 14 Perga khua ihsin an feh ih, Pisidia ram Anṭiok an thleng. Sabbath ni ah sinakok ah an lut ih an to. 15 Cule Dān thu le Profetpawl ih ngan mi thupawl an siar ṭheh hnuah, sinakok hruaitupawl in an hnenah mi an hei thlah ih, an hnenah, «Pulepawl le unaupawl, mipi hrangah thazangpeknak ṭawngkam nan neih asile sim uh,» tiah an ti.

16 Cun Paul cu a ding, a kut a hei zâp ih thu a sim, «Israel-mipawl le nannih Pathian a ṭihzahtupawl, i ngai hnik uh! 17 Hi Israel-mipawlih Pathian in kan pupápawl cu a hril ih, Izip ram ah a langte sung an um laiah, annih cu a hmuingilter. Cule a bân thacak in cutawk ihsin a hruaisuak hai. 18 Cule kum 40 hrawng ramṭhing ah an nundān thinsauten a zāwi hai. 19 Cule Kanaan ram ih miphun pasarih pawl a siatsuah thluh hnuah, cuih ram cu camcawhfung zûknak in a zem hai.

20 «Cuihhnu ah profet Samuel cān a thlen hlanlo, kum 450 hrawng Pathian in anmah cu laireltupawl a pe hai. 21 Cule cuih hnuin, Israel-mipawl in siangpahrang an dil ih, Pathian in kum 40 sung hrangah Benjamin hnám, Kish fapa Saul cu anmah a pe. 22 Pathian in Saul a ṭhawnhloh hnuah, David kha an siangpahrang ah a tungding. Cu paih thu cu Pathian in hitin a theihter fawn, ‹Jesse fapa David, ka thinlung vek pu mi ka hmu zo, anih cun tuahter ka duh mi hmuahhmuah a kimter ding,› tiin.

23 «A thutiamkam vekin, Pathian in Israel-mipawl hrangah David cithlah ihsin Rundamtu Jesu a suakter. 24 A rat hlanah, John in Israel-mi hmuahhmuah hnenah lungthlengnak baptisma co dingah thu a rak sim hmaisa. 25 John in a hnaṭuan a ṭheh zik zawngah, ‹Kei cu zo ah in ruat? Kei cu amahpa cu ka si lo. Asinan ngai hnik uh, ka hnuah Mi pakhat a ra, kei cu a kedam phawihtu ding hmanah ka tlak lo,› tiah a ti.

26 «Pulepawl le unaupawl, Abraham-ih tesinfapawl le nan lakih Pathian ṭihzahtupawl hmuahhmuah tla, nan hnenah hi rundamnak thu hi thlĕn a si. 27 Ziangahtile Jerusalem ih cêng mipawl le an hruaitupawl in amah cu an rak theithiam lo ih, Sabbath ni tinteih an siar ṭheu mi, profetpawlih aw hman an rak theihthiam lo ruangah, cupawl cu amah thiamlo coternak in an kimter. 28 Cule thihnaktlak thu zianghman an hmu lo nân, amah cu that dingin Pilat an dil. 29 A thuhla rak ngan cia mipawl hmuahhmuah kha an tlamtlinter hnuah, thing par ihsin an lathla ih, thlān ah an hlum. 30 Asinan Pathian in amah cu mithi lak ihsin a thoter. 31 Mipi hnenih a thutheihpitu Galili peng ihsin Jerusalem ih a zawngih hung sotupawl in amah cu ni tampi sung an hmu.

32 «Cule kan pupápawl hnenih rak tuah mi thutiamkam lungawiumza thuthang cu nan hnenah kan thăn a si. 33 Jesu a thawhtersalnak in Pathian in kannih an tesinfapawl hnenah cuih thutiamkam cu a thlengkimter a si. Cumi cu Sam pahnihnak sungih,

‹Nang cu ka Fapa na si,
Tuihsun ah ka lo hring a si,›

tiih ngan vek khan a si.

34 Cule a ruak cu a ṭawihrallonak dingah, Pathian in Jesu cu mithi lak ihsin a thoter, hihi a sim mi a si,

‹David hnenih ka pek mi a thianghlim mi rintlak thukampawl kha ka lo pe ding,›

tiin.

35 Curuangah a dang Sam khalah anih in,

‹Na Mi Thianghlim cu a ṭawihral khal na siang lo ding,›

tiah a ti.

36 «Ziangahtile Pathian duhdān in David cu amai san minungpawl a rĕn hnuah, a itthat, a pupápawl hnenah phum a si ih, a ruak cu a ṭawihrál ta. 37 Asinan Pathian ih a thawhtersal mi Jesu cu a ṭawihrál lo. 38 Curuangah u le nau pawl, hihi thei uh, Jesu zarih sualpawl ngaidamnak thu cu nan hnenah phuan a si. 39 Mosi Dān hmangin thiam a lo coter theilonak lak ihsin amah a zumtu pauhpauh cu thil hmuahhmuah ihsin Pathian in thiam a coter a si. 40 Curuangah ralring uh, culole Profetpawl ih,

41 ‹Ngai hnik uh, nannih minautathmangpawl,
Nan mangbang uhla hlorál uh!
Ziangahtile mi in lo sim khal hai sehla
Ziangti hmanih nan zum thei lo ding mi hna pakhat nanmai san ah hna pakhat ka ṭuan ding,›

tiih an rak sim mi kha nan parah a thleng pang ding,» tiah a ti.

42 Jew-pawl in sinakok an suahsan tikah, Paul le Barnabas cu Zentelpawl in hmai Sabbath ni ah an ṭawngkampawl pehsal dingin an ngen. 43 Sinakok mipi-umkhawm an ṭiak tikah, Jew-mi lakih mi tampi le an biaknaksakhua ih a lut mi Zentel Pathian ngaihsak mi tampi in Paul le Barnabas cu an thlun. Annih in an hnenah thu an sim ih, Pathian zangfahnak ih um ringring dingin an fawrh.

44 A hmai zarh Sabbath ni ah an khawsen deuhthawin Pathian kamsuakthu ngai dingin an rakhawm. 45 Asinan Jew-pawl in mipi tam zet an hmuh tikah, iksiknak in an khat; cule Paul ih thusim mipawl cu an êl ih, a thusim dokalhin ṭawng sia an ṭawng. 46 Cutikah Paul le Barnabas in ralṭha zetin, «Pathian kamsuakthu nan hnenih sim hmaisak a ṭul hrimhrim, asinan cucu nannih in nan êl ih nanmah le nanmah kumkhaw nunnak cotlakih nan ruahawk lo ruangah, ngai hnik uh, Zentelpawl hnenah kan her thlang a si. 47 Ziangahtile Bawipa in thu in pek mi cu hitin a si,

‹Zentelpawl hnenih tleu si dingah le
Leitlun dĕng tiangih rundamnak thlentu si dingah ka lo ret a si,› a ti,»

tiah an ti.

48 Zentelpawl in cuih thu an theih tikah, an lung a awi zet ih, Bawipaih kamsuakthu cu an sunlawih. Cule kumkhaw nunnak co dingin Pathian ih a ruat mipawl cun an zum.

49 Cule Bawipaih kamsuakthu cu ram pumpuluk ah a thangdarh. 50 Asinan Jew-pawl in Pathian ngaihsak mi upattlak nunaupawl le khaw sungih hotu mipapawl kha an tawkhrăwk. Cule Paul le Barnabas dokalhin tiduhdah an thăwk ih an ram ihsin an dawisuak. 51 Paul le Barnabas cun an ke leivut an thingtla ih, Ikoniam ah an feh. 52 Cule dungthluntupawl cu aipuannak le Thlarau Thianghlim in an khat.

14

Ikoniam Ah

1 Cun hitin a si, Ikoniam khua ah Paul le Barnabas cu Jew-pawlih sinakok ah an luttlang ih thu an sim, cule Jew-mi mi tampi le Grikmi mi tampi in an zum. 2 Asinan zum lo tu Jew-pawl in Zentelpawl an tawkhrăwk ih, unaupawl tlunah thinlung sia nei ko an tuah. 3 Curuangah Paul le Barnabas cu, cu tawkah reipi an cam, Bawipaih thu cu ralṭha zetin an sim vivo. Cule a zangfahnak kamsuakthu an phuan mi nĕmhngehnak ah hminsinnakpawl le mangbangzapawl an kut ih tuah theinak pek an si.

4 Asinan khaw sung mipi cu an ṭhenaw: mi hrek in Jew-pawl an ṭan, mi hrek in apostolpawl an ṭan. 5 Cule Jew-pawl khal in Zentelpawl le an uktupawl thawn apostolpawl cu mualphoter ding le lungto ih deng dingin an tum. 6 Apostolpawl in cumi cu an thei ih, Listra, Darbi, Likaonia ram khawpipawl le a kiangkap ram ah an tlân. 7 Cule cu tawkah thuthangṭha an sim vivo.

Listra le Darbi Ah

8 Listra khua ah mi pakhat a ke ah tha zianghman um lo, a nu ih a hrinthlak ihsi kebái, vei khat hman feh dah lo pa a to. 9 Cu pa cun Paul ih thusim a thei. Paul in cu pa cu a zoh keukeu ih, Bawipa in a damter ding ti zumnak a nei ti kha a hmu. 10 Cule aw ring zetin, «Na ke in dĭngten ding aw!» tiah a ti. Cule cu pa cu a hung khir ih a feh.

11 Mipi in Paul ih tuah mi an hmuh tikah, an au ih, Likaonia ṭawng in, «Minung vekah pathianpawl cu cangin, kan hnenah an rung ṭum a si hi!» tiah an ti. 12 Cule Barnabas cu aZeus an ti ih, Paul cu thusimtubik a si ruangah bHermes tiah an ko. 13 Zeus-ih temple cu an khaw lengah a um, cuih puithiam cun mipipawl thawn an hnenih raithawi a duh ruangah câwcangpawl le pangpar kûalpawl kăwtka ah a rak keng.

14:12a Zeus: Grik ṭawng a si ih, Laṭin ṭawng cun Jupiter an ti. Rairing mi pathianpawl lakih sângbik ih an ruah mi a si.

14:12b Hermes: Latin ṭawng in Mercury, ti a si ih, Grikmipawl le Rom mipawl ih pathianpawl aiawhih thuphuangtu si ih ruah a si.

14 Cumi cu apostol Barnabas le apostol Paul in an theih tikah, an hnipuan an thlek ih, mipi lakah an tlân ih an au, 15 cule, «Pulenuh, ziangahso hivek thilpawl nan tuah rero? Kannih khal nanmah vek milai menmen kan si ve. Kannih cun a ṭhahnem lo mi hi thilpawl ihsin lei le van le tifinriat le a sungih um mi hmuahhmuah a tuahtu Pathian nung hnen lamih nan hawinak dingah, nan hnenah thuthangṭha kan lo sim a si. 16 Hlanlai ah cun Pathian in miphun hmuahhmuah anmai duh mi lamzin ih feh a siang hai. 17 Sikhalsehla thil ṭha a tuah mi in amah le amah minung hnenah phuangaw loin a um lo. Van ihsin ruahpi le thlairahpawl anmai cān teah in pe, kan nunnak cu rawl le lungawinak thawn a khatter,» tiah an ti. 18 Cuih thupawl an sim na cing hmanin an hnenih raithawi lo dingin mipi an dawn thei ceu.

19 Cun Jew-pawl cu Anṭiok khua le Ikoniam khua ihsin cu tawkah an ra ih, mipi an lēmneh hnuah, Paul cu lungto in an dêng. A thi zo ah an ruat ih khaw lengah an dirsuak. 20 Asinan dungthluntupawl in an kulh vialvi laiah, a tho ih khaw sungah a lut. Cule a thaisun ah Paul cu Barnabas thawn Darbi khua ah a feh.

21 Cule cuih khua ah thuthangṭha an sim ih, dungthluntu tampi an tuah. Cuihhnu ah Listra khua, Ikoniam khua le Anṭiok khua ah an kir. 22 Dungthluntupawlih thinlung an hngetter ih, zumnak ah um ringring dingin tha an pe. Cule, «Pathian uknak sungih a luttu ding kannih cun harsatnak tampi táwng ding hrimhrim kan si,» tiah an ti. 23 Cun kawhhran tin ah elder-pawl an ruatsak vivo, rawlulin thla an cam hnuah, zumtupawl cu an zum mi Bawipa hnenah an ap ta vivo.

Siria Anṭiok ah Paul le Barnabas an Kir

24 Pisidia ram an lan hnuah, Pamfilia ram an thleng. 25 Perga khua ih kamsuakthu an phuan hnuah, Attalia khua ah an feh. 26 Cutawk ihsin Anṭiok khua ah lăwng in an feh, cutawk hmun cu an rak ṭheh zo mi hna kha ṭuan dingin unaupawl in Pathian zangfahnak ih an rak apnak hmun a si.

27 An thlen tikah kawhhran mipawl an kokhawm ih, anmah hmangin Pathian in a tuah mi hmuahhmuah le Zentelmi hnenih zumnak sângka a ăwnsakzia pawl tla an sim. 28 Cutin cu tawkah dungthluntupawl hnenah reipi an câm.

15

Jerusalem Khawnsil

1 Judia peng ihsin mi hrekkhat Anṭiok khua ah an ra ih, «Mosi thupek bangtukin serh zim nan tan lo asile, rundam nan si thei lo ding,» tiah unaupawl an zirh. 2 Curuangah Paul le Barnabas cun lungkimlonak nasazet an nei ih, cutepawl cu an êl. Cule Paul, Barnabas le unau dang hrekkhat cu Jerusalem ah vung fehin hih thu hi apostolpawl le elder-pawl hnenih thlĕn dingin unaupawl in an relcat.

3 Cun kawhhran in annih cu an thlah ih, Fonisia ram le Samaria ram pál phahin Zentelpawl thlengawknak thu cu an sim phah vivo. Annih in unaupawl hmuahhmuah cu nasazetih aipuang ko an tuah. 4 Jerusalem an thlen tikah, kawhhran le apostolpawl le elder-pawl cun an rak hmuak, cule annih in anmah hmangin Pathian ih a rak tuah mi thil hmuahhmuah cu an sim. 5 Asinan Farasipawl lakih zumtu hrekkhat cu an ding ih, «Zentelpawl cu serh zim an tan tengteng a ṭul ih, Mosi Dān thlun dingin thu kan pek a ṭul a si,» tiah an ti.

6 Cule hi thu ruatkhawm dingah, apostolpawl le elder-pawl an táwngawkhawm. 7 Reipi an relkhawm hnuah, Peter cu a ding ih an hnenah, «Pulepawl le unaupawl, Zentelpawl in thuthangṭha kamsuakthu ka kâ ihsin an theih ih an zumnak dingah hlan deuhah Pathian in kan lakah a hril hai a si ti nan thei. 8 Cule thinlung theitu Pathian cun kan hnenih Thlarau Thianghlim a pek bangkhan, an hnen khalah pein a pawm hai a si. 9 Zumnak in an thinlung cu a thianfaiter zo ruangah, Pathian in anmah le kanmah karlakah danglamnak a umter lo. 10 Curuangah kanmah le kan pupápawl ih phurh thei lo mi hngawngkol cu, dungthluntupawlih hngawng ah bâtin, ziangahso Pathian nan hniksak? 11 Anmah vek thothoin Bawi Jesu Khrih zangfahnak thawngin rundam kan si ve ding ti kan zum sawn a si,» tiah a ti.

12 Cun mipi zaten daiten an um ih, Barnabas le Paul in anmah hmangih Pathian in Zentelpawl lakih thilmakpawl le mangbangzapawl a tuah mi hmuahhmuah thawng an thăn mi cu an ngai. 13 Cule daiteih an um hnuah, James in a sâng ih, «Pulepawl le unaupawl, i ngai hnik uh: 14 Amai hmin putu ding mi hril dingah, Pathian in Zentelpawl a hmaisabik a vehvaihdān Simon in in simfiang zo. 15 Cuih thu cu Profetpawlih ṭawngkampawl thaw khalin a milaw a si. Hitin ngan a si:

16 ‹Himi hnuah ka kirsal ding ih,
A tlu zo mi David-ih puanthlam ka dĭnsal ding.
A siatbăl mipawl ka dĭnsal ding ih,
Ka tungding ding.
17 Cutin a tāng mi minungpawl in Bawipa an hawl ding,
Ka hmin pu Zentelpawl hmuahhmuah hman in an hawl ding.
Hi thil hmuahhmuah tuahtu Bawipa in a ti,›

tiin.

18 «Leilung sēmtir ihsin Pathian in amai hnaṭuan hmuahhmuah cu a thei ṭheh. 19 Curuangah Pathian lamih a hawi mi Zentelpawl cu kan buaiter lo ding ti hi ka thuṭhendān a si, 20 milempawl ih an bawrhhlawhter mi thilpawl, nunau-mipa sualnak, hngawng rek ih thah mi sa le sa thi pawl hrial dingin ca kan kuat sawn pei. 21 Ziangahtile Sabbath ni tin in sinakokpawl ah Mosi Dān cu an rak siar ruangah hlanlai sanpawl ihsin cumi cu khaw tin ah an rak phuang zo,» tiah a ti.

Zentel Zumtupawl hnenih Khawnsil Cakuat

22 Cun apostolpawl, elder-pawl le kawhhran zaten Anṭiok khua ih thlah ding mi anmah lak ihsin hril ding cu thil ṭha ah an ruat. Paul le Barnabas zawngih feh dingah unaupawl lakih hruaitu Barsabas ti khalih an kawh mi Judas le Silas an hril ih, 23 anmah hnenin hi ca hi an kuat, «Kannih apostolpawl le elder-pawl le unaupawl in Anṭiok khua, Siria ram le Silisia ram ih um Zentel unaupawl, cibai kan lo bûk.

24 «Kan hnen ihsin mi hrekkhat nan hnenah rain an ṭawngkam in buainak an lo pe ih, nan thinlung an lo buaiter ti kan thei. An hnenih cuvek thupek kan pek lo mipawl in ‹Serh zim nan tán tengteng pei ih, Dān nan thlun tengteng pei,› an lo ti. 25 Kan duhdawt mi Barnabas le Paul zawngih hril mipawl nan hnenih thlah cu thil ṭha a si ding tiah tawngkhawmawin, lungrualten kan ruat. 26 Barnabas le Paul cu kan Bawipa Jesu Khrih hmin ruangah an nunnak tiang a pe siangtu an si. 27 Curuangah Judas le Silas kan rak thlah ih, annih in kan ngan mi ṭawngkampawl cu an kâ in an lo sim ding. 28 Ziangahtile Thlarau Thianghlim le kannih cun hi thil ṭul pawimawhpawl hnakih ritsawn lo phurhter lo ding cu, thil ṭha ah kan ruat. 29 Thil ṭul mipawl tla cu: milem hnenih an hlăn mi rawl siseh, sa thi siseh, hngawng rek ih thah mi sa siseh, nunau-mipa sualnak siseh hrial uh. Cuih thilpawl nan hrial asile nan tiṭha ding. Damten,» tiin.

30 Cun an thlah hnuin, Anṭiok khua ah an feh; cule mipi an kokhawm ih, cakuat cu an pe. 31 Cuih ca an siar ṭheh tikah, cuih thapeknak thucah ruangah lungawiaipuangin an um. 32 Judas le Silas khal profet an si ih, unaupawl cu tha an pe ih, ṭawngkam tampi hmangin tha an cakter. 33 Cule cutawk ih tawkfang an cām hnuah, unaupawl in apostolpawl hnenah hnangamten kirsal dingin an thlah.

34 Sikhalsehla Silas cun cutawk ih tān ta hrih cu ṭhain a ruat. 35 Paul le Barnabas khal Anṭiok khua ah cun an tâp ta ih, mi dang tampi thawn Bawipaih kamsuakthu an zirh ih an phuang.

Paul le Barnabas Lungruallonak

36 Cun ni tawkfang hnuah Paul in Barnabas hnenah, «Bawipaih kamsuakthu kan rak sim zonak khaw tin ah fehsalin unaupawl ziang an bang ti kan va zoh pei,» tiah a ti. 37 Barnabas in Mark an ti mi John kha an zawngih hruai a duh. 38 Asinan Pamfilia ram ah anmah tlunsanin hnaṭuannak ih an zawngih feh ve lo tu Mark hruai cu Paul in ṭhain a ruat lo. 39 An karlakah lungruallonak a nasatuk, cutin pakhat le pakhat an ṭhenaw. Barnabas cun Mark a hruai ih, Saipras tikulh lamah lăwng in an feh. 40 Cun unaupawl in Paul cu Pathian zangfahnak ah an ap, cule anih in Silas a hril ih an feh. 41 Cule Siria ram le Silisia ram a fáng ih, kawhhranpawl a cakter vivo.

16

Timothy in Paul le Silas a Thlun

1 Cun Paul cu Darbi khua le Listra khua a thleng. Cule ngai hnik, cu tawkah zumtu Jew-nuih fapa Timothy ti mi dungthluntu pakhat a um; asinan a pa cu Grikmi a si. 2 Amah cu Listra khua le Ikoniam khua ih unaupawl in an fak zet. 3 Paul in Timothy cu a khualtlawnnak ih hruai a duh; cule a hruai ih serh zim a tansak, ziangruangahtile cuih ram kiangkapih Jew-pawl hmuahhmuah in Timothy pa cu Grikmi a si ti an thei. 4 Jerusalem ih apostolpawl le elder-pawl in an thlun dingih an relcatsak mi dānpawl cu khawpipawl an păl phahah an sim phah vivo. 5 Cun kawhhranpawl cu zumnak ah an cak sinsin ih, ni tin mipum an karh.

Masidonia Kawhnak

6 Cule Frizia ram le Galatia ram an fang, Thlarau Thianghlim in annih cu Asia ram ih kamsuakthu phuan ding a kham hai. 7 Misia peng an thlen tikah, Bithinia ram sung luh an tum, asinan Thlarau in an luh ding a siang lo. 8 Cun Misia peng hrialin, Troas khua ah an feh. 9 Cule zan ah Paul hnenah larnak a lang. Masidonia ram ihsin mi pakhat cu dingin, «Masidonia ram ah ra awla, in ra bawm aw,» tiah a ngen. 10 Paul in larnak a hmuh hnuah, Masidonia ram ih feh dingin kan timtuahaw lohli, an hnenih thuthangṭha sim dingin Bawipa in in ko a si hi tiah kan ruatcat.

Lydia Lungthlengnak

11 Curuangah Troas khua ihsin lăwng in dĭngten Samothrace tikulh ah kan feh, cule a thaisun ah Nipolis khua kan thleng. 12 Cutawk ihsin Rom-mipawl um hleicenak Masidonia ram, peng pakhat ih an khawpibik Filipi khua ah kan feh. Cuih khua ah ni tawkfang kan câm. 13 Cule thla an cam ṭheu nak hmun khaw leng tiva kapah, Sabbath ni ah kan feh; cule kan to ih, cutawk ih a rakhawm mi nunaupawl hnenah thu kan sim. 14 Thiatira khawmi, puan sendup zuartu, Lydia ti mi nu cu Pathian betu a si ih, Paul ih thusim mipawl ṭhatei ngai dingin Bawipa in a thinlung a ăwnsak. 15 Cule amah le a sungkua zaten baptisma an co ṭheh hnuah, «Bawipa ah mirinum si ih in ruah asile, ra uhla ka inn ah ra cām uh,» tiah in ngen. Cun hranhramin in sawm.

Paul le Silas Thawng Sungah

16 Cule hitin a si, thlacamnak hmun ih kan feh laiah, khawse pawlh mi hmai lam thu a simsung theitu siahhlawh nute pakhat in in rak táwng. Hmai lam thu a simsungnak in a pulepawl hrangah hlawknak tampi a ngahsak. 17 Cu nute cun Paul le kanmah in thlun ih, «Hipawl hi Cungnungbik Pathian siahhlawh an si, kan hnenah rundamnak lamzin thu an phuang a si,» tiah a au vivo. 18 Cutivekin ni tampi a tuah.

Paul cu thinna zetin khawse lamah cun a heraw ih, «Hi nuih sung ihsin suak dingin Jesu Khrih hmin in thu ka lo pe,» tiah a ti. Cule hmakhatteah cu nu cu khawsia in a suahsan. 19 Asinan a pulepawl in an ruahsan mi hlawknak a um nawn lo ti an hmuh tikah, Paul le Silas cu an kai ih, thuneitupawl hmaiih dingter dingin dawrhmun ah an dirlut.

20 Cule khawpi uktu bawipawl hnenah an hruai ih, «Hipawl hi Jew-mi an si ih, kan khaw sungah buainak nasazet an suakter. 21 Kannih Rom-mi hrangih kan cohlan thei lo mi le kan thlun thei lo mi dān kalh mi nunphungpawl tla an zirh,» tiah an ti. 22 Cun mipi cu Paul le Silas dokalhin an tho; cule khawpi uktu bawipawl in an hnipuan an thleksak ih, anmah cu fungfekpawl ih vaw dingin thu an pe. 23 Vei tampi an vuak hnuah, thawng sungah an hlăwn ih, thawnginn kiltupa kha ṭhatei kil dingin thu an pe. 24 Cuih thupek a dăwn hnuah, Paul le Silas cu thawnginn sungta pindan ah a hlăwn hai ih, an ke ah hreng a sut hai.

Thawngtla Kiltupaih Lungthlengnak

25 Zanṭim ah Paul le Silas cu thla an cam ih, Pathian thangṭhatnak hla an sak, cule thawngtlapawl in an ngai. 26 Rinlopiah nasazetin ling a hnîn ih, thawnginn lungphumpawl a hnîn ṭheh; cule hmakhatteah thawnginn sângkapawl an áwngaw ṭheh ih, thawngtlapawl hmuahhmuah ih thir cikcinpawl an phawihaw ṭheh. 27 Cule thawngtla kiltupa cu a ihthahnak ihsin a hung ṭhang ih, thawnginn sângkapawl áwngawin a hmu, thawngtlapawl an tlânsuak ṭheh zo ah a ruat, cule a ralnâm a zûk ih, amah le amah thahawk a tum. 28 Cutikah Paul cu aw ring zetin a au ih, «Nangmah le nangmah tuahmawhaw hlah law, ziangahtile kan zaten hi tawkah kan um thluh ko,» tiah a ti.

29 Cule thawngtla kiltu cun meifar a dil ih a tlânlut, ṭihin a khūr rero ih, Paul le Silas ke hramah a băwk. 30 Cule annih cu lengah a hruai hai ih, «Pulenuh, rundam si dingah ziang ka tuah ding?» tiah a ti.

31 Cule annih in, «Bawi Jesu Khrih zum awla, rundam na si ding, nangmah le na sungkuapawl thawn,» tiah an ti. 32 Cun Bawipaih kamsuakthu cu amah le a inn ih umpawl zate hnenah an sim. 33 Cule cuih zan lala ah Paul le Silas cu a hruai hai ih, an hriamhmapawl a khawlhsak. Cule amah le an sungkua zaten baptisma an co cih. 34 A inn ih a hruai hai hnuah, an hmaiah rawl a hunsak hai; amah le a sungkua hmuahhmuah in Pathian an zum ruangah an ai a puang zet.

35 Cule khua a van tikah khawpi uktu bawipawl in palik bawipawl an hei thlah ih, «Khapawl kha thlah uh,» tiah an ti.

36 Cule thawngtla kiltupa in cuih ṭawngkampawl cu Paul hnenah thawng a thăn ih, «Khawpi uktu bawipawl in nanmah lo suah dingin thu in pe zo. Curuangah atu ah nan suak thei a si, hnangamten feh uh,» tiah a ti.

37 Asinan Paul in palik bawipawl hnenah, «Rom-mi kan si ve ko nain, thu zianghman zăwihliah ta loin langhnganin in vua ih, thawng sungah in hlăwn. Atu ah athupten in dawihlo ding maw si? A si thei hrimhrim lo! Anmah rori ra in in ra suah hai seh,» tiah a ti.

38 Cule palik bawipawl in cuih ṭawngkampawl cu khawpi uktu bawipawl an sim tikah, Rom-mi an si ti an thei ih an ṭih. 39 Cun an va feh ih, thawnginn ihsin an suah hnuah khaw sung ihsin suak dingin an dil. 40 Paul le Silas cu thawnginn ihsin an suah hnuah, Lydia-ih inn ah an lut. Cu tawkah unaupawl an táwng ih tha an pe, cule an fehsuak.

17

Thessalonika Ah

1 Paul le Silas cu Amfipolis khawpi le Appollonia khua an tlawngsuak ih, Thessalonika khua an thleng, cu tawkah Jew-pawlih sinakok a um. 2 A ti ṭheu dān vekin, Paul cu an hnenah a vung lut ih, Sabbath ni ni thum sung anmah thawn Cathianghlim sung thu an relkhawm. 3 Khrih cun a tuar tengteng a ṭul ti le mithi lak ihsin a thawhsal tengteng a ṭul ti cu Paul in a simfiang hai ih a nĕmhnget. Cule anih in, «Nan hnenih ka phuan mi Jesu hi Khrih cu a si,» tiah a ti. 4 Cule mi hrekkhat in an zum ih, Paul le Silas an va bên; cule Pathian ngaihsaktu Grik mi tampi le nunau hotu mi tampi in an bên ve.

5 Asinan a thusim pawm lo tu Jew-pawl cun an nahsuah ih, dawrhmun ihsin miṭha lopawl kha an sawmkhawm ih, khaw sungah buainak tuah an thăwk. Mipi hmaiih hruai dingin Jason-ih inn cu an va luhhnawh ih an hawl. 6 An hmuh lo tikah, Jason le unau hrekkhat cu khawpi uktu bawipawl hmaiah an dirsuak ih, «Leitlun linglettertupawl hitawk khalah an ra thleng. 7 Annih cu Jason in a rak cohlang hai ih, an zaten Kaisar-ih thusuah an dokalh. Siangpahrang dang a um, a hmin cu Jesu a si an ti,» tiin an au. 8 Cutiih an au cu mipi le khawpi uktu bawipawl in an theih tikah, an buai ṭheh. 9 Cule Jason le a dangpawl cu amkhāmnak tangka an pekter ih an thlah.

Beria Ah

10 Cun zan ah unaupawl in Paul le Silas cu Beria khua ah an thlah lohli. An thlen tikah, Jew-pawlih sinakok ah an feh. 11 Cutawk ih mipawl cu Thessalonika khawmipawl hnakin an duhum sawn, kamsuakthu cu hlawptlo zetin an cohlang ih, Paul ih thusim mi cu a dik maw diklo ti thei dingah ni tinten fimkhur zetin Cathianghlimpawl an hliakhlai. 12 Curuangah mi tampi in an zum ih, upattlak Grik nunaupawl le Grik mipa tampi khal in an zum.

13 Asinan Thessalonika khua ih Jew-pawl in Paul in Beria khua khalah Pathian kamsuakthu a sim ti an theih tikah, cutawk khalah Jew-pawl cu an feh ih, mipi an tawkhrăwk. 14 Cun unaupawl in hmakhatteah Paul kha tifinriat lamih feh dingin an thlah; asinan Silas le Timothy cu cu tawkah an rung tâng. 15 Paul cu a thlahtupawl in Athen khua tiang an hruai; cule a rang thei bikin Silas le Timothy kha amai hnenih ra dingin thupek an ngah hnuah, a thlahtupawl cu an tlung.

Athen Ah

16 Paul in Silas le Timothy kha Athen khua ihsin a hngah hai laiah, cuih khawpi cu milem in a khat ti a hmuh tikah, a thinlung a na zet. 17 Curuangah Jew-pawl le Pathian ngaihsaktu mi dangpawl cu sinakok sungah thu a relpi hai ih, ni tinten dawrhmun ih a tawn mi hmuahhmuah thu a relpi. 18 Cun khawruatthiam mifim Epikuras-ih dungthluntupawl le Stoamipawl khal in Paul cu an táwng. Cule mi hrek in, «Hi mitlăwkciarpa hin ziangso sim a duh?» tiah an ti.

Mi dangpawl in, «Ram dang pathianpawlih thuhla a phuang a bang,» tiah an ti, ziangruangahtile an hnenah Jesu le thawhsalnak thu a sim.

19 Cule Paul cu an hruai ih, Areopagas ah an fehpi, cule, «Na aupi mi zirhnak thar hi ziang a si ti kan thei thei pei maw? 20 Ziangahtile kan hna ah thil lamdangpawl na run keng a si. Curuangah hih thilpawlih tican theih kan duh,» tiah an ti. 21 Ziangahtile Athen khawmipawl hmuahhmuah le cutawk ih um ram dang mipawl cu thil dang zianghman tuah loin, thu thar simnak ah simaw, ngaithlaknak ah simaw an cān lawng hmuahhmuah cu an hmang.

22 Cun Paul cu Areopagas laiah a ding ih an hnenah, «Nannih Athen khawmipawl, thil ziangkim ah biaknaksakhua ngaihsak zet mi nan si ti ka thei. 23 Ziangahtile ka len phahah nan biak mipawl ka zoh ih, biakṭheng pakhat ka hmu. Cuih parah cun,

THEIH LO MI PATHIAN HNENAH,

tiih ngan mi ka hmu. Curuangah thei lo piih nan biak mi pa cu nan hnenih ka phuan mi hi a si. 24 Cuih Pathian cun leilung le a sungih um mi hmuahhmuah hi a tuah. Anih cu lei le van ih Lal a si ruangah, minung kut ih sak mi temple-pawl ah a cêng lo. 25 Amah in mi hmuahhmuah hnenah nunnak, thaw le thil hmuahhmuah a pek ruangah, ṭulsăm mi nei vekin minungpawl in an kut ih amah an rĕn ding khal a ṭul lo. 26 Cule leilung vangdâp hmuahhmuah parih cêng dingah thisen pakhat ihsin miphun hmuahhmuah a tuah. Cule tikcucānpawl le an cēnnak ding hmun ramripawl tla a ruatsak. 27 Anih cu kanmah lakih zo thaw hman in a hlat lo na cingin, minungpawl in Bawipa cu an hawl, an dap ih an hmuhsuak theinak dingah, Pathian in hihi a tuah a si. 28 Ziangahtile amai zarin kan nung, kan cāngvai, kan um a si. Thungaiten, nan hlaphuahthiam mi hrekkhat in, ‹Ziangahtile kannih cu a tefa kan si,› an ti a si. 29 Cutiih Pathian tefa kan si ruangah, Pathian-ih sinak cu minung thiamnak le ruahnak ih tuah mi sui, ngun le lungto milem thawi bangawin kan ruat ding a si lo. 30 Hlanlai ah Pathian in an theih lo lai cānpawl kha hmu lo vekin a umsan; asinan atu ah cun hmun kip ih mi hmuahhmuah lung thleng dingin thu a pe. 31 Ziangruangahtile a ruah cia zo mi pa hmangin dik zetih leitlun thu a ṭhen ding ni cu a khiah zo. Cucu mithi lak ihsin amah thawhter a sinak khan, Pathian in mi hmuahhmuah hnenah himi thuhla a fĕngzia a langter a si,» tiah a ti.

32 Cule mithi thawhsalnak thu an theih tikah, mi hrekkhat in an hmuhsuam, mi dangpawl in, «Hi thu hi na hnen ihsin ngaithlaksal kan duh,» tiah an ti. 33 Cule Paul cu an hnen ihsin a fehsuak. 34 Sikhalsehla mi málte cun Paul an bên ih an zum, cupawl lakah Areopagas sungtel pakhat Dionisias a tel, Damaris an ti mi nu pakhat le mi dang khal an hnenah an tel ve.

18

Korinth Ah

1 Cuih thilpawl hnuah Paul cu Athen khua suahsanin Korinth khua ah a feh. 2 Cu tawkah Ponṭas ram ih suak, Jew-mi pakhat Akuila ti mi a táwng. Rom Siangpahrang Klaudias in Jew-mi hmuahhmuah kha Rom ihsin suak dingin thu a pek ruangah, Akuila cu Italy ihsin a nupi Prisilla thawn tu baite ah Korinth ah an ra tlân. Paul cu anmah hmu dingin a va feh. 3 An hnaṭuan a bangawk ruangah, an hnenah a um ih hna a ṭuan; ziangahtile an hnaṭuan cu puanthlam sak a si. 4 Cule Sabbath ni tinten Paul cun sinakok ah thu a relpi hai ih, Jew-pawl le Grikmipawl simfiang a tum.

5 Masidonia ram ihsin Silas le Timothy an ra thlen tikah, Thlarau in Paul cu a turhnawh ih, Jew-pawl hnenah Jesu cu Khrih a si ti thu a theihter. 6 Cule an do ih, anmah dokalhnak ṭawng sia an ṭawng tikah, Paul cu a sinfen a thing ih, «Nan thisen cu nanmai lu parah tla seh; kei cu nan thisen ihsin ka thiang a si. Atu thăwkin Zentelpawl hnenah ka feh thlang ding,» tiah a ti.

7 Cutawk ihsin Paul cu a suak ih, Jasṭas an ti mi paih inn ah a lut, cu pa cu Pathian betu a si ih, a inn cu sinakok kiang teah a um. 8 Cun sinakok hruaitu Krispas le a sungkua hmuahhmuah in Bawipa cu an zum. Cumi an theih tikah Korinth khawmi mi tampi in an zum ih baptisma an co.

9 Zan ah larnak in Bawipa in Paul hnenah, «Ṭih hlah, thusim aw, daiten um hlah; 10 ziangahtile ka lo umpi a si, lo tuahmawh dingin zohman in na parah kut an thlak lo ding, ziangahtile hi khua ah minung tampi ka nei,» tiah a sim. 11 Cule Paul cu cu tawkah kum khat le thla ruk a um, an hnenah Pathian kamsuakthu a zirh.

12 Gallio cu Akaia ramṭhen uktu a si laiah, lungrualten Jew-pawl in Paul cu an do ih, thuṭhennak tokham ah an hruai. 13 Cule «Hi pa in Dān thawi kalhawin Pathian be dingah mipi neh a tum a si,» tiah an ti.

14 Cule Paul cu a kâ a ān zik zawngah, Gallio in Jew-pawl hnenah, «Nannih Jew-pawl, dingfellonak thu asilole bumawknak siava thu ih phunzai si uhla cu, nan thu ka lo ngai ding. 15 Asinan ṭawngkampawl le hminpawl le nanmai dān thuhla ih thusuhnak an si ah cun nanmah tein tifel uh. Ziangahtile khavek thil thuṭhentu si ka duh lo,» tiah a ti. 16 Cule thuṭhennak tokham ihsin a dawisuak hai. 17 Cun Grikmipawl hmuahhmuah in sinakok hruaitu Sosthenes cu an kai ih, thuṭhennak tokham hmaiah an vuak. Asinan Gallio cun cuih thilpawl cu ziang hmanah a siar lo.

Prisilla, Akuila le Apollos

18 Cun Paul cu Korinth khua ah reipi a um, cule unaupawl hnenah damten tiah a ti ih, Siria ram ah lăwng in a feh. A zawngah Prisilla le Akuila khal an feh ve. Kenkeria khua ah a sám a met, ziangahtile thukamnak a rak tuah. 19 Cule Efesa khua a thleng ih, cu tawkah Prisilla le Akuila cu a tān ta hai; Paul amah rori cu sinakok ah a lut ih, Jew-pawl thu a relpi. 20 Jew-pawl in an hnenih cān rei deuh cam dingin an dil tikah, a lung a kim lo. 21 Cuhnakin damten ti phahin an hnenah, «Jerusalem ih um cing ding mi puai cu ziangti lam khalin ka hman tengteng a ṭul; asinan Pathian in rem a ti asile, nan hnenah ka ra kirsal ding,» tiah a ti. Cule Efesa khua ihsin lăwng in a feh.

22 Cule Sisaria khua ih a ṭum hnuah a hung so ih, kawhhran mipawl cibai a bûk, cule Anṭiok ah a rung suk. 23 Cutawk ih cān tawkfang a hman hnuah, a păwksuak ih, a sangsângten Galatia le Frizia ram a tlawng, dungthluntupawl hmuahhmuah a cakter vivo.

24 Cule Alexandria khua ih suak, Jew-mi pakhat Apollos ti mi cu Efesa khua ah a ra thleng, amah cu ṭawngkam thiam zet le Cathianghlim thu thei zet a si. 25 Hi pa hi Bawipaih lamzin thuhla rak zirh zo mi a si; cule anih cun John-ih baptisma lawng a thei ko nân, a thinlung ih duhnak nasazet thawn Bawipaih thuhla cu dik zetin a sim ih, a zirh. 26 Cule sinakok ah ralṭha zetin thusim a thăwk. Akuila le Prisilla in a thusim an theih tikah, a dang deuhah an hruai ih, Pathian lamzin thu cu diksinin an simfiang.

27 Apollos cu Akaia peng ih feh a duh tikah, unaupawl in cutawk ih dungthluntupawl cu amah rak cohlang dingin fawrhnak ca an ngan. A va thlen tikah, zangfahnak ruangih a zumtupawl kha nasazetin a bawm hai. 28 Ziangahtile langhnganih elawknak ah Jew-pawl cu Apollos cun a neh nêknêk hai ih, Jesu cu Khrih a si ti Cathianghlim ihsin a simfiang hai.

19

Efesa ah Paul

1 Cule hitin a si, Korinth khua ih Apollos a um laiah, Paul cu Efesa khua thleng dingin tlun lam rampawl hrut vivo in a tlâwng. Cu tawkah dungthluntu hrekkhat a táwng hai ih, 2 anih in an hnenah, «Nan zum tikah khan, Thlarau Thianghlim nan rak co maw?» tiah a ti hai.

Cule annih in, «Thlarau Thianghlim a um le um lo hman hna in kan thei lo,» tiah an ti.

3 Cule Paul in an hnenah, «Ziang baptisma so nan co?» tiah a ti.

Cule annih in, «John-ih baptisma kan co,» tiah an ti.

4 Cun Paul in, «John cun lungthlengnak baptisma a pe taktak, a hnuih a ra ding mi pa zum dingin mipi a sim, cumi cu Khrih Jesu zum dingin a si,» tiah a ti.

5 Cuih thu an theih tikah, Bawi Jesu Khrih hmin in baptisma an co. 6 Paul in an parah a kut a suang ih, an parah Thlarau Thianghlim a rung thleng, cule ṭawng phun dangdangin an ṭawng ih, profet thuphuan in thu an phuang. 7 An zaten patling hleihnih hrawng an si.

8 Cule Paul cu sinakok ah a lut ih, thla thum sung ralṭha zetin thu a sim, Pathian uknak thu mi a relpi ih, mi a fiangter. 9 Asinan mi hrekkhat cu an thinlung an hakter ih an zum lo, mipi tam zet hmaiah cuih aLamzin thu dokalhin ṭawng sia an ṭawng ciamco sawn riangri. Cutikah anmahpawl cu Paul in a tlansan hai ih, dungthluntupawl kha amai zawngah a hruai, cule Tirannas-ih thuzirhnak inn ah ni tin thu a relpi hai. 10 Cutivekin kum hnih sung a um ih, Asia ram ih a cêng mi Jew-mi le Grikmi hmuahhmuah in Bawi Jesu-ih kamsuakthu cu hna in an thei ṭheh.

19:9a Lamzin: 9:2 simfiangnak zoh aw.

11 Cule Pathian in Paul kut hmangin thilmak hleicepawl a tuah, 12 cutin a taksaruangpum ihsin pavuapawl le taingerh puanpawl tla minapawl hnenah an keng ih, an nathripawl in a tlansan hai, cule an sung ihsin khawse siavapawl an suak.

13 Cun khawse siava dawisuakih hmun kip ih vâkvai Jew-mi mi hrekkhat cu tawkah an um. Cupawl cun khawse siavapawl parah Bawi Jesu hmin ko vein, «Paul ih sim mi Jesu hmin in suak dingin thu kan lo pe,» tiah an ti. 14 Jew-mi puithiam sâng a si ve mi, Skeva an ti mi paih fapa pasarih pawl cun, cutivekih tuah ve an um.

15 Cule khawse siava in a sawn ih, «Jesu ka thei, Paul khal ka thei, asinan nanmah cu zo nan si?» tiah a ti hai.

16 Cun khawse siava neitupa cu an parah a khir ih an zaten a neh ṭheh hai, an zate hnakin a caksawn, curuangah cuih inn ihsin taklawng le hriamhma thawn an tlânsuak. 17 Cuih thu cu Efesa khua ih cêng Jew-pawl le Grikmipawl hmuahhmuah in an theih tikah, an zate parah ṭihnak a thleng ih, Bawi Jesu hmin an thangṭhat. 18 Cule cu tawkah a zumtu mi tampi rain an sual an phuang ih, thil ṭhalo an tuah mipawl an phuangsuak. 19 Mitkherhmang mi tampi khal in an cazualpawl an rak kengkhawm ih, mi zapi hmaiah an ur. Cule cuih cazualpawlih man cu an kăwm tikah angun tangka 50000 a si. 20 Cutivekin Bawipaih kamsuakthu cu nasazetin a karhzai ih, nehnak a ngah.

19:19a ngun tangka: Darakma a si men thei. Darakma pakhat cu mi pakhat ni khat hlawh a si.

21 Hih thilpawl a can ṭheh hnuah, Paul in Masidonia peng le Akaia peng tlawng ta in Jerusalem ih feh dingin a thinlung sungin a tum. Cule, «Cutawk ka thlen hnuah, Rom khal ka hmuh tengteng a ṭul,» tiah a ti. 22 Cun amah riantu mi pahnih Timothy le Erasṭas cu Masidonia ram ah a thlah hai ih, amah cu Asia ram ah málte sung a rung tâng.

Efesa ih Buainak

23 Cuih cān hrawngah Lamzin thuhla ah buainak nasazet a suak. 24 Ziangahtile ngun bur thiam Demeṭrias an ti mi pa in aArṭemis khuavangnuih binnte kha ngun in a tuah ih zungthiampawl cu hlawknak tampi a pe. 25 Amah in cupawl le cuvek hnaṭuan a ṭuantupawl cu a kokhawm ih an hnenah, «Pulenuh, hi hnaṭuannak ihsin sum lakluhnak ṭha kan nei ti nan thei. 26 Cuihtlunah Efesa khua lawngah si loin, Asia ram pumpi zuakzo ah hih Paul hin mi tampi cu nehin a hruaipêng ti cu nan hmu ih nan thei. Milai kut ih tuahcawp mipawl cu pathian an si lo tiah a ti. 27 Kan sumtuahnak hi a hmin a se pang ding ti phan a um lawng si loin, Asia ram ih um mi hmuahhmuah ih an biak mi le leilung tlun khua zakip khalih biak mi a ropi zet mi Arṭemis khawzingnuih temple khal hi nautat a si ding ih, a ropitnak khal siatsuah a si pang ding ti phan a um fawn,» tiah a ti.

19:24a Arṭemis: Grik khawzingnu. A Rom hmin cu Diana a si.

19:24b innte: Hihi pathian biaknak innte a si.

28 Cumi cu mipi in hna in an theih tikah, thinlingnak in an khat ih, «Efesa khawmipawlih Arṭemis cu a ropi a si!» tiah an au. 29 Cun khaw sung cu buainak in a khat ih, mipi cun Paul-ih khualtlawnpi Masidonia-mi Kaias le Aristarkas cu an kai ih, lungrualten zohnuam zohnak tualrawnpi ah an tûllut. 30 Cule Paul cu mipi lakih luh a duh nân, dungthluntupawl in an siang lo. 31 Cun Asia ram ih thuneitupawl lakih a rualpi hrekkhat khal in cuih zohnuam zohnak hmun ih va feh hrimhrim lo dingin thu an cah ih, an ngen. 32 Mipungkhawm lakih buainak a um ruangah, mi hrek in thu pakhat an au ih, mi hrek in thu dang an au; mi tamsawn in ziangruangah an ra pungkhawm ti an thei lo. 33 Cule mipi lak ihsin Alexander cu an dirsuak ih, Jew-pawl in hmai lamah an tûl. Cule Alexander cun daiteih um dingin mipi cu a kut a zâp ih, mipi hmaiih amah le amah humawk a duh. 34 Asinan Jew-mi a si ti an theih tikah, an zaten aw rual zetin nazi pahnih sung hrawng, «Efesa khawmipawlih Arṭemis cu a ropi a si!» tiah an au ciamco.

35 Cuih khawpi cazipa in mipi cu a daiter ih, an hnenah, «Nannih Efesa khawmipawl, Efesa khawpi cu Arṭemis khawzingnuih temple le van ihsin a tla mi milem kilkhawitu a si ti thei lo zo so um? 36 Hi thilpawl cu phat thei rual a si lo ruangah, daiten nan um le ruat ta loin zianghman nan tuah lo a ṭha ding. 37 Ziangahtile annihpawl cu temple-pawl suamtu an si lo ih, nan khawzingnu dokalhin ṭawng sia ṭawngtu khal an si lo nân, hi tawkah nan rak hruai. 38 Curuangah Demeṭrias le a hawipi zungthiampawl in mi pakhat khat sual mawhthluk ding an neih asile, thuṭhennak hmun cu ăwn a si ih, ramṭhen uktupawl an um ko. Cu tawkah pakhat le pakhat sual puhaw hai seh. 39 Asinan a dang thuzăwihnit nan duh asile, dān vekih punkhawmnak ih relcat ding a si. 40 Ziangahtile tuihsun ih thil cang mi ruangah nan hél a si tiah sual in puh ding ti phan a um. Ziangahtile himi punkhawmnak thu ah a săn rel thei ding zianghman kan nei lo,» tiah a ti. 41 Cutiih a ti hnuah punkhawmnak cu a ṭiakter.

20

Masidonia le Grik Ram ah Paul

1 Buainak a cem hnuah, Paul in dungthluntupawl cu a hnenah a ko ih, damten maw tiah a ti hai ih, Masidonia ram lam tlawng dingin a păwksuak. 2 Cuih rampawl cu a tlawng vivo ih, ṭawngkam tampi in tha a pe hai, cule Grik ram a thleng. 3 Cu tawkah thla thum a um. Cule Siria ram lamah lăwng ih a feh zik zawngah Jew-pawl in amah dokalhin thil ṭhalo an ruahthup ruangah, Masidonia ram ihsin kirsal dingin thutluknak a tuah. 4 Cule Beria khawmi Sopaṭa, Thessalonika khawmi Aristarkas le Sekundas, Darbi khawmi Kaias le Timothy, Asia rammi Ṭaikikas le Trofimas tla in Paul cu Asia ram tiang an fehpi. 5 Cupawl cu an rak feh sung ih, Troas khua ihsin in rak hngak. 6 Thilnu telh lo Sang Puai Nipawl a cem hnuah, Filipi ihsin lăwng in kan feh ih, ni nga hnuah an hnen Troas khua kan thleng, cu tawkah ni sarih kan câm.

Zuṭikhas Thawhternak

7 Zarh khat ih a ni khatnak ah, sang phel dingin dungthluntupawl an tawngkhawmaw. A thaizing fehsuak ding a si ruangah, Paul cun an hnenah zanṭim tiangin thu a sim. 8 An khawmnak tlunta pindan ah cun meito tampi a um. 9 Cule Zuṭikas an ti mi tlangval pakhat cu tukvirh ah a to ih, Paul ih reipi thu a sim laiah thithlĕpin a rak itthat. A ihthah ṭhat laiah sâwng thumnak ihsin a tla. An vung sar tikah a rak thi zo. 10 Paul cu a vung ṭum ih tlangvalpaih parah a băwk ih a pawm, cule, «Buai ruri hlah uh, ziangahtile a sungah a nunnak a um lai,» tiah a ti. 11 Cule Paul cu tlunta pindan ah a hung kaisal, sang a phel ih a ei. Cule reipi khawvâng tiang a ṭawng ih a fehsuak. 12 Tlangvalpa cu nungdamin an hruai ih, an hna a ngam zet.

Efesa Elder-pawl le Paul

13 Cun Assos khua ah lăwng in kan feh sung ih, cu tawkah Paul sawm phah kan tum, ziangahtile amai khawkhan cia vekin ke ih rak feh cia a tum. 14 Cule Assos khua ih in rak tawn tikah, lăwng parah kan hruai ih, Miṭilin khua ah kan feh. 15 Cutawk ihsin lăwng in kan feh ih a thaisun ah Kios tikulh kiang kan thleng. A tipsun ah Samos tikulh kan thleng ih, Trozilliam khua ah kan câm. A thiamsun ah Mileṭas khua kan thleng. 16 Paul cun Asia ram ih cām rei a duh lo ruangah, lăwng in Efesa khua cu fehlansan a tum; ziangahtile a cang thei asile, Jerusalem ah Pentikos puai ni khelh a duh ih a manhlap zet.

17 Paul in Mileṭas khua ihsin Efesa khua ah mi a thlah ih, kawhhran elder-pawl a kokhawm hai. 18 A hnen an ra thlen tikah an hnenah, «Asia ram kan ra thlen ih a ni khatnak ihsin nan hnenah ziangti vekin ka nung ti nan thei; 19 tăngdawr zet le vei tam zet mitthli thawn le Jew-pawlih phiarsawmnak ih cang mi hniksaknak tuarin, Bawipa ka rian a si. 20 Nan hlawknak ding zianghman ka sûp lo, cuhnakin mipi hmaiah siseh, inn khat hnu inn khat ah siseh ka phuangsuak ih ka lo zirh sawn. 21 Jew-pawl le Grikpawl hnenah Pathian lamah lung thleng dingin le kan Bawipa Jesu Khrih zum dingin fiang zetin thu ka sim. 22 Cule atu ah ngai hnik uh, Jerusalem ih feh dingin thlarau ih ṭemṭawn ka si, cu tawkah ka parah ziang thilpawl a cang ding ti ka thei lo. 23 Ka theihsŭn cu, cutawk in thawngtlaknak le harsatnak in in hngak a si tiah khaw tin ah Thlarau Thianghlim in fiang zetin a theihter mi lawng hi a si. 24 Asinan Pathian zangfahnak thuthangṭha theihter dingah, aipuannak thawn ka tlanzuamnak le Bawi Jesu hnen ihsi ka ngah mi rawngbawlhna cu a cemnet tiang ka ṭhehsuak theinak dingah cuih thilpawl lakih pakhat hman in i hnînter lo ih, ka nunnak khal seherh tlakah ka ruat lo.

25 «Cule ngai hnik uh, Pathian uknak thu simin nan lakah ka rak vâk, atu ah ngai hnik uh, nan zaten ka hmel in hmusal nawn lo ding ti ka thei. 26 Curuangah mi hmuahhmuah thisen ihsin ka thiang a si tiah tuihsun ah nan hnenah ka lo theihter. 27 Ziangahtile Pathian-ih thil tum mi hmuahhmuah kha sûp loin, nan hnenah ka phuang. 28 Pathian kawhhran, amai thisen ih a lei mi tuu rual câwm dingin Thlarau Thianghlim in an lakih hotu ih a lo ruah hai zo ruangah nanmah hrangah le tuu rual zate hrangah fimkhur uh. 29 Ziangahtile hihi ka thei a si, ka feh hnuah nan lakah cinghnia hrang an ra lut ding ih, tuu rual hi an zuah lo ding. 30 Nanmai sung rori ihsi khalin, dungthluntupawl anmah lamih hruai dingin mi an suak ding ih, anmah rori ih merhkawi mi thuphan an sim ding. 31 Curuangah ralring uh, sun le zan mitthli thawn kum thum sung cawl loin, mi hmuahhmuah ralrinnak ka lo pek kha cîng ringring uh.

32 «U le nau tla, atu ah Pathian hnenah le a lo tuahṭha theitu le mithianghlimpawl hmuahhmuah lakah co ding ro khal a lo pe theitu a zangfahnak kamsuakthu ah ka lo ap a si. 33 Sui siseh, ngun siseh, hnipuan siseh zo-ih ta hman ka daw lo. 34 A si, hi kutpawl hin keimah le ka hnenih um mipawlih ṭul mi a pesuak ti nanmah rori in nan thei. 35 Micaklopawl nan băwm theinak dingah, hitivekin hna ṭuanin ziangkim ah ka lo hmuh zo. Bawi Jesu-ih kamsuakthupawl hi cīng uh, anih in, ‹Ngah lam hnakin pek lamah thlawsuah a tamsawn,› a ti,» tiah a ti.

36 Cule cuih thilpawl a sim hnuah, Paul cu a khuk a bil ih an zaten thla a campi. 37 Cun an zaten ring zetin an ṭap, Paul cu an pawm ih an hnam. 38 A hmel an hmusal nawn lo ding ti a sim mi ṭawngkampawl cun an riah a seter cuang. Cule lăwng tiang an hei thlah.

21

Jerusalem Lamah

1 Cule hitin a si, anmah kan fehsan hnuah lăwng in dĭngten kan feh ih, Kos tikulh kan thleng. A thaisun ah Rhodes tikulh ah kan feh, cule cutawk ihsin Patara khua ah kan feh. 2 Cu tawkah Fonisia ram lamih feh ding mi lăwng kan hmu, cuih lăwng cu kan to ih, kan fehlan. 3 Saipras tikulh kan hmuh hnuah, thlang lam ihsin kan lan ih, Siria ram fehtlăngin Ṭaiar khua ah kan cawl; ziangahtile cuih khua ah lăwng thil phurh mipawl thlak ding a si. 4 Cule cu tawkah dungthluntupawl kan táwng ih an hnenah ni sarih kan câm. Thlarau simnak in cuih dungthluntupawl cun Paul hnenah, «Jerusalem ah feh hlah,» tiah an ti. 5 Kan umtlang cān a net tikah, kan suak ih kan khualtlawn kan peh; cule dungthluntupawl hmuahhmuah cun an nupi le an fātepawl thawn khaw leng tiang in thlah. Cule ti kapah kan khuk kan bil ih thla kan cam. 6 Pakhat le pakhat, damten maw, kan tiawk hnuah, lăwng parah kannih kan kai ih, annih cu anmai inn ah an kirsal.

7 Cule tipi parih khualtlawn kan ṭheh hnuah, Ṭaiar khua ihsin Ptolemais khua kan thleng, cu tawkah unaupawl kan cibai ih an hnenah ni khat kan câm. 8 A thaisun ah Paul-ih tlawnpi kannih cu kan păwksal ih, Sisaria khua kan thleng. Cule mi pasarih lakih pakhat a si mi evangelist Filip-ih inn ah kan lut ih a hnenah kan câm. 9 Cu pa cun profet thuphuan ih thuphuang fala him fanu pali a nei.

10 Cu tawkah ni tampi kan cam hnuah, Judia peng ihsin profet pakhat Agabas an ti mi a rung. 11 Kan hnenah a ra ih, Paul-ih taikhap a la ih a ke le a kutpawl a ṭawnaw ih, «Thlarau Thianghlim in hitin a ti, ‹Hih taikhap neitupa hi Jerusalem ah Jew-pawl in an ṭawn ding ih, Zentelpawl kut ah an pe ding,› a ti,» tiah a ti.

12 Cuih thu cu kannih le cutawk hmun ih um mipawl in kan theih tikah, Paul cu Jerusalem ih feh lo dingin kan ngen ciamco. 13 Cun Paul in, «Ziangah nan ṭap ih ka thinlung in kûaiter? Ziangahtile Jerusalem ah cun thawngthlak lawng si loin, Bawi Jesu Khrih hmin ruangah thih khal ka tiar a si,» tiah in sawn.

14 Kan dăwn thei lo ruangah daiten kan um ih, «Bawipa in a duhnak vekin tuah ko seh,» tiah kan ti.

15 Cuihhnu ah kan tim kan tuah ih, Jerusalem ah kan hung so. 16 Sisaria khua ihsin dungthluntu hrekkhat khal kan hnenah an tel ve ih, kan riahnak ding Manason inn ah in hruai. Amah cu Saipras tikulhmi a si ih, dungthluntu hmaisabikpawl lakih pakhat a si.

Paul le James

17 Cule Jerusalem kan thlen tikah, unaupawl cun lungawi zetin in rak hmuak. 18 A thaisun ah Paul le kannihpawl cun James kan va leng ih, cu tawkah elder-pawl hmuahhmuah an rak um. 19 Paul in cibai a bûk hai hnuah, a rawngbawlnak ihsin Pathian in Zentelpawl lakih a thil tuah mipawl pakhat hnu pakhat a simfiang hai. 20 Cule cuih thu an theih tikah, Bawipa an thangṭhat. Cule Paul hnenah, «Unaupa, Jew-pawl lak ihsin mi thawng tampi in an zum zo ih, cupawl cu an zaten Dān thu ih ṭhahnemngai zet an sizia cu na hmu. 21 Zentelpawl lakih um Jew-pawl hmuahhmuah cun Dān thlauthla ding le an fātepawl serh zim tan lo dingin le nunphung khal thlun lo dingin na zirh tiah hipawl hnenah mi hrekkhat in an theihter zo. 22 Ziangtin kan tuah ding? Mipi an ra pungkhawm tengteng ding, ziangahtile na ra thleng zo ti an thei. 23 Curuangah kan lo sim mi vekin tuah tengteng aw: thukamnak tuah mi patling pali kan hnenah an um a si. 24 Cupawl cu hruai awla, an zawngah thianfaiaw aw, cule an lu meh man khal peksak aw. Cule na thuhla an thăn mi cu a diklo ti mi hmuahhmuah in an thei ding. Cutin Dān thu na thlun ti le Dān vekin na nung ti an lo thei ding. 25 Asinan Zentel zumtupawl thuhla ah cun hih thilpawl cu tuah lo dingin ca kan rak kuat zo. Annih cun milem hnenih an hlăn mi thil, sa thi le hngawng rek ih thah mi sa, nunau-mipa sualnak pawl hrial dingin kan relcat a si,» tiah an ti.

26 Cun a thaisun ah Paul in cuih mi pali cu a hruai hai ih, anmai zawngah a thianfaiaw. Cule temple kulh sungah a lut ih, thianfainak cān ziang tik ni ah a cem ding ti le cuih cān ah pakhat ciar hrangah thilhlăn a pe ding ti a sim.

Paul Kaihnak

27 Ni sarih a cem zik tikah, Asia ram ihsi a ra mi Jew-pawl in Paul kha temple kulh sungah an hmu. Cule mipi zaten an căwktho ih, Paul cu an kai. 28 An au ih, «Israel-mipawl, in bawm uh! Hi pa hin kan mipi, Dān le hi hmun dokalhin hmun kip ah mi hmuahhmuah thu a zirh. Cuihtlunah Grikpawl khal temple sungah a hruai ih, hih hmun thianghlim hi a bawrhbangter,» tiah an ti. 29 Cutiih an aunak săn cu Efesa khawmi Trofimas kha Jerusalem ah an hmu ih, Paul in temple sungah a rak luhpi ko ding tiih an ruah ruangah a si.

30 Cuih thu cun an khawsen in a căwkbuai, cule mipi an ra tlânkhawm, Paul cu an kai ih temple kulh sung ihsin an dirsuak, cule kăwtkapawl cu an khar lohli. 31 Mipi in Paul thah an duh laiah, Rom aralkap bur khat hotu ralbawipi hnenah Jerusalem khaw pumpi a buai luihlo ti thu a thleng. 32 Hmakhatteah cu pa cun ralkappawl le ralkap 100 hotupawl kha a hruai ih an hnenah an va tlân. Ralbawipi le ralkappawl an hmuh tikah, Paul an vuak lai cu an cawl. 33 Cun ralbawipi cu a feh ih, Paul a kaih hnuah thir cikcin pahnih thawn ṭawn dingin thu a pek. Cule zo a si ti le ziang a tuah ti a sut. 34 Cule mipi sung ihsin mi hrekkhat in phun khat in an au ih, mi hrekkhat cun phun dangin an au. Thawmvâng a tam tuk ruangah anih in thufiang a thei thei lo ih, Paul cu ralkap khemp ih hruai dingin thu a pek. 35 Nasatukih mipi an buai ruangah, Paul cu kaiṭen a thlen fangah ralkappawl in an zâwn. 36 Ziangahtile mipi tam zetin an thlun ih, «That uh!» tiah an au phah vivo.

21:31a ralkap bur khat: Mat 27:27 simfiangnak zoh aw.

Paul Thusimnak

37 Cun ralkap khemp sungih an hruai zik zawngah, Paul in ralbawipi hnenah, «Na hnenah thu ka lo sim thei pei maw?» tiah a ti.

Cule anih in, «Grik ṭawng na thiam maw? 38 Hi hlan tawkfangih héltu le ramṭhing ih mi thattu 4000 hruaitu Izippa kha na si maw?» tiah a let.

39 Asinan Paul in, «Keimah cu Silisia ram khaw pawimawh Tarsas khua ih suak Jew-mi ka si. Mipi hnenih thusim i siang hram dingin ka lo ngen a si,» tiah a ti.

40 Thusim theinak pek a si hnuah, Paul cu kaiṭen parah dingin mipi hnenah a kut a hei zâp ih, daiteih an um hnuah aHebru ṭawng in an hnenah thu a sim.

21:40a Hebru ṭawng: Luke 23:38 simfiangnak zoh aw.

22

1 Paul cun, «U le nau le pale tla, atu nan hnenih ka humawknak thu ka sim mi hi ngai hnik uh,» tiah a ti. 2 An hnenah aHebru ṭawng in thu a sim ti hna in an theih tikah, daiten an um sinsin.

22:2a Hebru ṭawng: Luke 23:38 simfiangnak zoh aw.

3 Cule Paul cun, «Keimah cu Silisia ram Tarsas khaw suak, Jew-mi ngaingai, Gamaliel-ih tlawngta, hi khua ih ṭhanglian ka si. Anih in kan pupápawlih dān cu famkim zetin i zirh ṭheh, cule tuihsun ih nan zate vek hin Pathian hrangih ṭhahnemngai zettu ka rak si ve dah. 4 Hih aLamzin thluntu mipapawl le nunaupawl ṭawn tahratin thawng ka thlâk hai ih, thi tiangin ka tiduhdah hai. 5 Cuih thu cu puithiam lubik le Sanhedrin thuṭhentupawl hmuahhmuah in in theihpi. Damaskas khua ih umpawl cu ṭem tahratin Jerusalem ah hruaiih cawhkuan pe dingin, an hnen ihsin unaupawl hnenih pek ding ca ka ngah hnuin cuih khua ah ka feh.

22:4a Lamzin: 9:2 simfiangnak zoh aw.

Paul in a Thlengawknak Thu a Sim

6 «Cule hitin a si, sun lai hrawngih Damaskas khua ka thlen zik zawngah, rinlopiin van ihsin tleu nasazetin ka kiangkap a run tlet. 7 Cule lei ah ka tlu ih aw pakhat in ka hnenah, ‹Saul, Saul, ziangahso i tiduhdah rero?› tiah i ti ka thei. 8 Cule kei in, ‹Bawipa, zo na si?› tiah ka let. Cule anih in ka hnenah, ‹Na tiduhdah rero mi, Nazareth Jesu ka si,› tiah i ti.

9 «Cule ka hnenih um mipawl cun tleu cu an hmu rori ih, ṭihnak in an khat, asinan ka hnenih ṭawngtupaih aw cu an thei lo. 10 Cun kei in, ‹Bawipa, ziang ka tuah ding?› tiah ka ti. Cule Bawipa in ka hnenah, ‹Tho awla, Damaskas khaw sungah feh aw, cule cu tawkah na tuah dingih ka ruah cia mi thil hmuahhmuah an lo sim ding,› tiah i ti. 11 Cule cuih tleu ih tle cu a natsattuk ruangah khua ka hmu thei lo. Cule ka hnenih umpawl in ka kut in in hruai ih, Damaskas khaw sungah ka lut.

12 «Cun cu tawkah Ananias an ti mi pa a um, amah cu Dān vekih Pathian ngaihsak le khatawk ih cêng Jew-pawl hmuahhmuah ih an fak mi a si. 13 Ka hnenah a ra ih, ka kiangah a ding. Cule ka hnenah, ‹Unaupa Saul, khua hmu aw,› tiah i ti. Cuih tikcu rori ah amah cu ka hun zoh. 14 Cun anih in, ‹Pathian duh zawng thei dingah le Midingfel Pa hmu dingah le a kâ ihsin a aw thei dingah, kan pupápawlih Pathian in a lo hril zo. 15 Ziangahtile nang cu mi hmuahhmuah hnenah amai hrangah na hmuh mi le na theih mi theihpitu na si ding. 16 Atu hi ziangahso na hngah rero? Tho awla, baptisma co aw, cule Bawipaih hmin koin, na sualpawl khawlhfai aw,› tiah i ti.

17 «Cule hitin a si, Jerusalem ih ka kirsal hnuah, temple kulh sungih thla ka cam laiah zelhin ka um. 18 Jesu ka hmu ih, anih in ka hnenah, ‹Zamrang aw, Jerusalem ihsin suak lohli aw, ziangahtile ka thuhla na phuan mi an pawm lo ding,› tiah i ti. 19 Cun kei in, ‹Bawipa, sinakok tin ih nangmah lo zumtupawl thawng ka thlâk hai ih ka vuak haizia cu anmah rori in an thei. 20 Cule na thutheitu Stefen thisen an suah laiah, kei khal an kiang nâite ah ka ding. An thah cu ka lung a kim ih, a thattupawlih hnipuan ka rak kilsak hai,› tiah ka ti. 21 Cun Jesu in ka hnenah, ‹Feh aw, ziangahtile lam hlapi ih Zentelpawl hnenah ka lo thlah ding,› i ti,» tiah a ti.

Paul cu Rom-mi a Si

22 Cuih ṭawngkam tiang cu Jew-pawl in an ngai, cule an au ih, «Khavek mi kha lei par ihsin lahlo uh, ziangahtile nungtlak a si lo!» tiah an ti. 23 Cun annih in au phahin an hnipuan an hlăwn ih, thli lakah leivut an theh ciamco. 24 Ralbawipi in Paul cu ralkap khemp sungih hruai dingin le ziangruangah mipi khativekin an au ti a theih theinak dingah, savun hri in vua ih thusut dingin thu a pe. 25 Cule Paul cu lengah an suah ih, savun hri in an ṭawn. Paul in cu tawkah a kiangih ding ralkap 100 hotu hnenah, «A thu relsak hrih lo Rom-mi pakhat vuak cu na hrangah a thiang maw?» tiah a ti.

26 Cucu ralkap 100 hotupa in a theih tikah, ralbawipi hnenah a feh ih, «Na thil tuah ding mi ah ralring aw, ziangahtile hi pa hi Rom-mi sokhaw a si,» tiah a sim.

27 Cutikah ralbawipi cu, Paul hnenah a feh ih, «Rom-mi na si maw? I sim hnik,» tiah a ti.

Anih in, «Ka si,» tiah a ti.

28 Ralbawipi cun, «Rom-mi sinak ding hrangah tangka tampi ka pe,» tiah a sawn.

Cule Paul in, «Kei cu suahkeh in Rom-mi ka si,» tiah a ti.

29 Cuveten Paul vuak le thusuh a tumtupawl cu dungah an sīp ṭheh; cule ralbawipi khal in Paul cu Rom-mi a si ti le Rom-mi a ṭemṭawn ti a theih tikah, a ṭih ve.

Sanhedrin hmaiah Paul

30 Ralbawipi cun ziangruangah Jew-pawl in Paul an hêk ti theih a duh ruangah a thaisun ah Paul cu ṭawnnak ihsin a suah ih, puithiam sângpawl le Sanhedrin thuṭhentu zaten tawngkhawmaw dingah thu a pe. Cule Paul cu a run hruai ih an hmaiah a ret.

23

1 Cun Paul in Sanhedrin thuṭhentupawl cu hmaităwnin a zoh hai ih, «Pulepawl le unaupawl, tuihni tiang Pathian hmaiah thinlung zate thiangin ka nung a si,» tiah a ti. 2 Cule puithiam lubik Ananias in Paul kiangih a ding mipawl kha a kâ ah bēng dingin thu a pe hai. 3 Cun Paul in a hnenah, «Nang cu si râng hnih mi phăr vek na si, Pathian in a lo bēng ding. Ziangahtile Dān vekih thu i ṭhen dingah na to ih, Dān kalhzawngin keimah bēng dingin thu na pe hai maw si?» tiah a ti.

4 Cule Paul kiangih dingtupawl in, «Pathian-ih puithiam lubik na hmuhsuam ding maw?» tiah an ti.

5 Cun Paul in, «U le naupawl, puithiam lubik a si ti ka thei lo pi; ziangahtile, ‹Na mipawl hruaitu dokalhin ṭawng sia ṭawng hlah,› tiih ngan a si,» tiah a ti.

6 Asinan Paul in mi hrekkhat cu Sadusi an si ih, mi hrekkhat cu Farasi an si ti a theih tikah, Sanhedrin thuṭhentupawl hmaiah cun a au ih, «Pulepawl le unaupawl, keimah cu Farasi fapa, Farasi ka si. Ruahsannak thu le mithi thawhsalnak thu ah thuṭhen dingih kawh ka si,» tiah a ti.

7 Cutiih a ti hnuah, Farasipawl le Sadusipawl karlakah thuelawknak nasazet a suak; cule mipungkhawm cu an ṭhenaw. 8 Ziangahtile Sadusipawl cun thawhsalnak a um lo, vancungmi siseh, thlarau siseh a um lo tiah an ti. Asinan Farasipawl cun cupawl hmuahhmuah cu an pawmhnget. 9 Cun auaw nasazet a suak ih, Dānzirhtu hrekkhat, Farasi lamṭangpawl cu an ding ih nasazetin an êl, «Thu sia zianghman hi pa ah kan hmu lo, vancungmi in simaw, thlarau in simaw a hnenih thu a sim a si ahcun, Pathian kan dodal lo pei uh,» tiah an ti.

10 Elawknak nasazet a suah tikah, ralbawipi in Paul kha an băwtthlek thluh pang ding ti a phan ruangah, ralkappawl kha vung feh ih, Paul kha mipi hnen ihsin hranhramih hruai dingin le ralkap khemp ih fehpi dingin thu a pe.

11 Asinan a thaizan ah Bawipa cu Paul kiangah a ding ih, «Paul, hnangamten um aw, ziangahtile Jerusalem ih ka thu na theihter zo vekin, Rom khalah na theihter tengteng ding a si,» tiah a ti.

Paul Thah an Tum

12 Cule khua a van tikah, Jew-pawl lakih mi hrekkhat cu khua an khângkhawm ih, anmah le anmah siatcamawin, Paul an thah hlanlo ziangkhal ei lo le in loih um dingin an tiaw. 13 Cutiih phiarthupnak a tuahtupawl cu mi 40 hnakih tam an si. 14 Puithiam sângpawl le miupapawl hnenah an feh ih, «Kanmah le kanmah siatcamawknak thawn kan ṭemṭawnaw zo, Paul kan thah hlanlo, ziangkhal kan ei lo ding. 15 Curuangah atu ah nanmah le Sanhedrin thuṭhentupawl in Paul kha nan hnenah thaisun ah run hruai dingin, ralbawipi hnenah ruahnak pe uhla, amai thuhla ah famkim deuhin zăwi kan duh tiin tiawter uh. Cule Paul a ra thlen hlanah amah that dingin kan rak tiar cia ding,» tiah an ti.

16 Cule Paul-ih farnuih fapa in cutiih an bawhthup thu a theih tikah, ralkap khemp ah a lut ih Paul cu a va sim. 17 Cun Paul in ralkap 100 hotupawl lak ihsin pakhat kha a ko ih a hnenah, «Hih tlangvalpa hi ralbawipi hnenah hei hruai aw, ziangahtile a hnenah thusim ding a nei,» tiah a ti. 18 Cule anih cun a fehpi ih, ralbawipi hnenah a hruai, cule, «Thawngtlapa Paul in a hnenah i ko ih, hih tlangvalpa na hnenih ratpi dingin i dil. Anih in thu lo sim ding a nei,» tiah a ti.

19 Cun ralbawipi cun tlangvalpa cu a kut in sirah a hruai ih, «Ziang thu i sim duh?» tiah thu a sut.

20 Cule anih in, «Jew-pawl in thaisun ah Paul kha Sanhedrin thuṭhennak ah run hruai aw tiah lo dil dingin an lung a kim zo. A thuhla kha famkim deuhin theih an duhawter ding. 21 Asinan an thu lung hlah aw, ziangahtile mi 40 hnak tam in amah cu an bawh. Cupawl cu anmah le anmah siatcamawin an ṭemṭawnaw, Paul an thah hlanlo zianghman an ei lo ding ih, an in lo ding. Atu ah nangmai thutiamkam lawng hngakin an um,» tiah a ti.

22 Cule ralbawipi in tlangvalpa cu, «Ka hnenih na sim mi thilpawl hi zohman sim hlah,» tiah thu a pek ih a tlunter.

Sisaria ah Paul an Ṭhawn

23 Cule ralkap hotu bawibik in a ralkap 100 hotu pahnih cu a ko hai ih, «Zan nazi pakua ah Sisaria khua tiang feh dingin ralkap 200, ráng ralkap 70 le fei hmang ralkap 200 timtuah uh. 24 Paul ih to dingah to mi ṭilvapawl timtuah uhla, ram uktu Filix hnenah himdamten va thlah uh,» tiah thu a pe.

25 Ralbawipi cun hitin ca a ngan:

26 «Kei, Klaudias Lisias in ram uktu upattlak Filix na hnenah ca ka ngan a si:

«Cibai ka lo bûk.

27 «Jew-pawl in hi pa hi an kai ih thah an tum laiah, Rom-mi a si ti ka thei ih, ralkappawl thawn ka va runsuak. 28 Cule ziangruangah sual an puh ti theih ka duh tikah, amah cu Sanhedrin hmaiah ka hruai. 29 An Dān thusuhnak thu ah sual an puh ih, thihnaktlak le thawngtlaknaktlak thu zianghman a um lo ti ka hmu. 30 Cule Jew-pawl in hi pa thahnak ding khua an khâng ti in sim tikah amah cu na hnenah ka rak kuat lohli, cule amah sual puhtupawl khal amah sual an puhnak thu cu na hmaiih thlĕn dingin ka sim hai. Damten,» tiin.

31 Cun thupek an si vekin ralkappawl cun Paul cu an fehpi ih, zan ah Anṭipaṭris khua tiang an hruai. 32 A thaisun ah ralkappawl in Paul hnenih fehtu ding rángralkappawl cu an tăn ta ih, an ralkap khemp lamah an tlungkir. 33 Rángralkappawl cu Sisaria khua an thlen tikah, cakuat cu ram uktu hnenah an pek ih, Paul khal cu a hnenah an ap. 34 Cule ram uktupa cun cakuat cu a siar ih, amah cu khui ram in a si ti a sut. Cule Silisia ram ihsin a si ti a theih tikah, 35 Paul hnenah, «Sual a lo puhtupawl an thlen tikah, na thuhla cu ka ngaithla leh ding,» tiah a ti. Cule Paul cu Herod-ih praetorium sungah ret dingin thu a pe.

24

Filix hmaiah Paul Thu an Ṭhen

1 Cun ni nga hnuah puithiam lubik Ananias cu miupa hrekkhat le sihni Tertullas thawn Sisaria khua ah an rung suk. Sihnipa in ram uktupa hnenah Paul sual an puhnak thu cu a thlĕn.

2 Cule Paul cu an ko ih, Tertullas cun Filix hnenah Paul-ih thu cu hitin sim a thăwk, «Nangmai hnuaiah cān reipi sung hnangamten kan um zo ih, na remruahnak in hi miphun ṭhansonak nasazet na thlĕn zo. 3 Zahtlak miropi Filix, hmun kip ah le ziang tik lai khalah lungawinak nasazet thawn kan lo cohlang ringring a si. 4 Sikhalsehla reipi ka lo hnaihnăwklonak dingah, zangfahten ṭawngkam málte in ngaisak hram dingin ka lo dil. 5 Ziangahtile hi pa hi buainak tuahtu a si ti kan hmungah zo, leitlun pumpi ih Jew-pawl hmuahhmuah héltertu le aNazir-mipawlih biaknaksakhua hruaitu a si. 6 Temple sung bawrhbangter khal a tum ih, kan kaih; kanmai Dān vekin thuṭhen kan duh. 7 Asinan ralbawipi Lisias a ra ih, kan kut ihsin hranhramin a ra hruai. 8 Lisias cun Paul sual puhtupawl kha na hnenah ra dingin thu a pe hai. Amah cu nangmah rori in na zingzăwi tikah, sual kan puhnak thil hmuahhmuah cu na theikim thei ding,» tiah a ti. 9 Cule Jew-pawl khal an lung a kim ih, hi thilpawl hi a dik a si, tiah an ti.

24:5a Nazir-mipawl: Jesu dungthluntu hmuhsuamnak ṭawngkam a si. Khristian tinak tluk a si.

10 Cun ram uktupa in Paul kha thusim ve dingin a kut a hei zâp ih, Paul cun a sâng ih a hnenah, «Kum tampi sung hi miphun thuṭhentu na si ti ka lo theih ruangah, lungawi zetin keimah le keimah ka humaw a si. 11 Ziangruangahtile Jerusalem ah Pathian be dingin ka hung fehnak hi ni hleihnih hnakin a tam hrih lo ti cu áwlten na thei ko ding. 12 Cule temple kulh sungah zo thaw hmanih thu kan relkhawm in hmu lo, sinakok ah siseh, khawpi sungah siseh mipi ka căwkbuai lo. 13 Cule atu ih sual in puhnak thilpawl cu a dikzia khal na hnenah an lo hmuh thei lo ding. 14 Asinan pawl hran an ti mi aLamzin zulhin, Dān cazual sung le Profetpawlih cazual sungih ngan mi thil hmuahhmuah zumin, in thlahtupawl Pathian ka bia ti na hnenah ka phuang a si. 15 Midingfelpawl le midingfel lo pawl cu thihnak ihsin an thosal leh ding tiah anmah vek thothoin, Pathian ah ruahsannak ka nei. 16 Cumi ruangah, Pathian lamah le minung lamah sia le ṭha theihnak fiang nei dingin ka zuam ringring.

24:14a Lamzin: 9:2 simfiangnak zoh aw.

17 «Kum reipi sung ka um nawn lo hnuah, ka miphun hnenah băwmnak thilpekpawl le thilhlănpawl pe dingin ka vung feh. 18 Jew-mi mi hrekkhat Asia ram ihsin an ra ih, temple kulh sungih keimah le keimah ka thenfaiawk in hmu. Ka hnenah mipi an um lo ih, buainak zianghman ka tuah lo. 19 Sualpuh ding in neih asile, na hmaiah anmah rori in sual in puh hai seh. 20 Culoasile hitawk ih a um mipawl hin Sanhedrin hmaiih ka din laiah, keimah ah ziang diklonak an hmu? 21 Hih thil pakhat lawng hi a si ko ding, an hmaiih ka din laiah, ‹Mithi thawhsalnak thu ruangah tuihsun ah nan hmaiah thuṭhenin ka um a si,› tiah ka au,» tiah a ti.

22 Cupawl cu Filix in a theih tikah, Lamzin thu cu fiang zetin a theih ruangah, «Ralbawipi Lisias a rat tikah, na thu cu ka relcat leh ding,» tiah thurel lai cu a bānter. 23 Cule ralkap 100 hotupa kha Paul kil dingin le zalĕnnak málte pe dingin le a rualpipawl in a ṭulhai mipawl tawlrelsak dingin thu a pe.

24 Ni málte a rei hnuah, Filix cu a nupi aDrusilla thawn an ra kirsal, Drusilla cu Jew-mi a si. Filix in Paul a ko ih, Khrih zumnak thuhla a sim mi kha a ngai. 25 Paul in dingfelnak thu, sūpawknak thu le a ra thleng ding mi thuṭhennak thupawl a rel tikah, Filix cun a ṭih ih, «Atu cu feh hrih ko aw; cān remcâng ka hmuh tikah ka lo ko leh ding,» tiah a sang. 26 Cuih cān ah Filix cun Paul in a suahnak dingah paisa in pe ding ti a beisei. Curuangah amah cu a ko leuhleuh ih, a be ṭheu.

24:24a Drusilla: Herod Agrippa I-ih fanu a si. A pasal cu Filix a si.

27 Asinan kum hnih a rei hnuah, Porsias Fesṭas in Filix-ih ai a run awh. Filix cun Jew-pawl lungawiter a duh ruangah, Paul cu thawng sungah a tān ta.

25

Fesṭas hmaiah Paul Thu an Ṭhen

1 Fesṭas cu cuih ram a thlennak ni thum a rei hnuah, Sisaria ihsin Jerusalem ah a hung feh. 2 Cun puithiam lubik le Jew hruaitupawl in a hnenah Paul sual an puhnak thuhlapawl cu an rak sim. 3 Annih cun Paul cu lamzin ah rak bawh ih that dingin khua an khanthup ruangah, Jerusalem ih thlah dingin Fesṭas an dil. 4 Asinan Paul cu Sisaria ah ret a si ding ih, amah rori khal a feh ding a si tiin Fesṭas in a sâng hai. 5 Anih in, «Curuangah nan lakih thuneihnak neitupawl kha ka hnenah nan ra thei a si. Hi paih thu ah sualralnak ziang simaw a um pang asile, sual an puh thei ding,» tiah a ti.

6 Fesṭas cu an lakah ni hra hnakih tam a cām hnuah, Sisaria ah a suk. A thaisun ah thuṭhennak tokham parah a to ih, Paul hruai dingin thu a pe. 7 Paul a thlen hnuah, Jerusalem ihsi a ra mi Jew-pawl cu a kimvelah an ding ih, a dik rori a si tiih an lăngter thei lo mi, nasazetzetin sual tampi an puh. 8 Paul cu amah le amah a humaw ih, «Jew-pawlih Dān dokalhin siseh, temple dokalhin siseh, Kaisar dokalhin siseh zianghman ka tuah lo,» tiah a ti.

9 Asinan Fesṭas cun Jew-pawl lungawiter a duh ruangah, Paul cu a sawn ih, «Jerusalem ah hung so in, cu tawkah sual an lo puhnakpawl ka hmaiih suh na duh maw?» tiah a ti.

10 Cule Paul in, «Thuṭhen ka sinak ding hmun, Kaisar-ih thuṭhennak tokham hmaiah ka ding a si. Na theihfiang zet vekin, Jew-pawl hnenah thilsual zianghman ka tuah lo. 11 Cutiih ka tinak săn cu dingfellonak le thihnaktlak thilsual ziang simaw tal ka tuah asile, thih ka êl lo. Asinan hipawl ih sual in puh mi pakhat hman a diklo a si ahcun, zohman in an kut ah in pe thei lo, Kaisar hnenah lu ka pu ding,» tiah a ti.

12 Cun Fesṭas cun a khawnsil upapawl thawn thu an rawnawk hnuah, «Kaisar hnenah na thlĕn maw? Kaisar hnenah cun na feh ding a si!» tiah an sawn.

Fesṭas in Siangpahrang Agrippa Thu a Ráwn

13 Ni tawkfang hnuah Siangpahrang aAgrippa le bBernis cu Fesṭas cibaibûk dingin Sisaria khua an ra thleng. 14 Cutawk ih ni tampi an um hnuah, Fesṭas in Paul-ih thuhla cu siangpahrang hnenah a rel, «Filix in thawng a thlak ta mi pa hi tawkah hin a um, 15 Jerusalem ih ka um laiah, puithiam sângpawl le Jew-pawlih miupapawl in sual an puh ih amah cu thuṭhen dingin in dil. 16 Kei in an hnenah, ‹Sual an puh mi pa in sual a puhtupawl kha hmaităwnin sual an puh mipawl ihsin amah le amah humawknak cān nei seh, cumi a tuah hlanah thi dingih pek cu Rom-mipawlih nunphung a si lo,› tiah ka sâng hai. 17 Curuangah an ratkhawm tikah, tlaiter loin a thaisun ah thuṭhennak tokham parah ka to ih, cu pa cu rak hruailut dingin thu ka pe. 18 Sual a puhtupawl cu an ding ih an ṭawng tikah, ka beisei vekin sualpuh thei mi an nei lo, 19 cuhnakin anmai biaknaksakhua thuhla le Jesu an ti mi pa a thi ih a nungsal a si tiih Paul ih a sim mi thu ah elnak hrekkhat an nei sawn. 20 Cule cuih an thuelnakpawl cu ziangti lamih zawihnit ding ti ka theih lo ruangah, Jerusalem ah fehin cutawk ih sual an puhnakpawl rel sehla a duh le duh lo thu ka sut. 21 Asinan a thuhla cu Augasṭas ih relcat dingin hi tawkah in ret uh tiin Paul in a ngĕn ruangah, Kaisar hnenih ka kuat hlan sung ṭhaten kilhim dingin thu ka pek,» tiah a ti.

25:13a Agrippa: Herod Agrippa I-ih fapa Herod Agrippa II a si. Herod Agrippa I hi nauhakpawl thattu Herod-ih fapa a si.

25:13b Bernis: Herod Agrippa I-ih fanu a si. Herod Agrippa I hi nauhakpawl thattu Herod-ih fapa a si.

22 Cutikah Agrippa cun Fesṭas hnenah, «Keimah rori khal in cu paih thusim ngaithlak ka duh a si,» tiah a ti.

Fesṭas in, «Thaisun ah na ngaithla ding,» tiah a ti.

23 Cule a thaisun ah Agrippa cu Bernis thawn an ra thleng, tawnkhawmawknak pindan sungah cun ropi zetin an rung lut ih, ralbawipipawl le khaw sung upapawl in an thlun. Fesṭas ih thupeknak in Paul cu an run hruailut. 24 Cule Fesṭas in, «Siangpahrang Agrippa le kan hnenih a um mi hmuahhmuah in hi pa hi nan hmu, Jerusalem ah siseh, hitawk khalah siseh, Jew-mi mipungkhawm zaten a thuhla ka hnenah an thlĕn ih, hi pa cu nung ding a tlak nawn lo tiah an ausuak. 25 Asinan hi pa hin thihnaktlak zianghman a tuah lo ti ka hmu, cule amah rori in Augasṭas hnenih a thuhla a thlĕn ruangah kuat dingin ka ruatcat zo. 26 Ka bawipa Augasṭas hnenih a thuhla ka ngan tikah, a cekciih ngan ding zianghman ka nei lo. Curuangah nan zate hmaiah, a hleicein Siangpahrang Agrippa na hmaiah ka hun suahpi a si, kan zawihnitngah hnuah ngan ding ziang tal ka neih pangah tiah a si. 27 Ziangahtile thawngtla pakhat dokalhin sual an puh mi a cekci fiangter loih kuat cu a awm lo ding tiah ka ruat,» tiah a ti.

26

Agrippa hmaiah Paul

1 Cun Agrippa in Paul hnenah, «Nangmai hrangah na thuhla na sim ding ka lo siang a si,» tiah a ti. Cule Paul cu a kut a hun pharh ih a thiamthu a rel. 2 «Siangpahrang Agrippa, tuihsun ah na hmaiih Jew-pawlih sual in puh mi thil hmuahhmuah ihsin ka thiamthu ka rel ding ruangah mithlawsuak ah ka ruataw. 3 Nangmah cu Jew-pawl lakih nunphung le elawknak hmuahhmuah thei zettu na si ruangah ka lung a awi hleice. Curuangah thinsauten i rak ngaithla hram aw tiah zangfah ka lo dil.

4 «A thăwktein Jerusalem ih ka mipawl lakah ka um a si. Jew-pawl hmuahhmuah in ka nauhak lai ihsin ka nuntukhawsakdān cu an thei. 5 A tir ihsin in thei tuk zo, an duh asile, kan biaknaksakhua ih pawl fekbik Farasi pakhat ka sizia an simfiang thei ding. 6 Cule kan pupápawl hnenah Pathian ih a pek mi thutiam ruahsannak ka neih ruangah, atu ah thuṭhensak siin ka ding a si. 7 Cuih thutiam cu kan hnám hleihnih pawl cun a sun a zan ṭhahnemngai zetin Pathian an biak ruangah congah ding ruahsannak an nei. Siangpahrang Agrippa, cuih ruahsannak thu ruangah Jew-pawl in sual in puh a si. 8 Pathian in mithi a thoter ti cu ziangahso zumtlak loih nan ruah?

9 «Thungaiten, Nazareth Jesu hmin dokalhin thil tampi ka tuah ding tiah ka rak ruat dah. 10 Cumi cu Jerusalem ih ka rak tuah dah mi kha a si, puithiam sângpawl hnen ihsin thuneihnak ka ngah ih, mithiang tampi thawng ah ka thlak; cule thah an si tikah ka lungkimpi hai. 11 Cule sinakok tin ah cawhkuan ka pe hai ṭheu ih, lo theih loin Pathian thangsiatter hai dingin ka rak zuam. Anmah dokalhin ka thin a heng tuk ih, anmah tiduhdah dingin ram dang khawpipawl tiangin ka thleng.

Paul in a Thlengawknak Thu a Sim

12 «Cutin puithiam sângpawl hnen ihsin thuneihnak le thupek thawn Damaskas khua ah ka feh. 13 Maw siangpahrang, sun laifangih lamzin ih ka feh rero laiah, ni hnakih a tlesawn mi êng cun keimah le ka fehpipawl kimvelah van ihsin a run tlet kha ka hmu. 14 Cule kan zaten leilung ah kan tlu ih, aHebru ṭawng in aw pakhat in ka hnenah, ‹Saul, Saul, ziangahso i tiduhdah rero? Na hrangah fung zum sit cu a har mi a si,› i run ti ka thei.

26:14a Hebru ṭawng: Luke 23:38 simfiangnak zoh aw.

15 Cun kei in, ‹Bawipa, zo na si?› tiah ka ti.

Cule anih in, ‹Na tiduhdah rero mi Jesu ka si. 16 Tho awla, na ke in ding aw; ziangahtile na hmuh mi thilpawl le ka lo hmuh lai ding mi thilpawl hrangih rawngbawltu le theihpitu dingah ka lo hril zo, cumi tumtahnak ruangah na hnenah ka rung lang a si. 17 Nangmah cu atu ah Jew-pawl le Zentelpawl hnenah ka lo thlah ih, an hnen ihsin ka lo runsuak ding. 18 Cucu an mit ka vanternak dingah le thim ihsin tleu ah le Setan thuneihnak ihsin Pathian hnenih an kirsal ih sualpawl ngaidamnak an conak dingah le keimah in zumnak thawngin tithianhlim mipawl thawi ro an cotlangnak dingah ka lo thlah a si,› tiah i ti.

19 «Curuangah Siangpahrang Agrippa, van ihsin larnak ka hmuh mi cu lung loin ka rak um lo. 20 Cuhnakin a hmaisabikah Damaskas khua le Jerusalem le Judia peng pumpi le Zentelpawl hnenah, annih cu an lung thleng ih Pathian lam hawi dingin le lungthlengnak thawi milaw mi hnaṭuan ṭha ṭuan dingin thu ka sim hai sawn. 21 Himi thupawl ruangah temple kulh sungih ka um laiah, Jew-mi mi hrekkhat in in kai ih, thah in tum. 22 Curuangah Pathian ih băwmnak in tuihni tiang ka ding ih, mitûm le mite pawl hnenah Mosi le Profetpawl in a ra thleng ding an ti mi siarlo a dang thil ka theihter hai lo. 23 An ti mi cu, Khrih in a tuar ding ih, anih cu mithi lak ihsi tho hmaisabik a si ding, Jew-pawl hnen le Zentelpawl hnen khalah tleu thu a phuang ding,» tiah Paul in a ti.

24 Cutivekih a thiamthu a rel laiah, Fesṭas cu aw ring zetin a au ih, «Paul, na â a si hi! Tam tuk na zirnak in a lo atter zo a si,» tiah a ti.

25 Asinan Paul in, «Zahtlak Fesṭas, ka â riai lo, thutak thupawl le ruahtlak thupawl ka sim sawn a si. 26 Ziangahtile hih thilpawl cu siangpahrang in a thei ih a hnenah ralṭha zetin ka sim a si. Ziangahtile hih thil hmuahhmuah hi a kĕlkawm ih tuah mi an si lo ruangah, siangpahrang in a thei ṭheh ti ka theifiang. 27 Siangpahrang Agrippa, Profetpawl ih sim mi na zum maw? Na zum ti ka thei,» tiah a ti.

28 Cun Agrippa in Paul hnenah, «Hih cān tawite sungah Khristian cang ko i hmĭn zik leuleu a si si!» tiah a ti.

29 Cule Paul in, «Hi ka kut ih thir cikcin siarlo, nangmah lawng si loin, tuihsun ih ka thu a theitu hmuahhmuah khal keimah vek nan si zik lawng si loin, nan si pumhlum ding hi Pathian hnenih ka thlacam mi a si,» tiah a ti.

30 Cuih thilpawl a sim ṭheh tikah, siangpahrang, ram uktu le Bernis le a hnenih a totupawl cu an tho. 31 Cule hmun dangih an suahsan hnuah, pakhat le pakhat, «Hi pa hin thihnaktlak le thawngtlaknaktlak zianghman a tuah lo,» tiah an tiaw.

32 Cun Agrippa in Fesṭas hnenah, «Amah in Kaisar hnenah a thuhla hi thlĕn lo sehla cu, kan luatter thei mai ding nân,» tiah a ti.

27

Rom ah Paul a Feh

1 Cule Italy ram ah lăwng in kan feh ding tiah an relcat, Paul le a dang thawngtla hrekkhat cu Augasṭas-ih aralkap bur lakih ralkap 100 hotu Julias kut ah an pe. 2 Cun Adaramiṭiam khua ihsin a ra mi, Asia ram lăwng cawlhnak kip ih cawl phah vivo ding mi lăwng ah kan to ih, kan feh. Thessalonika khua ihsin Masidonia-mi pakhat Aristarkas khal kan hnenah a tel ve.

27:1a ralkap bur: Mat 27:27 simfiangnak zoh aw.

3 Cule a thaisun ah Sidon khua kan thleng. Cule Julias in Paul cu ṭha zetin a tuamhlawm ih a rualpipawl in a ṭulhai mi an pek theinak dingah Paul kha an hnenih va feh a siang. 4 Cutawk ihsin kan păwksuak tikah thli cu kanmah hmaităwn zawngin a hrang, curuangah Saipras tikulh phenin kan feh. 5 Cule Silisia ram le Pamfilia ram naih tifinriat kan lan hnuah, Lisia peng ih um, Mira khawpi kan thleng. 6 Cu tawkah ralkap 100 hotu in Italy ram ih feh ding mi Alexandria ihsin a ra mi lăwng a hmu ih, cuih lăwng sungah in ret. 7 Nuamteten ni tampi kan feh hnuah, harsa zetin Sinidas khaw zawn kan thleng. Cutawk lam ihsin fehbêt ding cu thli in in kham ruangah, Salmone khat lam ral Khirit tikulh phenin kan feh. 8 Harsa zetin cucu kan lan ih, lăwng cawlhnak ‹Hmun Mawi› tiih an kawh mi hmun kan va thleng. Cucu Lasi khawpi kiangah a si.

9 Cān tampi a liam zo ih, atu ah cun lăwng thawi khualtlawn cu a ṭihnung thlang, ziangahtile arawlulh ni a liam zo ruangah, Paul in an hnenah ralrinnak a pe hai. 10 An hnenah, «Pulenuh, kan khualtlawnnak cu ṭihnungza a si ti ka hmu, lăwng le nan phurh mi thilri lawng si loin, kan nunnak hrang khalah siatralnak nasatak a si ding,» tiah a ti. 11 Sikhalsehla ralkap 100 hotu cun Paul ih thusim mipawl hnakin lăwng mâwngtu bawi le lăwng neitupawlih thu a zum sawn. 12 Cule an lăwng cawlhnak cu thlatang cān ah cawlhnak a ṭhat lo ruangah, mi tamsawn in feh vivo dingin an lung a kim. Finik khua thlen thei ding le cutawk ih thlatang sung um an beisei. Cucu Khirit tikulh ih lăwngcawlhnak hmun a si ih, nitlaknak thlang lam le nitlaknak sak lam hawiin a um.

27:9a rawlulh ni: Cucu tlennak ni, September thla cem lam a si. Himi cān hrawngah hin thlipi ruangah tifinriat ih khualtlawn a ṭihnung ṭheu.

Thlipi

13 Thlang lam thli nemtei a hung hran tikah, an duhthusam hmungah zo ah an ruat. Cule an păwk ih, Khirit tikulh kapin an feh. 14 Asinan a rei hlanah, aZurokhalidon an ti mi thlisia cu, tikulh lam ihsin a rung thăwk ciamco. 15 Thlipi cun kan lăwng a run nuai ih, thli lakah hmai lam kan pan thei nawn lo ruangah lăwng cu kan thlah ih, thli cun in fehpi vivo. 16 Cule Kalauda an ti mi tikulh fate phenin kan tlan laiah harsa zetin vawkkuanglăwng cu kan hum. 17 Cuihhnu ah bvawkkuanglăwng cu lăwng kimvelah hridai in hnget zetin an ṭawn. Sirṭis vunnel pâwng rawtngah pang an phan ruangah, lăwng puanzar an ṭhum; cule thli in a fehpi vivo. 18 Cule thlipi in lăwng cu a hlăwn sukso tuk ruangah, a thaisun ah lăwng sungih phurhritpawl hlăwn an thăwk. 19 A ni thumnak ah kan kut rori in lăwng thilripawl kan hlăwn. 20 Ni tampi sung ni siseh, arsipawl siseh an lang lo ih, thlipi cu nasazetin a hrang ringring, luat dingih kan ruahsannak hmuahhmuah a hlo ṭheh.

27:14a Zurokhalidon: Grik ṭawng a si ih, nisuahnak thlang lam thli a si.

27:17b vawkkuanglăwng: Buainak an tawn tikih humhimawknak ding hrangih lăwngpi ih an phurh ṭheu mi lăwngte a si.

21 Rawl ei loin ni tampi an um hnuah, Paul cu an lakah a ding ih, «Ruallenuh, nannih in ka thusim rak ngaiin Khirit tikulh ihsin rak păwksuak lo nungla cu, hitivek siatralnak le hlohnak hi kan táwng lo ding. 22 Asinan atu ah cun thinhnangamten um dingin ka lo ngen hai a si, ziangahtile zo-ih nunnak hman a hlo lo ding, lăwng lawng kan hloh ding. 23 Ziangahtile i neitu le a rawng ka bawl mi Pathian-ih vancungmi cu mizan ah ka kiangah a ding ih, 24 ‹Paul, ṭih hlah, nangmah cu Kaisar hmaiah na ding ding; ngai hnik, nangmah thawi lăwng ih khual a tlawngtu hmuahhmuah ih nunnak cu Pathian in na hnenah a lo pe zo,› tiah i ti. 25 Curuangah pulenuh, hnangamten um uh, ziangahtile Pathian ka zum ih, i sim mi vek cekci in a cang taktak ding. 26 Sikhalsehla tikulh pakhat khat ah tang ko kan tlân tengteng ding a si,» tiah a ti.

27 A ni hleilitnak zan ah thli cun a suk a so ah Adria tifinriat ah cun in nuai ciamco, zanṭim hrawngah lăwng mâwngtupawl in khawmual kan naih thlang ding tiah an ruat. 28 Ti thûk lam an tah tikah, ti cu pi 120 a thûk ti an thei. Málte hladeuh an feh hnuah an tahsal ih, pi 90 a thûk ti an thei. 29 Cun lungpipawl kan sawh pang ding ti an phan ruangah, lăwng mei ihsin thirkâwnpi pali an thlak ih, khawvan ding dilin thla an cam. 30 Cule lăwng mâwngtupawl cu tlansuah an duh ih, lăwng hmai lam ihsin thirkâwnpipawl thla ding vekin an umawter ih, avawkkuanglăwng cu tifinriat sungah nuamteten an thlak. 31 Paul in ralkap 100 hotu le ralkappawl hnenah, «Hipawl hi lăwng sungih an um lo asile, nan luat thei lo ding,» tiah a ti. 32 Cun ralkappawl in vawkkuanglăwng hri cu an sâtcat ih an fĕnhloter.

27:30a vawkkuanglăwng: Câng 17 simfiangnak zoh aw.

33 Cule khua a van zik zawngah an zaten rawl ei dingin Paul in nasazetin a ngen hai, an hnenah, «Zianghman ei lo le rawl loih nan hngahnak a ni hleilitnak a si zo. 34 Curuangah rawl ei dingin ka lo fawrh a si. Harhdamnak ṭha nan neihnak dingah nan ṭul a si, ziangahtile nan lakah mi zohman in a lu ih a sám phang khat hman a hloh lo ding,» tiah a ti. 35 Cuih thupawl a sim hnuah, sang a lâk ih an zate hmaiah Pathian hnenah lungawi thu a sim. Cule a phel ih ei a thăwk. 36 Cumi cun an zaten an hna a ngamter ih, annih khal in rawl an ei ve. 37 Lăwng sungih um hmuahhmuah cu mi 276 kan si. 38 An ei khawp hnuah, lăwng zângter dingah sangvutpawl cu tifinriat sungah an hlăwn.

Lăwng Siatnak

39 Khua a van tikah, khui khawmual a si ti an thei lo; asinan tikĕl ih tikap lei an hmu ih, a cang thei asile, cutawk ih an lăwng mawnluh an tum. 40 Cule thirkâwnpipawl cu an sâtcat ih, tifinriat sungah an tān ta. Hri in an ṭawn mi lăwng hlaunak cu an phawih; cule lăwng hmai lam puanzar kha thli ih hrăn dingin an zar ih, tikap lam an pan. 41 Asinan tifinriat pahnih tawnawknak hmun ah kan thleng ih, lăwng cun lei a sawh, cule a hmai lam zum a dawtawhnget ih ṭhawn theih loin a um. Tisuar in a mei cu vuakparh a thăwk.

42 Thawngtlapawl kha ti leuhsuakin an tlân pang ding ti ralkappawl in an phan ruangah, thah an duh. 43 Asinan ralkap 100 hotupa in Paul humsuak a duh ruangah, an thil tum mi cu tuahsuak lo dingin a dawn hai. Tileuh theipawl cu ti sungih dawp hmaisa ih khawmual lamih leuh dingin thu a pe. 44 A tāng mipawl cu thingphengpawl simaw, lăwng kekkuai mi simaw toin suak dingin thu a pe. Cuticun an zaten khawmual ah himdamten an thleng.

28

Malṭa Tikulh Ah

1 Cun himdamten tikap an thlen tikah, cuih tikulh cu Malṭa tikulh a si ti an thei. 2 Cule barbaros-mipawl cun nasazetin kan parah ṭhatnak an langter; cuih cān ah ruah a sur ih a daih tuk ruangah annih cun meisa in tihsak ih ṭha zetin in cohlang. 3 Paul in zanthing tăwm khat a khawm ih, meisa ah a thlak, cule a săt ruangah rulngân a suak ih a kut a cuk. 4 Cutawk tikulh ih minungpawl cun a kut ih rul thlaiaw an hmuh tikah, pakhat le pakhat, «Hi pa cu laithat a si tengteng ding, tifinriat ihsin himdamten a suak ko nân, aDiknak cun nun sau a siang lo,» tiah an tiaw. 5 Asinan Paul in rul cu meisa sungah a thingthla ih amah cu a zianghman a pawi lo. 6 Sikhalsehla a thling ding ih hmakhatteah tlu-in a thi ding tiah an ruat. Asinan reipi an zoh hnuah, a parah thil dang zianghman a cang lo ti an hmuh tikah, an thinlung an thleng ih, «Hi pa hi pathian a si,» tiah an ti.

28:4a Diknak: Grik ṭawng in «Dike» a si ih, amah hi diknak khawzingnu a si tiih zumlotupawl ih an zum mi a si.

7 Cuih cān ah tikulh hotupa Publias an ti mi in cuih hmun kiangkapah lóram a nei, cu pa cun ni thum sung ṭha zetin in cohlang. 8 Cule hitin a si, cuih cān ah Publias-ih pa cu khawsik le santēn thi thawhin a na ih a it. Paul cu a hnenah a lut ih thla a camsak hnuah, a parah a kut a suang ih a damter. 9 Cutiih a tuah ruangah cuih tikulh ih um nathri nei hmuahhmuah an ra ih, annih cu damter an si. 10 Upatnak tampi in pek, lăwng in feh kan tum tikah, kan ṭul mi thil hmuahhmuah in pe.

Rom ah Paul a Thleng

11 Thla thum hnuah thlatang sung hmuahhmuah tikulh ih um, Alexander khua ihsi ra, hminsinnak dingih fapa phir zuk cuang mi lăwng in kan păwk. 12 Cule Sirakus khawpi ah kan cawl ih, cu tawkah ni thum sung kan câm. 13 Cutawk hmun ihsin suakin kan helkûal ih, Rezium khawpi kan thleng. Ni khat hnuah thlang lam thli a hrang ih, a ni hnihnak ah Puteoli khua kan thleng. 14 Cu tawkah unaupawl kan hmu ih, an hnenah ni sarih sung cām dingin in sawm. Cule Rom lam panin kan feh. 15 Rom ih unaupawl in kan thuhla an theih tikah, Appias bazaar khua le Khualbûk pathum khua tiang in hmuak dingin an ra. Paul in a hmuh hai tikah, Pathian hnenah a lung a awi ih a hna a ngam. 16 Rom kan thlen tikah, ralkap 100 hotupa in thawngtlapawl cu thawngtla kiltu hotubik hnenah a ap; asinan Paul cu amah kiltu ralkap pakhat thawn amah te lawng cêng dingin a siang.

Paul le Jew Hruaitupawl

17 Cule hitin a si, ni thum hnuah Paul in Jew-pawl lakih an hruaitupawl a kokhawm. Cutin an ratkhawm tikah an hnenah, «Pulepawl le unaupawl, kan mipi le kan pupápawlih nunphung kalhzawngin zianghman ka tuah lo, cuticingin Jew-pawl in Jerusalem ihsin Rom-mipawl hnenah thawngtla pakhat dinhmun in in ap. 18 Rom-mipawl in in zăwihliah tikah, thlah in duh, ziangruangahtile thihnaktlak sual ka tuah lo ti an hmu. 19 Asinan Jew-pawl in dokalhin an el tikah, lo theih loin Kaisar hnenah lu ka pu a si; ka mipipawl dokalhnak zianghman ka nei lo. 20 Curuangah nanmah lo hmuh le nan hnenih thu lo sim ka dilnak săn a si. Thir cikcin ih in ṭawnnak săn cu Israel-mipawlih ruahsannak ruangah a si,» tiah a ti.

21 Cun annih in a hnenah, «Nangmai thu thawn pehparin Judia peng ihsin cakuat zianghman kan ngah lo, cule cutawk ihsin a ra mi unaupawl lakih zohman in na thuhla zianghman an rel lo ih, na thuhla sia zianghman an rel fawn lo. 22 Asinan na ruahdān na hnen ihsin kan ngai a ṭha ding tiah kan ruat; ziangahtile hmun kip ah hipawlih thuhla dokalhnak rel a si ti kan thei,» tiah an ti.

Rom ih Paul Thusimnak

23 Cule ni an tĭn hnuah a riahnak hmun ah mi tampi an ra ih, zing ihsin zan lam tiang Pathian uknak thu cu an hnenah a simfiang ih, fimkhur zetin a theihter hai. Mosi-ih Dān cazual le Profetpawlih cazual sung ihsin Jesu-ih thuhla in hmĭn thei hai dingin a zuam. 24 Cule a sim mi thu cu mi hrek in an zum ih, mi hrek cun an zum lo. 25 Cun pakhat le pakhat an lung a rual lo, an ṭhenawk hlanah Paul in netabikah ṭawngkam pakhat a rel, «Thlarau Thianghlim in kan pupápawl hnenah profet Isaiah hmangin thu dik zetin a sim. 26 A sim mi thu cu,

‹Hih minungpawl hnenah va feh awla,
«Hna cun nan thei ding nân, nan theithiam lo ding.
A hmuh cu nan hmu ding nân, theihthiamnak thawn nan hmu lo ding.
27 Ziangahtile hih minungpawlih thinlung cu a cawlăwl,
Hnaset vekin an um ih an mit an sîng.
Culoasile an mit in an hmu ding ih, an hna in an thei pang ding,
Culoasile an thinlung in an theithiam ding, cule an hawikir ding ih,
Ka damter hai pang ding,» tiah sim aw,›

ti hi a si.

28 «Curuangah Zentelpawl hnenah Pathian rundamnak cu pek a si zo ti le cumi cu annih in an ngaithla ding ti kha thei uh!» tiah a ti. 29 Cule cuih thupawl a sim hnuah, Jew-pawl cu an fehhlo ih, anmah le anmah lakah nasazetin an relkhawm.

30 Cun Paul cu amai sān mi inn ah kum hnih khêng a um ih, a hnenih ratu hmuahhmuah a cohlang hai. 31 Ralṭha zet le khamtu zohman um loin, Pathian uknak thu phuang le Bawi Jesu Khrih thuhla zirhin a um ringring.