About Bible Thianghlim | ©

BibleThianghlim – 2 KORINTH

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

2 KORINTH

  • A ngantu: Paul
  • A siartu: Korinth Kawhhran
  • Ngan kum: A.D. 56

Paul in cakuat pakhatnak a ngan cān hi a missionary khualtlawn a vei thumnak ih Efesa khua ah hlawhtling zetih rawng a bawl laiah a si. Anih in Korinth khua tlawnsal thei a duh nân, Efesa khua ih hlawhtlinnak a hmuh ruangah cutawk ih cām hrih a tum nân (1Kor 16:5-9), Korinth kawhhran ah buaipi ṭul zet mi thubuai a um. A rawngbawlnak ah dokalhnak nasazet a um thu a hmusuak ih, Korinth khua ah zamrang zetin a feh (2Kor 2:1-2). Hih ṭum ahcun a tumtah mi a hlawhtling lo a bang. Cutawk ihsin a tlun hnuah thubuai tifel dingin Korinth khua ih va fehsal aiah (2Kor 1:23), ca a kuat sawn (2Kor 2:4, 9).

Paul cun cuih a cakuat cu Korinth khua ih zumtupawl in ziangti vekin an cohlang ding tiin a dawn a har zet. Troas khua ah Tita thawn an tawnawk tiktikah, cuih thu cu theih ding a beisei (2:12; Apo 20:1-2). Ziang thu ruangah simaw Tita kha Troas khua ah a ra lo. Curuangah Paul cu Masidonia lamah a feh (2:13; 7:5). Cu tawkah Tita a va táwng ih, Korinth khua ih zumtupawl in an lung thleng in, thulunnak lamih kir an duh thu a thei (7:6-16).

Korinth kawhhran ah thubuai a um lai thotho. Apostol dēupawl in nasazetin Paul-ih rawngbawlnak an dokalh (11:13-15). Cupawl cun Korinth khua ih zumtupawlih thinlung an neh (11:19-20; 12:11, 20-21). Korinth cakuat a pahnihnak hi amah le a rawngbawlnak humhimnak hrangah, Korinth ih thubuai dangpawl rĕm dingah le rawngbawlnak dik sawhhnget dingah A.D. 56 hrawngah Paul ih a ngan mi a si.

Korinth cakuat pahnihnak hi ṭhen thum ih ṭhen theih a si. Bung 1-7 ah Paul in a rawngbawlnak humhimin Pathian siahhlawh diktakih rawngbawldān thu a simfiang. Bung 8-9 ah Zentel kawhhranpawl in Jerusalem ih zumtu mifarahpawl hrangih sum an khawn thu a sim. Bung 10-13 ah cun a doralpawlih dokalhnak thupawl Paul in a sâng. Apostol dik a sizia a simfiang ih, Khrih hrangih a tuarnak thu tla a sim. Pathian siahhlawh cu a cahlobik cān ah a nun ah Pathian huham a langfiangbik ṭheu ti thu a simfiang. Paul in a cakuat kharnak ah a thu thlun dingah thu hngetkhoh a pe. Korinth khua ih zumtupawl in a thu an hnáwng a si ahcun, an hnenah va feh tahratin, rorum zetih an thubuai tifel a tum thu a sim.

Pathian zangfahnak hi a haidaih ih, «Ka cah lo tikah ka cak ṭheu» (12:10), ti bangin kan cahlonak ah a cahnak a famkimter (12:9) a si.

Thuhlawm Ṭhen

  • I. Thuhmaihruai (1:1-11)
  • II. Paul in a rawngbawlnak a hum ih, Pathian siahhlawh diktak thuhla a zirh (1:12-7:16)
  • III. Paul in Jerusalem ih mithiangpawl hrang Zentel kawhhranpawl hnen ihsi sum khawn thu a rel (bung 8-9)
  • IV. Paul a humaw ih, doralpawl ih hēknak a sawn (10:1-13:10)
  • V. Thukharnak (13:11-14)

1

Cibaibûknak

1 Pathian duhzawngih Jesu Khrih-ih apostol, Paul le kan unaupa Timothy in Korinth khua ih Pathian kawhhran le Akaia peng pumpi ih mithiangpawl hmuahhmuah hnenah:

2 Pathian kan Pa le Bawi Jesu Khrih hnen ihsin zangfahnak le hnangamdaihnak nan hnenah um hram seh.

Lamzin Phun Zakipih Thlangămtu Pathian

3 Kan Bawipa Jesu Khrih-ih Pa a si mi Pathian, zahngainakih Pa le lamzin phun zakip ih in thlangămtu Pathian cu thangṭhatin um seh. 4 Pathian ih in thlangămnak in buainak phun zakip a tuartupawl kan thlangăm ve theinak dingah, anih cun kan buainak hmuahhmuah ah in thlangăm ṭheu. 5 Ziangahtile Khrih-ih tuarnak cu kanmah ih a luanliam vekin, Khrih zarah kan thlangamnak khal a luangliam a si. 6 Zăwnzaihnak kan neih asile, cucu nan thlangamnak le nan runsuahnak hrangah a si. Cumi cun kan tuar mi vek harsatnak tuar theinak a lo pe thei a si. Asilole Pathian in in thlangăm asile, cumi khal cu nanmai thlangamnak le rundamnak hrangah a si. 7 Cule tuarnakpawl ih tel vetu nan si ih, thlangamnak khalih tel vetu nan si ti kan theih ruangah, kan ruahsannak cu a hnget a si.

8 Ziangahtile u le nau tla, Asia peng ih kan parih a thleng mi kan buainak kha thei loih nan um ding kan duh lo; kha tiin kan phurh thei lo ding mi phurrit nasazet kan parah rung thlengin, cumi ruangah nun ding hman ruahsan lo tiangin kan um a si. 9 A si, kanmah le kanmah rinsanaw loin, mithi kaithotu Pathian kan rinsan sawn theinak dingah, thi dingih thuṭhensak mi vekin kan um. 10 Cuih Pathian cun khavek thihnak rapthlak ihsin in runsuak zo, atu khalah in run; in runsuak leh ding tiah amah cu kan rinsan. 11 Thilpek ruangah mi tampi in kanmai ruangah thangṭhatnak an pek theinak dingah, nannih khal in kan hrangah thlacamnak in in rak bawmkhawm a si.

Paul in a Khawkhan cia mi a Thleng

12 Ziangahtile kan tluangkhawndān cu hitin a si: milai fimnak si loin, Pathian zangfahnak ruang sawn ih nundān tluangtlamte le Pathian ṭihnak nun dik zetih hi leitlun ih kan nun ṭheu kha, kan sia le ṭha theihnak in in theihpi ih, nannih lak sinsin ah cun cutivekin kan um sinsin a si kha. 13 Ziangahtile nan siar mi le nan theihthiam mi siarlo thil dang zianghman nan hnenah kan ngan lo. A cemnet tiang khal ziangkim nan theihthiam thluh ka zum. 14 Cutivekin nannih cun ziangmaw zât cu in rak theithiam zo, Bawi Jesu-ih Ni ah kannih cu nan tluangkhawnnak kan si bangin, nannih khal kan tluangkhawnnak nan si ding ka beisei.

15 Cucu ka theihfiang ruangah a vei hnihnak hlawknak nan neih theinak dingah nan hnenih rat hmaisak ka rak tum. 16 Masidonia peng ka tlawn zawngah ka lo tlawng phah ding ih, Masidonia ihsin nan hnenah ka kirsal ding tiah ka rak tum. Cule nannih in Judia peng ah in thlah uhla tiah ka rak ruat. 17 Curuangah himi ka tumtah tikah, awlsám tukin ka ti pang maw? Asilole ka tumtah mi thilpawl hi milai tidān vek menih tumin, keimah ah a si, a si tithul, a si lo, a si lo tithul dualdo ka si maw? 18 Asinan Pathian cu mirinum a si vekin, nan hnenih kan ṭawngkam hi, a si tithul, a si lo tithul, dualdo a si lo.

19 Ziangahtile Pathian Fapa, Jesu Khrih thu cu Silas le Timothy le kei in nan hnenah kan rak phuang. Cumi ruangah amai thuhla kan sim mi cu a si tithul, a si lo tithul dualdo si loin, amah ah cun, a si, ti lawng hi a si ringring. 20 Ziangahtile Pathian thutiamkam hmuahhmuah hi amah ah cun, ‹A si,› ti a si thluh. Kanmah ruangah Pathian cawimawiih a um theinak dingah amah ah cun, ‹Amen,› ti a si. 21 Nannih le kannih Khrih ih in hngettertu le hriak in thihtu cu Pathian a si. 22 Anih cun tacik in khĕn ih, kan thinlung sungah amahkhānnak ah Thlarau in rak pe.

23 Cuihtlunah ka lo ānhaiterlonak dingah a si, Korinth ih ka ratsal nawn lo, ka sim mi a dik a si ti ka nunnak ih i theihpitu cu Pathian a si. 24 Nan zumnak parah bawi vekih lo uk kan duh lo, cuhnakin nan aipuan theinak dingah kannih cu nan hnaṭuanpi kan si sawn; ziangahtile nannih cu zumnak in nan dinghnget a si.

2

1 Asinan thinna cing cun nan hnen ra lo tlawngsal nawn lo dingin thu ka ruatcat zo. 2 Ziangahtile nan thin ka lo natter asile, zo in so ka lung i awiter ding? Thin ka natter mi nanmahpawl thotho kha ka lung i awitertu ding nan si lo maw? 3 Cule nan hnen ka ra thlen tikah ka ai i puangtertupawl in ka riah in siatterlonak dingah hitin ka ngan a si, ka aipuannak cu nan zateih aipuannak a si tiah zumhngehnak ka nei. 4 Ziangahtile zawnzai zet le thinlung ānhai zetin nan hnenah mitthli tampi thawn ca ka ngan, nan thinnatnak dingah a si lo, cuhnakin ka lo duhdawt zet ti nan theihnak dingah a si sawn.

Sual Tuahtu hrangih Ngaidamnak

5 Asinan mi pakhat in thinnatnak a suahter asile, keimah lawng ka thin in nater a si lo ih, nan zaten tawkfang cu nan thin a lo nater a si; ka ti luarkai tuk lonak dingah málte lawng ka rel a si. 6 Cuvek mi hrangah cun mi tampi ih cawhkuan an pek mi hi a tawk a si. 7 Cu pa cu ngaidam le thlangamter sawn ding nan si, culole nasazetih thinnatnak in cu pa cu a dawlh pang ding. 8 Curuangah amah nan duhdawtnak kha nĕmhnget dingin ka lo ngen a si. 9 Cumi ruangah nan hnenah thil ziang tinkim ah thu nan ngai le ngai lo ka lo hniksak theinak dingah ca ka rak ngan. 10 Ziang thil khalih mi nan ngaidam mi cu, kei khal in ka ngaidam ve. Ziangahtile ziang thil khal ka rak ngaidam asile, ka ngaidam mi pa cu, nanmah ruangah Khrih hmaiah ka ngaidam a si. 11 Culoasile Setan in kan hnen ihsin remcānnak a ngah pang ding, ziangahtile a khawkhandān cu thei lo kan si lo.

Khrih ah Nehnak

12 Thu dangah, Troas khawpi ih Khrih thuthangṭha phuang dingih ka feh tikah Bawipa in ka hrangah sângka a áwng ti ka hmu. 13 Cu tawkah ka unaupa Tita ka hmuh lo ruangah ka thinlung a cawlhahdam thei lo. Cule an hnenah damten tiah ka ti hai ih, Masidonia lamah ka rak feh sawn.

14 Khrih ah nehnak ih in hruai ringring tu le kanmah hmangih hmun zakip ih amah theihnak rimhmui vekih hmuitertu Pathian hnenah lungawi thu um hram seh.

15 Ziangahtile kannih cu rundam lai rero mipawl hnenah le a hlorál lai rero mipawl hnenah Pathian hrangah Khrih rimhmui kan si. 16 Mi hrekkhat hnenah cun thihnak dingih thihnak rim kan si ih, mi hrekkhat hnenah cun nunnak dingih nunnak rim kan si. Cuih thilpawl hrangah zo so tling? 17 Ziangahtile mi tampi in sumpai hlawknak hrangih Pathian kamsuakthu an hman vekin, kannih cun kan hmang ve lo; cuhnakin thungaithlakin Pathian hnenih mi vekin Pathian mithmuhah Khrih ruangah thu kan sim sawn a si.

3

Thukham Thar Rawngbawltu

1 Mah le mah fakawk kan thăwksal maw? Asilole mi dang in nan hnenih pek ding mi faknak capawl simaw, nanmah hnen ihsin faknak capawl an ṭul vekin kan ṭul ve maw si? 2 Nannih cu kan thinlung sungih ngan mi kan cakuat nan si, mi kip in cuih ca cu an thei ih an siar. 3 Nannih cu kan rawngbawlnak, Khrih-ih cakuat, cati thawi ngan mi si lo, a nung mi Pathian Thlarau thawi ngan mi sawn, lungphengpawl parih ngan mi si lo, milai thinlung par sawnih ngan mi nan si ti fiang zetih lăngter a si.

4 Cutivek zumhngehnak cu Khrih zarah Pathian lamah kan nei a si. 5 Kannih cu thil zianghman kanmah ihsin a suak tiih ruataw dingin kan tlak tiah ka ti lo, Pathian lawng hi kan haidaihnak a si sawn. 6 Pathian cun thukham thar rawngbawltu tling ah in tuah. Cangan mi rawng kan bawl lo, cuhnakin Thlarau rawng kan bawl sawn a si; ziangahtile cangan mi cun mi a that, asinan Thlarau cun nunnak a pe.

7 Mosi hmel lăngdān a ropit ruangah Israel-mipawl cun a hmel an zoh ringring thei lo, cuih ropitnak cu a hlorál vivo. Sikhalsehla thihnak thlentu rawngbawlnak, lungpheng parih kherih ngan mi hman a ropit a si ahcun, 8 Thlarau rawngbawlnak cu ziangtluk ropi sinsin so a si pei? 9 Ziangahtile thiamlo mi cotertu rawngbawlnak hman a ropit a si ahcun, dingfelnak thlentu rawngbawlnak cu nasa sinsinin a ropi ding. 10 Ziangahtile thiamlo mi cotertu rawngbawlnak cu Pathian in ropi ko a rak tuah zo. Sikhalsehla dingfelnak thlentu rawngbawlnak ih ropitnak cu a nasat tuk ruangah thiamlo mi cotertu rawngbawlnakih ropitnak cu zianghmanlo ah a cang. 11 Ziangahtile a hlorál mi hman a ropit a si ahcun, a hmun ringring mi cu a ropi nasa sinsin a si.

12 Cuvek ruahsannak kan neih ruangah, ralṭha zetin thu kan sim a si. 13 Cumi cu Mosi ih a rak tuah mi vek a si lo, anih cun Israel-mipawl in a hlorál cuahco mi ropitnak kha a cemnet tiang an zoh ringring lonak dingah puan in a hmai a khuh. 14 Asinan an lungthin mit a caw. Ziangahtile hmaikhuhnak cu Khrih ah lakhloh a si zo nân, tuihni tiangin thukham hlun an siar tikah cuih hmaikhuhnak cu a um lai thotho. 15 Asinan tuihni tiangin Mosi cazual an siar tikah, khuhnak cun an thinlung a khuh lai thotho. 16 Cutisikhalsehla, mi pakhat cu Bawipa lam a hawi tikah, khuhnak cu lakhlohsak a si ding. 17 Bawipa cu Thlarau a si ih, cuih Bawipaih Thlarau umnak ah zalĕnnak a um. 18 Sikhalsehla kannih cu kan zaten hmai khuh loin, thlalang sungih hmuhawk vekin Bawipaih ropitnak kan hmu. Bawipaih Thlarau zarah ropitnak ihsin ropit sinsinnak ah, amah băngnak ah tidanglamin kan um lai rero a si.

4

Thuthangṭha Tleu

1 Curuangah zahngainak kan rak co vekin hi rawngbawlnak hi kan co ruangah, kan bei a dawng lo. 2 Cuhnakin ningzakza thilthuppawl cu kan bansan, hrăwkhrawlin kan um lo, Pathian kamsuakthu khal mi bumnak ah kan hmang lo ih, thutak cu fiang zetin kan sim sawn a si, cuticun Pathian mithmuhah, mi kip ih sia le ṭha theihnak ah kanmah le kanmah kan áwngaw thluh sawn a si. 3 Asinan kan thuthangṭha hi khuhih a um a si ahcun, a hlorál rero mi hnenah a si khuhih a um ding. 4 Khrih thuthangṭha ropiih tleu in anmah a tlet theilonak dingah, hi khawvel pathian in zumlotupawlih lungthin mit cu a câwtter, Khrih cu Pathian băngpi a si. 5 Ziangahtile kannih cu kanmai thuhla kan phuang lo. Khrih Jesu Bawi a si thu le Jesu ruangah kannih cu nanmai siahhlawh kan si thu kan phuang sawn. 6 Ziangahtile Pathian in thim lak ihsin tleu cu êng dingin thu a pe. Cuih Pathian cu Jesu Khrih hmel ih Pathian ropitnak theihnak ihsi a ra mi tleu pe dingah kan thinlung sungah a rung êng.

Leibel sungih Hlawnthil

7 Asinan huham nasazet cu kanmah ihsi suak si loin, Pathian hnen ihsi suak a si sawn ti langter dingin cuih hlawnthil cu leibel sungah kan nei a si. 8 Kil i kip ihsin palbĕt kan si, asinan palbêk cu kan si lo; mangbangvansangin kan um, asinan kan bei a dawng lo; 9 tiduhdahin kan um, asinan thlauthlak kan si lo; hlăwnthlukin kan um, asinan kan thi lo. 10 Jesu-ih nunnak kha kan taksaruangpum ih a lăng theinak dingah, Bawi Jesu-ih thihnak cu kan taksaruangpum in kan phur ringring. 11 Ziangahtile Jesu-ih nunnak cu a thi thei mi kan taksa ih a lăng theinak dingah, Jesu ruangah kannih a nungdampawl hi thi dingih hlăn kan si ringring. 12 Curuangah thihnak cun kanmah ah a ṭuan ih, nunnak cun nanmah ah a ṭuan.

13 Cule, «Ka zum, curuangah ka sim,» tiih ngan bangtukin, kannih khal cuvek zumnak thinlung kan neih ruangah kan zum ve, curuangah kan sim a si. 14 Bawi Jesu a thotertu cun Jesu zarah kannih khal in thoter ding ih, nanmah thawn a hnenah in hlan ding ti kan thei. 15 Ziangahtile mi tam sinsin hnenih a thleng mi zangfahnak cun Pathian ropitnak ah lungawi thu simnak luangliam a suahternak dingah hi thil hmuahhmuah hi nanmai hlawknak ding hrangah a si.

16 Curuangah kan bei a dawng lo. Kan leng lam minung cu ṭumsuk vivo hmansehla, kan sung lam minung cu ni khat hnu ni khat tharter vivo a si. 17 Ziangahtile rei lo te sung hrang lawng a si mi, zăwnzaihnak kan tuar mipawl tete hin ropitnak nasazet kumkhaw hrangah in tuahsak nasa deuhdeuh a si. 18 Hmuh thei mi thilpawl kan zoh lo ih, hmuh thei lo mi thilpawl kan zoh sawn. Ziangahtile hmuh thei mi thilpawl cu a langte sung um mi an si ih, hmuh thei lo mi thilpawl cu kumkhua a hmun mi an si.

5

Van ih kan Umnak Hmun

1 Ziangahtile kan lei inn, hih puanthlam hi siatrál hmansehla van ah kut ih sak lo mi inn, Pathian hnen ihsin, kumkhuaih um ding mi kan nei a si ti kan thei. 2 Ziangahtile van ih kan inn thawi thăwmawk ding duhnak nasazet neiin, hi lei inn ah hin kan aihram ṭheu a si. 3 Cutiih thăwm kan si taktak ahcun taklawngih hmuh kan si lo ding. 4 Ziangahtile hi puanthlam ah hin phurrit phurin kan aihram ṭheu a si. Thăwm loih um kan duh ruangah si loin, nunnak in thihnak cu a dawlh thluh theinak dingah thăwmih kan um ding kan duh ruangah a si sawn. 5 Cumi hrangih in timtuahtu cu amah Pathian a si, anih cun amahkhānnak hrangah Thlarau khal in pe.

6 Curuangah hi taksaruangpum ih kan um sung cu Bawipa hnenah kan um lo ti theiin ngaihngam zetin kan um. 7 Ziangahtile hmuh mi in feh loin, zumnak in kan feh a si. 8 Ngaihngam zetin kan um, a si, taksaruangpum ah um loin Bawipa hnenih um kan duhsawn.

Khrih Tokham Thuṭhennak

9 Curuangah kannih cun kan umnak lei ih kan um ah simaw, um lo ah simaw, amah lungawiter kan tum a si. 10 Ziangahtile kan zaten Khrih thuṭhennak tokham hmaiah kan lang leh tengteng ding, mi kip in an taksaruangpum ih an rak tuah mi a sia siseh, a ṭha siseh an tuah mi vekin an co ding.

Remawknak Rawngbawlnak

11 Bawipa ṭihzah cu ziang a si ti kan theih ruangah mi kan lēm ṭheu. Asinan Pathian cun in theifiang tuk ih, nan sia le ṭha theihnak khal in in theihfiang zet ka zum. 12 Ziangahtile kan relmawiaw lehsal si loin, thinlung ih um mi ruangah si loin a lăngdān menih tluangkhâwngpawl nan sanlet theinak dingah, kanmah in tluangkhawnpinak canremcâng kan lo pe a si sawn. 13 Ziangahtile kan mumallo asile, Pathian hrangah a si ih, kan lung a fim asile, nanmai hrangah a si. 14 Ziangahtile Khrih duhdawtnak cun in tur a si, hitin thu kan ṭhencat: mi hmuahhmuah hrangih mi pakhat a thi a si ahcun, mi hmuahhmuah cu an thi a si; 15 cule a nung mipawl cu anmai hrangah nung nawn loin, an hrangih thitu le thosaltu hrangih an nun sawn theinak dingah anih cu mi hmuahhmuah hrangah a thi a si.

16 Cuti a si ruangah atu thăwkin taksa lam dān in mi zohman kan thei nawn lo. A liam cia mi cān ah Khrih cu taksa lam dān in rak thei zo hman nungla, atu thăwk ihsi cun cutivek zawng cun kan thei nawn lo. 17 Curuangah mi zokhal Khrih ih a um ah cun, sersiam thar a si; thil hlunpawl cu an hlorál ih, ngai hnik, thil hmuahhmuah cu a thar ah an cang. 18 Cule thil ziangkim hi Pathian hnen ihsin an si, anih cun Jesu Khrih zarah amah thawn in remawter zo ih, kan hnenah remawknak rawngbawlhna in rak pe. 19 Cumi cu Khrih ah Pathian in leitlun hi amah thawn a remawter ih, an mawhsualnakpawl cu anmai mawhsualnak ah a siarsak lo, cule cuih remawknak thu cu kan hnenah in ap a si.

20 Curuangah kannih cu Khrih hrangih palai kan si. Pathian in kanmah hmangih a lo ngĕn bangtukin, Khrih aiawhin Pathian thawn rem aw uh, tiah kan lo ngen a si. 21 Ziangahtile Khrih ah Pathian dingfelnak kan si theinak dingah sual a theih ih thei lo cu kan hrangah sual ah a tuah.

6

Rawngbawlnak Hminsinnakpawl

1 Cule kannih, amai hnaṭuanpipawl in Pathian zangfahnak cu zianghmanlo men hrangih nan cohlanlonak dingah kan lo ngen a si. 2 Ziangahtile anih in,

«Cohlan tikcu ah ka rak lo ngaithla ih,
Rundamnak ni ah ka rak lo run,»

tiah a ti.

Ngai hnik, atu hi cohlan tikcu a si, ngai hnik, atu hi rundamnak ni a si.

3 Mi in kan rawngbawlnak an sawisellonak dingah, mi tlûknak ding thil zianghman kan tuah hrimhrim lo. 4 Cuhnakin ziang tinkim ah Pathian rawngbawltu kan sizia kan langter sawn a si. Tuarfainak in siseh, harsatnak in siseh, tlaksămnak in siseh, vansannak in siseh, 5 vuaknak in siseh, thawngtlaknak in siseh, buainak in siseh, ṭuanbăngnak in siseh, it loih kilvennak in siseh, rawlulhnak in siseh, 6 thianhlimnak in siseh, theihnak in siseh, thinsaunak in siseh, ngilneihnak in siseh, Thlarau Thianghlim in siseh, a der si lo duhdawtnak taktakin siseh, 7 thutak kamsuakthu in siseh, Pathian huham in siseh, vawrh lam le keh lamih dingfelnak hriamhrei in siseh, 8 upatnak le nautatnak in siseh, relsiatnak le relṭhatnak in siseh, midik si siin mibumtupawl vekin, 9 theih zet mi si siin, mi ih theih lo mi vekin; thi cuahco vekin, ngai hnik, kan nung fawn si, nunsim mi vek si siin, thah cu si si loin, 10 riahsia vek si siin, asinan aipuang ringring tho siin, mifarah vek si siin, mi tampi liantertu si tho siin, zianghman nei lo vek si si, ziangkim nei thotho siin, hipawl hmuahhmuah ah hin Pathian rawngbawltu kan sizia kan langter ṭheu.

Thianghlim Uh

11 Maw nannih Korinth mipawl! Nan hnenah tlăng zetin kan rak ṭawng, nan hrangah kan thinlung khal kau zetin kan rak áwng a si. 12 Kannih in kan lo phit lo, nanmai pumpi hmangin phih nan si sawn. 13 In lehrulhnak dingah nannih khal kanmah lamah kau zetin áwng aw uh, fale hnenih thusim vekin ka lo sim a si.

Pathian Nung Temple

14 Zumlotupawl thawn a bangrep lo mi hngawngkol bâttlang hlah uh. Ziangahtile dingfelnak le dān loih nunnak in ziang ṭawmawknak so an neih? Tleu le thim in ziang pawlkawmawknak so an neih? 15 Cule Khrih le aBelial in teh ziang lungrualnak so an neih? Asilole a zumtu in a zumlotu thawn cotlang mi thil ziangso an neih? 16 Cule Pathian nung temple le milempawl in ziang lungrualnak so an neih? Ziangahtile nannih cu a nung mi Pathian temple nan si. Cumi cu Pathian in,

6:15a Belial: Setan relnak ih hman a si ih, a sullam cu santlaihnak zianghman nei lo, mihlothlau tinak a si.

«An lakah ka cêng ding ih,
An lakah ka tlanglêng ding.
An Pathian ka si ding ih,
Annih cu ka mi an si ding,»

tiah a ti mi vek khan a si.

17 Curuangah Bawipa in,

«An lak ihsin suak uhla, thiarfihlim aw uh.
A thianglo mi thil thâm hlah uh,
Cule ka lo cohlang ding,»

tiah a ti.

18 «Kei cu nan hrangah Pa ka si ding ih,
Nannih cu ka hrangah fanupawl le fapapawl nan si ding,»

tiah Ziangkimtithei Bawipa in a ti.

7

1 Curuangah, duhdawt mitla, thutiamkampawl kan neih ruangah taksa le thlarau bawrhhlawhtertu hmuahhmuah lak ihsin thianfai aw uhsi, Pathian ṭihzahnak kan neih bangin kan thianhlimnak cu famkimter uhsi.

Paul-ih Lungawinak

2 In cohlang uh. Zo hnen hmanah thilsual kan tuah lo, zohman kan siatsuah lo ih, zohman kan bum lo. 3 Cumi cu nanmah thiamlo lo coternak ah ka sim a si lo; ziangahtile thih le thihtlâng, nun le nungtlâng dingin kan thinlung sungah nan um ti thu, hi hlanah ka rak lo sim zo. 4 Nanmah hnenih ṭawng ding cu nasazetin ka ral a ṭha. Nanmah ruangih ka tluangkhawnzia hi a nasa a si. Hnangamnak in ka khat ih, kan harsatnak hmuahhmuah ah ka aipuannak a khatliam.

5 Ziangahtile thungaiten Masidonia peng kan thlen tikah kan taksa in cawlhhahdam cān a nei lo, kil i kip in buainak in pe. Leng lamah sualawknakpawl an um ih, sung lamah ṭihphannakpawl an um. 6 Sikhalsehla dinhmun niampawl thlangămtu, Pathian in Tita-ih ratnak in in thlangăm a si. 7 Cule Tita-ih ratnak in in thlangăm lawng si loin, amah nan rak thlangămnak ruang khalah a sibet. Anih in keimah hmuh nan hiarzia, nan thinnatzia, in humzia pawl in rak sim; curuangah ka aipuannak a nasa sinsin.

8 Ziangahtile ka ca lo kuat mi khan nan riah ka lo seter, cuih thu ah rak siraw zo khal ningla, atu ah cun ka siraw lo. Ziangahtile khaih ca ka lo kuat mi khan nan riah a lo seter nân, cān tawite sung lawng a si ti ka thei. 9 Atu ah ka ai a puang a si, nan riah a siat ruangah si loin, nan riahsiatnak in lungthlengnak ih a lo hruai ruangah a si sawn. Ziangahtile kanmai ruangah zianghman nan hlohlonak dingah, Pathian duhdān vekin riahsiatter nan si. 10 Ziangahtile Pathian hnen ihsi a ra mi riahsiatnak cun rundamnak ih hruaitu lungthlengnak a suakter, cumi cu pawi ti ding um loin a si. Asinan leitlun ihsi a ra mi riahsiatnak cun thihnak a thlĕn. 11 Ziangahtile ngai hnik uh, cuvek thil cu nan hnenah a rak thleng a si. Pathian hnen ihsi ra mi riahsiatnak cun nanmah ah thil ṭha tuah dingih taimaknak siseh, mah le mah humhimawk duhnak siseh, sual parih aithawknak siseh, ṭihnak siseh, thil ṭha tuah hiar duahdonak siseh, humhim duhnak le sual cawhkuanpeknak pawl a suah. Hi thu ah cun thil ziangkim ah nannih cu nan thiang a si ti nanmah le nanmah nan langfiangawter zo. 12 Curuangah nan hnenah ca ka rak ngan ko nân, cumi cu thilsual tuahtupaih ṭhatnak dingah simaw, thil a tisualnak paih ṭhatnak ding hrang simaw a si lo. Cuhnakin Pathian mithmuhih kan lo ngaihsaknak nan hnenih a lăng theinak dingah a si sawn.

Tita-ih Aipuannak

13 Curuangah nan hnangamnak ah kan hna a ngam. Cule nan zaten a thlarau tha thar nan rak pek ruangah, Tita-ih lungawiaipuannak ah kan aipuannak a nasa sinsin. 14 Ziangahtile a hnenah nanmai thu ih ziang thil khalih tluang ka khawn a si khalle ka ning a zak lo. Asinan nan hnenah thil ziangkim dik zetih kan lo sim zo bangin, Tita hnenih kan tluangkhawnnak khal a dik a si ti a lang. 15 Cule nan zateih thu nan lunzia, ṭih le khūr phah cingih amah nan cohlanzia pawl, Tita in a hngilh lo ih nanmah a lo ngainatnak cu a nasa sinsin. 16 Thil ziangkim ah nanmah ah lo rinsan ngamnak ka neih ruangah lungawiaipuangin ka um.

8

Siang zetih Pe dingih Thapeknak

1 Cuihtlunah u le nau tla, Masidonia peng ih kawhhranpawl Pathian in a zangfahnak a pek kha nan theih ding kan duh. 2 Annih cu zăwnzaihnak in hniksaknak nasazet an táwng ko nân, nasazetin an ai a puang. An rethei zet ko na cingin lian zet vekin tam zet an rak pe. 3 Ziangah cutin ka ti tile an tithei tawkin an pe ti ka theihpi hai a si. Anmai palungsuak rori in an tithei tawk lan tiangin pek an duh. 4 Mithiangpawl hrangih an thawhhlawm cohlang dingin le mithiangpawl rĕnnak ah tel ve dingin nasazetin in ngen. 5 Cumi cu kan beisei lo zawng piin an rak tuah, Bawipa hnenah anmah le anmah an rak peaw hmaisasawn ih, kanmai hnen khalah Pathian duhdān vekin anmah le anmah an rak peaw. 6 Cutin nan thawhhlawm kha Tita in a taw a rak thawh zo vekin, nan thawhhlawm khawnkhawm mi kha anih in a ṭheh lawlaw nak dingah, amah cu nasazetin kan rak ngen. 7 Asinan nannih cu ziangkim ah, zumnak ah siseh, thusim ah siseh, theihnak ah siseh, taimaknak hmuahhmuah ah siseh, kanmah in duhdawtdān ah siseh nan khatliam a si. Curuangah khaih thawhhlawm khalah khan khatliam uh.

8 Thupek zawngin ka lo sim a si lo, mi dangpawlih taimaknak thawn khaikhinin nan duhdawtnak takzia ka hniksak sawn a si. 9 Ziangahtile kan Bawipa Jesu Khrih-ih zangfahnak nan thei, anih cu milian a si ko na cingin, nanmai ruangah mifarah ah a cang; cutiih a retheihnak cu milian nan si theinak ding hrangah a si.

10 Cule himi thu ah thurawn ka lo pe a si: ziangahtile hihi nan hrangah hlawknak a si, kan dung kum ah nannih cu a pe hmaisabiktu nan si lawng si loin, pek a duh hmaisabiktu khal nan si. 11 Atu ah pesuak taktak ve thlang sawn uh, pek câknak a rak um zo bangin, nan neih mi hmangin pesuak uh. 12 Ziangahtile duhnak lungthin a um hmaisak asile, mi in a neih lo mi si loin, a neihdān izirin a pek mi cu Pathian in a cohlansak a si.

13 Ziangahtile mi dangpawl cu zângkhaiin, nannih phurrit uhci ka tinak a si lo. 14 Cuhnakin thil ziangkim bangrān ding ka duh sawn a si. Atu ah nan neih liam cun an tlaksămnak a silhkhahsak ding ih, annihih neih liam cun nan tlaksămnak a lo silhkhahsak ve ding, cutin thil ziangkim a bangrān thei ding. 15 Cumi cu, «Tampi a sartu in a hlei a nei cuang lo ih, málte a sartu khal a tlasam cuang lo,» tiih ngan vek khan a si.

Korinth ah Paul in Tita a Thlah

16 Asinan nanmah ka lo ngaihsaknak vek, Tita thinlung sungih rettu Pathian hnenah lungawi thu um seh. 17 Ziangahtile anih cun kan ngĕnnak cu a cohlang ngaingai ih, ngaihsaknak thinlung khal a nei betsin, amai duhhrilnak rori in nan hnenah a ra. 18 Cule thuthangṭha rawng a bawlnak ah kawhhran hmuahhmuah ih an lăwm mi, unaupa pakhat amai zawngah kan rak thlah. 19 Culawng si loin, kawhhranpawl in an thawhhlawm thawn amah cu kan hnenih tlâwng ve dingin an hril. Mi dang băwm nan paihzia theihter ding le Bawipa amah rori a sunlawi theinak dingah, cuih thawhhlawm cu kan fingkhawi a si. 20 Hi a tam zet mi thawhhlawm kan fingkhawinak thu ah mi ih sawisel hrial kan duh. 21 Bawipaih mithmuh lawngah si loin, milai mithmuh khalah thildik tuah kan duh a si.

22 Cule cute pahnih zawngah kan unaupa pakhat cu kan rak thlah ve, amah cu a phunphun in kan hniksak hnuah mitaima zet a si ti kan thei. Amah cu nanmah lo rinsannak nasazet a neih ruangah atu ah cun a taima sinsin. 23 Mi pakhat khat in Tita thuhla an suh asile, amah cu ka hnaṭuanpi a si. Nanmah lakih keimah thawi hnaṭuan a si. Asilole kan unaupawl thuhla an suh asile, annih cu kawhhranpawlih palai le Khrih-ih ropitnak an si. 24 Curuangah an hnenah le kawhhranpawl hmaika-ah nan duhdawt hai ti lăngternak le nanmai ruangih kan tluangkhawnnak săn hmuh hai uh.

9

1 Cule mithiangpawl rawngbawlsaknak thuhla ah nan hnenih ca ka ngan a ṭul hrimhrim lo. 2 Ziangahtile rĕn ding nan hiarzia ka thei ih, cumi ruangah Masidonia peng mipawl hnenah, «Akaia peng mipawl cu kan dung kum khat lai ihsin an tiar cia zo,» tiah ka lo tluangkhawnpi zăwk rero. Ṭhahnem nan ngainak cun mi tampi a rak căwktho. 3 Sikhalsehla himi thuhla ih kan rak lo tluangkhawnpinak cu a lak men a silonak dingah le, «Rak tiar cia uh,» tiih ka rak lo cah vekih nan tiar cianak dingah nan hnenah unaupawl hi ka rak thlah a si. 4 Cuti a si lo ahcun, Masidonia peng mipawl keimai zawngih an rat pang ih timlamaw hrih loih an lo hmuh pang asile, nannih si loin, kanmah sawn hi lo rinsan zetih kan lo tluangkhawnpinak ah hin kan ning a zak ding. 5 Curuangah nan rak tiamkam cia mi, nan sian zet mi thawhhlawm cu, timlam cia si dingin unaupawl cu nan hnenah a hlankhanin ra dingin fawrh ṭulin ka ruat. Culawngah nan thawhhlawm cu hnekcawpih pek mi si loin, siang zetih pek mi a si thei ding.

Tampi Vawrh

6 Asinan málte a tuhtu cun málte a at ding ih, tampi a tuhtu cun tampi a at ve ding ti hi ka sim a si. 7 Mi kip in ui cingin le pek lo theih lo a si ti ruat khal in pe loin, an thinlung ih an ṭhencat vekin pe ciar hai seh; ziangahtile Pathian in lungawi zetih petu a duhdaw a si. 8 Cule nannih in ziang tinkim ah haidaih tawk zet nei camcinin le hnaṭuan ṭha tinkim nan ṭuansuak theinak dingah, Pathian cun zangfahnak hmuahhmuah nan parah a lo vur thei a si. 9 Cumi cu,

«Anih cun a rak zemdarh ih,
Mifarahpawl hnenah a rak pe;
A dingfelnak cu kumkhuain a hmun,»

tiih ngan vek khan a si.

10 Thlaici tuhtu hnenih thlaici petu le rawl hrangih sang lo petu cun nan tuh mi thlaici cu karhterin, nan dingfelnak rahpawl cu ṭhangter hram seh. 11 Siang zetih nan pek theinak dingah ziang tinkim ah Pathian in a lo lĕnter laiah, cumi in Pathian hnenah lungawi thu sim ko in tuah.

12 Ziangahtile hi săwmdawlawknak nan rawngbawlnak hin mithiangpawlih tlaksămnak a silhkhahsak lawng si loin, mi tampi Pathian hnenih lungawi thu tampi simnak khalah a cang. 13 Hi rawngbawlnak hin Khrih-ih thuthangṭha cu nan lung ih, cuih thuthangṭha ah nan tlukluhzia le an hrang le mi hmuahhmuah hrangih siang zetih tampi nan zemsuah ṭheuzia a langfiangter ruangah Pathian an thangṭhat a si. 14 Cule nan parih Pathian zangfahnak luangliam ruangah nan hrangih thla an cam tikah, lo hmuh ding an duh zet a si. 15 Ṭawngkam ih sim theih lo a thilpek ruangah Pathian hnenah lungawi thu um seh.

10

Paul in a Rawngbawlnak a Hum

1 Nan hmaika-ih zâmih um, nan hnen um lo tikih nanmah lamih ralṭha zet pa, keimah, Paul in Khrih nunnemnak le zaidamnak in ka lo ngen hai a si. 2 Nan hnen ka um tikah, minung nundān ih nung ih i ruattupawl dokalhin rinsanawknak thawn ralṭha zetih um ka tum, cutivekih ralṭhat ka ṭullonak dingah ka lo ngen a si. 3 Ziangahtile kannih cu taksa in kan nung ko nân, tisa dān in kan do ve lo. 4 Ziangahtile raldonak ih kan hman mi hriamhreipawl cu milai hriamhrei an si lo, ralhruangkulhpawl ṭhiatbălnak dingah Pathian zarih thiltitheinak hriamhrei a si sawn. 5 Cuih hriamhrei in elnakpawl siseh, Pathian theihnak dokalhih mah te khaisângaw mi thil sâng pauhpauh siseh kan ṭhiatbăl ih, khawruahnak kip in Khrih thulunnak sál ah kan hruai a si. 6 Nan thulunnak a famkim tikah thulunlonak hmuahhmuah cawhkuan pe dingin kan tiar a si.

7 Leng lam lăngdān lawng nan zoh ṭheu a si lo maw? Mi pakhat khat in Khrih ta si rori ih zumhngehnak a neihawk asile, amah cu Khrih ta a si vekin kannih khal Khrih ta kan si ve ti ruatkirsal seh. 8 Ziangah cutin ka ti tile nanmah lo siatsuahnak dingah si loin, nanmah lo tuahṭhatnak ding sawnah Bawipa in thuneihnak in rak pek mi hi tluangkhawnpi deuh hlek hman ningla ka ning a zak lo. 9 Ka cakuat mipawl hmangin lo ṭhihṭhaih tum vekih ka lănglonak dingah a si. 10 Ziangahtile annih in, «A cakuatpawl cu an khohkhah zet ih hmual an nei zet, asinan amah ngaingai a um tikah cun a taksa cu a ṭawnṭai ih, a thusim khal zianghman a si lo,» tiah an ti. 11 Cuvek mi cun hihi ruat seh, nan hnenih kan um lo laiih cakuatpawl hmangih kan sim bangin, nan hnenih kan um tik khalah a taktakin kan si ding.

12 Ziangahtile mah le mah relmawiawpawl lakah kan siartelaw ngam lo ih, anmahpawl thawn kan khaikhinaw ngam fawn lo. Asinan annih cu anmah lakah an tahaw ih an khaikhinawk tikah, fimnak an nei lo. 13 Sikhalsehla kannih cun Pathian in kan ṭuannak ding bial in zĕm mi siarlo cu tluangkhawnpi loin, Pathian in kan hnenih in zĕm mi hnaṭuannak ramri ih a huap mi sung lawngah kan tluangkhâwng sawn ding, cuih ramri cu nan hnen tiangin a huap. 14 Ziangahtile nannih tiang kan run lo bial hi kan bial băn lopi run bial kan si lo, ziangahtile Khrih thuthangṭha thawn nan hnen tiang kan ra thleng a si. 15 Ramri lanin, cumi cu mi dangih hnaṭuan mi ah kan tluangkhâwng lo, cuhnakin, nan zumnak a ṭhan tikah Pathian in nanmah hmangin nan lakah kan hnaṭuannak cu nasazetin a kauter ding ti hi kan ruahsan sawn. 16 Cucu bial dangih mi dangpawlih hnaṭuan cia mi ih kan tluangkhawnlonak dingah le nan umnak ralkhat lam tiangih thuthangṭha kan sim theinak dingah a si.

17 Sikhalsehla, «Tluang a khawngtu cun Bawipa ah tluangkhâwng seh.» 18 Ziangahtile amah le amah a relmawiawtu cu pawm a si lo, Bawipa ih a relmawi mi lawng pawm a si.

11

Paul le Apostol Diklopawl

1 Â zetih ka ṭawng tikah málte tal in rak zāwi thei uhla ka va duh ve! A zāwi khal in zāwi taktak. 2 Ziangahtile Pathian thîknak thawn ka lo thîk hai a si. Ziangahtile nannih cu Khrih hnenah a thianghlim mi fala him vekih ka lo hlăn theinak dingah pasal pakhat hrangah ka lo ham zo. 3 Asinan rul in a hrăwkhrawlnak in Evi a bum bangin, Khrih ih nan taknak ihsin nan lungthin a bawrhhlawhter pang ding ti ka phâng. 4 Ziangahtile kan phuan mi si lo Jesu dang thu phuang nan hnenah an ra ding ih, nan co dah lo mi thlarau nan co ding ih, nan rak cohlan zo mi si lo thuthangṭha dang kha a ṭha tiin nan cohlang pang ding ti ka phâng! 5 Ziangahtile apostol thupibikpawl hnakin fate hman ka niam ce cuang lo tiin ka ruat. 6 Thusimthiam lo khal ningla, theihnak ah cun cuvek ka si lo. Thil ziangkim ah cipciar zetin nan lakah kannih cu lăngter zo kan si sawn a si kha.

7 Khaisan nan si theinak dingah keimah le keimah hnuaidawrawterin nan hnenah man la loin, Pathian thuthangṭha ka phuan ruangah thilsual ka tuah maw si? 8 Nanmah ka lo rĕn theinak dingah kawhhran dangpawl ka suam ih, an hnen ihsin hlawhman ka la. 9 Cule nan hnenih ka rak um laiah, ka tlaksăm tikah zo hrang hmanah phurrit ka si lo, ziangahtile ka tlaksăm mi cu Masidonia peng ihsi a ra mi unaupawl in in silhkhahsak ṭheh. Nan hrangah phurrit ka silonak dingah thil ziangkim ah keimah le keimah ka rak kilaw. Cutivekin ka kilawpeh vivo ding. 10 Khrih-ih thutak keimah ih a um vekin, Akaia rampawl ah hitiih ka tluangkhawnnak hi zohman in in kham thei lo ding. 11 Ziangahso? Ka lo duhdawt hai lo ruangah maw si? Pathian in a thei!

12 Mi hrekkhat cu kanmah bangih an lăng theinak dingah an tluangkhâwng, tluangkhawnnak cān remcâng duhtupawl hnen ihsin cān remcâng cu ka sahcatsak hainak dingah, ka tuah mi hi ka tuahpeh vivo sawn ding. 13 Ziangahtile cuvek mipawl cu anmah le anmah Khrih-ih apostol ah an tuahawcawp ih, apostol dēu le mibumhmang hnaṭuantu an si. 14 Mangbang ding a um lo! Ziangahtile Setan amah rori hman tleu vancungmi vekah a tuahaw. 15 Curuangah a siahhlawhpawl khal dingfelnak siahhlawh vekih an tuahawk tikah, thilmak a si lo, an cemnetnak ding cu anmai hnaṭuan mi vekin a si ding.

Paul in a Tuarnakpawl a Sim

16 Ka simsal a si, zohman in mi-â ah in ruat hlah hai seh, cutivekih in ruah ceng asile, málte tal ka tluangkhawn thei venak dingah mi-â cohlan vekin i cohlang uh. 17 Hitiih ka ṭawng mi hi Bawipaih thupek ih ka ṭawng mi a si lo, mah le mah rinawknak thawi ka tluangkhawn tikah, mi-â vekih ṭawng ka si sawn. 18 Mi tampi cu taksa dān in an tluangkhâwng, curuangah kei khal ka tluangkhâwng ve ding. 19 Ziangahtile nannih cu mifim nan si ruangah, mi-âpawl cu lungawi zetin nan zawi. 20 Ziangahtile mi pakhat in sál ah a lo hruai ah siseh, a lo eiral thluh ah siseh, nan neih mi thil a lo laksak ah siseh, amah le amah a khaisanawk ah siseh, nan hmai a lo beng ah siseh lungawi zetin nan zāwi a si. 21 A hlanah cak lo vekih kan rak lăng thuhla a rel ka ning a zak. Sihmansehla zo vek khalih an ngăm mi cu, mi-â bangin sim men sehla, kei khal in ka ngăm a si.

22 Annih cu Hebru-mi an si maw? Kei khal ka si ve. Israel-mi an si maw? Kei khal ka si ve. Abraham cithlah an si maw? Kei khal ka si ve. 23 Khrih rawngbawltu an si maw? Â zetin ṭawng men sehla, kei cu annih hnakin ka si sinsin. Annih hnakin ka ṭuanbāng sawn, siar cawk lo vuaknak, annih hnakih thawngtlak leuhleuhnak, vei tampi thi zikteih umnak tuartu ka si. 24 Vei 39 vuaknak kha Jew-pawl hnen ihsin ṭum nga ka tuar. 25 Fungfek in vei thum vuak ka si, vei khat lungto ih dēn ka si; lăwng siatnak vei thum ka táwng, ni khat le zan khat sung tifinriat parah ka rak um. 26 Atu le atu khual ka tlâwng, tivapawl ah ṭihphannak, suamhmangpawl hnen ihsin ṭihphannak, ka mipawl hnen ihsin ṭihphannak, Zentelpawl hnen ihsin ṭihphannak, khawpi sungih ṭihphannak, ramṭhing ih ṭihphannak, tifinriat ih ṭihphannak, unau dēupawl hnen ihsin ṭihphannak pawl ka rak táwng. 27 Bang zet ko hnaṭuannak le nasazetih hnaṭuannak siseh, atu le atu it loih kilawknak, rilrawn le tihālnak, atu le atu rawl loih umnak, khawsik le hnipuan loih umnak pawl ka rak tuar. 28 Hibang a leng lam thilpawl hleiah, kawhhranpawl hmuahhmuah ka ngaihtuahnak in ni tin i nĕn. 29 Micaklopawl cah lopi loin ka um dah maw? Mi an tlûk tikah aithawk loin ka um dah maw?

30 Ka tluangkhâwng ding ceng asile, ka cahlonak lam thilpawl hi a si ka tluangkhawnpi sawn ding. 31 Pathian le kan Bawipa Jesu Khrih-ih Pa, kumkhuaih thangṭhat ding mi cun, thuphan ka per lo ti a thei. 32 Damaskas khawpi ah Siangpahrang Areṭas hnuaiih ram uktu khan kaih i duh ruangah, Damaskas khawpi cu a kilter. 33 Asinan an hauhruang kulh mi tukvirh ihsin kho in in ṭhum ih, a kut ihsin ka tlânsuak.

12

Paul-ih Larnak a Hmuh Mi le Pathian in a hnenih a Pek Mi Hling

1 Tluangkhawn hi ka hrangah hlawknak a um lo ti cu rinhlelh ding a um lo. Bawipaih larawknakpawl le a phuanawknakpawl cu ka hun rel hnik pei: 2 Khrih ah mi pakhat ka thei, kan dung kum hleili laiah khan cu pa cu van thumnak ah laksohin a um. Cu pa cu taksaruangpum thawn a si maw, taksaruangpum tel loin a si maw ka thei lo, Pathian in a thei. 3 Cule ka theih mi pa cu taksaruangpum thawn a si maw, taksaruangpum tel loin a si maw ka thei lo, Pathian in a thei. 4 Cu pa cu Paradise ah laksohin a um, cule minung ih simsuah thianglo mi, relsuah theih lo kamsuakthupawl a rak thei. 5 Cuvek mi cu ka tluangkhawnpi ding; sikhalsehla keimah ah cun ka ṭawnṭaihnak siarlo, tluang ka khâwng lo ding. 6 Ziangahtile tluangkhawn duh khal ningla mi-â ka si lo ding; ziangahtile thudik ka sim ding a si. Asinan ka sūpaw ding, culole mi in keimah ih an hmuh vek hnak le ka hnen ihsi an theih mi hnakih sâng ah in ruat pang ding.

7 Cule ka hnenih thuphuansuah mi a ropit tuk ruangih keimah le keimah ka khaisanawklonak dingah, ka titsa ah hling pek ka si, cuih hling cu kutthak i hnawttu Setan palai a si, culole sâng tukah ka retaw pang ding. 8 Cuih hling cun i suahsan dingin, Bawipa hnenah vei thum ka rak dil. 9 Cule Bawipa in ka hnenah, «Ka zangfahnak hi na hrangah a tawk, ziangahtile ka cahnak cu cahlonak ah hin famkim ko tuah a si,» tiah i ti. Curuangah Khrih huham cu ka parih a um ringring theinak dingah ka ṭawnṭaihnakpawl ah hin lungawi zetin tluang ka khâwng sawn ding. 10 Curuangah Khrih ruangah ṭawnṭaihnakpawl ah siseh, mawhthluknakpawl ah siseh, tlaksămnakpawl ah siseh, tiduhdahnakpawl ah siseh, vansannakpawl ah siseh ka lung a hmui a si. Ziangahtile ka cah lo tikah ka cak ṭheu a si.

Paul in Korinth Zumtupawl a Ngaihtuah

11 Kei cu nanmah ih lo theih loih in năwrnak ruangah tluangkhawnnak ah mi-â ah ka cang. Ziangahtile kei cu nanmah ih relmawi zo ding mi ka si, ziangahtile keimah cu zianghmanlote si hman ningla apostol mithupi zetpawl hnakin ka tenau ce lo. 12 Thungaiten Apostol sinak hminsinnakpawl cu nan lakah thinsau ringring ten, hminsinnakpawl, mangbangzapawl le huham ih tuah mi thilpawl tla tuahsuak an si. 13 Ziangahtile keimah rori hi nan hrangih phurrit ka silonak siarlo ziang lam talah kawhhran dangpawl hnakih nan niam cenak a um maw? Himi ka tisualnak ah hin i ngaidam uh!

14 Ngai hnik uh, nan hnen ra tlawng dingih vei thum ka tiarnak a si. Nan thil neih mi hawl ka si lo ih, nanmah lo hawl ka si sawn ruangah nan hrangah phurrit ka si lo ding; ziangahtile falepawl in nu le pa hrangah thil an khawlsak ding a si lo ih, nu le pa in fale hrangah an khawlsak sawn ding a si. 15 Cule kei ih ka lo duhdawtnak cu a tam sinsin ih, nannih ih in duhdawtnak cu mál deuhdeuh khal sehla, kei cun nan nunnak hrangah lungawi zetin ziangkhal ka hmang ding, cule keimah le keimah khal ka hmangrálaw thluh ding. 16 Asinan sumpai thu ah nan phur ka lo ritter lo. Cuticingin mihrăwkhrawl ka si ruangah bumnak hmangin ka rak lo kaingah a si! 17 Nan hnenih ka rak thlah mi pakhat khat hmangin nan hnen ihsin hlawknak lâk mi ka nei maw? 18 Nan hnenih va feh dingin Tita ka rak ngen ih, amah thawn unaupa pakhat ka rak thlah. Tita cun nan hnen ihsin hlawknak ziang tal a la maw si? Kannih cu thinlung bangrepin kan nungtlang lo maw si? Zin bangrep zawhtlang kan si lo maw si?

19 Nan hmaiah kanmah le kanmah humaw rero ah in rak ruatbêt a si maw? Khrih ah Pathian hmaika-ah kan ṭawng a si, duhdawt mitla, kan tuah mi hmuahhmuah hi nan ṭhatnak dingah a si sawn. 20 Ziangahtile cuti a si lo ahcun, nan hnenih ka rat tikah ka beisei vekin ka lo hmu lo ding ih, nannih khal in nan beisei vekin in hmu lo pang ding. Cuti asilole nan lakah tawhawknak siseh, iksiknak siseh, thinlingnak siseh, ṭhenṭhekawknak siseh, relsiatawknak siseh, mi thuhla rel thekthonak siseh, hngalnak siseh, hnăwkbuainak siseh a um pang ding. 21 Cuti a si lo ahcun, ka ratsal tikah ka Pathian in nanmai ruangah hnuai i dawrter pang ding ih, hi hlan ihsi sual a tuahtupawl, bawrhhlawhnak le nunau-mipa sualnak, fihnungza hursualtuahnak pawl ihsin lung a thleng lo mi, mi tampi cu ka ṭah hai pang ding ti ka phâng.

13

Nunsimnak Netabik

1 Hihi nan hnenih ka rat a vei thumnak a si ding. «Theihpitu pahnih simaw, pathum simaw ih kâ ihsin ṭawngkam kip cu hngehter a si ding.» 2 A hlanah ka rak lo sim zo kha, nan hnenih a vei hnihnak um vekin ka lo sim cia, atu nan hnenah um lo khal ningla, hi hlanih thilsual a rak tuah zotupawl le mi dang zate hnenah ca ka ngan a si, ka ratsal a si ahcun, anmahpawl cu ka zuah hai lo ding. 3 Nanmah lamah cak lo si loin, thiltithei zet sawn a si mi Khrih cu keimah hmangin a ṭawng taktak maw, ṭawng taktak lo ti theihfiangnak nan hawl ruangah ka zuah hai lo ding. 4 Ziangahtile Khrih cu cak loin khĕnbet si hman sehla, Pathian huham in a nung a si. Cutivek thothoin, kannih khal amah ah kan cak lo nân, amah thawn Pathian huham in nanmah lamah kan nung ding a si.

5 Zumnak ah nan um maw um lo ti nanmah le nanmah cek aw uh. Nanmah le nanmah hniksak aw uh. Tling lo nan si lo ah cun, Jesu Khrih cu nan sungah a um ti nan thei lo maw? 6 Asinan kannih cu tling lo kan si lo ti nan thei ding tiah ka zum. 7 Thil ṭhalo nan tuahlonak dingah Pathian hnenah thla ka cam. Cutiih thla ka camnak săn cu kannih hi Pathian ih pawm mi kan sizia langter dingah si loin, nanmah in thil zahum nan tuahsuaknak ding hrangah a si sawn. Tling lo vekin lang khal nungla cutivekin thla ka cam a si. 8 Ziangahtile kannih cun thutak ṭan ding lo cun, thutak dokalh ding zawngin zianghman kan tuah thei lo. 9 Ziangahtile kannih kan cah lo laiih nannih nan cah tikah kan lung a awi. Cule famkimih tuah nan si theinak ding hrang khalah thla kan cam. 10 Curuangah siatsuahnak dingah si loin, tuahṭhatnak ding hrang sawnih Bawipa in ka hnenih thuneihnak i pek dān izirin nan hnenih ka um tikah, cuih thuneihnak hmangin nā tukih nun ka lo simlonak dingah nan hnenih ka um lo laiah hi thilpawl hi ka ngan a si.

Cibaibûknak Netabik

11 Netabikah u le nau tla, damten. Nanmah le nanmah famkimawter uhla, nanmah le nanmah thape aw uh; lungthin hmunkhat pu uhla, remawten um uh. Cule duhdawtnak le remnak Pathian cun a lo umpi ding.

12 Hnămawknak thianghlim thawn pakhat le pakhat cibaibûk aw uh.

13 Mithiangpawl hmuahhmuah in cibai an lo bûk.

14 Bawi Jesu Khrih zangfahnak, Pathian duhdawtnak le Thlarau Thianghlim pawlkawmnak cu nan zate hnenah um hram seh. Amen.